1. Nama kebuah semua kitai begunaka mayuh agi penemu-dalam? (Jaku-Dalam 4:7)

 ENTI nuan kala ngaga pemutus ti berat, nuan tentu kala besampi minta penemu-dalam ari Jehovah. Tu ketegal, nuan nemu diri amat begunaka nya. (Jas. 1:5) Raja Solomon madah: “Begigaka penemu-dalam nya utai ti pemadu beguna.” (Bacha Jaku-Dalam 4:7.) Ba ayat nya, Solomon nyebut pasal penemu-dalam ti datai ari Jehovah, ukai mensia. (J-lam. 2:6) Tang, kati penemu-dalam ari Petara amat ulih nulung kitai mutarka penanggul kemayaharitu? Au ulih. Kitai deka meda chara iya ba artikel tu.

2. Nama siti chara kitai ulih nyadi orang ke bepenemu-dalam?

² Kitai ulih nyadi orang ke bepenemu-dalam enggau belajarka sereta nitihka ajar ari dua iku lelaki ke bepenemu-dalam. Kesatu, kitai deka beratika Solomon. Bup Kudus madah: ‘Petara meri Solomon penemu-dalam enggau runding ti dalam.’ (1 Raj. 4:29) Kedua, kitai deka beratika Jesus. Iya orang ke pemadu bepenemu-dalam ke kala diau ba dunya tu. (Mat. 12:42) Bisi siti jaku benabi bekaul enggau Jesus ke madah: ‘Roh Jehovah deka meri iya penemu-dalam enggau penemu.’—Isa. 11:2.

3. Ba artikel tu, nama deka dikerandauka kitai?

 ³ Petara meri Solomon enggau Jesus mayuh penemu-dalam. Nya alai, sida ulih meri jaku lalau ti manah bekaul enggau utai ti dikemeratka kitai. Ba artikel tu, kita deka beratika tiga iti pekara tu: (1) runding ti ngena pasal duit, (2) kereja sereta (3) diri empu.

4. Nama bida entara Solomon enggau Jesus ari segi utai ke dikemisi?

⁴ Solomon amat kaya. Lalu iya bisi rumah ti amat manah alai iya diau. (1 Raj. 10:7, 14, 15) Taja pia, Jesus nadai mayuh utai lalu nadai rumah diri empu. (Mat. 8:20) Tang seduai iya bisi runding ti ngena pasal utai ke dikena ba pengidup besehari-hari. Tu ketegal, penemu-dalam seduai iya sama datai ari Jehovah.

5. Nama runding ti ngena ke dikembuan Solomon pasal duit?

⁵ Solomon madah duit meri kitai “pengelikun.” (P-jar. 7:12) Enti kitai bisi duit, kitai ulih meli utai ke diguna sereta sekeda utai ke dikedekaka kitai. Taja pan Solomon nya kaya, iya nemu bisi utai ke penting agi ari duit. Ambika chunto, iya nulis: “Pilih pemanah nama, ukai milih pengaya.” (J-lam. 22:1) Solomon mega beratika, orang ke angkunka duit kesuah iya enda puas ati enggau utai ke dikemisi sida. (P-jar. 5:10, 12) Iya mega madahka, kitai enda patut ngumbai duit nya utai ti pemadu penting. Tu ketegal, duit ke dikemisi kitai ulih jampat lenyau.—J-lam. 23:4, 5.

6. Nama runding ti ngena ke dikembuan Jesus pasal utai ke diguna ba pengidup besehari-hari? (Matthew 6:31-33)

⁶ Jesus bisi runding ti ngena pasal utai ke diguna ba pengidup besehari-hari. Iya lantang ati enggau pemakai sereta utai ke diirup. (Luk. 19:2, 6, 7) Bisi sekali ba kereja ajih iya ti keterubah, Jesus ngaga wain ti pemadu manah. (Jhn. 2:10, 11) Ba maya iya mati, iya ngena baju ti mar. (Jhn. 19:23, 24) Tang Jesus enda nejuka utai nya nyadi utai ti pemadu penting ba pengidup iya. Iya madah ngagai bala murid iya: ‘Nadai orang ulih betuaika dua iku tuan . . . Kita enda ulih  betuaika Petara enggau duit.’ (Mat. 6:24) Jesus madah enti kitai ngenuluka Perintah Petara, Jehovah deka meri kitai utai ke diguna ba pengidup.—Bacha Matthew 6:31-33.

