1, 2. Seraya kitai majak ngaga pemansang, nama dipelajarka kitai? Padahka siti chunto.

UJI gambarka orang meri hadiah ngagai seiku anak mit. Apai indai ngasuh iya, “Sebut terima kasih.” Iya nyebut nya ketegal diasuh. Tang seraya anak mit nya mansang besai, iya berengkah meretika kebuah apai indai iya ngumbai ulah ti beterima kasih ke pemanah orang bukai nya beguna. Nyau kelama, iya empu deka beterima kasih ngagai orang bukai laban iya udah belajarka nya.

² Pia mega enggau kitai. Lebuh kitai baru belajarka pemendar, kitai nemu endang manah enti ngasika batang pesan Jehovah. Tang seraya kitai majak ngaga pemansang, kitai belajar mayuh agi pasal runding Iya, iya nya, utai ti dikerindu Iya, utai ti dipegedika Iya, sereta runding Iya pasal siti-siti utai. Lebuh kitai ngawakka runding Jehovah nulung kitai ngaga pemutus sereta ngubah utai ti dikereja kitai, kitai ngasuh runding kitai sejalai enggau runding Jehovah.

3. Nama kebuah nya tusah deka berunding baka Jehovah?

³ Taja pan kitai rindu belajar berunding baka Jehovah, tang kadang-kadang kitai tusah deka berunding baka Iya laban kitai enda sempurna. Ambika chunto, kitai nemu runding  Jehovah pasal moral, pengaya, pengawa nginjil, salah nguna darah, sereta utai bukai. Tang kitai engka tusah deka meretika kebuah Iya ngumbai utai nya baka nya. Nya alai baka ni kitai ulih belajar berunding baka Jehovah? Lalu baka ni tu ulih nulung kitai ngereja utai ti ngena ari diatu sereta ke jemah ila?

4. Nama reti ngubah chara kitai berunding?

⁴ Bacha Rome 12:2. Ba ayat tu, rasul Paul nerangka utai ti patut digaga kitai ngambika belajar berunding baka Jehovah. Iya madahka, kitai ‘enda tau nitihka chara dunya.’ Baka ke udah dipelajarka kitai ba artikel sebedau tu, reti nya kitai enda tau enda nulak runding enggau ulah dunya. Tang Paul mega madahka kitai patut ngubah chara kitai berunding. Reti nya kitai patut belajarka Jaku Petara, mereti sereta belematika runding Iya, lalu enggau naka ulih ngembuan runding Iya.

5. Terangka bida entara macha enggau belajarka Bup Kudus kediri empu?

⁵ Belajarka Bup Kudus kediri empu ukai semina macha enggau jampat tauka nandaka saut aja. Lebuh belajar, kitai mikirka utai ti dipelajarka kitai pasal sapa Jehovah nya, nama utai ti dikereja Iya, sereta chara Iya berunding. Kitai nguji meretika kebuah Jehovah ngasuh kitai ngereja siti-siti utai lalu nyeliahka sekeda utai bukai. Kitai mega beratika utai ti patut diubah ba pengidup sereta ba runding kitai. Amat, kitai enda ulih belematika semua poin tu tiap kali kitai belajar. Nya alai endang manah enti kitai ngena setengah ari jam ke dikena belajar, belematika utai ti udah dibacha kitai.—Mas. 119:97; 1 Tim. 4:15.

6. Nama nyadi enti kitai belematika Jaku Petara?

⁶ Bisi utai manah nyadi enti kitai selalu belematika Jaku Petara. Kitai “nemu peneka Iya,” tauka arapka runding Jehovah nya pemadu badas. Kitai berengkah meretika runding Iya pasal siti-siti utai lalu kitai pan besetuju enggau runding Iya. Nya alai kitai ngubah chara kitai berunding lalu ngembuan chara berunding ti baru. Belubah-lubah kitai ngasuh runding kitai sejalai enggau runding Jehovah.

7, 8. (a) Nama runding Jehovah pasal pengaya? (Peda gambar ba pun artikel.) (b) Enti runding kitai sebaka enggau Jehovah pasal pengaya, nama utai ti seruran pemadu beguna ba kitai?

