1, 2. (a) Nama utai ti pemadu berega ba pengidup nuan? (b) Nama sekeda pemendar ti berega ba kitai, lalu nama kebuah? (Peda gambar ba pun artikel.)

NAMA utai ti pemadu berega ba pengidup nuan? Utai ti pemadu berega ba kitai ke nyembah Jehovah nya kaul kitai enggau Iya. Kitai enggai ngelengkaka kaul kitai enggau Jehovah ketegal utai bukai. Pia mega, pemendar ari Bup Kudus nya utai ti berega ba kitai laban nya nulung kitai nyadi pangan Jehovah.—Kol. 1:9, 10.

² Jehovah nya Pengajar ti Pemadu Tinggi ke ngajar kitai mayuh pemendar ti berega nengah Jaku Iya, Bup Kudus. Jehovah ngajar kitai pemesai reti nama Iya sereta madah pasal kualiti Iya ti badas. Iya madahka Diri rinduka kitai, nya kebuah Iya meri nyawa Anak ti dikesayauka Iya ngagai kitai. Jehovah mega ngajar kitai pasal Perintah Petara. Iya meri kitai pengadang ke jemah ila, nemuka nya di serega ke sida  ti dipilih kin tauka ba Paradais di bumi ke “bedus ti bukai.” (Jhn. 10:16) Jehovah ngajar kitai chara patut idup. Kitai ngumbai semua pemendar tu reta laban sida nulung kitai rapat enggau Penempa kitai lalu meri kitai tuju ba pengidup.

3. Kati Jehovah bisi minta bayar enti kitai belajarka pemendar?

³ Jehovah nya Petara ti gerah jari. Nya alai Iya meri nyawa Anak Iya Empu ke kitai. Lebuh Jehovah meda orang ngiga pemendar, Iya nulung sida tetemuka pemendar. Lalu Iya nadai minta bayar enti kitai belajarka pemendar. Bisi sekali, seiku lelaki ke benama Simon deka meri rasul Peter duit ngambika iya mega bisi kuasa meri orang bukai roh kudus. Peter nunjukka penemu lelaki nya salah lalu madahka: ‘Awakka duit nuan enggau nuan empu sama mati, laban nuan ngumbai diri ulih meli pemeri Petara ngena duit!’ (SKR. 8:18-20) Nya alai, nama reti ‘meli pemendar’?

4. Nama deka dipelajarka kitai pasal pemendar ba artikel tu?

⁴ Bacha Jaku Dalam 23:23. Kitai patut bebendar belajarka pemendar ari Bup Kudus. Kitai engka ngelengkaka utai bukai ngambika bulih pemendar. Lalu pengudah ‘meli pemendar,’ iya nya, belajarka pemendar, kitai enda tau enda bejimat ngambika enda ‘nyual iya,’ iya nya, ninggalka pemendar. Baka ni kitai ‘meli’ pemendar ari Bup Kudus? Berapa rega iya? Saut ngagai dua iti tanya tu deka nulung kitai ngumbai pemendar nya berega agi lalu enggai ninggalka iya. Kitai deka meretika kebuah pemendar ari Jehovah nya jauh berega ari utai bukai.

5, 6. (a) Baka ni kitai ulih meli pemendar enggau enda ngena duit? Terangka. (b) Nama penguntung ke diulih ari pemendar?

⁵ Utai ti dikumbai pechuma ukai reti nya nuan enda ibuh ngereja sebarang utai kena ngulihka iya. Leka jaku “beli” dalam jaku Hebrew ke disalin ba Jaku Dalam 23:23 ulih mega mai reti “bulih.” Kedua-dua leka jaku tu nunjukka orang patut bebendar tauka ngelengkaka utai bukai ngambika bulih utai ti dikumbai iya berega. Ngambika nemu baka ni kitai ulih meli pemendar, uji gambarka: Ba makit orang bisi meri buah pisang pechuma. Kati buah pisang nya ulih datai kediri ba atas mija kitai? Enda. Kitai patut ngagai makit lalu mai pisang nya pulai. Nya alai taja pan buah pisang nya pechuma, kita patut bebendar ngulihka sida. Pia mega, kitai enda begunaka duit belajarka pemendar. Tang kitai enda tau enda bebendar ngulihka pemendar lalu bisi utai ke patut dilengkaka.