7. Baka ni seiku menyadi lelaki bulih penguntung ketegal bisi runding ti ngena pasal duit?

⁷ Mayuh bala menyadi udah bulih penguntung ketegal nitihka jaku lalau Jehovah pasal duit. Perundingka chunto seiku menyadi lelaki ke benama Daniel. Ku iya: “Lebuh aku agi biak, aku mutuska deka gawa ke Jehovah. Nya meh utai ti dikenuluka aku ba pengidup.” Ketegal Daniel idup enggau pengumbas iya, iya ulih gawa mayuh agi ke Jehovah. Iya bisi peluang ulih nulung lebuh bisi penusah ketegal bencana alam sereta gawa ba Betel. Ku iya agi: “Aku enda nesal enggau pemutus aku. Kebendar iya enti aku ka, aku ulih ngulihka mayuh duit, enti duit nya pemadu penting ba aku. Tang duit enda ulih meri aku bala kaban ti manah, baka ke dikemisi aku diatu. Duit mega enda ulih meri aku pengelantang ati baka ke diasaika aku diatu, lebuh aku milih ngereja pengawa ke Jehovah. Duit ti mayuh enda ulih dibandingka enggau berekat Jehovah ke diberi ngagai aku.” Nya alai, kitai bulih penguntung enti kitai ngenuluka pengawa ke Jehovah, ukai duit.

8. Baka ni kitai nemu Solomon bisi runding ti ngena pasal kereja? (Pengajar 5:18, 19)

⁸ Solomon madah orang ke bagas gawa deka lantang ati. Solomon ngumbai utai nya endang ‘pemeri ari Petara.’ (Bacha Pengajar 5:18, 19.) Iya nulis: “Enti nuan gawa, nuan deka bulih pengidup.” (J-lam. 14:23) Solomon nemu utai ke dipadah iya endang amat. Solomon nya orang ke bagas gawa. Iya ngaga rumah, nanam anggur, numbuhka mayuh macham kebun sereta numbak pegung. Pia mega, iya nirika mayuh kuta. (1 Raj. 9:19; P-jar. 2:4-6) Ketegal nya, Solomon amat puas ati. Tang Solomon ukai gaga ati ketegal pengawa nya aja. Iya mega ngereja mayuh pengawa ke Jehovah. Ambika chunto, iya nguluka pengawa nirika rumah sembiang Jehovah pengelama tujuh taun! (1 Raj. 6:38; 9:1) Nyau kelama Solomon sedar, pengawa ke Jehovah penting agi ari nama-nama pengawa ke bukai. Iya nulis: ‘Semua utai nya udah disebut magang, tang siti agi utai deka disebut: Nangika Petara, lalu ngasika pesan Iya.’—P-jar. 12:13.

9. Baka ni Jesus nentuka kereja iya enda nyadi utai ti pemadu penting ba pengidup?

⁹ Jesus bagas gawa. Lebuh Jesus agi biak, iya gawa nyadi tukang kayu. (Mrk. 6:3) Apai indai Jesus tentu beterima kasihka tulung iya laban nyediaka utai ti diguna ruang bilik sida. Ketegal Jesus sempurna, utai ke digaga iya sebagai tukang kayu mega sempurna. Nya alai, asil kereja iya engka bulih peminta ti mayuh ari bala orang. Jesus tentu rindu enggau kereja iya. Taja pan Jesus bagas gawa, tang iya meri awak kena nyembah Jehovah. (Jhn. 7:15) Pengudah nya, lebuh iya berengkah nginjil penuh jam, iya madah ngagai peninga iya: “Anang bekereja ngulihka pemakai ti nemu buruk, tang bekereja ngulihka pemakai ti tan, ti meri pengidup ti meruan belama iya.” (Jhn. 6:27) Lebuh Jesus meri Jaku Ajar ba atas Bukit, iya madah: “Simpan pengaya ke diri empu di serega.”—Mat. 6:20