⁷ Runding kitai bisi kaul enggau utai ti dikereja kitai. (Mrk. 7:21-23; Jas. 2:17) Aram kitai beratika beberapa iti chunto kena nerangka utai tu. Siti chunto nya pasal pengada Jesus. Chunto nya enggau terang nunjukka runding Jehovah pasal pengaya. Jehovah Empu milih Josep seduai Maria ngambika ngemesaika Anak Iya taja pan seduai iya nadai ngembuan mayuh duit. (Lew. 12:8; Luk. 2:24) Pengudah Jesus ada, Maria “ngalika iya dalam dulang, laban sida nadai endur dalam rumah numpang.” (Luk. 2:7) Enti Jehovah deka, Iya ulih ngasuh Jesus ada ba endur ke manah agi. Tang Iya deka Jesus dibesaika ba ruang bilik ke ngenuluka sembah ngagai Jehovah. Nya utai ti pemadu beguna ba Iya.

⁸ Ari chunto pasal pengada Jesus, kitai nemu runding Jehovah pasal pengaya. Sekeda apai indai deka bala anak ngembuan utai ti pemadu manah, taja pan nya ngachau  kaul anak enggau Jehovah. Tang ba runding Jehovah, kaul enggau Iya nya utai ti pemadu beguna. Kati runding nuan sebaka enggau runding Jehovah ba pekara tu? Baka ni utai ti dikereja nuan nunjukka nya?—Bacha Hebrew 13:5.

9, 10. Baka ni kitai ulih nunjukka diri bisi runding ti sebaka enggau Jehovah pasal pengawa ke ngasuh orang bukai labuh ba pengarap?

⁹ Siti agi chunto nya bekaul enggau runding Jehovah pasal orang ke ngasuh orang bukai labuh ba pengarap, iya nya, ngujungka orang bukai bedosa tauka badu nyembah Jehovah. Jesus madahka: ‘Barang sapa ngasuh siku ari sida ke mit tu, ke arapka aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik.’ (Mrk. 9:42) Nya jaku tangkan ti berat! Lalu kitai nemu Jesus pan baka Apai iya. Nya alai kitai pechaya Jehovah enda lantang ati enti bisi orang ngasuh seiku ari murid Jesus labuh ba pengarap.—Jhn. 14:9.

¹⁰ Kati runding kitai sebaka enggau runding Jehovah seduai Jesus pasal pengawa ke ngasuh orang bukai labuh ba pengarap? Baka ni utai ti dikereja kitai nunjukka nya? Ambika chunto, kitai engka rinduka siti-siti stail gari enggau chara ngintu diri. Tang nama deka dikereja kitai enti kitai nemu utai ke dipilih kitai ngasuh sekeda bala menyadi Kristian enda nyamai ati tauka ngasuh orang bisi runding ti kamah? Kati pengerindu kitai ke sida meransang kitai ngelengkaka utai ti dikerindu kitai?—1 Tim. 2:9, 10.

11, 12. Baka ni kitai ulih nyaga diri enti kitai belajar begedika utai ti dipegedika Jehovah lalu ngemansangka ulah ti ulih nagang diri?

¹¹ Tu chunto ketiga: Jehovah begedika penyai. (Mas. 5:4) Iya tentu nemu, kadang-kadang kitai tusah deka ngereja utai ti ngena, laban kitai enda sempurna. Tang, Iya deka kitai baka Iya, begedika penyai. (Bacha Masmur 97:10.) Enti kitai belematika kebuah Jehovah begedika penyai, nya deka nulung kitai ngembuan runding ti sejalai enggau runding Iya, lalu nya mega deka meri kitai pengering ngambika enda ngereja utai ti enda manah.

