1. Nama pemutus ti penting ke patut digaga semua orang?

 KEMAYAHARITU semua orang patut ngaga pemutus ti penting. Kati sida nyukung Petara Jehovah ke nyadi pemerintah ba alam semesta? Tauka nyukung munsuh Petara, iya nya Sitan? Semua orang patut milih sekalika deka nyukung Jehovah tauka Sitan. Lalu sida enda ulih madahka diri enggai nyukung sapa-sapa. Pemutus sida deka nentuka sida bulih pengidup ti meruan belama iya tauka enda. (Mat. 25:31-33, 46) Lebuh “penusah ti besai,” nembiak Petara ti tetap ati deka nerima tanda ngambika ulih selamat. (Pem. 7:14; Esk. 9:4, 6) Tang sida ke nerima tanda ari jelu nya deka dipunaska.—Pem. 14:9-11.

2. (a) Hebrew 10:35-39 meransang kitai ngereja nama? (b) Baka ni bup Pemandang ulih nulung kitai?

² Bacha Hebrew 10:35-39. Enti nuan nyukung perintah Jehovah, nuan udah ngaga pemutus ti manah. Diatu, nuan pan deka nulung orang bukai ngaga pemutus ti betul. Nuan ulih ngena penerang ari bup Pemandang kena nulung sida. Bup Pemandang madahka nama deka nyadi ngagai sida ke ngelaban Jehovah, lalu baka ni Jehovah deka merekatka sida ke nyukung Iya. Nya alai, kitai patut belajarka penemu ti beguna tu. Enggau ngereja tu, kitai deka keran agi nyembah Jehovah. Kitai mega ulih ngena utai ke dipelajar kena nulung  orang bukai ngambika ngaga pemutus deka nyembah Jehovah lalu terus ngereja nya.

3. Nama deka dipejuraika kitai ba artikel tu?

³ Ba artikel tu, kitai deka nyaut dua iti tanya: (1) nama deka nyadi ngagai sida ke nyukung Perintah Petara? (2) nama deka nyadi ngagai sida ke nyukung jelu ke mirah-redam ke dipadah ba bup Pemandang?

4. Nama raban ke dipeda rasul John enggau Jesus ba serega?

⁴ Ba genera ke dipeda rasul John, bisi dua iti raban orang ke nyukung Perintah Jehovah sereta nerima berekat pengidup belama iya. Raban keterubah nya bisi 144,000 iku orang. (Pem. 7:4) Sida tu orang ke dipilih ari dunya kena numbuhka siti Perintah enggau Jesus ba serega. Sida deka merintah dunya begulai enggau Jesus. (Pem. 5:9, 10; 14:3, 4) Ba genera nya, John meda sida sama bediri enggau Jesus ba Bukit Sion di serega. Bukit Sion tu ngambarka alai Jesus nyadi Raja ba Perintah Petara di serega.—Pem. 14:1.

5. Nama deka nyadi ngagai sida ke dipilih ke serega ke agi bisi ba dunya?

⁵ Kenyau ari jeman bala rasul nyentukka diatu, beribu iku orang udah dipilih nyadi sebagi ari raban 144,000 iku nya. (Luk. 12:32; Rom. 8:17) John madahka, semina mimit aja orang ke dipilih ngagai serega agi bisi ba dunya ba hari ti penudi tu. Sebedau penusah ti besai berengkah, sida ke dipilih tang agi tinggal ba dunya deka nerima “chop tambit” ari Jehovah ke nunjukka sida diterima Iya. (Pem. 7:2, 3; 12:17) Enda lama pengudah penusah ti besai berengkah, sida tu deka niki ke serega magang. Ba serega, sida deka begulai enggau raban sida ke bisi dalam 144,000 iku nya, ke udah mati enggau tetap ati. Lalu sida deka enggau Jesus merintah ba Perintah Petara.—Mat. 24:31; Pem. 5:9, 10.

