ARTIKEL DIPELAJAR 22
Terus Bejalai ba “Jalai Raya Ngagai Pengudus”
“Jalai raya ti dikumbai ‘Jalai Raya Ngagai Pengudus,’ deka digaga dia.”—ISA. 35:8.
LAGU 31 Bejalai enggau Petara
DALAM ARTIKEL TU a
1-2. Nama pemutus ti penting ke patut digaga orang Judah ke diau ba Babilon? (Esra 1:2-4)
RAJA udah ngaga siti jaku gerah! Orang Judah ke nyadi orang tangkap ba Babilon pengelama kira-kira 70 taun, diatu udah bibas. Sida ulih pulai baru ngagai menua asal sida, iya nya menua Israel. (Bacha Esra 1:2-4.) Semina Jehovah aja ke ulih ngereja tu. Nama kebuah kitai ulih bejaku munyi nya? Babilon kesuah iya enda ngelepaska orang tangkap sida. (Isa. 14:4, 17) Tang Babilon udah dialahka, lalu raja ti baru udah madah ngagai orang Judah, sida ulih ninggalka menua nya. Ketegal nya, tiap iku orang Judah, kelebih agi bala tuai bilik, patut ngaga pemutus sekalika deka ninggalka Babilon tauka mengkang diau dia. Pemutus nya engka enda senang digaga. Nama kebuah?
2 Mayuh orang engka udah kelalu tuai deka ngaga pejalai ti jauh nya. Lalu mayuh orang Judah ada ba Babilon. Sida enda kala diau ba endur bukai. Ba sida, menua Israel nya semina menua aki ini sida. Sekeda orang Judah mega engka udah nyadi amat kaya ba Babilon. Nya kebuah sida engka ngasaika nya tusah deka ninggalka rumah sida ti manah tauka pengawa dagang sida lalu diau ba endur ti enda ditemu sida.
3. Baka ni Jehovah deka merekatka orang Judah ke pulai baru ngagai menua Israel?
3 Orang Judah ke tetap ati nemu, penguntung ke diulih sida lebuh pulai baru ngagai menua Israel jauh besai agi ari sebarang pengorbanan ke digaga sida. Berekat ti pemadu besai nya nyengkaum sembah sida. Ba Babilon, bisi lebih ari 50 buah rumah sembiang petara ti pelesu, tang nadai siti pan Rumah Sembiang ke Jehovah ba menua nya. Ba dia, nadai alta ke ulih dikena orang Israel meri pemeri ke patut diberi nitihka Adat Moses, lalu nadai bala imam ke diatur kena meri pemeri nya. Ba menua nya mega, bisi mayuh agi orang ke nyembah petara ti pelesu enti dibandingka enggau penyampau orang ke nyembah Jehovah tauka bebasaka standard Iya. Nya alai, orang Judah ke nangika Petara enda sabar deka pulai baru ngagai menua asal sida. Ba dia, sida ulih mulaika baru sembah ti tuchi.
4. Nama tulung ke disemayaka Jehovah ngagai orang Judah ke pulai baru ngagai menua Israel?
4 Pejalai ti tusah ari Babilon ngagai menua Israel engka begunaka kira-kira empat bulan, tang Jehovah besemaya sebarang penanggul ke ulih ngachau pejalai sida deka dibuai magang. Isaiah nulis: ‘Sediaka jalai di menua puang ke Jehovah! Gaga jalai di menua puang ke Petara kitai! . . . Rataka semua menua ti belenggak-lenggung.’ (Isa. 40:3, 4) Gambarka tu: siti jalai raya nengah menua ti puang. Jalai nya rata lalu ba entara bukit. Orang ke bejalai jauh tentu rindu nengah jalai nya! Sida tentu berasai senang agi bejalai ba jalai ti lurus ari ke niki bukit lalu nurun ngagai lebak. Pejalai nya mega engka jampat agi.
5. Jalai raya entara Babilon enggau menua Israel dikumbai jalai nama?
5 Kemayaharitu, mayuh jalai raya ulih dikelala nengah nama tauka lumur. Jalai raya ke ditulis Isaiah mega bisi nama. Ayat nya madahka: “Jalai raya ti dikumbai ‘Jalai Raya Ngagai Pengudus,’ deka digaga dia. Nadai orang ke bedosa deka bejalai nengah jalai nya.” (Isa. 35:8) Nama reti semaya tu ngagai orang Israel kelia? Lalu nama reti iya ke kitai kemayaharitu?
