1-2. Nama engka diperundingka kitai pasal sampi kitai?

 KALA nuan berunding sekalika Jehovah benung nyaut sampi nuan? Enti nuan kala berunding baka nya, nuan enda kediri. Mayuh bala menyadi mega madahka sida kala berunding baka nya kelebih agi lebuh sida benung napi penusah. Enti kitai benung napi penusah, kitai mega engka tusah deka nemu chara Jehovah nyaut sampi kitai.

² Aram kitai beratika kebuah kitai ulih andal Jehovah nyaut sampi bala penyembah Iya. (1 Jhn. 5:15) Kitai mega deka berandauka tanya tu: Nama kebuah kitai kekadang ngasaika Jehovah enda nyaut sampi kitai? Baka ni Jehovah nyaut sampi kitai kemayaharitu?

3. Nama kebuah Jehovah dekaka kitai besampi ngagai Iya?

³ Bup Kudus madahka, Jehovah amat rinduka kitai lalu kitai berega ba Iya. (Hag. 2:7; 1 Jhn. 4:10) Nya kebuah Iya mai kitai besampi minta tulung ari Iya. (1 Pet. 5:6, 7) Iya deka nulung kitai mengkang semak enggau Iya sereta tan napi penusah kitai.

4. Baka ni kitai nemu Jehovah nyaut sampi bala penyembah Iya? (Peda mega gambar.)

⁴ Dalam Bup Kudus, kitai suah macha pasal Jehovah ke nyaut  sampi bala penyembah Iya. Siti ari chunto nya, Raja David. Sepemanjai pengidup iya, iya bisi mayuh munsuh. Lalu iya suah minta tulung ari Jehovah ngena sampi. Bisi sekali, iya bebendar besampi ngagai Jehovah: ‘O Jehovah, dingaka sampi aku! Laban Nuan endang lurus, nya alai pendingka kangau aku. Ulih penetap ati Nuan, saut meh aku!’ (Mas. 143:1) Jehovah nyaut sampi David ke minta pengelepas. (1 Sam. 19:10, 18-20; 2 Sam. 5:17-25) David ulih enggau ati ti andal madahka: “[Jehovah] diau semak sida ke ngangauka Iya.” Kitai mega ulih andalka nya.—Mas. 145:18.

5. Kati sampi bala penyembah Jehovah kelia seruran disaut nitihka chara ke dikedekaka sida? Beri siti chunto. (Peda mega gambar.)

⁵ Jehovah engka enda nyaut sampi kitai nitihka chara ke dikedekaka kitai. Nya meh utai ke nyadi ngagai rasul Paul. Iya minta Petara muai “duri dalam isi” iya. Rasul Paul tiga kali besampi enggau nyemetak pasal penanggul ti tusah tu. Kati Jehovah nyaut sampi nya? Au. Tang ukai nitihka chara ke dikedekaka rasul Paul. Jehovah enda muai penusah nya, tang Iya meri Paul pengering ke diguna iya ngambika ulih terus nyembah Jehovah enggau tetap ati.—2 Kor. 12:7-10.

6. Nama kebuah kitai kekadang engka ngasaika Jehovah enda nyaut sampi kitai?

⁶ Kekadang kitai mega engka nerima saut ti bebida ari utai ti dikedekaka kitai. Tang kitai ulih yakin, Jehovah nemu chara ti pemadu manah kena nulung kitai. Iya indah “ulih ngereja utai ti jauh mayuh agi ari ke dipinta tauka diperundingka kitai.” (Eps. 3:20) Nya kebuah saut Iya ke sampi kitai engka datai ba maya tauka nengah chara ti enda dijangka kitai.

