1. Nitihka Matthew 28:18-20, nama pesan ke diberi Jesus ngagai bala murid iya?

PENGUDAH Jesus diangkatka idup baru, iya ngayanka diri ba mua bala murid iya lebuh sida begelumu ba Galili. Iya deka madahka utai ti beguna ngagai sida. Nama utai nya? Kitai ulih nemu tu ba Matthew 28:18-20.—Bacha.

2. Nama tanya ke deka dipejuraika kitai?

² Nembiak Petara kemayaharitu mega nitihka pesan Jesus ke ngasuh ngaga murid. Nya alai, aram kitai bejuraika tiga iti tanya bekaul enggau pengawa ti udah diberi Jesus ngagai kitai. Keterubah, kelimpah ari ngajar pasal standard Petara, nama patut digaga kitai? Kedua, baka ni semua bala penginjil ulih nulung pemelajar Bup Kudus mansang ba pengarap? Ketiga, baka ni kitai ulih nulung bala menyadi Kristian ke enda aktif berengkah baru ngaga murid?

3. Nama iring ti disengkaum dalam pesan Jesus?

³ Iring ari Jesus nya terang. Kitai patut ngajar orang pesan iya. Taja pia, kitai patut ingat poin ti beguna. Jesus nadai madahka: ‘Ajar sida semua pesan ti udah diberi aku ngagai kita.’ Tang, iya madahka: ‘Ajar sida ngasika semua pesan ti udah diberi aku ngagai kita.’ Kena ngasika iring Jesus, kita  patut ngajar pemelajar Bup Kudus utai ke patut digaga sida sereta baka ni sida ulih ngereja nya. (SKR. 8:31) Nama kebuah nya beguna?

4. Baka ni kitai ulih ngajar pemelajar Bup Kudus ngasika pesan Jesus? Terangka.

⁴ Baka ni kitai ulih ngajar orang “ngasika” pesan Jesus? Pikirka chunto tu. Sebedau orang belajar deriba kerita, pengajar patut ngajar undang-undang jalai alun ba kelas. Taja pia, ngambika ulih nulung pemelajar ngasika undang-undang nya, pengajar patut enggau pemelajar lebuh pemelajar nya deriba ba jalai alun sereta nguji ngena utai ti udah dipelajar iya. Nama ulih dipelajarka kitai ari chunto tu?

5. (a) Nitihka John 14:15 enggau 1 John 2:3, nama patut diajar kitai ngagai pemelajar Bup Kudus? (b) Beri chunto baka ni kitai ulih nulung pemelajar nitihka prinsip Bup Kudus?

⁵ Lebuh kitai ngajar orang Bup Kudus, kitai ngajar sida pasal peneka Petara. Tang kitai enda tau enda ngereja lebih ari nya. Kitai patut ngajar pemelajar Bup Kudus ngena utai ke dipelajar sida ba pengidup ninting hari. (Bacha John 14:15; 1 John 2:3.) Ari teladan kitai empu, kitai ulih nunjukka ngagai pemelajar baka ni sida ulih ngena prinsip Bup Kudus ba sekula, ba endur gawa, tauka maya bemain. Kitai ulih bekunsi ngagai sida baka ni nitihka prinsip Bup Kudus udah nyaga kitai ari pemedis tauka nulung kitai ngaga pemutus ti manah. Lebuh kitai enggau pemelajar, kitai ulih besampi ngagai Jehovah lalu minta Iya ngiring sida nengah roh kudus.—Jhn. 16:13.

6. Nama utai bukai ke patut digaga kitai lebuh ngajar orang ngasika pesan Jesus?

⁶ Nama utai bukai ke patut digaga kitai lebuh ngajar orang ngasika pesan Jesus? Kitai enda tau enda nulung pemelajar Bup Kudus ngemansangka pengeran sida deka ngaga orang nyadi murid. Sekeda pemelajar engka takut deka nginjil. Nya alai, kitai patut sabar lebuh nulung sida meretika pemendar Bup Kudus enggau manah. Enggau nya, pengarap sida deka majak tegap, ati sida deka ditegu lalu sida diperansang deka nginjil. Baka ni kitai ulih nulung pemelajar Bup Kudus bisi pengeran deka nusui berita manah?

