1-3. (a) Nama runding kitai pasal pemendar Bup Kudus? Terangka. (Peda gambar ba pun artikel.) (b) Nama deka dipejuraika kitai ba artikel tu?

KEMAYAHARITU, orang suah meli barang ari kedai lalu udah nya mulaika iya baru. Lalu lebuh orang meli barang nengah online, sida deka agi mulaika iya. Sida engka enda tentu rinduka barang nya tauka barang nya rusak. Nya alai sida deka nukar iya enggau barang bukai tauka minta duit sida dipulaika.

² Kitai enggai ngereja tu ngagai pemendar Bup Kudus. Enti kitai udah “meli” iya, kitai enggai “nyual” iya, iya nya enti kitai udah belajarka pemendar, kitai enggai ninggalka iya. (Bacha Jaku Dalam 23:23; 1 Tim. 2:4) Baka ke dikerandauka kitai ba artikel sebedau tu, kitai ngena mayuh jam belajarka pemendar. Kitai mega engka ngelengkaka kereja ke ngasuh kitai bulih mayuh duit. Lalu kitai engka patut ngubah kaul kitai enggau orang bukai, ngubah ulah sereta chara kitai  berunding, tauka badu nitihka adat enggau pengawa ti enda ngerinduka ati Jehovah. Tang berekat ke diulih kitai ketegal nerima pemendar nya besai agi ari sebarang utai ti dilengkaka kitai.

³ Jesus meri siti sempama pasal seiku sedagar ke ngiga batu mutiara. Lebuh iya tetemuka sigi batu mutiara ti berega, iya jampat-jampat nyual semua utai ti dikemisi iya ngambika ulih meli batu mutiara nya. Batu mutiara nya ngambarka pemendar pasal Perintah Petara. Nya alai, Jesus nunjukka pemendar nya berega amat ba orang ke ngiga iya. (Mat. 13:45, 46) Lebuh kitai baru belajarka pemendar, iya nya, pemendar pasal Perintah Petara enggau semua pemendar bukai ti berega ari Bup Kudus, kitai mega sanggup ngelengkaka sebarang utai ngambika tau bulih iya. Enti kitai terus ngumbai pemendar nya berega, kitai tentu enggai ninggalka iya. Tang sayau amat, sekeda ari nembiak Petara enda agi ngumbai pemendar nya berega lalu indah ninggalka iya. Kitai tentu enggai ngereja nya! Kitai patut nitihka jaku ajar Bup Kudus ke ngasuh “diau nitihka pemendar.” (Bacha 3 John 2-4.) Reti nya kitai ngenuluka pemendar lalu nunjukka nya ba pengidup kitai. Tang nama kebuah sereta baka ni orang engka “nyual,” tauka ninggalka, pemendar? Baka ni kitai ulih nentuka diri enda ngereja tu? Lalu baka ni kitai ulih keran agi deka “diau nitihka pemendar”?

4. Maya jeman Jesus, nama kebuah sekeda orang enda terus nitihka pemendar?

⁴ Maya jeman Jesus, sekeda orang ke udah nerima pemendar enda terus nitihka pemendar. Ambika chunto, pengudah Jesus ngaga kereja ajih lalu meri orang mayuh makai, sida nitihka Jesus ngagai seberai Danau Galili. Tang udah nya Jesus nyebut utai ti ngenyitka ati sida: ‘Enti kita enda makai tubuh Anak Mensia, lalu enda ngirup darah iya, kita nadai pengidup dalam kita.’ Ari ke ngasuh Jesus nerangka reti jaku nya, ku sida bejaku: “Ajar tu kelalu mar. Sapa ulih nerima ajar tu?” Ketegal tu, ‘mayuh murid Jesus ninggalka iya, lalu enggai agi bejalai enggau iya.’—Jhn. 6:53-66.

5, 6. (a) Nama kebuah sekeda orang ngenyauhka diri ari pemendar? (b) Gambarka baka ni orang ulih limpang ari pemendar?

