1. Baka ni Bup Kudus ngambarka pengerindu ti bendar?

 “DAUN api pengerindu ti mau nya daun api Jehovah. Ai enda ulih madamka iya. Ai bah enda ulih ngelamun iya.” b (P-dai. 8:6, 7, NWT) Naka meh pemanah chara Bup Kudus ngambarka pengerindu ti bendar! Rambai jaku tu amat meransang bala laki bini. Nuan tau ngembuan pengerindu ti enda nemu abis ke pangan diri.

2. Nama patut dikereja sepasang laki bini ngambika pengerindu seduai iya enda nyadi chelap?

² Sepasang laki bini patut berusaha rinduka pangan diri seagi-agi seduai iya idup. Gambarka tu: Api ulih mengkang mau enti bisi orang terus nepu kayu ba api nya. Tang enti nadai orang ngereja nya, api nya deka belubah-lubah padam. Baka nya mega, pengerindu entara laki bini ulih mengkang dalam enti seduai iya negapka kaul entara pangan diri. Kekadang, sepasang laki bini ulih ngasaika pengerindu seduai iya majak chelap, kelebih agi lebuh seduai iya patut tan napi penanggul ba duit, penanggul ba pengerai, tauka cabaran ngemesaika anak. Nya alai, enti nuan udah kawin, baka ni nuan ulih nentuka “daun api Jehovah” mengkang mau ba tikah nuan? Dalam artikel tu, kitai deka berandauka tiga iti chara nuan ulih nentuka kaul nuan enggau kaling pengidup nuan mengkang tegap sereta chara nuan ulih ngembuan tikah ti lantang. c

3. Baka ni kaul ti tegap enggau Jehovah nulung pengerindu laki bini mengkang mau? (Pengajar 4:12) (Peda mega gambar.)

³ Ngambika “daun api Jehovah” mengkang mau, laki bini patut bebendar ngembuan kaul ti tegap enggau Jehovah. Baka ni kaul ti tegap enggau Jehovah nulung laki bini? Lebuh laki bini ngumbai kaul seduai iya enggau Jehovah amat penting, seduai iya deka keran nitihka jaku lalau ari Iya. Tu deka nulung laki bini nyeliah sereta mutarka penanggul ke ulih ngasuh pengerindu seduai iya nyadi chelap. (Bacha Pengajar 4:12.) Sida ke bisi kaul ti tegap enggau Jehovah mega deka bebendar neladan Iya sereta ngemansangka sifat ke diayanka Iya baka pemanah ati, penyabar, sereta sanggup ngampun. (Eps. 4:32–5:1) Lebuh laki bini ngayanka sifat ke baka tu, pengerindu seduai iya deka senang agi mau. Lena, siku menyadi indu ke udah kawin pengelama lebih ari 25 taun, madahka, “Senang agi deka rindu sereta bebasaka orang ke bisi kaul ti tegap enggau Jehovah.”

4. Nama kebuah Jehovah milih Josep enggau Maria nyadi apai indai Messiah ti deka datai?

⁴ Peratika siti chunto ari Bup Kudus. Lebuh Jehovah patut milih apai indai ke Messiah ti deka datai, Iya milih Josep enggau Maria ari semua peturun David. Nama kebuah? Seduai iya bisi kaul kediri empu enggau Jehovah, lalu Jehovah nemu Josep enggau Maria deka ngenuluka Iya ba pengawa tikah seduai iya. Kita ke laki bini, nama ulih dipelajarka kita ari Josep enggau Maria?

5. Nama ulih dipelajarka bala laki ari Josep?

⁵ Josep keran deka nitihka iring ari Jehovah, lalu nya ngasuh iya nyadi siku laki ti manah agi. Abis kurang bisi tiga kali iya nerima iring ari Petara bekaul enggau diri sebilik iya. Tiap kali iya nerima iring, iya ngasi enggau jampat, indah lebuh utai nya tusah ba iya. (Mat. 1:20, 24; 2:13-15, 19-21) Lebuh Josep nitihka iring ari Petara, iya ulih nyaga, nyukung, sereta nyediaka utai ke diguna Maria. Perundingka tu: utai ke digaga Josep tentu ngasuh Maria rindu sereta bebasa agi ngagai iya. Bala laki, nuan ulih neladan Josep lebuh nuan ngiga jaku lalau ari Bup Kudus kena nyaga kita sebilik. d Lebuh nuan nitihka jaku lalau tu, taja pan enti jaku lalau nya tusah, nuan ngayanka pengerindu ke bini nuan sereta negapka tikah nuan. Siku menyadi indu ba Vanuatu, ke udah kawin lebih ari 20 taun madahka: “Lebuh laki aku ngiga sereta nitihka iring ari Jehovah, nya ngasuh aku bebasa agi ke iya. Aku berasai likun, lalu aku ulih andalka pemutus ke digaga iya.”