⁶ Bacha Isaiah 55:1-3. Utai ti dipadah Jehovah nulung kitai nemu reti meli pemendar. Ba ayat tu, Jehovah mandingka jaku Iya enggau ai, ai tusu, sereta wain. Baka ai chelap ke ngenyamaika orang ti aus, pemendar ngenyamaika kitai. Lalu baka ai tusu ke ngasuh kitai enggau anak mit kering agi, pemendar Bup Kudus negapka agi kaul kitai enggau Jehovah. Jehovah mega mandingka jaku Iya enggau wain. Nama kebuah? Bup Kudus madahka wain ngelantangka ati orang. (Mas. 104:15) Nya alai lebuh Jehovah ngasuh kitai ‘meli wain,’ Iya deka kitai nemu, lebuh kitai nitihka iring Iya ba pengidup, nya ngagaka ati kitai. (Mas. 19:8) Jehovah ngena jaku banding nya nulung kitai nemu penguntung ke diulih lebuh kitai  belajar sereta nitihka pemendar. Diatu aram kitai berandauka lima iti utai ke engka dilengkaka kitai ngambika ulih meli pemendar.

7, 8. (a) Nama kebuah belajarka pemendar begunaka jam? (b) Nama utai ti dilengkaka seiku pemelajar Bup Kudus, lalu nama asil iya?

⁷ Jam. Orang endang begunaka jam enti deka ningaka pesan pasal Perintah Petara, macha Bup Kudus enggau litaricha Bup Kudus, belajarka Bup Kudus enggau Saksi-Saksi Jehovah, nyediaka utai ti dikena begempuru, sereta ngagai gempuru. Ngambika ulih ngereja semua nya, kitai patut ngurangka jam ti dikena ngereja pengawa bukai ke enda tentu beguna. (Bacha Epesus 5:15, 16 enggau nota kaki.) Ni pengelama belajarka batang ajar ari Bup Kudus? Nya bepanggai ba kitai seiku-seiku. Nadai tatak pasal utai ti ulih dipelajarka kitai bekaul enggau penemu, peneka, sereta utai ti udah digaga Jehovah. (Rom. 11:33) Majalah Watch Tower ti keterubah dikeluarka mandingka pemendar enggau “siti bungai ti mit” lalu majalah nya madahka: “Anang puas ati enggau siti aja bungai tauka pemendar. Enti siti aja udah chukup, tentu nadai agi iya ke bukai. Gumpul, giga mayuh agi.” Nya alai kitai ulih nanya diri empu, ‘Ni pemayuh utai ti udah dipelajarka aku pasal Jehovah?’ Taja pan kitai idup belama iya, kitai seruran bisi mayuh utai ti deka dipelajarka pasal Jehovah. Taja pia, kemayaharitu, endang manah enti kitai ngena jam ke dikemisi kitai enggau naka ulih belajar. Ditu kitai bisi siti chunto.

⁸ Mariko, * (peda nota kaki) seiku indu ke biak ari menua Jepun, pindah ngagai Amerika Serikat ketegal besekula ba New York City. Bisi sekali, seiku pengerintis indu datai ke rumah iya bekunsi berita manah. Mariko endang udah bisi jalai pengarap bukai, tang iya belabuh belajarka Bup Kudus enggau pengerintis nya. Iya rindu bendar enggau utai ti dipelajarka iya, nya alai iya minta belajar dua kali seminggu. Taja pan Mariko kisuk besekula sereta kereja part-time, iya berengkah datai ke gempuru. Iya ngurangka jam ba rekreasi ngambika bisi mayuh agi jam belajarka pemendar. Enggau nya, Mariko majak rapat enggau Jehovah, lalu kurang ari setaun, iya pan dibaptisa. Enam bulan udah nya, ba taun 2006, iya nyadi pengerintis, lalu agi ngerintis datai ke seharitu.

9, 10. (a) Baka ni belajarka pemendar ngubah runding kitai pasal pengaya? (b) Nama utai ti dilengkaka seiku indu ke biak, lalu baka ni asai ati iya pasal utai nya?

⁹ Pengaya. Ngambika ulih belajarka pemendar, kitai engka ngelengkaka kereja ti begaji besai ba dunya tu. Ambika chunto, Peter seduai Andrew nya orang  berikan, tang lebuh Jesus mai seduai iya nyadi murid iya, seduai iya ninggalka pengawa berikan. (Mat. 4:18-20) Tu ukai reti nya nuan patut badu kereja lebuh nuan belajarka pemendar. Orang patut bekereja sereta ngintu ruang bilik iya. (1 Tim. 5:8) Tang lebuh nuan belajarka pemendar, runding nuan pasal pengaya berubah. Nuan nemu bagi utai ti patut dikenuluka ba pengidup. Jesus madahka: “Anang nyimpan pengaya ke diri empu di dunya.” Tang, iya meransang kitai: “Simpan pengaya ke diri empu di serega.” (Mat. 6:19, 20) Nya meh utai ti digaga seiku indu ke biak ti benama Maria.