7. Nama kebuah kitai engka patut ngubah utai ti disampika kitai? Beri siti chunto.

⁷ Kitai engka patut ngubah utai ti disampika kitai lebuh kitai ulih beratika peneka Jehovah enggau terang agi. Peratika chunto Menyadi Martin Poetzinger. Enda lama pengudah kawin, Menyadi Martin diukum jil ba siti kem Nazi. Terubah iya, iya besampi minta Jehovah ngelepaska iya ari kem nya ngambika iya ulih ngintu bini iya lalu berengkah nginjil baru. Taja pia, pengudah dua minggu, nadai tanda ke nunjukka Jehovah deka ngelepaska iya ari kem nya. Nya alai, iya berengkah besampi: “Jehovah, tulung tunjukka aku utai ti dikedekaka nuan kereja aku.” Udah nya, iya berengkah berunding pasal utai ke ditapi  bala menyadi ke bukai ba kem nya. Mayuh ari sida amat irauka bini sereta anak sida. Nyadi Menyadi Martin pan besampi: “Jehovah, terima kasih ke pengawa ti baru tu. Tulung meh aku meransang sereta ngeringka bala menyadi aku.” Nya meh utai ti dikereja iya pengelama semilan taun ba kem Nazi!

8. Nama utai ti penting ke patut dikingatka kitai lebuh besampi?

⁸ Kitai patut ingat Jehovah bisi siti tuju, lalu Iya deka ngamatka nya nitihka jam ke udah ditetapka Iya. Tuju nya nyengkaum muai semua penusah ke ngasuh kitai merinsa kemayaharitu—penusah baka bencana alam, penyakit, enggau pemati. (Dan. 2:44; Pem. 21:3, 4) Taja pia, nyentuk ngagai maya nya, Jehovah benung nejuka Sitan merintah dunya tu. b (Jhn. 12:31; Pem. 12:9) Enti Jehovah muai semua penusah mensia diatu, orang engka ngumbai Sitan benung merintah enggau manah. Nya alai, taja pan kitai patut nganti Jehovah ngamatka semaya Iya, tu ukai reti iya Jehovah enda nulung kitai. Aram kitai beratika sekeda utai ke dikereja Jehovah kena nulung kitai.

9. Baka ni Jehovah ulih nulung kitai lebuh kitai patut ngaga pemutus? Padahka siti chunto.

⁹ Iya meri kitai penemu-dalam. Jehovah besemaya deka meri kitai penemu-dalam ke diguna kitai kena ngaga pemutus ti manah. Kitai begunaka penemu-dalam ari Jehovah lebuh kitai ngaga pemutus ke ulih ngubah pengidup kitai, baka pemutus sekalika deka kawin tauka enda. (Jas. 1:5) Peratika pengalaman siku menyadi Kristian indu ti bedau kawin ke benama Maria. c Iya gaga ati gawa nyadi siku pengerintis biasa. Lalu ba maya nya, iya betemu enggau siku menyadi lelaki. Ku iya madahka: “Lebuh kaul kami majak rapat, kami pan bisi asai ati ke pangan diri. Aku nemu aku patut ngaga pemutus. Aku mayuh besampi pasal pekara nya. Aku begunaka iring ari Jehovah. Tang aku mega nemu Jehovah enda ngaga pemutus ke aku.” Iya ngasaika Jehovah nyaut sampi iya ke minta penemu-dalam. Baka ni? Iya ngaga pansik ba litaricha kitai lalu tetemuka sekeda artikel ti nyemetak ke nyaut tanya ke dikembuan iya. Iya mega ningaka jaku lalau ti manah ari indai iya ke tetap ati ngagai Jehovah. Jaku lalau nya nulung Maria mansik asai ati iya. Nya alai, iya ulih ngaga pemutus ti manah.