“JALAI RAYA NGAGAI PENGUDUS”—SUBA ENGGAU DIATU
6. Nama kebuah jalai raya tu dikumbai kudus?
6 “Jalai Raya Ngagai Pengudus”—nya nama ti chukup manah! Nama kebuah jalai nya dikumbai kudus? “Orang ke bedosa” nya orang Judah ke ngereja ulah ti kamah, nyembah engkeramba, tauka ngereja dosa besai ti bukai. Sida enda dikemendarka diau ba menua Israel. Orang Judah ke pulai baru deka nyadi ‘orang ke kudus’ ngagai Petara sida. (U-dat. 7:6) Tang tu ukai reti iya orang ke ninggalka Babilon enda ibuh ngaga ubah kena ngelantangka ati Jehovah.
7. Nama sekeda ubah ke patut digaga orang Judah? Beri siti chunto.
7 Baka ke dipadah tadi, mayuh ari orang Judah ada ba Babilon, lalu mayuh ari sida udah biasa enggau chara orang Babilon berunding sereta standard sida. Betaun-taun pengudah orang Judah ti keterubah pulai ngagai menua Israel, Esra nyau nemu sekeda orang Judah udah jadi enggau orang indu ke enda nyembah Jehovah. (P-sut. 34:15, 16; Esr. 9:1, 2) Udah nya, Gabenor Nehemiah tekenyit lebuh nemu bala anak ke ada ba Israel nadai belajarka bansa jaku orang Judah. (U-dat. 6:6, 7; Neh. 13:23, 24) Baka ni bala nembiak tu ulih belajar rindu sereta nyembah Jehovah enti sida enda meretika bansa jaku Hebrew? Jaku Hebrew nya jaku utama ke dikena nulis Jaku Petara. (Esr. 10:3, 44) Nyadi, orang Judah ba dia patut ngaga ubah ti besai, tang ubah tu senang agi digaga ba menua Israel, laban ba endur dia sembah ti tuchi belubah-lubah dipulaika baru.—Neh. 8:8, 9.
Kenyau ari taun 1919 M., bejuta iku lelaki, indu, sereta bala anak udah ninggalka Babilon ti Besai, lalu udah berengkah bejalai ba “Jalai Raya Ngagai Pengudus” (Peda genteran 8)
8. Nama kebuah utai ti nyadi kelia patut diperatika kitai kemayaharitu? (Peda gambar ba mua majalah.)
8 Sekeda orang engka berunding, ‘Semua utai nya amat ngalitka ati, tang kati utai ke nyadi ba orang Judah kelia bisi mai reti ke kitai kemayaharitu?’ Au, bisi, laban utai ke dikereja kitai ulih dibandingka enggau pejalai ba “Jalai Raya Ngagai Pengudus.” Enda ngira kitai dipilih ngagai serega tauka “raban bedus ti bukai,” kitai patut mengkang ba “Jalai Raya Ngagai Pengudus.” Iya deka nulung kitai terus nyembah Jehovah diatu sereta ba jemah ila lebuh Perintah Petara mai utai ti manah ke dunya tu. b (Jhn. 10:16) Kenyau ari taun 1919 M., bejuta iku lelaki, indu, enggau anak udah ninggalka Babilon ti Besai, iya nya gerempung pengarap pelesu sedunya. Sida udah berengkah bejalai ba “Jalai Raya Ngagai Pengudus” nya. Nuan mega engka siku ari sida. Orang udah berengkah nengah jalai raya nya kira-kira 100 taun suba, tang orang bukai udah berengkah nyediaka jalai nya betaun-taun sebedau nya.
NYEDIAKA JALAI RAYA
9. Nitihka Isaiah 57:14, baka ni “Jalai Raya Ngagai Pengudus” nya disediaka?
9 Ba orang Judah ke ninggalka Babilon, Jehovah nentuka utai ti nekul jalai sida dibuai. (Bacha Isaiah 57:14.) Baka ni enggau “Jalai Raya Ngagai Pengudus” kemayaharitu deh? Beratus taun sebedau taun 1919, Jehovah udah berengkah ngena bala lelaki ke amat bebasaka Iya ngambika nyediaka jalai kena orang bukai pansut ari Babilon ti Besai. (Banding Isaiah 40:3.) Sida ngereja utai ti patut ngambika ila orang ti lurus ulih ninggalka pengarap ti pelesu lalu nyembah Jehovah begulai enggau nembiak Iya. Nama utai ke disengkaum ba pengawa nyedia tu? Peratika sekeda pengawa nyedia ke udah dikereja.
