1. Jehovah mai bala penyembah Iya ngereja nama? (Peda mega gambar.)

 BA SAPA kitai ulih tetemuka pengelantang enggau iring? Kitai nemu saut ngagai tanya nya. Kitai ulih besampi ngagai Petara Jehovah. Jehovah mai kitai ngereja nya. Iya dekaka kitai seruran besampi. Bup Kudus madahka, “anang ngetu besampi.” (1 Tes. 5:17) Kitai ulih besampi ngagai Iya ba sebarang maya, lalu minta ari Iya iring dalam semua aspek pengidup kitai. (J-lam. 3:5, 6) Ketegal pengerah jari Jehovah, Iya nadai netapka tatak penyuah kitai ulih besampi ngagai Iya.

2. Nama deka dikerandauka kitai dalam artikel tu?

² Kitai amat beterima kasih ngagai Jehovah laban Iya nejuka kitai besampi ngagai Iya. Tang ketegal semua kitai bisi mayuh utai ti patut dikereja, kekadang kitai engka tusah deka ngiga awak ngambika ulih besampi. Kitai mega engka ngasaika diri patut ngemansangka kualiti sampi kitai. Kitai amat beterima kasih laban kitai ulih tetemuka peransang sereta iring dalam Bup Kudus. Dalam artikel tu, kitai deka berandauka utai ti ulih dipelajarka kitai ari Jesus pasal chara kitai ulih nentuka diri bisi awak besampi. Kitai mega deka berandauka chara kitai ulih ngemansangka kualiti sampi kitai lebuh kitai nepuka lima pekara ti penting dalam sampi kitai.

3. Nama utai ke ditemu Jesus pasal sampi?

³ Jesus nemu sampi kitai amat berega ba Jehovah. Lama sebedau Jesus datai ke dunya, iya meda Apai iya nyaut sampi bala nembiak ti tetap ati. Ambika chunto, Jesus bisi ba sepiak  Apai iya lebuh Apai iya nyaut sampi Hanah, David, Elijah, enggau mayuh agi bala nembiak ti tetap ati. (1 Sam. 1:10, 11, 20; 1 Raj. 19:4-6; Mas. 32:5) Nya kebuah Jesus ngajar bala murid iya ngambika seruran besampi lalu ngereja nya enggau ati ti andal!—Mat. 7:7-11.

4. Nama ulih dipelajarka kitai ari Jesus pasal sampi?

⁴ Nengah sampi iya ngagai Jehovah, Jesus netapka teladan ke ulih dititihka bala murid iya. Sepemanjai pengawa nginjil iya, Jesus suah besampi. Iya patut netapka awak kena besampi laban iya suah kisuk sereta dikelingi mayuh orang. (Mrk. 6:31, 45, 46) Iya dani tumu pagi ngambika iya bisi awak kediri kena besampi. (Mrk. 1:35) Jesus besampi semalam-malam sebedau ngaga sesiti pemutus ti penting. Ba maya ke bukai mega Jesus ngereja tu. (Luk. 6:12, 13) Lalu Jesus mega mayuh kali besampi ba malam sebedau iya mati, enda lama sebedau iya nembuka begian ti pemadu penting ari pengawa iya ba dunya.—Mat. 26:39, 42, 44.

5. Baka ni kitai ulih neladan Jesus lebuh kitai besampi?

⁵ Ari teladan Jesus kitai belajar, enda ngira sekalika kitai amat kisuk pan, kitai patut netapka awak kena besampi. Baka Jesus, kitai engka patut ngiga awak kena besampi. Kitai engka patut dani tumu agi ngambika ulih besampi tauka kitai engka ulih besampi maya laun malam. Lebuh kitai ngereja nya, kitai nunjukka diri beterima kasih ngagai Jehovah laban udah meri kitai pemeri ti spesial tu. Siku menyadi indu ke benama Lynne ngenang baru asai ati iya ti beterima kasih lebuh iya terubah kali belajar pasal peluang iya ke ulih besampi. Iya madah, “Lebuh aku nemu aku ulih bejaku ngagai Jehovah ba sebarang maya, nya nulung aku meda Jehovah baka siku kaban ti rapat. Lalu nya mega meransang aku kena ngemansangka kualiti sampi aku.” Mayuh ari kitai mega tentu berasai baka nya. Nyadi aram kitai berandauka lima pekara ti penting ke ulih ditepuka kitai dalam sampi kitai.