10. Nitihka Pilipi 4:13, nama deka digaga Jehovah kena nulung bala penyembah Iya? Beri siti chunto. (Peda mega gambar.)

¹⁰ Iya meri kitai pengering ngambika ulih tan. Baka ke udah digaga Jehovah ngagai rasul Paul, Iya mega meri kitai pengering ke diguna kitai ngambika ulih tan napi penanggul. (Bacha Pilipi 4:13.) Peratika chara Jehovah nulung siku menyadi lelaki ke benama Benjamin  tan napi situasi ti tusah. Lebuh Benjamin agi biak, iya enggau sida sebilik diau ba kem pelarian di Afrika. Ku iya madahka: “Aku seruran besampi ngagai Jehovah, lalu minta Iya meri aku pengering ngambika aku ulih ngereja utai ti dikerinduka Iya. Jehovah nyaut sampi aku. Iya meri aku pengelantang ba runding, pemerani ngambika ulih terus nginjil, sereta litaricha ngambika aku ulih mengkang semak enggau Iya.” Iya mega madahka: “Lebuh aku macha pasal pengalaman bala menyadi Kristian sereta beratika chara Jehovah nulung sida tan, nya negapka pengeran aku ngambika mengkang tetap ati ngagai Jehovah.”

11-12. Baka ni Jehovah engka ngena bala menyadi Kristian nyaut sampi kitai? (Peda mega gambar.)

¹¹ Iya ngena bala menyadi Kristian kitai. Ba malam sebedau Jesus mati, iya bebendar besampi. Iya minta Jehovah ngambika enda nejuka orang ngumbai iya bejaku ngelaban Petara lalu ngutuk iya ketegal nya. Tang, ari ke ngereja nya, Jehovah nulung Jesus lebuh Iya nganjung siku ari bala melikat Iya negapka Jesus. (Luk. 22:42, 43) Jehovah engka nulung kitai nengah bala menyadi Kristian kitai. Iya engka ngiring sida ngambika nelefon tauka ngabas kitai. Nya alai, semua kitai ulih ngiga peluang ngambika meri “jaku ti siru” ngagai bala menyadi Kristian kitai.—J-lam. 12:25.

¹² Peratika pengalaman siku menyadi Kristian indu ke benama Miriam. Beberapa minggu pengudah laki iya mati, Miriam kediri ba rumah. Iya berasai nadai daya sereta balat tusah ati. Iya enda ulih ngetu nyabak lalu begunaka sesiku orang alai iya ulih bejaku. Iya madahka: “Aku nadai pengering deka nelefon sapa-sapa. Nyadi, aku besampi ngagai Jehovah. Lebuh aku agi benung nyabak sereta besampi, telefon aku bebunyi. Nya kaban aku, siku tuai gempuru.” Miriam nerima pengelantang ari tuai gempuru nya enggau bini iya. Iya yakin Jehovah meh ke meransang menyadi tu nelefon iya.

13. Beri siti chunto ke nunjukka chara Jehovah ulih ngena orang ke enda nyembah Iya nyaut sampi kitai.

¹³ Iya engka ngena orang ke enda nyembah Iya. (J-lam. 21:1) Kekadang, Jehovah ngena orang ke enda nyembah Iya nyaut sampi bala nembiak Iya. Ambika chunto, Iya meransang Raja Artaserses ngemendarka Nehemiah pulai baru ngagai Jerusalem ngambika Nehemiah ulih nulung ba pengawa nirika baru  nengeri nya. (Neh. 2:3-6) Kemayaharitu mega, Jehovah ulih ngena sida ke enda nyembah Iya nulung kitai lebuh kitai begunaka nya.

14. Baka ni pengalaman Soo Hing meransang nuan? (Peda mega gambar.)

¹⁴ Siku menyadi indu ke benama Soo Hing ngasaika tulung ari Jehovah nengah lutur iya. Anak lelaki iya bisi penanggul ti serius ba mental. Lebuh anak iya bisi eksiden ti balat, Soo Hing enggau laki iya badu kereja kena nyaga anak seduai iya. Ketegal nya, sida bisi penanggul ba duit. Soo Hing madahka, iya ngasaika diri baka ke enda ulih tan agi. Iya mantaika asai ati iya ngagai Jehovah lalu minta tulung ari Iya. Lutur nya ngiga chara kena nulung Soo Hing enggau sida sebilik. Ketegal nya, sida nerima tulung ari perintah sereta tetemuka endur diau ti enda kelalu mar. Pengudah nya, Soo Hing madahka: “Kami meda chara Jehovah nulung kami. Iya endang Petara ke ‘nyaut sampi.’”—Mas. 65:2.