¹⁰ Maria rindu bemain golf kenyau ari iya agi mit. Lebuh ba sekula sekondari, iya majak landik bemain golf. Ketegal nya iya diberi sekulasip ari universiti. Maria keran deka nyadi pemain golf profesional sereta ngulihka mayuh duit. Udah nya iya belabuh belajarka Bup Kudus. Iya rindu enggau utai ti dipelajarka lalu berengkah ngena nya ba pengidup. Ku iya madahka: “Bendar agi aku ngubah pendiau enggau chara idup ngambika sejalai enggau standard Bup Kudus, gaga agi ati aku.” Maria nemu, iya tusah deka beberatka kaul iya enggau Jehovah enti iya beberatka kereja iya ba sukan. (Mat. 6:24) Nya alai iya ngelengkaka juluk ati ti deka nyadi pemain golf profesional. Diatu, iya nyadi pengerintis lalu madahka diri ngembuan “pengidup ti pemadu ngagaka ati sereta bisi tuju.”

11. Lebuh kitai belajarka pemendar, nama engka nyadi ba kaul kitai enggau orang bukai?

¹¹ Kaul enggau orang bukai. Lebuh kitai belabuh nitihka utai ti dipelajar ari Bup Kudus, kaul kitai enggau bala pangan sereta diri sebilik engka berubah. Jesus nulung kitai meretika kebuah nya lebuh iya besampi pasal bala murid iya: “Kuduska sida dalam pemendar. Jaku Nuan nya pemendar.” (Jhn. 17:17) “Kuduska” ulih mai reti diserara. Lebuh kitai belabuh idup sejalai enggau pemendar, kitai diserara ari dunya laban kitai nitihka standard Bup Kudus. Taja pan kitai nguji ngetanka kaul ti manah enggau bala pangan sereta kaban belayan, sekeda ari sida engka enda agi rinduka kitai baka ti udah lalu indah nyakal utai baru ti dipechaya kitai. Tu enda ngasuh kitai tekenyit. Jesus madahka: “Munsuh kita ke pemadu jai nya kita sebilik empu.” (Mat. 10:36) Tang Jesus mega besemaya, kitai deka bulih mayuh berekat enti kitai sanggup ngelengkaka sekeda utai ketegal pemendar!—Bacha Mark 10:28-30.

12. Nama utai ti dilengkaka seiku lelaki bansa Judah lebuh belajarka pemendar?

¹² Ngelama tu, seiku lelaki bansa Judah ke benama Aaron madahka nama Petara enda tau disebut. Tang iya keran deka nemu pemendar pasal Petara. Bisi sekali, seiku Saksi madahka enti Aaron nambah urup vokal ngagai empat iti urup konsonan Hebrew ba nama Petara,  urup nya ulih disebut nyadi “Jehovah.” Ketegal gaga amat nemu pasal utai tu, Aaron mupuk ke balai gempuru lalu madah ngagai bala pengajar adat! Kumbai iya sida deka gaga lebuh nemu utai ti amat pasal nama Petara, tang sida enda. Sida ngeludah lalu muru iya. Sida Aaron sebilik mega ngelaban iya. Tang iya enda nejuka tu nagang iya ngelala Jehovah enggau mayuh agi. Aaron nyadi Saksi Jehovah lalu tetap ati nyembah Iya sepemanjai pengidup iya. Kitai mega nyadang kaul kitai enggau orang bukai engka berubah lebuh kitai belajarka pemendar.

13, 14. Nama bansa runding enggau ulah ke patut diubah kitai lebuh belajarka pemendar? Padahka siti chunto.

¹³ Runding enggau ulah ti enda tuchi. Lebuh kitai belajarka pemendar lalu belabuh idup sejalai enggau standard Bup Kudus, kitai patut deka ngubah ulah sereta chara kitai berunding. Rasul Peter nulis: ‘Diau baka anak mit ke ngasi. Anang nurutka pengingin kita ti jai baka lebuh kita ke apin nemu Petara suba.’ Ku iya agi: “Intu diri kudus dalam semua utai.” (1 Pet. 1:14, 15) Mayuh orang ba Korint menya kamah ulah. Orang ke diau dia patut ngaga ubah ti besai ngambika tuchi ba mata Jehovah. (1 Kor. 6:9-11) Kemayaharitu, mayuh orang ngaga ubah ti sama lebuh sida belajarka pemendar. Peter nyebut pasal utai tu lebuh iya nulis: “Udah chukup meh kita dulu suba ngereja utai baka ti dikerinduka orang bansa bukai: kereja ti jai, ti kamah, mabuk, berami enda beiga-iga, berami ngirup, enggau besembahka engkeramba.”—1 Pet. 4:3.