7. Baka ni kitai nulung pemelajar ngemansangka pengeran sida deka nusui berita manah ngagai orang?

⁷ Kitai ulih nanya pemelajar Bup Kudus: “Kati pengidup nuan bisi manah agi ketegal nitihka ajar Bup Kudus? Ba runding nuan, kati orang bukai patut ninga pesan Bup Kudus? Baka ni nuan ulih nulung sida?” (J-lam. 3:27; Mat. 9:37, 38) Tunjukka surat mit ke bisi ba Perengka Kena Ngajar lalu nejuka iya empu milih bagi surat ti ulih narit minat kaban belayan, bala pangan, tauka orang ke sama gawa enggau iya. Beri meh sekeda surat mit ngagai pemelajar. Belatih meh enggau iya chara nyadung surat mit ngagai orang. Endang amat, pengudah pemelajar kitai nyadi penginjil ke bedau dibaptisa, kitai deka nginjil enggau iya.—P-jar. 4:9, 10; Luk. 6:40.

8. Nama kebuah nya beguna pemelajar negapka agi pengerindu ke Petara sereta ke orang bukai? (Peda mega kutak “ Baka Ni Nulung Pemelajar Ngembuan Pengerindu ti Dalam ke Petara?”)

⁸ Kingatka, Jesus ngasuh kitai ngajar orang “ngasika semua pesan” ti udah diberi iya. Pesan tu nyengkaum dua iti pesan ti pemadu besai iya nya, rinduka Petara sereta rinduka orang bukai. Dua iti pesan tu bisi kaul enggau pengawa nginjil sereta  ngaga orang nyadi murid. (Mat. 22:37-39) Nama kaul iya? Tuju kitai nginjil iya nya pengerindu kitai ke Petara sereta ke orang bukai. Tang sekeda pemelajar Bup Kudus engka takut deka nginjil. Taja pia kitai ulih nulung pemelajar nemu, enggau tulung ari Jehovah, sida ulih mutarka asai takut nya. (Mas. 18:1-3; J-lam. 29:25) Kutak ba artikel tu deka bejuraika nama ulih digaga kitai kena nulung pemelajar majak agi rinduka Petara. Pia mega, nama ulih digaga bala menyadi Kristian kena nulung murid ti baru ngemansangka agi pengerindu sida?

9. Ari chunto orang ke belajar deriba, baka ni chara pemelajar nya belajar utai ti beguna?

⁹ Pikirka baru orang ke belajar deriba tadi. Lebuh iya benung deriba enggau pengajar iya, baka ni chara iya belajar? Enggau mendingka pengajar iya sereta bejimat meratika deriba ke bukai. Pengajar engka nunjuk ngagai iya chunto deriba bukai ke meri jalai ngagai deriba seiku agi. Tauka madahka pasal deriba ti ngurangka panchar lampu ngambika deriba ke bukai ulih meda lalu meransang iya ngereja utai ti sama. Chunto tu ngajar pemelajar utai ti beguna ngambika ulih ngena nya lebuh iya deriba.

10. Nama nulung pemelajar Bup Kudus mansang ba pengarap?

¹⁰ Pia mega, pemelajar Bup Kudus ke baru nyembah Jehovah ukai semina belajar ari pengajar iya, tang mega belajar ari nembiak Jehovah ke bukai. Nya alai, nama ulih nulung pemelajar mansang ba pengarap? Datai ngagai gempuru Kristian. Nama kebuah? Utai ke didinga sida ba gempuru deka nulung sida ngenalamka agi penemu, negapka pengarap, sereta nambahka agi pengerindu sida ke Petara. (SKR. 15:30-32) Pia mega, pengajar Bup Kudus ulih mai pemelajar bekelala enggau bala menyadi Kristian ke sama napi penanggul baka iya. Pemelajar mega ulih meda teladan manah bala menyadi Kristian ke ngayanka pengerindu dalam eklisia. Perundingka beberapa iti chunto tu.

