1-2. (a) Nama nulung kitai betan lebuh napi penanggul? Terangka. (b) Nama deka dipejuraika kitai ba artikel tu?

“LEBUH ngenang pasal penusah ke ditapi, aku nemu aku enda ulih betan enti ngena pengering diri.” Kala nuan nyebut munyi tu? Mayuh ari kitai kala, kelebih agi lebuh ngenang pasal chara nuan ulih betan maya kena penyakit ti balat tauka lenyau orang ti dikesayau. Nuan ngasaika diri ulih betan laban roh kudus ari Jehovah meri nuan “kuasa ti besai.”—2 Kor. 4:7-9.

² Kitai mega begunaka roh kudus kena nulung kitai ngelaban utai ti jai ba dunya tu. (1 Jhn. 5:19) Kelimpah ari nya, kitai begunaka pengering kena ngelaban “kuasa roh ti jai.” (Eps. 6:12) Nya alai kitai deka berandauka dua iti chara roh kudus ulih nulung kitai lebuh napi penanggul. Udah nya, kitai deka bejuraika utai ke ulih digaga ngambika bulih mayuh agi penguntung ari roh kudus Petara.

3. Nama chara dikena Jehovah nulung kitai betan napi penanggul?

³ Roh kudus Jehovah meri kitai pengering kena bejalaika semua tanggung pengawa kitai taja pan napi penanggul. Ambika chunto, rasul Paul ulih terus gawa ke Jehovah taja pan napi penanggul. Nya ketegal iya bepanggai ba “kuasa Kristus.” (2 Kor. 12:9) Lebuh kedua kali bejalaika pengawa nyadi pengerintis seberai tasik, Paul ukai semina bebendar nginjil tang iya mega bekereja ngulihka belanja ke dikena diri empu. Iya diau ba rumah Akuila enggau Prisila di Korint. Seduai iya ngaga langkau kain. Ketegal Paul mega ngaga langkau kain, kadang-kadang iya gawa enggau seduai iya beberapa hari. (SKR. 18:1-4) Roh kudus meri Paul pengering ti dikena iya ba kereja sekular enggau ba pengawa nginjil.

4. Nitihka 2 Korint 12:7b-9, nama penanggul ke ditapi Paul?

 ⁴ Bacha 2 Korint 12:7b ari nota kaki, * 8-9. Ba ayat tu, nama reti ku Paul lebuh iya madahka diri merinsa ketegal bisi “duri diengkah dalam tubuh” iya? Enti bisi duri lekat ba tubuh nuan, nya tentu ngasuh nuan berasai balat pedis. Nyadi Paul madahka bisi siti penanggul ke ngasuh iya balat pedis. Iya ngumbai penanggul tu “melikat Sitan” ke majak “merinsaka” iya. Penanggul ke baka duri ti ditapi Paul engka ukai datai ari Sitan enggau bala melikat ti jai. Tang lebuh sida beratika “duri” nya, sida engka bebendar deka ngachuk duri nya dalam agi, reti nya, nambahka pemedis ke ditapi Paul. Nama digaga Paul?

5. Baka ni Jehovah nyaut sampi Paul?

⁵ Terubah, Paul deka Jehovah muai “duri” nya. Ku iya madah: ‘Tiga kali aku udah besampika ngagai Jehovah minta penyakit nya dibuai ari aku.’ Tang, taja pan Paul udah besampi, penanggul ke baka duri nya agi mengkang ba iya. Kati reti nya Jehovah enda nyaut sampi Paul? Ukai pia. Iya bisi nyaut sampi Paul. Iya enda muai penanggul Paul, tang meri iya pengering kena betan. Ku Jehovah madahka: “Kuasa Aku nyadi pemadu badas lebuh nuan lemi.” (2 Kor. 12:8, 9) Enggau saup ari Jehovah, Paul ulih ngetanka pengaga sereta pemaik ba ati enggau runding!—Plp. 4:4-7.