6. Nitihka Pemandang 4:10, 11, nama utai ti endang layak diterima Jehovah?

⁶ Muji Jehovah. Dalam siti genera ti ngalitka ati, rasul John meda 24 iku bala tuai ba serega benung nyembah Jehovah. Sida muji Jehovah lalu madahka Jehovah layak nerima “mulia, basa, enggau kuasa.” (Bacha Pemandang 4:10, 11.) Bala melikat ti tetap ati mega  bisi mayuh kebuah kena muji Jehovah. Sida diau ba serega enggau Jehovah lalu sida amat ngelala Iya. Sida ulih beratika sifat Jehovah lebuh sida meda utai ti dikereja Iya. Lebuh sida meda chara Jehovah ngereja sesiti utai, sida diperansang muji Iya.—Jop 38:4-7.

7. Nama sekeda utai ke meransang kitai meri puji ngagai Jehovah?

⁷ Kitai mega patut muji Jehovah dalam sampi kitai. Kitai ulih ngereja nya lebuh kitai madahka utai ti dikerinduka kitai pasal Iya, sereta kebuah kitai bebasaka Iya. Lebuh nuan macha sereta belajarka Bup Kudus, uji giga sifat Jehovah ke amat dikerinduka nuan. (Jop 37:23; Rom. 11:33) Udah nya, padah ngagai Jehovah asai ati nuan pasal sifat nya. Kitai mega ulih muji Jehovah laban Iya nulung kitai sereta semua bala menyadi Kristian kitai. Iya seruran nyaga sereta ngelindung kitai.—1 Sam. 1:27; 2:1, 2.

8. Nama sekeda kebuah kitai meri terima kasih ngagai Jehovah? (1 Tesalonika 5:18)

⁸ Meri terima kasih ngagai Jehovah. Kitai bisi mayuh kebuah meri terima kasih ngagai Jehovah nengah sampi. (Bacha 1 Tesalonika 5:18.) Kitai ulih meri terima kasih ngagai Jehovah ketegal semua utai ti manah ke dikembuan kitai. Semua pemeri ti manah endang datai ari Iya. (Jas. 1:17) Ambika chunto, kitai ulih meri terima kasih ketegal bumi kitai ti manah sereta utai bukai ke udah ditempa Iya. Kitai mega ulih meri terima kasih ketegal pengidup ti dikembuan kitai, diri sebilik, bala kaban, sereta harapan kitai. Pia mega kitai deka meri terima kasih ngagai Jehovah laban udah ngawakka kitai bisi kaul ti rapat enggau Iya.

9. Nama kebuah kitai patut ngemansangka asai ati ti beterima kasih ngagai Jehovah?

⁹ Tiap iku kitai bisi mayuh kebuah meri terima kasih ngagai Jehovah. Tang kitai engka patut berusaha berundingka kebuah nya. Nama kebuah? Mayuh orang kemayaharitu enda nemu meri terima kasih. Kesuah iya, orang semina berunding pasal chara sida deka ngulihka utai ti dikedekaka sida. Tang sida enda berunding pasal chara sida deka ngayanka asai ati ti beterima kasih ke utai ti dikemisi sida. Enti kitai berengkah nitihka runding ke baka nya, kitai engka semina minta utai aja ba sampi kitai. Kena nagang utai nya ari nyadi, kitai patut terus ngemansang sereta ngayanka asai ati ti beterima kasih ke semua utai ti udah digaga Jehovah ke kitai.—Luk. 6:45.

10. Baka ni asai ati ti beterima kasih nulung siku menyadi indu tan napi penusah? (Peda mega gambar.)

¹⁰ Asai ati ti beterima kasih ulih nulung kitai tan napi penusah. Peratika pengalaman menyadi Kyung-sook, ke bisi ba majalah Menara Jaga, 15 Januari 2015. Iya bisi kanser paru-paru. Ku iya, “Penyakit tu ngasuh aku balat asa. Aku ngasaika aku udah lenyau semua utai, lalu aku mega amat takut.” Nama nulung iya tan? Iya madah, ninting malam sebedau iya tinduk, iya deka niki ngagai perabung rumah iya lalu besampi enggau nyawa ti  inggar. Dalam sampi nya, iya deka nyebut lima iti utai ke ngasuh iya beterima kasih ba sehari nya. Tu ngasuh iya kurang agi irau lalu meransang iya ngayanka pengerindu ngagai Jehovah. Iya ulih ngasaika chara Jehovah nulung bala nembiak Iya ti tetap ati lebuh sida napi penanggul ti besai. Lalu iya mega beratika, ba pengidup kitai bisi mayuh agi utai ti manah enti dibandingka enggau penusah. Baka Kyung-sook, kitai bisi mayuh kebuah meri terima kasih ngagai Jehovah taja pan enti kitai benung napi penusah. Lebuh kitai meri terima kasih ngagai Jehovah dalam sampi, nya ulih nulung kitai tan sereta mengkang gaga ati.