11. Nama chunto ke engka dipeda pemelajar Bup Kudus ba eklisia, lalu baka ni nya ulih nulung iya?

¹¹ Kesatu, seiku pemelajar Bup Kudus ke nyadi indai tunggal, meda seiku menyadi Kristian indu ke napi utai ti sama baka iya. Ati iya ditegu lebuh meda menyadi indu nya enggau naka ulih datai begempuru enggau bala anak iya ke agi mit. Kedua, seiku pemelajar ke tusah deka badu nginsap bekelala enggau seiku menyadi Kristian ke kala napi utai ti sama tang iya ulih mutarka nya. Menyadi nya madah, ketegal pengerindu iya ke Jehovah majak nambah, iya ulih ngaga ubah. (2 Kor. 7:1; Plp. 4:13) Pengudah menyadi nya bekunsika peneleba iya, iya madah ngagai pemelajar, “Nuan mega ulih badu nginsap.” Pemelajar nya berasai diperansang sereta pechaya iya ulih ngaga ubah. Ketiga, seiku pemelajar indu beratika seiku menyadi indu ti biak gaga ati nyadi Saksi. Ketegal nya, iya diperansang deka nemu agi kebuah menyadi indu nya seruran gaga ati.

12. Nama kebuah kitai ngumbai semua kitai ulih nulung pemelajar Bup Kudus?

¹² Lebuh pemelajar Bup Kudus ngelala mayuh menyadi Kristian, iya ulih belajar ari teladan sida baka ni nitihka pesan Kristus, iya nya rinduka Petara sereta orang bukai. (Jhn. 13:35; 1 Tim. 4:12) Pia mega baka ke udah dikerandau, pemelajar ulih belajar ari bala menyadi ke napi penanggul ti sama baka iya. Baka menyadi Kristian nya, pemelajar mega ulih ngaga ubah ngambika iya ulih nyadi murid Kristus. (U-dat. 30:11) Genap iku orang ba eklisia ulih nulung  pemelajar Bup Kudus ngaga pemansang. (Mat. 5:16) Nama digaga nuan kena meransang pemelajar Bup Kudus ke datai ngagai gempuru?

13-14. Nama digaga Jesus lebuh bala rasul iya asa ati?

¹³ Kitai deka nulung menyadi Kristian ke enda aktif nginjil baru sereta ngaga murid. Baka ni kitai ngereja nya? Kitai ulih belajar ari teladan Jesus.

¹⁴ Sebedau Jesus dibunuh, bala rasul iya ‘ninggalka iya, lalu rari.’ (Mrk. 14:50; Jhn. 16:32) Maya nya, bala rasul Jesus amat asa ati. Tang nama digaga Jesus? Pengudah iya diangkatka idup baru, Jesus madah ngagai sekeda murid iya: “Anang takut! Alai, padah ke sida menyadi aku, [aku udah diangkatka idup baru].” (Mat. 28:10a, Bup Kudus Berita Manah Ka Rebak Diatu) Jesus enda ninggalka bala rasul iya. Taja pan sida ninggalka Jesus, iya agi ngumbai sida “menyadi aku.” Baka Jehovah, Jesus bisi pengasih sereta sedia deka ngampun.—2 Raj. 13:23.

15. Nama asai ati kitai ngagai bala menyadi ke ngetu nginjil?

¹⁵ Pia mega, kitai amat ibuhka bala menyadi ke udah ngetu nginjil. Sida nya bala menyadi Kristian kitai, lalu kitai rinduka sida! Kitai agi ingat semua pengawa ti digaga bala menyadi Kristian ke Jehovah, nyengkaum sida ke udah betaun-taun gawa enggau ransing, tang diatu sida enda aktif agi. (Heb. 6:10) Kitai amat lelengauka sida! (Luk. 15:4-7) Enggau neladan Jesus, nama chara kitai nunjukka diri ibuhka sida?

