1. Nama ulih ngelantangka ati kitai lebuh kitai berasai kediri tauka napi mayuh penanggul? (Masmur 118:5-7)

KALA nuan ngasaika kediri lalu nadai orang nulung nuan lebuh napi penanggul? Mayuh orang ngasaika baka nya, nyengkaum nembiak Jehovah ti tetap ati. (1 Raj. 19:14) Enti nuan kala ngasaika baka nya, kingatka semaya Jehovah: “Aku enggai sekali-kali ninggalka kita, tauka ngelengkaka kita.” Kitai ulih arap: ‘Jehovah endang penyaup aku, nya alai aku enda takut.’ (Heb. 13:5, 6) Jaku tu ditulis rasul Paul ngagai bala menyadi Kristian di Judea kira-kira taun 61 Masihi. Jaku ke ditulis iya ngingatka kitai utai ke dipadah ba Masmur 118:5-7.—Bacha.

2. Nama deka dipejuraika kitai ba artikel diatu, lalu nama kebuah?

² Baka pemasmur, Paul nemu Jehovah endang Penyaup iya laban Jehovah udah nulung iya mayuh kali sebedau nya. Ambika chunto, lebih ari dua taun sebedau iya nulis surat ngagai orang Kristian bansa Hebrew, Paul napi pejalai ti tusah laban kapal ke dikena sida dipangka kabut ti balat. (SKR. 27:4, 15, 20) Sebedau ba pejalai ke tusah nya, Jehovah kala nulung Paul ngena bemacham chara. Kitai deka bejuraika tiga iti chara iya nya (1) nengah Jesus enggau bala melikat, (2) orang ke bisi kuasa dalam perintah, sereta (3) bala menyadi Kristian. Lebuh kitai berandauka tiga iti pekara tu ba pengidup Paul, kitai deka arap  agi ngagai semaya Petara iya nya, Iya deka nyaut sampi kitai.

3. Nama engka ditanya Paul, lalu nama kebuah?

³ Paul begunaka tulung. Ba urung taun 56 Masihi, seraban orang mayuh ngirit Paul pansut ari rumah sembiang di Jerusalem lalu nguji deka munuh iya. Ba hari siti, lebuh Paul dibai ngagai balai Kunsil, iya nyauka dibunuh bala munsuh iya. (SKR. 21:30-32; 22:30; 23:6-10) Maya nya, Paul engka nanya diri empu, ‘Berapa lama aku patut betan napi penanggul tu?’

4. Baka ni Jehovah ngena Jesus nulung Paul?

⁴ Nama tulung ke diterima Paul? Malam pengudah Paul ditangkap, Jesus bediri ngimbai iya lalu madah: ‘Anang takut! Baka nuan ke udah besaksika pasal aku di Jerusalem, baka nya mega nuan deka besaksika pasal aku di Rome.’ (SKR. 23:11) Semaya nya amat meransang Paul! Jesus muji pengawa Paul ke udah besaksika pasal iya di Jerusalem. Lalu iya besemaya Paul deka selamat datai di Rome, alai iya terus besaksika pasal Jesus. Pengudah ningaka semaya nya, Paul tentu berasai likun, baka anak ke diberap apai.

5. Baka ni Jehovah ngena seiku melikat nulung Paul? (Peda gambar ba mua majalah.)

⁵ Nama penanggul bukai ke ditapi Paul? Kira-kira dua taun pengudah utai ke nyadi di Jerusalem, Paul mansang ngagai Itali ngena kapal. Maya nya kabut balat mangka nyentukka semua sida ba kapal ngumbai diri deka mati. Tang Paul enda takut. Nama kebuah? Ku iya madah ngagai sida: ‘Laban malam tadi siku melikat Petara, iya nya Petara ke dipetuaika sereta disembah aku, bisi bediri ngimbai aku, lalu bejaku, “Anang takut, Paul. Nuan enda tau enda bediri di mua Raja Besai. Lalu Petara deka nyelamatka semua orang ke belayar enggau nuan.”’ Jehovah ngena seiku melikat nandu baru semaya ke udah diberi Iya ngagai Paul nengah Jesus. Lalu Paul datai ba Rome baka ke udah disemaya ke Jehovah.—SKR. 27:20-25; 28:16.