6. Nama ulih dipelajarka bala bini ari Maria?

⁶ Maria bisi kaul iya empu enggau Jehovah. Iya empu nentuka pengarap iya tegap.  Iya amat nemu Jaku Petara enggau manah. Iya mega ngatur jam ngambika ulih berunding enggau dalam pasal utai ti dipelajarka iya. (Luk. 2:19, 51) Kitai ulih pechaya, kaul iya enggau Jehovah nulung iya nyadi siku bini ti manah. Kemayaharitu, mayuh bala bini bebendar neladan Maria. Ambika chunto, siku menyadi indu ke benama Emiko madahka: “Lebuh aku bedau kawin, aku nitihka jadual pengawa rohani aku empu. Pengudah aku kawin, laki aku besampi ke kami lalu ngulu ba pengawa belajarka Bup Kudus ba diri sebilik. Nya ngasuh aku sedar aku udah berengkah bepanggai ba iya kena ngereja utai nya ke aku. Ketegal nya, aku nemu aku empu patut nentuka kaul aku enggau Jehovah mengkang tegap. Nyadi diatu, aku ngatur jam ngambika aku ulih kediri enggau Jehovah baka besampi, macha Bup Kudus, sereta belematika runding Jehovah.” (Gal. 6:5) Bala bini, seraya kita terus negapka kaul kita enggau Jehovah, laki kita deka bisi mayuh agi kebuah muji sereta rinduka kita.—J-lam. 31:30.

7. Nama ulih dipelajarka laki bini ari Josep enggau Maria pasal begulai nyembah Jehovah?

⁷ Josep enggau Maria mega bekerejasama kena nentuka kaul seduai iya enggau Jehovah mengkang tegap. Seduai iya nemu kebuah begulai nyembah Jehovah enggau diri sebilik amat penting. (Luk. 2:22-24, 41; 4:16) Tu engka tusah dikereja, kelebih agi lebuh seduai iya bisi mayuh agi anak, tang seduai iya mujur ngereja nya. Tu teladan ti manah ke laki bini kemayaharitu! Enti nuan bisi bala anak baka Josep enggau Maria, nuan engka tusah deka datai gempuru tauka ngatur jam kena belajarka Bup Kudus ba diri sebilik. Nuan engka tusah agi ngatur jam kena belajar tauka besampi begulai enggau kaling pengidup nuan. Tang kingatka tu, lebuh seduai begulai nyembah Jehovah, seduai deka majak semak agi ngagai Iya sereta ngagai pangan diri. Nyadi, kenuluka meh pengawa sembah ngagai Jehovah.

8. Nama ulih digaga laki bini ke bisi penanggul ba tikah ngambika seduai iya bulih mayuh agi penguntung ari pengawa belajarka Bup Kudus ba diri sebilik?

⁸ Baka ni enti tikah nuan bisi penanggul? Nuan engka enda entu deka ngereja pengawa belajarka Bup Kudus ba diri sebilik. Enti pia, seduai ulih berengkah berandau pasal siti utai ti pandak sereta ngerinduka ati. Seduai patut bela setuju berandauka utai nya. Tu deka nulung nuan rindu agi ke kaling pengidup nuan sereta deka agi begulai nyembah Jehovah.

9. Nama kebuah laki bini patut meri awak begulai enggau pangan diri?

⁹ Laki bini, nuan mega ulih nentuka pengerindu nuan mengkang mau seraya nuan meri awak begulai enggau pangan diri. Lebuh nuan ngereja nya, tu deka nulung nuan nemu agi utai ba runding sereta asai ati kaling pengidup nuan. (P-kal. 2:24) Peratika utai ti ditemu Lilia enggau Ruslan enda lama pengudah seduai iya kawin, lebih ari 15 taun suba. Ku Lilia: “Kami sedar awak ke ulih dikena kami begulai enggau pangan diri kurang agi ari ke dijangka kami. Kami amat kisuk enggau kereja sekular, kereja ba rumah, sereta udah nya bala anak. Kami nemu enti kami enda magi awak ke pangan diri, kaul kami duai ulih nyadi lemi.”

10. Baka ni laki bini ulih nitihka jaku lalau ke dipadah ba Epesus 5:15, 16?

¹⁰ Nama ulih digaga laki bini kena nentuka seduai iya bisi awak begulai enggau pangan diri? Seduai engka patut netapka awak, ngambika ulih begulai enggau pangan diri. (Bacha Epesus 5:15, 16.) Siku menyadi lelaki ba Nigeria ke benama Uzondu madahka: “Lebuh aku ngatur pengawa aku, aku nyengkaumka awak begulai enggau bini aku. Aku nentuka awak  aku begulai enggau bini aku dikenuluka.” (Plp. 1:10) Peratika baka ni Anastasia, siku bini tuai ti ngabas ba Moldova, ngena awak iya enggau manah. Ku iya: “Aku nguji ngereja utai ti patut digaga aku maya laki aku kisuk enggau tanggung pengawa iya. Enggau nya, kami bisi awak begulai enggau pangan diri.” Tang baka ni enti jadual nuan ngasuh nuan tusah deka ngiga awak begulai enggau kaling pengidup nuan?