Pengelama beratus taun, bala lelaki ke amat bebasaka Petara udah nulung nyediaka jalai pansut ari Babilon ti Besai (Peda genteran 10-11)
10-11. Baka ni pengawa nyelak enggau nyalin Bup Kudus udah nulung ngerembaika penemu pasal Bup Kudus? (Peda mega gambar.)
10 Pengawa nyelak. Nyentuk ngagai kira-kira taun 1450, Bup Kudus udah disalin ngena jari. Pengawa tu begunaka mayuh awak, lalu salinan Bup Kudus amat jarang bisi sereta kelalu mar. Tang lebuh mesin nyelak dikena ngasilka salinan Bup Kudus, tu ngasuh salinan Bup Kudus senang agi diasilka dalam penyampau ti mayuh sereta ulih disadung ngagai mayuh orang.
11 Pengawa nyalin. Pengelama beratus taun, mayuh Bup Kudus semina bisi dalam jaku Latin, lalu semina orang ke bepelajar aja ulih meretika jaku nya. Taja pia, lebuh Bup Kudus mayuh agi dichelak, bala lelaki ke amat bebasaka Petara bebendar nyalin Bup Kudus ngagai mayuh agi bansa jaku ke ditemu orang. Diatu, bala pemacha Bup Kudus ulih mandingka utai ti diajar bala tuai pengarap enggau utai ti bendar ke diajar Bup Kudus.
Bala lelaki ke amat bebasaka Petara udah nulung nyediaka jalai pansut ari Babilon ti Besai (Peda genteran 12-14) c
12-13. Beri siti chunto ke nunjukka chara bala nembiak Bup Kudus ti lurus ba abad ke-19, berengkah mantaika pemula ke diajar pengarap ti pelesu.
12 Perengka belajarka Bup Kudus. Bala nembiak Bup Kudus enggau bejimat belajarka mayuh utai ari utai ke dibacha sida dalam Jaku Petara. Tang bala tuai pengarap gerija amat ringat lebuh bala nembiak Bup Kudus tu berengkah bejaku enggau orang bukai pasal utai ti udah dipelajarka sida. Ambika chunto, ba abad ke-19, beberapa iku bala lelaki ke lurus berengkah ngeluarka surat mit ke mantaika pemula ti diajar ba gerija.
13 Kira-kira taun 1835, siku lelaki ke nangika Petara ke benama Henry Grew ngeluarka siti surat mit ke berandauka pasal pendiau orang ke udah mati. Dalam surat mit nya, iya nunjukka ari Bup Kudus, sesiku orang bisi pengidup ti enda nemu mati enti Petara meri nya ke iya, ukai ketegal iya ada enggau nyawa ti enda nemu mati baka ke diajar mayuh gerija. Ba taun 1837, siku tuai pengarap ke benama George Storrs tetemuka siti salinan surat mit lebuh iya nepan kereta api. Iya macha surat mit nya lalu yakin iya udah tetemuka siti pemendar ti penting. Iya mutuska diri deka bekunsika utai ti udah dipelajarka iya. Ba taun 1842, iya meri beberapa iti cheramah ke bekaul enggau tema “Siti Tanya—Kati Orang ke Jai Nya Enda Nemu Mati?” Siku lelaki ke belajar enggau George Storrs nya siku nembiak lelaki ke benama Charles Taze Russell.
14. Baka ni Menyadi Russell enggau bala bakih iya bulih penguntung ari pengawa nyediaka jalai ke udah digaga suba? (Peda mega gambar.)
14 Baka ni Menyadi Russell enggau bala bakih iya bulih penguntung ari pengawa nyediaka jalai ke udah digaga suba? Lebuh sida ngaga pansik, sida ulih ngena kamus, bup pansik, sereta mayuh macham salin Bup Kudus. Semua perengka nya udah disediaka sebedau jeman sida. Sida mega bulih penguntung ari pansik Bup Kudus ke digaga bala lelaki baka Henry Grew, George Storrs, enggau ke bukai. Menyadi Russell enggau bala bakih iya bisi nulung neruska pengawa nyediaka jalai nya lebuh sida ngasilka mayuh bup sereta surat mit ke berandauka utai ti dipadah Bup Kudus.