6. (a) Baka ni Jehovah nyaut sampi kitai? (b) Nama semaya ari ayat Bup Kudus ba genteran tu ke ulih ngeringka nuan?

⁶ Baka Paul, kala nuan minta Jehovah muai penanggul ke ditapi nuan? Engka nuan udah suah besampi pasal penanggul nya tang nuan agi napi iya tauka iya majak balat. Kati tu ngasuh nuan ngumbai Jehovah enda lantang ati enggau nuan? Enti pia, kingatka meh chunto Paul. Jehovah bisi nyaut sampi Paul, lalu Iya mega tentu deka nyaut sampi nuan! Jehovah engka enda muai penanggul ke ditapi nuan. Tang Iya deka meri nuan pengering nengah roh kudus kena betan. (Mas. 61:3, 4) Nuan engka “dipalu,” tang Jehovah enda ninggalka nuan.—2 Kor. 4:8, 9; Plp. 4:13.

7-8. (a) Baka ni roh kudus ulih disemaka baka ribut? (b) Baka ni Peter nerangka chara roh kudus bekereja?

⁷ Nama siti agi chara roh kudus nulung kitai? Kitai ulih nyemaka roh kudus baka ribut. Kapal ulih ngena ribut ke bepuput ngagai endur ti dituju ngambika ulih datai enggau selamat taja pan bisi kabut ba tasik. Pia mega, roh kudus nulung kitai terus nyembah Jehovah taja pan kitai napi penanggul seraya kitai nganti dunya baru ti disemaya Petara datai.

⁸ Rasul Peter orang berikan, nya alai iya teleba belayar. Nya kebuah iya ulih nerangka chara roh kudus bekereja ngena leka jaku ti bekaul enggau belayar. Ku iya nulis: ‘Laban jaku ti benabi nadai kala datai ari peneka mensia, tang mensia, nyebut pesan Petara ti dibai roh kudus.’—2 Pet. 1:21.

9. Nama sempama ke dikena Peter nerangka leka jaku “dibai”?

⁹ Nama sempama ke dikena Peter nerangka leka jaku “dibai”? Leka jaku Gerika ti sama mega dikena Luke, ke nulis bup Kereja Rasul, lebuh nerangka pasal kapal ti “dibai” ribut. (SKR. 27:15) Seiku orang ke landik pasal Bup Kudus madahka, lebuh Peter nulis pasal bala penulis Bup Kudus ke “dibai” roh kudus, Peter ngena leka jaku ke ngasuh orang berunding pasal belayar. Peter madahka, baka ribut ke mai kapal ngagai endur ke dituju, roh kudus ngiring bala penulis Bup Kudus bejalaika pengawa sida. Orang ke landik pasal Bup  Kudus tadi mega madahka, bala penulis Bup Kudus baka kapal ke udah “ngerembaika layar.” Jehovah ngereja utai ti patut digaga Iya. Iya meri roh kudus ngagai bala penulis Bup Kudus. Nya alai sida ulih bejalaika pengawa ti diberi ngagai sida ngena iring ari roh kudus.

10-11. Nama dua iti utai ke patut digaga kitai kena nentuka diri diiring roh kudus? Beri siti chunto.

¹⁰ Amat, kemayaharitu Jehovah nadai agi ngena roh kudus ngiring orang nulis Bup Kudus. Taja pia, Jehovah agi ngena roh kudus ngiring bala nembiak Iya. Jehovah agi ngereja utai ti patut digaga Iya. Baka ni kitai tau bulih penguntung ari roh kudus Petara? Chara iya kitai nentuka diri enda ngetu ngereja utai ti patut digaga kitai. Baka ni kitai ulih ngereja nya?