11. Nama kebuah bala murid Jesus begunaka pemerani pengudah Jesus niki ke serega?

¹¹ Minta pemerani ari Jehovah lebuh nuan nginjil. Enda lama sebedau Jesus niki ke serega, Jesus ngingatka bala murid iya pasal pengawa ti diberi iya ngagai sida. Sida deka meri saksi pasal Jesus “ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8; Luk. 24:46-48) Enda lama udah nya, bala tuai orang Judah nangkap rasul Peter enggau rasul John lalu mai seduai iya ngagai Raban Kunsil Orang Judah. Sida ngasuh bala lelaki ti tetap ati tu badu agi nginjil, indah ngugut tauka ngenakutka sida. (SKR. 4:18, 21) Nama reaksi Peter enggau John?

12. Nitihka Surat Kereja Rasul 4:29, 31, nama utai ti dikereja bala murid Jesus?

¹² Nama reaksi Peter enggau John lebuh diugut bala tuai pengarap orang Judah? Seduai iya nyaut: “Ba mata Petara, sekalika kami patut ngasika kita ari ke ngasika Petara, barang ku kita meh berundingka nya. Tang kami enda ulih ngetu bejaku pasal utai ke udah dipeda sereta didinga kami.” (SKR. 4:19, 20) Lebuh Peter enggau John dilepaska, bala murid nya besampi ngagai Jehovah pasal ngereja peneka Iya. Sida besampi: “Tulung meh ulun Nuan ngambika terus nusui jaku Nuan enggau berani.” Jehovah nyaut sampi sida ke ari ati nya.—Bacha Surat Kereja Rasul 4:29, 31.

13. Nama ulih dipelajarka kitai ari teladan menyadi Jin-hyuk?

¹³ Kitai ulih neladan bala murid Jesus. Kitai deka terus nginjil taja pan piak perintah ngasuh kitai badu agi nginjil. Peratika teladan Jin-hyuk, siku menyadi lelaki ke dijil ketegal enggai nyadi soldadu. Ba rumah jil, iya diasuh ngintu sekeda orang tangkap ke dikurung kediri dalam bilik jil. Tang iya semina dikemendarka bejaku enggau sida pasal utai ke diguna sida aja. Iya enda dikemendarka bejaku enggau sida pasal Bup Kudus. Iya besampi minta pemerani sereta penemu-dalam ngambika ulih bejaku enggau manah kena nginjil ba tiap iti peluang. (SKR. 5:29) Iya madah: “Jehovah nyaut sampi aku. Iya meri aku pemerani sereta penemu-dalam kena ngepunka mayuh pelajar Bup Kudus ti pandak terus ba pintu bilik jil sida. Udah nya, maya lemai hari, aku nulis surat ke deka diberi aku ngagai sida ba hari siti.” Kitai mega ulih andal Jehovah deka nulung kitai nembuka pengawa nginjil kitai. Baka Jin-hyuk, kitai ulih besampi minta pemerani sereta penemu-dalam.

14. Nama ulih nulung kitai lebuh kitai bisi penanggul? (Masmur 37:3, 5)

¹⁴ Minta tulung ari Jehovah kena tan taja pan napi penanggul. Mayuh ari kitai merinsa ketegal bisi penyakit tauka napi penanggul ba emosi, lenyau orang ke dikesayau, penanggul ba diri sebilik, diperinsa, tauka penanggul ke bukai. Lalu utai baka pandemik enggau perang udah ngasuh kitai tusah agi tan napi penanggul nya. Padahka enggau nyemetak ngagai Jehovah pasal asai ati nuan. Padah ngagai Iya pasal situasi nuan sama baka chara  nuan bejaku enggau siku kaban ti rapat. Lalu pechaya meh, Jehovah “deka nulung nuan.”—Bacha Masmur 37:3, 5.