6-7. (a) Nama raban ke dipeda John pengudah nya, lalu nama ulih dipelajar kitai pasal sida? (b) Nama kebuah orang ke dipilih ke serega enggau bala ‘orang mayuh’ nganti Pemandang bagi 7 dikeamatka?

⁶ Pengudah meda seraban orang ke dipilih ke serega, John meda seraban ‘orang mayuh.’ Raban ‘orang mayuh’ tu enda sebaka enggau raban 144,000 iku nya. Tu ketegal, penyampau orang ba raban nya enda ulih diitung. (Pem. 7:9, 10) Nama ulih dipelajar kitai pasal sida? Ku Jesus madahka John: “Tu meh bala orang ke udah pansut ari penusah ti besai. Sida udah masu baju panjai sida, lalu ngaga baju nya burak ngena darah Anak Domba.” (Pem. 7:14) Raban ‘orang mayuh’ tu selamat ari penusah ti besai. Sida deka idup ba dunya belama iya lalu nerima mayuh berekat.—Mas. 37:9-11, 27-29; J-lam. 2:21, 22; Pem. 7:16, 17.

⁷ Enda ngira sekalika kitai dipilih ke serega tauka idup ba dunya, kati kitai pechaya utai ke ditulis ba Pemandang bagi 7 deka dikeamatka? Kitai enda tau enda pechayaka nya. Lebuh utai ke ditulis ba Pemandang bagi 7 dikeamatka, nya siti maya ti amat ngerinduka ati ngagai dua iti raban ke disebut tadi. Maya nya, kitai tentu gaga ati laban udah milih nyukung perintah Jehovah. Tang nama utai bukai ke disebut ba bup Pemandang pasal penusah ti besai?—Mat. 24:21.

8. Baka ni penusah ti besai deka berengkah, lalu baka ni gaya orang lebuh nya nyadi?

⁸ Baka ke dipadah ba artikel sebedau tu, enda lama da agi kuasa politik deka nyerang Babilon ti Besai, iya nya gerempung pengarap pelesu serata dunya. (Pem. 17:16, 17) Tu  nunjukka penusah ti besai udah berengkah. Kati penusah ti besai tu ngasuh orang ngaga pemutus deka nyembah Jehovah? Enda. Bup Pemandang bagi 6 nunjukka utai ke deka nyadi ba maya ti tusah nya. Politik enggau pengawa dagang ke disebut ba bup Pemandang bagi 6, disemaka enggau bukit. Nya alai, orang ke enda nyembah Jehovah deka minta jaga ari sida. Ketegal sida enda nyukung Perintah Petara, Jehovah ngumbai sida orang ke ngelaban.—Luk. 11:23; Pem. 6:15-17.

9. Baka ni nembiak Jehovah bebida ari orang bukai lebuh penusah ti besai, lalu nama pengujung iya?

⁹ Nembiak Jehovah ke tetap ati bebida ari orang bukai lebuh penusah ti besai. Semina sida raban ke nyembah Jehovah ba dunya tu, lalu sida enggai nyukung “jelu nya.” (Pem. 13:14-17) Penetap ati nembiak Jehovah deka ngasuh orang ke ngelaban balat ringat. Pengujung iya, orang ari bemacham-macham bansa deka begempung enggau bala pemerintah nyerang nembiak Jehovah di serata dunya. Bup Kudus madah, serang tu dikumbai serang ari Gok ari Magok.—Esk. 38:14-16.

10. Nitihka Pemandang 19:19-21, nama deka digaga Jehovah lebuh nembiak Iya diserang bala munsuh?

¹⁰ Nama deka digaga Jehovah lebuh nembiak Iya diserang munsuh? Ku Jehovah madahka: “Aku deka pedis ati.” (Esk. 38:18, 21-23) Pemandang bagi 19 madahka utai ti deka nyadi pengudah nya. Jehovah deka nganjung Anak Iya kena ngelindung nembiak Iya sereta ngalahka bala munsuh. “Bala soldadu serega,” iya nya bala melikat ke tetap ati enggau raban 144,000 iku nya deka sama enggau Jesus beperang ngelaban Gok ari Magok. (Pem. 17:14; 19:11-15) Nama deka nyadi pengudah perang nya? Semua orang sereta gerempung mensia ke ngelaban Jehovah deka dipunaska belama iya!—Bacha Pemandang 19:19-21.