15. Nama nulung siku menyadi indu sedar Jehovah benung nyaut sampi iya?

¹⁵ Sampi kitai kesuah iya enda disaut enggau chara ti ngalitka ati. Tang saut ke diterima kitai nya meh utai ke diguna kitai kena mengkang tetap ati ngagai Jehovah. Nyadi, bebendar meh beratika chara Jehovah nyaut sampi nuan. Siku menyadi indu ke benama Yoko ngasaika Jehovah baka ke enda nyaut sampi iya. Tang udah nya, iya berengkah nulis dalam siti bup pasal utai ke dipinta iya ari Jehovah. Pengudah sesiti timpuh, iya meda baru utai ti ditulis iya dalam bup nya. Ketegal nya, iya sedar Jehovah udah nyaut nyauka semua sampi iya, indah sekeda sampi ke enda diingatka iya agi. Kitai patut suah ngetu sereta berunding pasal chara Jehovah nyaut sampi kitai.—Mas. 66:19, 20.

16. Baka ni kitai ulih ngayanka pengarap bekaul enggau sampi kitai? (Hebrew 11:6)

¹⁶ Kitai ukai semina ngayanka pengarap lebuh kitai besampi ngagai Jehovah. Tang kitai mega ngayanka pengarap lebuh kitai nerima saut ke diberi Iya ngagai sampi kitai, enda ngira nama saut nya. (Bacha Hebrew 11:6.) Peratika chunto Mike enggau bini iya, Chrissy. Seduai iya bisi juluk ati deka gawa ba Betel. Ku Mike madahka: “Kami duai mayuh kali ngisi pom minta gawa ba Betel lalu kami duai mega mayuh kali besampi ngagai Jehovah pasal juluk ati tu. Tang kami enda dikangau.” Mike seduai Chrissy yakin Jehovah nemu chara ti pemadu manah ngena seduai  iya. Mike enggau Chrissy ngereja ni ke ulih seduai iya. Seduai iya gawa nyadi pengerintis biasa ba endur ke begunaka mayuh agi penginjil sereta nyukung projek nirika bengunan teokratik. Diatu seduai iya ba pengawa ngabas raban gempuru. Mike madahka: “Jehovah enda seruran nyaut sampi kitai nitihka chara ke dikedekaka kitai. Tang Iya bisi nyaut sampi kitai enggau chara ti manah agi ari ke ulih digambarka kitai.”

17-18. Nitihka Masmur 86:6, 7, nama utai ke ulih diandalka kitai?

¹⁷ Bacha Masmur 86:6, 7. Pemasmur David mega yakin Jehovah ninga sereta nyaut sampi iya. Nuan mega ulih ngembuan pengandal ti sama. Chunto ke dikerandauka dalam artikel tu nulung kitai andal Jehovah ulih meri kitai penemu-dalam sereta pengering ke diguna kitai kena tan napi penusah. Iya mega engka ngena bala menyadi Kristian tauka indah orang ke enda nyembah Iya diatu kena nulung kitai.

¹⁸ Taja pan Jehovah engka enda seruran nyaut sampi kitai nitihka chara ke dikedekaka kitai, tang kitai nemu Iya deka nyaut sampi kitai. Iya deka meri kitai utai ti sesuai ke diguna kitai sereta ba maya kitai amat begunaka nya. Nyadi terus meh besampi lalu pechaya Jehovah deka ningaka nuan. Andal meh Jehovah deka nyaga nuan diatu, lalu ba dunya ti baru ila, Iya deka meri nuan “utai ti dikinginka nuan.”—Mas. 37:4.