6. Nama semaya Jesus ke ulih ngeringka kitai, lalu nama kebuah?

⁶ Nama tulung ke diterima kitai? Jesus deka nulung kitai, baka iya ke udah nulung Paul. Ambika chunto, Jesus besemaya ngagai bala murid iya: “Aku deka seruran enggau kita nyentuk ngagai pengujung dunya.” (Mat. 28:20) Jaku Jesus ulih ngeringka kitai. Nama kebuah? Laban bisi maya  kitai tusah deka betan. Ambika chunto, lebuh orang ti dikesayauka kitai udah nadai, pemedis ke diasaika kitai ukai semina beberapa hari tang betaun-taun. Sekeda berasai tusah ketegal sida udah tuai. Bisi mega kelalu balat tusah ati ketegal depression. Taja pia, kitai ulih betan laban kitai nemu Jesus “seruran” enggau kitai nyengkaum ba maya kitai berasai amat lemi.—Mat. 11:28-30.

7. Nitihka Pemandang 14:6, baka ni Jehovah nulung kitai kemayaharitu?

⁷ Ari Bup Kudus kitai pechaya, Jehovah ngena bala melikat Iya nulung kitai. (Heb. 1:7, 14) Ambika chunto, bala melikat nulung sereta ngiring kitai lebuh kitai nginjil ‘berita manah pasal Perintah Petara’ ngagai ‘semua bansa, raban bansa, enggau jaku.’—Mat. 24:13, 14; bacha Pemandang 14:6.

8. Baka ni Jehovah ngena kepala soldadu nulung Paul?

⁸ Nama tulung ke diterima Paul? Ba taun 56 Masihi, Jesus besemaya Paul deka selamat datai ba Rome. Taja pia, sekeda orang Judah di Jerusalem merambu deka nyerang sereta munuh Paul. Lebuh kepala soldadu Rome iya nya Klaudius Lisias nemu pasal pelan tu, iya datai nyelamatka Paul. Tekala nya, Klaudius ngasuh raban soldadu ngelindung Paul lalu mai iya ngagai Siseria, nengah jalai ke kira-kira 105 kilometer (65 batu) ari Jerusalem. Ba Siseria, Gabenor Peliks ngasuh Paul “dijaga dalam istana Herod.” Ketegal nya, munsuh Paul enda ulih munuh iya.—SKR. 23:12-35.

9. Baka ni Gabenor Pestus nulung Paul?

⁹ Dua taun pengudah nya, Paul agi dijil di Siseria. Pestus nganti Peliks nyadi gabenor. Orang Judah minta Pestus mai Paul ngagai Jerusalem ngambika dipechara, tang Pestus enggai. Engka Pestus nemu orang Judah ‘deka ngipa lalu munuh Paul di rantau jalai.’—SKR. 24:27–25:5.

10. Nama digaga Gabenor Pestus lebuh Paul minta dipechara Raja Besai?

¹⁰ Pengudah nya, Paul dipechara di Siseria. Ketegal Pestus “minta diri dikerinduka orang Judah,” iya nanya Paul, “Kati nuan deka mupuk ngagai Jerusalem lalu kena pechara din . . . di mua aku empu?” Paul nemu iya tentu deka dibunuh di Jerusalem. Nya alai, ngambika iya enda dibunuh lalu ulih selamat datai ba Rome kena neruska pengawa nginjil, Paul madah: “Aku ngapil ngagai Raja Besai.” Pengudah berunding enggau bala penyanding penemu iya, Pestus madah ngagai Paul: “Nuan udah ngapil ngagai Raja Besai. Ngagai Raja Besai meh nuan deka mupuk.” Ketegal pemutus Pestus deka nganjung Paul ngagai Rome, munsuh Paul enda ulih munuh iya.—SKR. 25:6-12.