⁵ Tang sayau amat, sekeda orang kemayaharitu mega ninggalka pemendar. Nama kebuah? Sekeda ari sida engka enda nyamai ati enggau penemu baru pasal siti-siti ayat Bup Kudus tauka utai ti disebut tauka dikereja menyadi Kristian ke dikelala sida. Sekeda nya engka enggai orang ngerara sida ngena Bup Kudus, tauka sida enda sebulu enggau menyadi Kristian. Lalu bisi nya engka nitihka ajar ti bula ari orang ke limpang ari Petara sereta orang ke nyebut utai ti bula pasal kitai. Tu sekeda kebuah orang deka ngenyauhka diri ari Jehovah enggau bala menyadi Kristian. (Heb. 3:12-14) Manah agi enti sida arapka Jesus, baka ke digaga Peter! Lebuh orang mayuh tekenyit ninga jaku Jesus, Jesus nanya bala rasul iya sekalika sida mega deka ninggalka iya. Peter nyaut: ‘Tuan, sapa patut digagai kami? Nuan ngembuan jaku ti meri pengidup ti meruan belama iya.’—Jhn. 6:67-69.

⁶ Sekeda orang belubah-lubah limpang ari pemendar, lalu sida enda sedarka tu. Orang ke ninggalka pemendar deka baka  perau ti belubah-lubah anyut ari tebing sungai. Bup Kudus ngasuh kitai bejimat ngambika “enda limpang.” (Heb. 2:1) Selalu iya, orang ke limpang ukai sengaja ngereja nya. Tang iya nejuka kaul iya enggau Jehovah nyadi lemi, lalu nyau kelama iya lenyau kaul nya. Baka ni kitai ulih nentuka tu enda nyadi ba kitai?

7. Nama deka nulung kitai ngambika enda nyual pemendar?

⁷ Ngambika terus nitihka pemendar, kitai enda tau enda nerima sereta ngasika semua utai ti disebut Jehovah. Kitai enda tau enda ngenuluka pemendar ba pengidup lalu nitihka prinsip Bup Kudus ba semua utai ti dikereja kitai. Dalam sampi, Raja David besemaya ngagai Jehovah: “Aku diau nitihka pemendar Nuan.” (Mas. 25:5) David keran deka nitihka pemendar, lalu pia mega enggau kitai. Enti enda, nya engka ngujungka kitai berengkah berundingka utai ti dilengkaka kitai ketegal pemendar, lalu indah dekaka sekeda utai nya baru. Tang kitai enda ulih milih ni bagi pemendar Bup Kudus ke deka tauka ke enggai dititihka. Kitai enda tau enda nitihka “semua pemendar.” (Jhn. 16:13) Ba artikel sebedau tu, kitai berandauka lima iti utai ke engka dilengkaka kitai ngambika ulih belajar sereta nitihka pemendar. Diatu kitai deka meda baka ni kitai ulih nentuka diri enda pulai baru ngagai utai ti udah dilengkaka kitai.—Mat. 6:19.

8. Baka ni jam ke enda dikena enggau manah ulih ngasuh menyadi Kristian limpang ari pemendar? Beri siti chunto.

⁸ Jam. Ngambika enda limpang ari pemendar, kitai enda tau enda ngena jam enggau manah. Enti enda bejimat, kitai engka ngena kelalu mayuh jam ba rekreasi, hobi, meda Internet, tauka meda TV. Taja pan semua utai tu baka ke enda salah, tang nya engka nyau ngambi jam ke dikena kitai belajar sereta ba pengawa nginjil. Tu utai ke nyadi ba Emma. * (Peda nota kaki.) Kenyau ari mit, iya rindu nepan kuda lebuh iya bisi awak. Tang iya berengkah enda nyamai ati enggau jam ke dikena iya ba hobi, lalu berunding deka ngaga ubah ba utai ti patut dikenuluka iya. Emma mega belajar ari cherita pengidup Cory Wells, seiku menyadi Kristian indu ke kala enggau main rodeo. * (Peda nota kaki.) Diatu Emma ngena mayuh agi jam gawa ke Jehovah, begulai enggau diri sebilik sereta bala pangan ke mega nyembah Jehovah. Iya berasai rapat agi enggau Jehovah lalu gaga ati nemu diri ngena jam enggau manah.