¹⁴ Betaun Devynn enggau Jasmine nyadi orang ke pemabuk. Taja pan Devynn landik ngintu akaun, tang iya enda ulih ngemeranka kereja nya laban iya udu ngirup. Jasmine dikelala orang ketegal udu ringat sereta mangah. Bisi sekali lebuh ba jalai, Jasmine ke benung mabuk betemu enggau sepasang laki bini ke Saksi ti nyadi pengerintis seberai tasik. Seduai iya mai Jasmine belajarka Bup Kudus. Tang lebuh seduai iya datai baru minggu siti, Jasmine enggau Devynn bela mabuk. Seduai iya enda pechaya pengerintis seberai tasik nya amat deka datai. Lebuh pengerintis seberai tasik nya datai baru, Jasmine enggau Devynn bisi berubah. Seduai iya keran deka berengkah belajarka pemendar Bup Kudus, lalu jampat nitihka utai ti dipelajarka. Kurang ari tiga bulan, seduai iya badu ngirup, lalu udah nya ngerejista tikah seduai iya. Mayuh orang ba kandang alai seduai iya diau udah beratika ubah ke bisi ba seduai iya, lalu sida mega belabuh belajarka Bup Kudus.

15. Nama siti ubah ke pemadu tusah digaga kitai ngambika bulih pemendar, lalu nama kebuah?

¹⁵ Adat enggau pengawa ti enda dikerinduka Petara. Siti ubah ke pemadu tusah digaga kitai iya nya ngelengkaka adat enggau pengawa ke enda ngerinduka ati Petara. Taja pan sekeda orang udah nemu asai ati Jehovah pasal utai nya, tang sida agi ngasaika diri tusah deka ngelengkaka nya. Sida nangika runding diri sebilik, orang ke sama kereja, tauka bala pangan. Sida nemu orang bepegai bendar ba sekeda adat baka, adat ke masa diri sebilik ti udah mati. (U-dat. 14:1) Nyadi, nama ulih nulung kitai ngaga ubah? Kitai ulih belajar ari teladan  berani sekeda orang Kristian ba abad keterubah di Epesus. Sida ngaga ubah lebuh sida belajarka pemendar.

16. Nama utai ti dilengkaka sekeda orang di Epesus?

¹⁶ Di nengeri Epesus kelia, pengawa bemanang nya utai ti seruran dikereja. Nama digaga bala manang pengudah sida nyadi orang Kristian? Bup Kudus madahka: ‘Mayuh manang datai mai bup sida, lalu nunu bup nya di mua orang mayuh. Lebuh rega semua bup nya diitung, rega semua utai nya nyau deka bulih lima puluh ribu singkap duit pirak. Nya alai jaku Jehovah balat amat ngelekai sereta mansang dalam kuasa.’ (SKR. 19:19, 20) Orang Kristian ke tetap ati nya sanggup nunu bup sida ti mar rega, lalu sida bulih berekat ari Jehovah.

17. (a) Nama sekeda utai ke engka dilengkaka kitai pengudah belajarka pemendar? (b) Nama sekeda tanya ti deka disaut kitai ba artikel pengudah tu?

¹⁷ Nama utai ti udah dilengkaka nuan ngambika ulih belajarka pemendar? Semua kitai ngena jam ngumpul pemendar. Sekeda ari kitai udah ngelengkaka peluang deka nyadi kaya. Lalu sekeda kaul kitai enggau orang engka udah berubah. Mayuh ari kitai udah ngubah ulah sereta chara kitai berunding, lalu udah nulak adat enggau pengawa ti enda ngerinduka ati Jehovah. Tang kitai pechaya, pemendar Bup Kudus berega agi ari sebarang utai ti dilengkaka kitai. Pemendar Bup Kudus nulung kitai bisi kaul ti rapat enggau Jehovah. Nya utai ti pemadu berega ba pengidup kitai. Lebuh mikirka semua berekat ke diulih kitai ketegal pemendar, kitai tusah meretika kebuah orang deka “nyual” pemendar. Baka ni nya ulih nyadi? Lalu baka ni kitai ulih nyeliah ari ngereja penyalah ti besai nya? Kitai deka nyaut dua iti tanya nya ba artikel pengudah tu.