16. Baka ni kitai ulih ibuhka bala menyadi Kristian ke enda aktif?

¹⁶ Ngelaluka sida datai ngagai gempuru. Siti chara Jesus meransang bala rasul iya ke asa ati, iya nya mai sida datai begempuru. (Mat. 28:10b; 1 Kor. 15:6) Baka nya mega, enti menyadi ke enda aktif udah lama nadai datai begempuru, kitai ulih meransang iya datai baru. Tang kitai patut ngereja nya mayuh kali. Jesus tentu gaga ati lebuh bala murid iya datai betemu enggau iya.—Bandingka Matthew 28:16 enggau Luke 15:6.

17. Nama patut digaga kitai lebuh menyadi ke enda aktif datai begempuru?

¹⁷ Ngelaluka penatai sida. Jesus ngelaluka bala murid iya lebuh sida betemu enggau iya. Jesus enda nganti sida datai ngagai iya, tang iya empu ke datai ngagai sida lalu berandau enggau sida. (Mat. 28:18) Baka ni enggau kitai lebuh menyadi ke enda aktif datai ngagai Palan Gempuru? Baka Jesus, kitai mansang lalu ngelaluka penatai iya enggau manah. Terubah iya, kitai engka berasai irau laban enda nemu nama utai ke patut disebut ngagai sida. Ngambika iya berasai nyamai, kitai ulih madah diri gaga ati ulih betemu enggau iya.

18. Baka ni kitai ulih meransang penginjil ke enda aktif?

¹⁸ Meransang sida. Bala murid Jesus engka ngumbai diri enda ulih ngereja pengawa nginjil di serata dunya. Jesus meransang bala murid iya enggau nyebut: “Aku deka seruran enggau kita.” (Mat. 28:20) Kati jaku nya meransang bala murid iya? Au. Enda lama udah nya, sida mengkang “ngajar sereta nusui ka berita manah.” (SKR. 5:42, Bup Kudus Berita Manah Ka Rebak Diatu) Penginjil ke enda aktif mega begunaka peransang. Sida engka berasai takut deka nginjil baru. Enti sida udah besedia, kitai ulih begulai nginjil enggau sida. Sida deka beterima kasih ke sukung kitai lebuh sida berengkah  nginjil baru. Lebuh kitai ngumbai sida ke enda aktif tu menyadi Kristian kitai, sida engka deka pulai baru lalu nya deka ngasuh bala menyadi ke bukai berasai gaga ati.

19. Nama juluk ati kitai, lalu nama kebuah?

¹⁹ Berapa lama agi kitai deka terus nginjil sereta ngaga murid? Pengawa tu deka terus dipejalaika nyentuk ngagai pengujung dunya. (Mat. 28:20) Sebedau maya nya datai, aram meh kitai terus nginjil sereta ngaga orang nyadi murid! Kitai gaga ati meri awak, pengering, enggau duit ngiga orang ke deka “nerima pengidup ti meruan belama iya.” (SKR. 13:48) Lebuh kitai ngereja nya, kitai neladan Jesus ke nyebut: ‘Pemakai aku nya ngereja peneka Iya ke ngirumka aku, lalu nembuka pengawa Iya.’ (Jhn. 4:34; 17:4) Nya meh juluk ati kitai, iya nya nembuka pengawa ti udah diberi Jesus ngagai kitai. (Jhn. 20:21) Lalu kitai deka orang bukai, nyengkaum menyadi ke enda aktif, sama betan ngereja pengawa tu.—Mat. 24:13.

20. Nitihka Pilipi 4:13, nama kebuah kitai ulih nembuka pengawa ke diasuh Jesus?

²⁰ Endang enda senang ngereja pengawa ke diasuh Jesus. Taja pia, kita enda kediri ngereja pengawa tu. Jesus besemaya iya deka enggau kitai. Lebuh kitai ngaga murid, ‘kitai sama bekereja enggau Petara.’ (1 Kor. 3:9) Nya alai, kitai ulih nembuka pengawa ke udah diberi ngagai kitai. Endang basa ti besai ulih ngereja pengawa tu sereta nulung orang bukai sama ngereja nya mega!—Bacha Pilipi 4:13.