9. Baka ni kitai engka nyau beberatka pengaya?

⁹ Pengaya. Ngambika terus nitihka pemendar, kitai enda tau kelalu beberatka pengaya. Pengudah belajarka pemendar, kitai nemu gawa ke Jehovah nya beguna agi ari pengaya, lalu kitai gaga ati ngelengkaka sekeda pengaya ketegal  pemendar. Tang nyau kelama, kitai engka meda orang meli perengka elektronik ke pemadu baru tauka sida lantang ati ngena utai bukai ke ulih dibeli sida. Kitai engka belabuh ngasaika diri tinggal ba pekara ke baka nya. Kitai engka enda agi puas ati enggau utai ke dikemisi lalu berengkah ngumpul pengaya, ukai beberatka pengawa ke Jehovah. Tu ngingatka kitai utai ke nyadi ba Demas. Iya balat angkunka “dunya” nya alai iya ninggalka pengawa ke dikereja iya enggau rasul Paul. (2 Tim. 4:10) Demas engka angkunka pengaya lebih ari gawa ke Petara. Tauka iya engka enggai agi ngelengkaka sekeda utai ngambika gawa enggau Paul. Nama ulih dipelajarka kitai? Suba kitai engka angkunka pengaya. Tang enti kitai enda bejimat, pengangkun ke pengaya ulih tumbuh baru ba ati kitai, lalu majak balat nyentukka kitai lenyau pengerindu ke pemendar.

10. Nama utai ti enda tau enda dilaban kitai?

¹⁰ Kaul enggau orang bukai. Ngambika terus nitihka pemendar, kitai enda tau nejuka orang ke enda nyembah Jehovah ngelimpangka kitai. Lebuh kitai belajarka pemendar, kaul kitai enggau bala pangan sereta diri sebilik ke ukai Saksi berubah. Sekeda ari sida engka bebasaka pengarap baru kitai, tang sekeda nya engka nyakal pengarap nya. (1 Pet. 4:4) Amat, kitai enggau naka ulih begulai manah sereta siru enggau diri sebilik. Tang kitai enda tau melakangka standard Jehovah ketegal deka ngenyamaika ati sida. Lalu baka ke dipadah ba 1 Korint 15:33, pangan rapat kitai patut orang ke rinduka Jehovah.

11. Baka ni kitai ulih nyeliahka runding enggau ulah ti enda tuchi?

¹¹ Runding enggau ulah ti enda tuchi. Ngambika terus nitihka pemendar, kitai patut tuchi, tauka beresi, ba mata Jehovah. (Isa. 35:8; bacha 1 Peter 1:14-16.) Lebuh belajarka pemendar, kitai ngaga ubah ba pengidup ngambika ulih nitihka standard Bup Kudus. Sekeda ari kitai ngaga ubah ti besai. Tang kitai patut bejimat ngambika enda nyilih pengidup kitai ti tuchi enggau pengidup ti kamah. Nama ulih nulung kitai ngelaban pengingin deka ngereja utai ti kamah? Pikirka utai ti udah diberi Jehovah ngambika kitai ulih tuchi. Iya meri nyawa Anak ti dikesayauka Iya, Jesus Kristus! (1 Pet. 1:18, 19) Ngambika kitai mengkang beresi ba mata Jehovah, kitai patut seruran ingat genselan tebus Jesus nya utai ti berega.

12, 13. (a) Nama kebuah kitai enda tau enda ngembuan runding ti sebaka enggau Jehovah pasal hari besai? (b) Nama deka dipejuraika kitai diatu?

¹² Adat enggau pengawa ti enda dikerinduka Petara. Diri sebilik, orang ke enggau sama gawa, sereta orang ke sama sekula engka nguji deka mai kitai sama enggau sida ngintu pengerami baka parti hari pengada tauka ngintu hari besai. Nama ulih nulung kitai ngambika enda alah dibai nitihka adat sereta ngintu hari besai ke enda ngerinduka ati Jehovah? Kitai patut seruran ingatka kebuah Jehovah enda nerima hari besai nya. Kitai ulih ngiga pansik ba litaricha kitai sereta ngingatka diri empu baka ni sekeda hari besai nya berengkah. Lebuh belematika kebuah Bup Kudus enda ngasuh ngintu hari besai nya, kitai pechaya kitai nitihka ‘utai ti ngerinduka ati Tuan.’ (Eps. 5:10) Enti kitai arapka Jehovah enggau Jaku Iya, kitai enda nangika utai ti dipikir orang.—J-lam. 29:25.