11. Nama utai ti pemadu penting ke deka nyadi ke bisi dipadah ba bup Pemandang?

¹¹ Perundingka asai ati orang ke tetap ati ba dunya lebuh sida selamat pengudah Petara munaska bala munsuh Iya! Maya nya tentu ngagaka ati! Taja pan sida ba serega gaga ati lebuh Babilon ti Besai dipunaska, tang bisi utai bukai ke ngasuh sida gaga agi ati. (Pem. 19:1-3) Tu meh begian ti pemadu penting ba bup Pemandang iya nya, “tikah Anak Domba.”—Pem. 19:6-9.

12. Nitihka Pemandang 21:1, 2, kemaya tikah Anak Domba deka nyadi?

¹² Kemaya tikah nya deka nyadi? Semua sida ke 144,000 iku nya deka niki ke serega sebedau perang Armagedon. Tang, nya ukai maya tikah Anak Domba. (Bacha Pemandang 21:1, 2.) Tikah Anak Domba nyadi pengudah perang Armagedon, lebuh semua munsuh Petara udah dipunaska.—Mas. 45:3, 4, 13-17.

13. Nama deka nyadi lebuh tikah Anak Domba?

¹³ Nama deka nyadi lebuh tikah Anak Domba? Baka tikah ke nampilka lelaki enggau indu, tikah Anak Domba mega nyerakupka Jesus enggau 144,000 iku nya. Ba bup Pemandang, sida ke 144,000 iku nya dikumbai pengantin indu. Pengudah tikah nya, sida ke 144,000 iku nya deka enggau Jesus merintah dunya pengelama 1,000 taun.—Pem. 20:6.

14-15. Bup Pemandang bagi 21 nyemaka 144,000 iku orang enggau nama? (Peda gambar ba mua majalah.)

¹⁴ Pemandang bagi 21 nyemaka 144,000 iku orang enggau nengeri ti amat manah ke dikumbai ‘Jerusalem ti Baru.’ (Pem. 21:2, 9) Nengeri nya bisi 12 igi batu pemun ke bisi  dituliska “nama dua belas iku rasul Anak Domba.” Nama kebuah tu ngerinduka ati John? Laban bisi nama iya ditulis ba siti ari batu nya. Naka meh pemesai basa tu ba John!—Pem. 21:10-14; Eps. 2:20.

¹⁵ Nengeri tu enda sebaka enggau nama-nama nengeri ti bukai. Jalai raya di nengeri nya digaga ari emas ti tulin. Lalu 12 iti pintu nya digaga ari 12 igi batu mutiara. Batu pemun ke dinding nengeri nya diias ngena semua macham batu ti berega. Pia mega, nengeri nya besegi empat. (Pem. 21:15-21) Tang, John meda bisi utai ti nadai dia! Peratika utai ke dipadahka John: ‘Aku nadai meda Rumah Sembiang dalam nengeri nya, laban Petara ti Pemadu Bekuasa Empu enggau Anak Domba nyadika Rumah Sembiang dalam nengeri nya. Lalu nengeri nya enda begunaka mata hari tauka bulan manchar ngagai iya, laban mulia Petara manchar ngagai iya, lalu Anak Domba nyadika lampu iya.’ (Pem. 21:22, 23) Sida ke bisi begian enggau Jerusalem ti Baru ulih begulai enggau Jehovah. (Heb. 7:27; Pem. 22:3, 4) Nya alai, Jehovah enggau Jesus deka nyadi Rumah Sembiang ba nengeri nya.