10. Nama penanggul ke ulih nyadi enti kitai nyadi pekereja ti manah?

¹⁰ Penemu-dalam ti datai ari Jehovah nulung kitai bisi runding ti ngena pasal kereja. Ketegal kitai orang Kristian, kitai diasuh “[‘bebendar kereja,’ NWT], lalu ngereja pengawa  ti menyana.” (Eps. 4:28) Tuke suah beratika ulah kitai ti lurus sereta pemagas kitai gawa. Iya engka beterima kasihka pemagas kitai. Nya alai ketegal kitai bisi tuju ati ti manah, kitai engka berengkah gawa lebih jam. Tu ketegal, kitai deka tuke bisi runding ti manah pasal Saksi-Saksi Jehovah. Tang nyau kelama kitai nemu diri enda chukup awak begulai enggau diri sebilik sereta gawa ke Jehovah. Nya alai, kitai patut ngaga ubah ngambika bisi mayuh agi awak ngereja utai ti patut dikenuluka kitai.

11. Nama ulih dipelajarka seiku menyadi lelaki pasal ngembuan runding ti ngena bekaul enggau kereja?

¹¹ William, seiku menyadi lelaki ke biak beratika kebuah patut bisi runding ti ngena pasal kereja. William kala gawa enggau seiku tuai gempuru. Ku William madahka: “[Menyadi tu] nyadi chunto ti manah pasal bisi runding ti ngena bekaul enggau kereja. Iya bagas gawa. Ketegal nya, bala pelanggan iya rinduka pengawa iya laban kereja iya amat manah. Tang pengudah iya abis gawa, iya meri awak sereta pengering iya kena begulai enggau diri sebilik sereta ba pengawa sembah ke Jehovah. Aku meda iya amat gaga ati!” b

12. Baka ni Solomon nunjukka diri bisi runding ti ngena pasal diri empu, tang baka ni runding nya lenyau?

¹² Lebuh Solomon nyembah Jehovah enggau tetap ati, iya ngembuan runding ti ngena pasal diri empu. Lebuh iya agi biak, iya ngaku diri bisi tatak lalu minta iring ari Jehovah. (1 Raj. 3:7-9) Lebuh Solomon berengkah merintah, iya mega nemu penusah ke ulih nyadi ketegal penyumbung. Iya madah: “Penyumbung nuju ngagai pengerusak, lalu ati ti tinggi ngasuh nuan rebah.” (J-lam. 16:18) Tang sayau amat, Solomon enda mujur nitihka jaku lalau diri empu. Beberapa taun pengudah iya merintah, iya nyadi sumbung lalu berengkah enda ngasika Adat Jehovah.  Ambika chunto, siti ari Adat Jehovah madahka, seiku raja orang Israel enda patut bisi ‘mayuh bini, laban nya deka ngasuh iya ninggalka Jehovah.’ (U-dat. 17:17) Tang Solomon enda ngasika adat nya lalu ngembuan 700 iku bini enggau 300 iku indu simpan. Mayuh ari sida nya enda nyembah Jehovah! (1 Raj. 11:1-3) Engka Solomon ngasaika utai tu enda ulih ngachau iya. Pengujung iya, Solomon napi mayuh penusah ketegal enda ngasika Jehovah.—1 Raj. 11:9-13.