 ¹³ Kitai ngarapka diri terus nitihka pemendar belama iya. Nama ulih nulung kitai keran agi deka terus nitihka pemendar? Bisi tiga iti utai ke ulih digaga kitai.

14. (a) Baka ni terus belajarka Bup Kudus ulih nulung kitai enda ninggalka pemendar? (b) Nama kebuah kitai begunaka penemu-dalam, jaku ajar, enggau ati ti mereti?

¹⁴ Kesatu, terus belajarka Bup Kudus, lalu perundingka utai ti dipelajarka nuan enggau dalam. Seruran magi jam dikena belajar. Bendar agi nuan belajar, dalam agi pengerindu nuan ke pemendar, lalu anang ninggalka iya. Jaku Dalam 23:23 ngasuh kitai ‘meli pemendar’ sereta mega meli “penemu-dalam, jaku ajar, enggau ati ti mereti.” Nemu pemendar Bup Kudus aja enda chukup. Kitai patut ngena iya ba pengidup. Lebuh kitai bulih pemereti ati, kitai ngempungka semua utai ti dipelajar kitai enggau utai ti udah ditemu. Penemu-dalam meransang kitai ngereja utai ti ditemu kitai. Kadang-kadang pemendar meri jaku ajar ngagai kitai. Jaku ajar nunjukka ni bagi utai ke patut diubah. Kitai patut jampat nitihka jaku ajar. Bup Kudus ngumbai iya berega agi ari pirak.—J-lam. 8:10.

15. Baka ni pemendar ngelindung kitai baka belulang?

¹⁵ Kedua, keran nitihka pemendar ba pengidup ninting hari. Bup Kudus mandingka pemendar enggau belulang ke dikena soldadu. (Eps. 6:14) Maya jeman Bup Kudus, lebuh soldadu beperang, belulang ngelindung iya seagi-agi belulang nya ditanchang rat. Enti gerah, belulang enda ulih ngelindung iya. Baka ni pemendar ulih ngelindung kitai baka belulang? Enti kitai seruran semak enggau pemendar Bup Kudus, pemendar deka ngelindung kitai ari runding ti salah lalu deka nulung kitai ngaga pemutus ti manah. Lebuh bisi penanggul ti besai tauka bisi pengingin deka ngereja utai ti salah, pemendar Bup Kudus deka nulung kitai keran agi ngereja utai ti ngena. Baka soldadu ke enggai nurun beperang enti nadai belulang, kitai enggai ninggalka pemendar ke disemaka baka belulang. Kitai nentuka diri nitihka pemendar Bup Kudus ba semua pekara dalam pengidup kitai. Soldadu mega deka nangkin pedang ba belulang iya. Aram kitai meda baka ni kitai ulih ngereja utai ti sama.

16. Baka ni ngajar pemendar nulung kitai terus nitihka pemendar?

 ¹⁶ Ketiga, enggau naka ulih ngajar pemendar Bup Kudus ngagai orang. Bup Kudus disemaka baka pedang. Baka soldadu ke nangkin pedang iya enggau rat, kitai patut bepegai rat ba Jaku Petara. (Eps. 6:17) Semua kitai ulih nyadi pengajar ti manah agi, “ngajar pesan ti bendar ngena jalai ti betul.” (2 Tim. 2:15) Lebuh kitai ngena Bup Kudus ngajar orang, kitai nemu pemendar enggau mayuh agi lalu rindu agi ke iya. Lalu kitai keran agi deka terus nitihka pemendar.

17. Nama kebuah pemendar Bup Kudus berega ba nuan?

¹⁷ Pemendar nya pemeri ti berega ari Jehovah. Pemendar nulung kitai ngembuan kaul ti rapat enggau Jehovah. Nya utai ti pemadu berega. Jehovah udah ngajar kitai mayuh utai, tang nya baru pun aja! Iya besemaya deka terus ngajar kitai belama iya. Nya alai, jaga pemendar enggau manah baka nuan ke nyaga batu mutiara ti berega. Terus ‘meli pemendar, lalu anang nyual iya.’ Lalu baka David, nuan deka bepegai ba semaya tu ngagai Jehovah: “Aku diau nitihka pemendar Nuan.”—Mas. 25:5.