11. Nama pengawa ke digaga Akuila enggau Prisila begulai?

¹¹ Laki bini ulih belajar ari teladan Akuila enggau Prisila. Seduai iya amat dikerinduka mayuh bala menyadi Kristian ba abad keterubah. (Rom. 16:3, 4) Taja pan Bup Kudus nadai meri mayuh penerang pasal tikah seduai iya, tang iya bisi madahka seduai iya bekereja, nginjil, sereta nulung orang bukai begulai. (SKR. 18:2, 3, 24-26) Kebendar iya, tiap kali Bup Kudus nyebut pasal Akuila enggau Prisila, iya seruran nyebut nama seduai iya begulai.

12. Nama ulih digaga laki bini ngambika seduai iya bisi mayuh agi awak begulai enggau pangan diri? (Peda mega gambar.)

¹² Baka ni laki bini ulih neladan Akuila enggau Prisila? Perundingka pasal mayuh utai ke patut digaga nuan enggau kaling pengidup nuan. Kati seduai ulih ngereja nya begulai ari ke ngereja nya kediri? Ambika chunto, Akuila enggau Prisila nginjil begulai. Kati nuan suah ngaga pelan ngambika ulih nginjil begulai mega? Akuila enggau Prisila mega gawa begulai. Nuan enggau kaling pengidup nuan engka bisi kereja sekular ti bebida, tang kati seduai ulih ngaga kereja ba rumah begulai? (P-jar. 4:9) Lebuh seduai nulung pangan diri nembuka sesiti pengawa, seduai deka ngasaika diri baka siti tim lalu bisi peluang bejaku enggau pangan diri. Robert enggau Linda udah kawin lebih ari 50 taun. Ku Robert madah: “Kebendar iya, kami duai nadai mayuh awak begulai ba pengawa rekreasi. Tang lebuh aku nuchi pinggai lalu bini aku ngelap pinggai, tauka lebuh aku gawa ba kebun lalu Linda datai nulung aku, aku berasai amat gaga ati. Lebuh kami ngereja utai begulai, kaul kami rapat agi. Pengerindu kami duai ke pangan diri majak dalam.”

13. Ngambika ulih amat beserakup, nama patut digaga laki bini?

¹³ Taja pia, kingatka, lebuh laki bini begulai enggau pangan diri, nya enda seruran mai reti seduai iya deka majak rapat enggau pangan diri. Siku bini ari Brazil madahka: “Kemayaharitu, pengidup kitai amat sibuk, kitai senang ngumbai kitai benung begulai enggau pangan diri laban kitai diau ba rumah ti sama. Tang aku belajar bisi mayuh agi utai ke patut dikereja ari ke semina diau begulai. Aku mega patut meri perhatian ngagai utai ke diguna kaling pengidup aku.” Peratika baka ni Bruno enggau bini iya, Tays, nentuka diri meri perhatian ngagai pangan diri. Ku Bruno madahka: “Lebuh kami ngena awak begulai, kami enda meda  telefon tang kami ngena awak nya begulai enggau pangan diri.”

14. Enti laki bini enda rindu begulai enggau pangan diri, nama ulih digaga seduai iya?

¹⁴ Taja pia, baka ni enti nuan enggau kaling pengidup nuan enda rindu ngereja utai begulai? Seduai engka bisi minat ti enda sama, tauka seduai mega engka bisi ngereja utai ti enda entu dikerinduka pangan diri. Nama ulih digaga nuan? Peratika baru api ti disebut ba pun tadi. Lebuh api nya diidupka, iya enda terus mau. Nuan patut belubah-lubah nepu kayu ti besai agi ngagai api nya. Baka nya mega, nuan ulih ngena mimit awak ninting hari ngereja utai begulai enggau pangan diri. Kereja meh utai ti ngerinduka ati seduai, ukai utai ke ngasuh siku ari seduai ringat ngagai pangan diri. (Jas. 3:18) Lebuh seduai berengkah ngena mimit awak ke pangan diri, nyau kelama seduai ulih meda pengerindu seduai ke pangan diri deka majak dalam baru.

