1, 2. (a) Nama digaga Jesus lebuh Peter ngasuh iya sayauka diri empu? (Peda gambar ba pun artikel.) (b) Nama kebuah Jesus nyaut munyi nya?

BALA MURID Jesus tekenyit! Sida ngumbai Jesus deka mulaika perintah menua Israel, tang Jesus madahka enda lama agi iya deka merinsa lalu mati. Ku rasul Peter: “Anang enda sayauka diri empu, Tuan; utai nya enda tau sekali-kali nyadi ba nuan!” Jesus nyaut: ‘Rari ari aku, Sitan! Nuan mempang jalai aku, laban nuan berundingka utai mensia, ukai utai Petara.’—Mat. 16:21-23, NW; SKR. 1:6.

² Enggau bejaku munyi nya, Jesus enggau terang nunjukka runding Jehovah bebida ari runding orang ba dunya ke di baruh kuasa Sitan. (1 Jhn. 5:19) Peter ngasuh Jesus ngembuan ulah ti berundingka diri empu. Tu ulah ke dikembuan mayuh orang ba dunya. Tang Jesus nemu, Jehovah dekaka iya nyikap diri napi pemerinsa enggau pemati ti deka ninggang iya enda lama agi. Saut Jesus enggau terang  nunjukka iya nerima runding Jehovah lalu nulak runding dunya.

3. Nama kebuah enda senang nerima runding Jehovah lalu nulak runding dunya?

³ Baka ni enggau kitai? Kati kitai berunding baka Jehovah tauka baka orang ba dunya? Kitai tentu bebendar dekaka utai ti dikereja kitai ngerinduka ati Petara. Tang baka ni enggau chara kitai berunding? Kati kitai enggau naka ulih berunding baka Jehovah pasal siti-siti pekara? Tu patut digaga enggau bebendar. Taja pia, berunding baka orang ba dunya senang amat. Nya ketegal runding dunya bisi ba dini-dini alai. (Eps. 2:2) Pia mega, orang ba dunya suah agi berundingka diri empu, lalu kitai engka deka berunding baka sida. Au, berunding baka orang ba dunya senang amat enti dibandingka enggau berunding baka Jehovah.

4. (a) Nama deka nyadi enti kitai nitihka runding dunya? (b) Nama deka dipejuraika kitai ba artikel tu?

⁴ Enti kitai nitihka runding dunya, tu ulih ngujungka kitai berundingka diri empu aja lalu deka mutuska utai ti ngena enggau utai ti salah kediri empu. (Mrk. 7:21, 22) Nya kebuah kitai patut belajar ‘berundingka utai Petara,’ ukai “utai mensia.” Artikel tu deka nulung kitai ngereja nya. Kitai deka bejuraika kebuah berunding baka Jehovah pasal siti-siti pekara enda nyekat pengidup kitai, tang manah ke kitai. Kitai mega deka beratika baka ni kitai ulih nyeliah ari nitihka runding dunya. Ba artikel pengudah tu, kitai deka belajarka chara kitai ulih nemu runding Jehovah pasal sekeda pekara lalu ngaga runding kitai sejalai enggau runding Iya.

5. Nama kebuah sekeda orang enggai orang bukai ngachau sida berunding?

⁵ Sekeda orang enggai sapa-sapa ngachau chara sida berunding. Sida madah, “Awakka aku empu berunding.” Reti nya sida deka ngaga pemutus kediri empu lalu ngasaika diri bisi hak ngereja nya. Sida enggai dikuasa tauka dipejal orang. * (Peda nota kaki.)

6. (a) Nama bansa pengelepas ti diberi Jehovah ngagai kitai? (b) Kati pengelepas tu nadai tatak?

⁶ Taja pan kitai nitihka runding Jehovah, ukai reti nya kitai enda ulih ngembuan runding ke diri empu. Dua Korint 3:17, NW madahka: “Dia alai roh kudus Jehovah, dia meh pengelepas.” Jehovah meri kitai peluang milih deka nyadi orang ke baka ni. Kitai ulih milih utai ti dikedeka sereta dikerindu diri. Kitai endang sigi digaga Jehovah baka nya. Tang ukai reti nya pengelepas kitai nadai tatak. (Bacha 1 Peter 2:16.) Lebuh kitai patut nemu utai ti ngena tauka salah, Jehovah deka kitai ngena Jaku Iya ngiring kitai. Kati tu kelalu terit, tauka manah ke kitai?