15. Nama pemansang ti penting ke nyadi ba taun 1919?
15 Ba taun 1919, Babilon ti Besai lenyau kuasa atas nembiak Petara. Ba taun nya, “ulun ke tetap ati sereta bepenemu-dalam” berengkah gawa ngambika orang ke lurus ulih berengkah bejalai ba “Jalai Raya Ngagai Pengudus.” (Mat. 24:45-47) Pengawa nyediaka jalai ke digaga orang bukai suba, udah nulung orang ke lurus berengkah bejalai nengah jalai nya. Sida deka belajar mayuh agi pasal Jehovah enggau tuju Iya. (J-lam. 4:18) Sida mega ulih ngasuh pengidup sida sejalai enggau peneka Jehovah. Jehovah enda ngarapka bala nembiak Iya ngaga ubah ti patut sekaligus. Tang, Iya belubah-lubah nulung bala nembiak Iya ngaga ubah. (Peda kutak “ Jehovah Belubah-Lubah Nulung Bala Nembiak Iya Ngaga Ubah.”) Semua kitai deka gaga ati lebuh kitai ulih ngelantangka ati Petara kitai ba semua utai ti dikereja kitai!—Kol. 1:10.
“JALAI RAYA NGAGAI PENGUDUS” AGI DIBUKA
16. Kenyau ari taun 1919, nama pengawa ke udah digaga ba “Jalai Raya Ngagai Pengudus” ngambika jalai nya mengkang manah? (Isaiah 48:17; 60:17)
16 Tiap iti jalai raya patut suah diaduka baru ngambika mengkang manah. Kenyau ari taun 1919, pengawa nyediaka “Jalai Raya Ngagai Pengudus” udah diteruska ngambika mayuh agi orang ulih pansut ari Babilon ti Besai. Ulun ke tetap ati sereta bepenemu-dalam ke baru dipilih berengkah gawa, lalu ba taun 1921, sida ngeluarka siti perengka belajarka Bup Kudus kena nulung orang ke baru belajar pemendar ari Bup Kudus. Litaricha ke betajuk The Harp of God, udah disadung nyauka enam juta salinan dalam 36 bengkah bansa jaku lalu mayuh orang belajarka pemendar ari litaricha nya. Baru-baru tu, kitai bisi litaricha ke baru ke dikena belajarka Bup Kudus, iya nya bup Idup enggau Lantang Belama Iya! Sepemanjai Hari ti Penudi tu, Jehovah udah ngena gerempung Iya ngambika nyediaka iring ari Jaku Petara. Tu nulung semua kitai ngambika terus bejalai ba “Jalai Raya Ngagai Pengudus.”—Bacha Isaiah 48:17; 60:17.
17-18. Kini penunga “Jalai Raya Ngagai Pengudus”?
17 Kitai engka ulih madah, lebuh sesiku orang setuju deka belajarka Bup Kudus, iya bisi peluang bejalai ba “Jalai Raya Ngagai Pengudus.” Sekeda orang semina ngaga pejalai ti pandak aja, lalu udah nya ninggalka jalai raya nya. Ke bukai keran deka neruska pejalai nya nyentukka sida datai ngagai destinasi sida. Nama destinasi nya?
18 Ba sida ke bisi harapan ngagai serega, “Jalai Raya Ngagai Pengudus” mai sida ngagai “paradais Petara” ba serega. (Pem. 2:7) Ba sida ke bisi harapan idup ba dunya, jalai raya nya deka mai sida ngagai pengujung 1,000 taun Kristus merintah. Maya nya, semua orang deka nyadi sempurna. Enti nuan benung bejalai ba jalai raya nya diatu, anang berundingka utai ti udah dilengkaka nuan. Tu deka nulung nuan terus bejalai ba jalai raya nya. Lalu anang ninggalka jalai raya nya nyentukka nuan udah nembuka pejalai nuan ti nuju ngagai dunya ti baru. Kami ngarapka pejalai nuan likun.
LAGU 24 Aram Niki Ngagai Bukit Jehovah
a Jehovah nyemaka jalai ari Babilon ngagai Israel nya “Jalai Raya Ngagai Pengudus.” Kemayaharitu mega, kati Jehovah bisi nyediaka jalai ke bala nembiak Iya? Au, bisi! Kenyau ari taun 1919 M., bejuta iku orang udah ninggalka Babilon ti Besai lalu berengkah bejalai ba “Jalai Raya Ngagai Pengudus.” Semua kitai mesti mengkang ba jalai nya nyentukka kitai datai ba destinasi ti penudi, iya nya ba dunya ti baru.
b Peda Nubuat Yesaya—Terang bagi Seluruh Umat Manusia II, lamb. 56-57, dalam jaku Indonesia.
c PENERANG PASAL GAMBAR: Menyadi Russell enggau bala bakih iya ngena perengka belajarka Bup Kudus ke udah disediaka sebedau jeman sida.