¹² Enti kitai belajar begedika penyai, nya mega deka nulung kitai nemu sekeda utai nya salah, taja pan Bup Kudus nadai nyebut enggau nyemetak. Ambika chunto, sebengkah pengawa ti kamah ke dikumbai tanda pah majak suah dikereja orang ba dunya diatu. Sekeda orang ngumbai pengawa nya enda sama enggau pengawa beleman enggau orang. Nya alai sida enda ngumbai nya pengawa ti jai. * (Peda nota kaki.) Kati Jehovah besetuju enggau penemu ke baka nya? Kingatka, Jehovah begedika semua bansa penyai. Nya alai, aram meh kitai nyeliah ari semua penyai. Chara iya belajar ngembuan ulah ti ulih nagang diri sereta begedika utai ti dipegedika Jehovah.—Rom. 12:9.

13. Nama kebuah kitai patut mikirka runding Jehovah pasal siti-siti utai ari diatu ngambika kitai ulih ngaga pemutus ti manah dudi hari?

¹³ Lebuh belajarka Bup Kudus kediri empu, kitai patut mikirka runding Jehovah pasal siti-siti utai laban tu ulih nulung kitai ngaga pemutus ti manah. Lalu, enti kitai bisi napi penanggul ke ngasuh kitai patut ngaga pemutus enggau lengkas, kitai tentu udah besedia. (J-lam. 22:3) Aram kitai beratika sekeda chunto ari Bup Kudus.

14. Nama dipelajarka kitai ari saut ke diberi Josep ngagai bini Potipar?

¹⁴ Lebuh bini Potipar nguji nundi Josep, Josep jampat-jampat nulak. Enti pia, Josep udah belematika runding Jehovah pasal tikah. (Bacha Pemungkal 39:8, 9.) Josep madah ngagai bini Potipar: ‘Baka ni ku aku tau ngereja utai ti kamah tu, lalu bedosa ngelaban Petara?’ Tu nunjukka runding Josep sejalai enggau runding Petara. Baka ni enggau kitai? Nama deka digaga nuan enti sema orang ke sama gawa enggau nuan nguntik nuan? Tauka baka ni enti sema orang bisi nganjung mesej tauka gambar ke ngerang-ngerang bekaul enggau ulah seks ti kamah ngagai telefon binching nuan? * (Peda nota kaki.) Kitai deka senang agi taluk ngagai Jehovah enti kitai udah belajar sereta nerima runding Jehovah pasal utai nya, lalu udah mikirka utai ke deka digaga.

15. Baka ni kitai ulih mengkang tetap ati ngagai Jehovah baka tiga iku nembiak Hebrew nya?

¹⁵ Peratika mega chunto tiga iku nembiak Hebrew ke benama Sadrak, Mesak, enggau Abednego. Lebuh Raja Nebukadnesar ngasuh sida nyembah engkeramba emas ke udah digaga iya, sida tiga bebendar nulak. Saut sida ngagai raja nya nunjukka sida udah berunding pasal utai ti deka nyadi enti sida meruan tetap ati ngagai Jehovah. (P-sut. 20:4, 5; Dan. 3:4-6, 12, 16-18) Baka ni enggau kemayaharitu? Nama deka digaga nuan enti sema tuke ngasuh nuan meri duit turu kena nyambut pengerami ke bekaul enggau pengarap pelesu? Sebedau utai ke baka tu nyadi, endang manah enti kitai ari diatu belematika runding Jehovah bekaul enggau utai nya. Lalu, enti sema utai tu bisi nyadi dudi hari, kitai deka senang agi ngereja sereta nyebut utai ti patut baka tiga iku nembiak Hebrew nya.

16. Nama kebuah meretika runding Jehovah ulih nulung kitai nyikap diri napi penanggul lebuh patut diperubat enggau lengkas?

¹⁶ Belematika runding Jehovah mega nulung kitai mengkang taluk ngagai Iya enti kitai patut diperubat enggau lengkas. Kitai tentu enggai nerima empat bengkah bansa darah tauka siti ari empat bengkah bansa darah nya. (SKR. 15:28, 29) Tang bisi sekeda chara berubat ke begunaka darah lalu tiap orang Kristian patut ngaga pemutus kediri empu bepelasarka prinsip Bup Kudus. Ni maya pemadu manah nentuka utai ti patut dikereja? Kati nya lebuh ba sepital, engka lebuh kitai benung pedis  lalu patut ngaga pemutus enggau lengkas? Tentu ukai. Diatu meh maya ngaga pansik, ngisi dokumen berubat ti sah baka Health Care Directive ke nerangka utai ti dikedekaka kitai, lalu berandau enggau lutur. * (Peda nota kaki.)