7, 8. Kati berunding pasal siti-siti pekara baka Jehovah nyekat pengidup kitai? Padahka siti chunto.

⁷ Peratika tu. Apai indai nguji ngajar anak ngayanka ulah tauka kualiti ti manah. Sida engka ngajar anak ngambika nyadi orang ke lurus, bagas gawa, sereta ibuhka orang bukai. Tu enda nyekat pengidup  anak. Tang, apai indai nyikap anak ngambika mujur ba pengidup. Lebuh anak nyau udah besai lalu ninggalka rumah, sida ulih bibas ngaga pemutus kediri empu. Enti sida milih idup nitihka ulah tauka kualiti manah ke diajar apai indai, sida ulih ngaga pemutus enggau manah lalu nyeliahka mayuh penanggul, pengirau, enggau asai ati ti asa.

⁸ Baka seiku apai ti manah, Jehovah deka bala anak Iya ngembuan pengidup ti ngemuaska ati. (Isa. 48:17, 18) Nya alai Iya ngajar kitai batang prinsip pasal ulah sereta chara kitai patut begulai enggau orang. Iya ngasuh kitai belajar berunding pasal siti-siti pekara baka Iya sereta idup sejalai enggau prinsip ti diajar Iya. Tu enda nyekat pengidup kitai. Tang, nya ngasuh kitai bepenemu agi lalu nulung kitai ngaga pemutus enggau manah agi. (Mas. 92:5; J-lam. 2:1-5; Isa. 55:9) Kitai agi ulih ngembuan utai ti dikedeka diri, tang kitai deka ngaga pemutus ti ngagaka ati kitai. (Mas. 1:2, 3) Lebuh kitai ngembuan runding Jehovah, nya manah ke kitai ba mayuh pekara!

9, 10. Nama nunjukka runding Jehovah tinggi agi ari runding dunya?

⁹ Siti agi kebuah kitai dekaka runding kitai sebaka enggau enggi Jehovah laban runding Iya jauh tinggi ari runding dunya. Dunya meri jaku ajar pasal ulah moral, baka ni deka bulih ruang bilik ti lantang, enggau baka ni deka mujur ba kereja, sereta utai bukai ba pengidup. Tang semua jaku ajar nya enda sejalai enggau runding Jehovah. Ambika chunto, dunya suah meransang orang ngulihka utai ti ngerinduka ati sida aja lalu ngumbai ulah seks ti kamah nya enda salah. Lalu dunya kadang-kadang madahka orang ke udah nikah deka lantang agi ati enti sida beserara tauka sarak ketegal pekara ti mit. Jaku ajar tu ngelaban ajar Bup Kudus. Kati jaku ajar ari dunya kemayaharitu manah agi enti dibandingka enggau jaku ajar ari Bup Kudus?

¹⁰ Jesus madahka: ‘Penemu-dalam Petara dikamatka ulih utai ti dikereja penemu-dalam nya empu.’ (Mat. 11:19) Taja pan dunya udah mayuh mansang ba teknologi, tang iya agi enda ulih mutarka sekeda penusah besai ke nekul kitai lantang, baka perang, temegahka bansa diri, enggau jenayah. Kelimpah ari nya, dunya ngumbai ulah seks ti kamah nya enda salah. Tang mayuh orang besetuju utai nya ngerusak ruang bilik, ngachau pengerai, sereta utai bukai ke enda manah. Baka ni enggau jaku ajar ari Jehovah? Orang Kristian ke nerima penemu Jehovah ngembuan ruang bilik ti lantang, bepengerai, sereta bisi kaul ti manah enggau semua bala menyadi Kristian sida di serata dunya. (Isa. 2:4; SKR. 10:34, 35; 1 Kor. 6:9-11) Tu enggau terang nunjukka runding Jehovah nya tinggi agi ari runding dunya.