16. Nama deka nyadi ngagai mensia lebuh Seribu Taun Kristus Merintah?

¹⁶ Sida ke dipilih ke serega gagit ati lebuh berundingka Jerusalem ti Baru. Tang sida ke bisi peluang idup ba dunya mega patut nemu pasal nengeri nya, laban bisi kaul enggau sida. Lebuh Seribu Taun Kristus Merintah, Jerusalem ti Baru deka mai mayuh berekat ngagai mensia. John nyemaka semua berekat tu baka “sungai ai pengidup.” Ba tebing sungai nya ari sepiak-sepiak bisi “kayu pengidup” ke bisi daun kayu “dikena ngeraika bansa.” (Pem. 22:1, 2) Maya nya, semua mensia deka bulih penguntung ari semua utai ke disediaka Jerusalem ti Baru. Semua mensia ke ngasika Jehovah deka belubah-lubah nyadi sempurna. Maya nya nadai agi sakit, nadai agi pedis sereta nadai agi nyabak.—Pem. 21:3-5.

17. Nitihka Pemandang 20:11-13, sapa ke deka bulih penguntung ari Seribu Taun Kristus Merintah?

¹⁷ Sapa ke deka nerima penguntung ari Seribu Taun Kristus Merintah? Keterubah, orang ke selamat ari perang Armagedon enggau bala anak ke deka ada ba dunya baru. Tang Pemandang bagi 20 bisi semaya  ti madahka, sida ke mati deka diangkatka idup baru. (Bacha Pemandang 20:11-13.) “Orang ke lurus” enggau sida ke “enda lurus” deka diangkatka idup baru. Sida ke enda lurus tu, sida ke nadai peluang belajar pasal Jehovah. (SKR. 24:15; Jhn. 5:28, 29) Tang kati semua orang deka diangkatka idup baru lebuh Seribu Taun Kristus Merintah? Enda. Orang ke jai ti nulak peluang belajar pasal Jehovah lebuh sida agi idup suba enda diangkatka idup baru. Sida kala bisi peluang nya lalu sida nunjukka diri enda layak nerima pengidup ti meruan belama iya ba Paradais.—Mat. 25:46; 2 Tes. 1:9; Pem. 17:8; 20:15.

18. Nama deka nyadi ngagai orang ba dunya ba pengujung 1,000 taun nya?

¹⁸ Ba pengujung 1,000 taun nya, semua mensia ba dunya nyadi sempurna. Nadai orang deka merinsa ketegal dosa ti datai ari Adam. (Rom. 5:12) Semua penyai ke nyadi ketegal dosa Adam deka dipunaska. Nya alai, reti iya semua orang ba dunya deka ‘diangkatka ari mati,’ laban sida deka nyadi sempurna ba pengujung 1,000 taun nya.—Pem. 20:5.

19. Nama kebuah penguji ti penudi nya enda tau enda dipejalaika?

¹⁹ Kitai nemu, Jesus mengkang tetap ati ngagai Petara taja pan Sitan nguji iya. Tang kati semua mensia ti sempurna deka tetap ati lebuh Sitan nguji sida? Tiap iku orang bisi peluang nunjukka penetap ati ngagai Jehovah lebuh Sitan dilepaska ari lubang ti amat dalam, ba pengujung 1,000 taun nya. (Pem. 20:7) Sida ke mengkang tetap ati pengudah penguji ti penudi deka nerima pengidup ti meruan belama iya lalu dilepaska ari dosa. (Rom. 8:21) Orang ke ngelaban Jehovah deka dipunaska. Sida tu deka dirusak enggau Sitan sereta bala melikat ti jai.—Pem. 20:8-10.

20. Nama asai ati nuan pasal jaku benabi ba bup Pemandang?

²⁰ Nama asai ati nuan pengudah ngelansa bup Pemandang? Kati nuan gagit ati ngambarka diri bisi kaul enggau jaku benabi tu? Kati tu meransang nuan ransing agi deka mai orang sama nyembah Jehovah? (Pem. 22:17) Kitai udah berandauka utai ke deka nyadi jemah ila. Kitai gagit ati lalu deka madahka utai ti sama baka rasul John: ‘Amin. Datai meh nuan Tuan Jesus!’—Pem. 22:20.