¹¹ Perundingka chunto tu. Ngambika perau dibai angin, kelasi enda tau enda ngereja dua iti utai. Kesatu, perau iya patut ba endur ribut bepuput. Perau nya enda mindah enti kelasi mengkang ba penyangkai kapal, jauh ari endur angin bepuput. Kedua, kelasi nya patut nikika layar lalu ngerembaika iya. Perau nya deka mindah enti layar dipuput ribut. Pia mega, kitai ulih terus gawa ke Jehovah enti diiring roh kudus. Ngambika ulih diiring roh kudus, kitai patut ngereja dua iti utai. Kesatu, kitai patut ngereja pengawa ke diberi Jehovah ti diiring ngena roh kudus. Kedua, kitai patut “ngerembaika layar,” iya nya enggau naka ulih ngereja pengawa ti diberi Jehovah. (Mas. 119:32) Lebuh kitai nitihka dua iti chara tu, roh kudus deka nulung kitai terus gawa ke Jehovah seraya kitai nganti dunya baru ti disemaya Petara datai.

12. Nama deka dipejuraika kitai diatu?

¹² Naka ke diatu, kitai udah berandauka dua iti chara roh kudus nulung kitai. Roh kudus meri pengering sereta nulung kitai mengkang  tetap ati lebuh napi penanggul. Roh kudus mega ngiring sereta nulung kitai ngereja pengawa ke diberi Jehovah, lalu nulung kitai bulih pengidup ti meruan belama iya. Diatu, kitai deka bejuraika empat iti utai ke patut digaga kitai kena bulih mayuh agi penguntung ari roh kudus Petara.

13. (a) Nitihka 2 Timoti 3:16, 17, baka ni Bup Kudus ulih nulung kitai? (b) Tang nama patut digaga kitai?

¹³ Kesatu, belajarka jaku Petara ba Bup Kudus. (Bacha 2 Timoti 3:16, 17.) Leka jaku Gerika ke disalin “bepun ari Petara” mai reti “Petara ngesuhka.” Petara ngena roh kudus Iya “ngesuhka” penemu Iya ngagai runding bala penulis Bup Kudus. Lebuh macha lalu belematika utai ke dibacha kitai ba Bup Kudus, iring ari Petara tama ngagai runding sereta ati kitai. Penemu ke datai ari Petara meransang kitai idup sejalai enggau peneka Iya. (Heb. 4:12) Tang ngambika bulih mayuh agi penguntung ari roh kudus Petara, kitai patut ngatur jam belajarka Bup Kudus enggau tetap lalu berundingka enggau dalam pasal utai ke dibacha. Udah nya, jaku Petara ba Bup Kudus deka bisi asil ti manah ba semua utai ke disebut enggau digaga kitai.

14. (a) Nama kebuah kitai ngumbai roh kudus bisi ba gempuru Kristian kitai? (b) Nama ulih nulung kitai bulih mayuh agi penguntung ari roh kudus ba gempuru Kristian kitai?

¹⁴ Kedua, nyembah Jehovah begulai enggau bala menyadi Kristian kitai. (Mas. 22:22) Gempuru Kristian kitai nya endur “ribut bepuput.” Roh kudus Jehovah bisi ba gempuru. (Pem. 2:29) Nama kebuah kitai madah munyi nya? Laban lebuh kitai begempuru nyembah Jehovah begulai enggau bala menyadi Kristian, kitai besampi minta roh kudus, nanyika lagu Perintah Petara ke bepelasarka Bup Kudus, lalu mendingka iring ti bepelasarka Bup Kudus ke dikenataika bala menyadi ke lelaki ti udah dipilih nengah roh kudus. Lalu roh kudus ti sama mega nulung bala menyadi ke indu nyediaka sereta ngenataika begian sida. Taja pia, ngambika bulih mayuh agi penguntung ari roh kudus, kitai patut besedia deka meri saut lebuh begempuru. Enggau chara tu, lebuh kitai datai begempuru, kitai udah sedia deka bulih penguntung ari roh kudus, baka perau ti udah dikerembaika layar.