11. Runding sapa dititihka Moses, lalu nama asil iya?

 ¹¹ Nembiak Jehovah ke tetap ati kelia nemu runding Jehovah nya tinggi. Ambika chunto, taja pan Moses diajar “semua penemu-dalam orang Ejip,” tang iya nemu penemu-dalam ti bendar datai ari Jehovah. (SKR. 7:22; Mas. 90:12) Nya alai iya minta ngagai Jehovah: “Padahka pelan Nuan ngagai aku.” (P-sut. 33:13) Laban Moses ngawakka runding Jehovah ngiring iya, Jehovah ngena iya enggau chara ti ngalitka ati ngemujurka tuju Iya. Lalu Jehovah mega meri basa ngagai Moses enggau ngumbai iya orang ti ngembuan pengarap ti besai.—Heb. 11:24-27.

12. Pemutus ke digaga Paul beduduk ba utai nama?

¹² Rasul Paul nya orang ke pandai, tinggi pelajar, sereta nemu jaku Hebrew enggau Gerika. (SKR. 5:34; 21:37, 39; 22:2, 3) Tang, iya nulak penemu dunya lalu ngaga pemutus beduduk ba Jaku Petara. (Bacha Kereja Rasul 17:2, 3; 1 Korint 2:6, 7, 13.) Asil iya, Paul mujur ba pengawa nginjil lalu nganti upah ti meruan belama iya.—2 Tim. 4:8.

13. Sapa ke betanggungjawap nentuka runding kitai sebaka enggau runding Jehovah?

¹³ Amat, runding Petara jauh tinggi ari runding dunya. Enti kitai nitihka standard Petara, kitai deka gaga ati sereta mujur. Tang Jehovah enda mejal kitai berunding baka Iya. “Ulun ke tetap ati sereta bepenemu-dalam” enggau bala tuai gempuru mega enda ngachau runding kitai. (Mat. 24:45; 2 Kor. 1:24) Tiap iku kitai betanggungjawap nentuka runding diri sebaka enggau runding Jehovah. Baka ni kitai ulih ngereja nya?

14, 15. (a) Nama utai ti patut dibelematika kitai ngambika berunding baka Jehovah? (b) Nama kebuah kitai enda tau nejuka runding dunya ngubah runding kitai? Padahka siti chunto.

¹⁴ Rome 12:2 madahka: ‘Anang nitihka chara dunya, tang awakka Petara ngubah chara kita berunding, ngambika kita nemu peneka Iya—iya nya utai ti badas, ti ngerinduka ati Iya, ti pemadu menyana.’ Ari ayat tu kitai nemu, enda ngira nama utai ke ngiring runding kitai sebedau kitai belajarka pemendar, kitai ulih ngubah runding kitai lalu ngasuh iya sebaka enggau runding Petara. Kitai engka berunding nitihka chara kitai dibesaika sereta utai ke nyadi ba pengidup kitai. Taja pia, runding kitai seruran ulih berubah. Lalu iya deka berubah bepanggai ba utai ti suah dirunding kitai. Enti kitai belematika runding Jehovah, kitai deka nunjukka runding Iya seruran ngena. Enggau nya, kitai keran agi deka berunding pasal siti-siti pekara baka Iya.

¹⁵ Tang ngambika kitai ulih berunding baka Jehovah, kitai ‘enda nitihka chara dunya.’ Reti nya kitai anang meda, macha, sereta ninga sebarang utai ti ngelaban runding Petara. Kena nemu kebuah tu beguna, peratika chunto pasal pemakai. Orang ke deka gerai engka bekira deka makai pemakai ti manah agi. Tang semua utai ke digaga iya nadai mai penguntung enti iya mega selalu makai pemakai ke enda manah ke pengerai! Pia mega, ulah kitai ke bebendar belajar pasal runding Jehovah nadai mai penguntung enti kitai nejuka runding dunya ngubah runding kitai.