15. Baka ni sampi ulih nulung kitai ‘betan lebuh napi penusah’? Beri siti chunto.

¹⁵ Majak besampi ulih nulung kitai ‘betan lebuh napi penusah.’ (Rom. 12:12) Jehovah nemu utai ke benung ditapi bala penyembah Iya. Bup Kudus madahka: “Iya ninga sabak sida.” (Mas. 145:18, 19) Kristie, siku pengerintis ke beumur 29 taun ngasaika utai nya endang amat. Iya enda ngadang diri kena penanggul ti serius ba pengerai. Ketegal nya, iya napi kemurungan ti balat. Pengudah nya, iya nyau nemu indai iya bisi napi siti penyakit ke deka ngujungka iya mati. Kristie madah: “Aku bebendar besampi ngagai Jehovah kena meri aku pengering ti diguna aku ninting hari. Aku nguji nitihka jadual pengawa rohani ti tetap baka datai begempuru enggau ngaga pengawa belajarka Bup Kudus kediri empu.” Ku iya agi: “Sampi nulung aku tan napi maya ti tusah nya. Aku nemu Jehovah seruran bisi dia lalu runding nya nulung aku berasai lantang agi. Taja pan penanggul ba pengerai aku enda lenyau tekala nya, tang Jehovah nyaut sampi aku, Iya meri aku pengelantang ba runding sereta ati ti tenang.” Arapka semua kitai mengkang ingatka tu: “Jehovah nemu chara ngelepaska orang ke enda bebagi ati nyembah Iya ari penguji.”—2 Pet. 2:9.

16. Nama kebuah kitai begunaka tulung ari Jehovah kena ngelaban penguji?

¹⁶ Minta tulung ari Jehovah kena ngelaban penguji. Ketegal kitai enda sempurna, kitai patut seruran ngelaban pengingin ti deka ngereja utai ti salah. Sitan enggau naka ulih ngasuh kitai tusah ngelaban pengingin ti enda manah nya. Siti chara iya nguji ngerusak runding kitai nya, nengah pemerindang ti enda bemoral. Pemerindang ke baka nya ulih ngasuh kitai ngembuan runding ti enda bemoral. Runding ke baka nya ulih ngasuh kitai ngereja utai ti kamah ba mata Jehovah. Lalu tu  mega ulih ngujungka kitai ngereja dosa ti besai.—Mrk. 7:21-23; Jas. 1:14, 15.

17. Pengudah kitai besampi, nama utai ke patut dikereja kitai ngambika ulih nyeliah ari penguji? (Peda mega gambar.)

¹⁷ Kitai begunaka tulung ari Jehovah enti kitai deka nyeliahka diri ari pengingin ti deka ngereja utai ti salah. Jesus nepuka peminta tu ba chunto sampi ke diberi iya: “Anang nejuka kami alah laban penguji, tang lepaska kami ari Sitan.” (Mat. 6:13) Jehovah deka nulung kitai, tang kitai mesti minta tulung ari Iya. Pengudah nya, kitai mesti ngereja utai ti sejalai enggau sampi kitai. Kitai ulih bebendar nyeliah ari macha tauka ningaka penemu ti salah ke tebilang ba dunya Sitan. (Mas. 97:10) Kitai ulih ngisi runding kitai enggau utai ti manah lebuh kitai macha sereta belajarka Bup Kudus. Datai begempuru sereta nginjil mega ulih nyaga runding kitai. Lalu Jehovah besemaya, Iya enda nejuka kitai napi penguji ke enda ulih ditatka kitai.—1 Kor. 10:12, 13.

18. Bekaul enggau sampi, nama utai ke patut dikereja semua kitai?

¹⁸ Kelebih agi ba hari ti penudi tu, tiap iku kitai patut lebih agi besampi ngambika ulih mengkang tetap ati ngagai Jehovah. Tetapka jam ninting hari ngambika ulih bebendar besampi ngagai Jehovah. Jehovah dekaka kitai besampi ngagai Iya lalu ‘madah ngagai Iya semua penusah kitai.’ (Mas. 62:8) Beri puji sereta terima kasih ketegal semua utai ti udah dikereja Iya. Minta Iya meri nuan pemerani ngambika ulih nginjil. Lalu, minta tulung ari Jehovah kena tan napi sebarang penanggul sereta ngelaban pengingin ke engka ditapi nuan. Anang nejuka sebarang utai tauka sapa-sapa nagang nuan ari seruran besampi ngagai Jehovah. Tang baka ni Jehovah nyaut sampi kitai? Kitai deka berandauka tanya ti penting tu ba artikel ke nangkanka tu.