15. Nama kebuah basa nya penting kena nentuka laki bini mengkang rinduka pangan diri?

¹⁵ Basa amat penting dalam tikah. Iya baka oksigen ke nentuka api mengkang mau. Enti nadai oksigen, api deka jampat padam. Baka nya mega, enti laki bini enda ngayanka basa ngagai pangan diri, pengerindu seduai iya mega deka jampat chelap. Taja pia, laki bini ke bebendar ngayanka basa ngagai pangan diri, benung nentuka pengerindu seduai iya mengkang mau. Nuan engka ngumbai diri benung ngayanka basa, tang tu ukai poin iya. Poin ti penting nya: Kati kaling pengidup nuan ngasaika diri dipebasa? Penny enggau Aret udah kawin lebih ari 25 taun. Penny madahka: “Ketegal kami bebasaka pangan diri, suasana rumah kami penuh enggau pengerindu. Kami senang madahka asai ati ngagai pangan diri laban kami nemu kami bebasaka runding pangan diri.” Nyadi, nama ulih dikereja nuan kena nulung kaling pengidup nuan ngasaika diri amat dipebasaka nuan? Aram beratika teladan Abraham enggau Sarah.

16. Nama ulih dipelajarka bala laki ari teladan Abraham? (1 Peter 3:7) (Peda mega gambar.)

¹⁶ Abraham ngintu Sarah enggau basa. Iya mending sereta berundingka pasal asai ati Sarah. Bisi sekali, Sarah berasai amat tusah ati, lalu iya madah ngagai Abraham pasal asai ati iya. Sarah indah nyalahka Abraham ketegal penanggul nya. Kati Abraham ringat lalu nyebut utai ti enda manah ngagai Sarah? Enda. Iya nemu Sarah nya bini ti nunduk sereta nyukung pemutus ke digaga iya. Abraham mendingka iya lalu nguji mutarka penanggul nya. (P-kal. 16:5, 6) Nama ulih dipelajarka kitai? Bala laki, nuan bisi kuasa ngaga pemutus ba diri sebilik. (1 Kor. 11:3) Tang, nuan ulih ngayanka pengerindu lebuh nuan mendingka runding bini nuan sebedau ngaga pemutus, kelebih agi enti pemutus nya bisi kaul enggau bini nuan. (1 Kor. 13:4, 5) Ba maya ke bukai, bini  nuan engka berasai amat stres lalu engka patut madahka asai ati diri. Kati nuan bebasaka asai ati iya lalu ninga enggau manah? (Bacha 1 Peter 3:7.) Angela enggau Dmitry udah kawin nyauka 30 taun. Angela madahka chara laki iya ngasuh iya berasai dipebasa: “Dmitry seruran sedia deka ningaka aku lebuh aku berasai tusah ati tauka lebuh aku semina deka bejaku. Iya sabar enggau aku, taja pan ba maya nya aku enda ulih madahka asai ati diri enggau chara ti tenang.”

17. Nama ulih dipelajarka bala bini ari teladan Sarah? (1 Peter 3:5, 6)

¹⁷ Sarah bebasaka Abraham lebuh iya nyukung pemutus ke digaga Abraham. (P-kal. 12:5) Bisi sekali, Abraham ngaga pemutus deka ngayanka pengerah jari ngagai bala temuai ke datai enggau enda dijangka. Abraham ngasuh Sarah ngetu ngereja utai ti benung digaga iya lalu nyediaka mayuh roti. (P-kal. 18:6) Sarah enggau jejampat nyukung pemutus ke digaga Abraham. Bala bini, nuan ulih neladan Sarah enggau nyukung pemutus ke digaga laki nuan. Lebuh nuan ngereja nya, nuan deka negapka agi tikah nuan. (Bacha 1 Peter 3:5, 6.) Dmitry, ke disebut ba genteran sebedau tu madahka chara bini iya ngasuh iya berasai dipebasa. Ku Dmitry: “Aku beterima kasih ke usaha Angela ke nyukung pemutus aku, taja pan iya enda setuju enggau pemutus nya. Enti asil ari pemutus nya enda mujur, iya enda ngutuk aku.” Amat, kitai deka senang agi rinduka orang ke bebasaka kitai!

18. Baka ni laki bini bulih penguntung lebuh seduai iya bebendar nentuka pengerindu seduai iya mengkang mau?

¹⁸ Kemayaharitu, Sitan deka laki bini Kristian ngetu rinduka pangan diri. Iya nemu enti laki bini enda agi rinduka pangan diri, seduai iya engka berengkah ngenyauhka diri ari Jehovah. Taja pia, pengerindu ti bendar enda nemu lenyau! Nyadi, arapka pengerindu dalam tikah nuan baka pengerindu ke disebut ba Pelandai Solomon. Nya alai, bebendar meh ngenuluka Jehovah ba tikah nuan, meri awak begulai enggau pangan diri, sereta bebasaka asai ati enggau utai ke diguna pangan diri. Seraya nuan ngereja nya, tikah nuan deka mai mulia ngagai Jehovah, pun pengerindu ti bendar. Lalu baka api ke seruran mau, pengerindu nuan deka meruan belama iya.