15. Baka ni roh kudus nulung kitai ba pengawa nginjil?

¹⁵ Ketiga, bejalaika pengawa nginjil. Lebuh ngena Bup Kudus maya kitai nginjil sereta ngajar orang, kitai ngawakka roh kudus nulung kitai bejalaika pengawa nya. (Rom. 15:18, 19) Tang, ngambika bulih mayuh agi penguntung ari roh kudus, nuan enda tau enda bejalaika pengawa nginjil enggau tetap sereta enggau naka ulih ngena Bup Kudus. Siti chara nuan tau bulih randau ti manah agi enggau orang iya nya, ngena chara ke ulih dikena berandau ari Bup Kereja Kena Gempuru Pengidup enggau Pengawa Kristian Kitai.

16. Baka ni chara kitai tau terus bulih roh kudus?

¹⁶ Keempat, besampi ngagai Jehovah. (Mat. 7:7-11; Luk. 11:13) Kitai tau terus bulih roh kudus ari Jehovah nengah sampi. Nadai utai ulih nagang sampi kitai datai ngagai Jehovah tauka nagang roh kudus ti diberi Jehovah datai ngagai kitai. Roh kudus ulih nulung kitai indah maya kitai dijil, lalu Sitan enda ulih nagang kitai ari bulih roh kudus. (Jas. 1:17) Baka ni chara kitai patut besampi ngambika bulih mayuh agi penguntung ari roh kudus? Kena nemu saut iya, aram kitai belajar pasal sampi enggau mayuh agi ari beratika siti sempama ke semina bisi ba bup Injil Luke. *

17. Nama dipelajarka kitai pasal sampi ari sempama Jesus ba Luke 11:5-9, 13?

¹⁷ Bacha Luke 11:5-9, 13. Sempama ke dikena Jesus nunjukka chara kitai patut besampi minta roh kudus. Dalam sempama nya, seiku lelaki bulih utai ti diguna iya laban iya “ituk minta.” Iya enda kakang ati minta tulung ari bakih iya taja pan maya nya udah jauh malam. (Luk. 11:8) * Baka ni Jesus ngena sempama tu bekaul enggau sampi? Dalam Luke 11:9, Jesus madahka enti kitai enda ngetu minta, kitai deka nerima, enti kitai enda ngetu ngiga, kitai deka nemu, enti kitai enda ngetu nekung, pintu deka dibuka ke kitai. Nya alai, nama dipelajarka kitai? Ngambika bulih tulung ari roh kudus, kitai enda patut ngetu besampi minta roh kudus.

18. Nitihka sempama ke dikena Jesus, nama kebuah kitai ulih andalka Jehovah deka meri kitai roh kudus Iya?

¹⁸ Sempama ke dikena Jesus mega nulung kitai nemu kebuah Jehovah deka meri kitai roh kudus. Lelaki dalam sempama nya deka ngintu temuai iya enggau manah. Iya keran deka nyediaka pemakai ke temuai iya ti datai jauh malam, tang iya nadai pemakai deka disediaka. Jesus madahka, orang ke berimbai pendiau enggau lelaki nya meri iya pemakai ketegal iya ituk minta. Nama utai ke diajar Jesus? Enti mensia ke enda sempurna deka nulung orang ke ituk minta, Apai kitai ti di serega tentu lebih agi deka nulung orang ke enda ngetu minta roh kudus ari Iya! Nya alai kitai ulih andalka Jehovah deka nyaut sampi kitai lebuh minta roh kudus ari Iya.—Mas. 10:17; 66:19.

19. Nama kebuah kitai pechaya kitai ulih betan?

¹⁹ Kitai pechaya kitai ulih betan taja pan Sitan enda ngetu-ngetu nyerang kitai. Nama kebuah? Laban roh kudus nulung kitai ngena dua iti chara. Kesatu, roh kudus meri kitai pengering kena napi penanggul. Kedua, nya pengering ke nulung kitai terus gawa ke Jehovah seraya kitai nganti dunya baru datai. Nya alai, aram meh kitai bebendar ngulihka mayuh agi penguntung ke datai ari saup roh kudus!