17-19. Nama kebuah nya beguna nemu runding Jehovah pasal siti-siti utai ari diatu? Padahka siti chunto.

¹⁷ Uji pikirka mega pasal saut Jesus ngagai jaku ajar Peter ke enda meransang: “Anang enda sayauka diri empu, Tuan.” Jesus tentu udah bebendar belematika utai ti dikedekaka Petara kereja iya sereta jaku ti benabi pasal pengidup enggau pemati iya ba bumi. Penemu tu meri iya pengering ngambika meruan tetap ati ngagai Jehovah, lalu meri pengidup iya nyadika genselan semua kitai.—Bacha Matthew 16:21-23. *

¹⁸ Kemayaharitu, Jehovah deka kitai nyadi pangan Iya lalu enggau naka ulih nusui berita manah. (Mat. 6:33; 28:19, 20; Jas. 4:8) Tang sekeda orang engka nguji ngelemika kitai baka ke digaga Peter ngagai Jesus. Ambika chunto, tuke engka deka nikika gaji nuan, tang nuan nemu nya ngujungka nuan gawa lebih jam lalu enda tentu ulih datai begempuru tauka nginjil. Tauka enti nuan nya agi besekula, cikgu engka meri nuan peluang belajar tinggi agi tang nya jauh ari rumah nuan. Enti sema utai tu bisi nyadi, kati nuan patut besampi, ngaga pansik, sereta berandau enggau diri sebilik tauka tuai gempuru sebedau nuan ngaga pemutus? Endang manah enti nuan nemu runding Jehovah pasal utai nya ari diatu, lalu ngasuh runding nuan sejalai enggau runding Iya. Lalu, enti sema utai tu bisi nyadi dudi hari, nuan tentu enda ngasaika nya narit ati nuan. Nuan nemu utai ke patut dikereja laban nuan udah mutus deka mengkang nyembah Jehovah.

¹⁹ Nuan engka berundingka utai bukai ke ulih nguji penaluk nuan ngagai  Jehovah. Amat, kitai engka enda besedia ke tiap iti utai ti deka nuntung kitai. Tang enti kitai belematika runding Jehovah lebuh belajarka Bup Kudus kediri empu, kitai tentu deka agi ingatka utai ti udah dipelajar lalu nemu baka ni ngena nya lebuh bisi napi penanggul. Nya alai lebuh belajar, aram meh kitai nguji nemu runding Jehovah pasal siti-siti utai, ngasuh runding kitai sejalai enggau runding Iya, lalu mikirka baka ni tu deka nulung kitai ngaga pemutus ti manah ari diatu sereta dudi hari.

20, 21. (a) Nama kebuah kitai gaga ati enggau pengelepas ke dikembuan kitai ba dunya baru? (b) Baka ni kitai ulih gaga ati enggau pengidup kitai diatu?

²⁰ Semua kitai keran nganti penatai dunya baru. Mayuh ari kitai deka idup belama iya ba Paradais di bumi. Di baruh Perintah Petara, kitai deka dilepaska ari semua pemedis enggau pemerinsa ke ninggang kitai ba dunya tu. Lalu, kitai agi ulih bibas ngaga pemutus bepelasarka utai ti dikedeka sereta dikinginka kitai.

²¹ Tang nya ukai reti pengelepas kitai nadai sekat. Orang ke baruh ati agi patut ngaga pemutus bepelasarka adat enggau runding Jehovah. Lalu tu deka mai pengaga ti besai sereta pengelantang ti belimpah-limpah. (Mas. 37:11) Sebedau jam nya datai, kitai agi ulih gaga ati enggau pengidup kitai diatu seraya kitai ngasuh runding kitai sejalai enggau runding Jehovah.