13. Nama ulih dipelajarka kitai enti berunding enggau dalam pasal pemaruh ati Jesus?

¹³ Jesus mengkang ngembuan runding ti ngena pasal diri empu lalu iya amat baruh ati. Sebedau Jesus datai ke dunya, iya udah ngereja mayuh utai ti ngalitka ati lebuh gawa ke Jehovah. Nengah Jesus, “semua utai ti di serega enggau di dunya udah digaga.” (Kol. 1:16) Lebuh iya dibaptisa, Jesus ingatka baru semua utai ke udah digaga iya lebuh iya ba serega enggau Jehovah. (Mat. 3:16; Jhn. 17:5) Taja pia, penemu nya enda ngasuh Jesus nyadi sumbung. Jesus enda kala nunjukka diri pama agi ari orang bukai. Tu meh utai ke dipadah Jesus ngagai bala murid iya pasal kebuah iya datai ke dunya: ‘Ukai minta diri dibela, tang laban iya deka mela, lalu nyerahka nyawa diri kena nebus orang mayuh.’ (Mat. 20:28) Jesus mega ngaku, iya enda ulih ngereja sebarang utai enti nadai bantu ari Jehovah. (Jhn. 5:19) Jesus amat baruh ati! Iya nyadi teladan ti manah ke ulih dititihka kitai.

14. Nama ulih dipelajarka kitai ari Jesus bekaul enggau runding ti ngena pasal diri empu?

¹⁴ Jesus ngajar bala murid iya bekaul enggau ngembuan runding ti ngena pasal diri empu. Bisi sekali, Jesus madah: “Semua lambar buk ba pala kita deh udah diitung magang.” (Mat. 10:30) Enti kitai suah bisi runding ti enda manah pasal diri empu, jaku Jesus tu ulih nulung kitai. Tu reti iya, Jehovah amat ibuhka kitai. Lalu kitai amat berega ba mata Jehovah. Enti Jehovah nejuka kitai nyembah Iya lalu ngumbai kitai layak idup belama iya ba dunya baru, kitai enda patut ngumbai Iya salah.

15. (a) Siti majalah Menara Jaga meransang kitai bisi runding ti baka ni pasal diri empu? (b) Baka ke dipeda ba gambar, lambar 24, nama berekat ke ulih lenyau enti kitai kelalu beratika diri empu?

 ¹⁵ Kira-kira 15 taun ti udah, siti majalah Menara Jaga meransang kitai bisi runding ti ngena pasal diri empu. Majalah nya madahka: “Kitai enda patut kelalu berundingka diri empu. Lalu kitai mega enda tau ngumbai diri pama agi ari ke patut laban nya deka ngasuh kitai nyadi sumbung. Tang kitai mega enda patut ngumbai diri enda berega nyentukka kitai balat tusah ati. Iya ke amat, kitai patut ngembuan runding ti ngena pasal diri empu. Reti iya, kitai nemu pengering sereta pengelemi diri empu. Seiku menyadi Kristian indu madahka: ‘Aku ukai orang ke jai, tang aku mega ukai orang ke pemadu manah. Aku bisi pengering sereta pengelemi, lalu orang bukai mega sama.’” c Kati nuan ulih meda penguntung iya enti kitai bisi runding ti ngena pasal diri empu?

16. Nama kebuah Jehovah meri kitai iring ti bepenemu-dalam?

¹⁶ Nengah Jaku Iya, Jehovah meri kitai iring ti bepenemu-dalam. Iya rinduka kitai, lalu Iya deka kitai gaga ati. (Isa. 48:17, 18) Pemutus ti pemadu manah sereta meri kitai pengaga ati ti bendar iya nya, terus ngereja utai ti ngelantangka ati Jehovah. Lebuh kitai ngereja nya, kitai ulih nyeliahka diri ari mayuh penanggul ke datai ari kelalu beberatka duit, kereja, tauka diri empu. Aram meh tiap iku kitai nambahka penemu-dalam ari Bup Kudus lalu terus ngagaka ati Jehovah!—J-lam. 23:15.