16. Kitai enda tau enda nyaga diri ari utai nama?

 ¹⁶ Ulih kitai terus nyeliahka semua penemu dunya? Enda. Laban kitai agi idup ba dunya tu. (1 Kor. 5:9, 10) Indah lebuh kitai nginjil, orang mantaika penemu ti salah sereta nyebut pasal ajar pengarap ti bula. Tang lebuh kitai enda ulih terus nyeliahka penemu ti salah, kitai enda patut majak berunding pasal penemu salah nya tauka nerima sida. Baka Jesus, kitai patut jampat-jampat nulak runding ti dikedekaka Sitan kembuan kitai. Lalu kitai ulih nyaga diri enti nyeliah ari sengaja ngiga runding dunya.—Bacha Jaku Dalam 4:23 ari nota kaki. *

17. Baka ni kitai ulih nyeliah ari sengaja ngiga runding dunya?

¹⁷ Ambika chunto, kitai patut bejimat milih orang ke tau nyadika bakih. Bup Kudus madahka, kelalu bebakih enggau orang ke enda nyembah Jehovah ulih ngujungka kitai berengkah berunding baka sida. (J-lam. 13:20; 1 Kor. 15:12, 32, 33) Kitai mega patut bejimat milih pemerindang. Lebuh kitai nulak pemerindang ke ngemansangka teori evolusi, pemangah, tauka ulah ti kamah, kitai nyeliah ngambika runding kitai enda “ngelaban penemu pasal Petara.”—2 Kor. 10:5.

18, 19. (a) Nama kebuah kitai enda tau enda bejimat enggau runding dunya ke dikerembai ngena chara ti enda berupai? (b) Nama sekeda tanya ke patut ditanya kitai, lalu nama kebuah?

¹⁸ Kitai mega enda tau enda ngelala lalu nulak penemu dunya ti dikerembai ngena chara ke enda tentu berupai. Ambika chunto, sekeda berita ditabur ngambika nyukung siti-siti penemu politik. Lalu sekeda cherita ngemansangka juluk ati enggau pemujur ke dikinginka orang ba dunya. Sekeda cherita wayang enggau bup ngemansangka runding “aku dulu” sereta “ruang bilik dulu” lalu ngaga runding ke baka nya ulih diterima, manah, indah betul. Taja pia, semua  penemu tu ngelaban ajar Bup Kudus. Bup Kudus madahka, kitai enggau diri sebilik ulih lantang lebuh kitai rinduka Jehovah lebih ari semua utai. (Mat. 22:36-39) Pia mega, taja pan sekeda cherita ke anak mit baka cherita kartun, cherita ba wayang, tauka ba bup, baka ke manah tang nya tau ngujungka sida nerima ulah ti kamah ke enda berupai.

¹⁹ Tu ukai reti nya salah ngelantangka diri ngena pemerindang ti manah. Tang kitai patut nanya diri empu: ‘Kati aku ngelala ni bagi runding ke datai ari dunya taja pan sida enda dikerembaika enggau berupai? Bisi aku nyaga bala anak aku sereta diri empu ari sekeda program ba TV, utai ti dibacha enggau game ba perengka elektronik? Kati aku nulung bala anak berunding baka Jehovah pasal sekeda pekara ngambika sida enda nitihka runding dunya ke didinga sereta dipeda sida?’ Enti kitai nemu bida entara runding Petara enggau runding dunya, kitai ‘enda nitihka chara dunya.’

20. Nama deka nentuka runding sapa ti dititihka nuan?

²⁰ Kingatka, penerang ke diulih kitai semina datai ari dua iti endur aja. Siti ari Jehovah, lalu siti agi ari Sitan enggau dunya iya. Sapa dititihka nuan? Saut nya bepanggai ba ari ni nuan ngulihka penerang. Enti kitai nerima runding dunya, runding kitai deka nitihka dunya lalu kitai deka berunding sereta ngereja pengawa nitihka runding diri empu aja. Nya alai endang patut kitai bejimat milih utai ti dipeda, dibacha, didinga, enggau dipikirka.

21. Nama deka dikerandauka kitai ba artikel pengudah tu?

²¹ Ba artikel tu kitai belajar, enti deka ngembuan runding Jehovah kitai enda tau enda nyeliahka runding dunya. Kitai mega enda tau enda belematika runding Petara ngambika ulih berunding baka Iya. Ba artikel pengudah tu, kitai deka belajarka chara nya.