11. Baka ni jaku ke ditulis Isaiah ngelantangka ati Paul?

¹¹ Sebedau Paul mupuk ngagai Itali, iya engka belematika jaku tangkan ke ditulis nabi Isaiah pasal orang ke ngelaban Jehovah. Ku iya: ‘Gaga meh pelan kita! Tang pelan nya enda ulih mujur. Bejaku meh kita enggau sepeneka ati kita! Tang jaku kita nya nadai guna, laban Petara bisi enggau kami.’ (Isa. 8:10) Paul nemu Petara deka nulung iya, lalu tu tentu meri iya pengering kena betan napi penanggul ke deka datai.

12. Baka ni ulah Julius ngagai Paul, lalu nama ditemu Paul?

¹² Ba taun 58 Masihi, Paul mupuk ngagai  Itali. Laban Paul agi nyadi orang tangkap, iya diserahka ngagai Julius seiku pemesai soldadu Rome. Julius ulih milih deka manah enggau Paul tauka enda. Baka ni iya ngena kuasa iya? Ba hari siti, lebuh kapal sida sangkai ba tebing, “Julius manah amat enggau Paul lalu ngemendarka iya betemu enggau pangan iya.” Julius mega kala nyelamatka Paul. Baka ni? Bala soldadu deka munuh semua orang tangkap ba kapal nya, tang Julius enda ngasuh sida ngereja nya. Nama kebuah? Iya “ingin deka ngidupka Paul.” Paul engka nemu Jehovah ngena Julius nulung sereta nyaga iya.—SKR. 27:1-3, 42-44.

13. Baka ni Jehovah ngena orang ke bisi kuasa ba perintah?

¹³ Nama tulung ke diterima kitai? Enti sejalai enggau tuju Iya, Jehovah ulih ngena roh kudus ngasuh orang ke bisi kuasa ba perintah ngereja peneka Iya. Raja Solomon nulis: ‘Jehovah ngatur runding raja, ngemudah Iya ke ngatur arus sungai.’ (J-lam. 21:1) Nama reti jaku tu? Mensia ulih ngaga parit kena ngubah arus ai. Pia mega, Jehovah ulih ngena roh kudus Iya ngubah runding pemerintah sejalai enggau tuju Iya. Lebuh nya nyadi, sida diperansang ngaga pemutus ti mai penguntung ngagai nembiak Petara.—Bandingka Esra 7:21, 25, 26.

14. Nitihka Kereja Rasul 12:5, kitai ulih besampika sapa?

¹⁴ Nama ulih digaga kitai? Kitai ulih besampi “ke raja enggau ke semua orang ke megai kuasa” lebuh sida patut ngaga pemutus bekaul enggau pengawa nginjil sereta gempuru kitai. (1 Tim. 2:1, 2; Neh. 1:11) Baka menyadi Kristian ba kurun keterubah, kitai mega ulih besampika bala menyadi Kristian ke kena jil. (Bacha Kereja Rasul 12:5; Heb. 13:3) Kitai mega besampika jejaga jil ke nyaga bala menyadi Kristian ke dijil. Kitai minta Jehovah ngena orang ti bekuasa ngambika sida ulih ngereja utai baka Julius lalu “manah” enggau menyadi Kristian kitai ke dijil.—SKR. 27:3.

15-16. Baka ni Jehovah ngena Aristarkus enggau Luke nulung Paul?

¹⁵ Nama tulung ke diterima Paul? Lebuh pejalai iya ngagai Rome, Jehovah seruran ngena bala menyadi Kristian nulung Paul. Aram kitai beratika sekeda chunto.

 ¹⁶ Dua iku pangan Paul, Aristarkus enggau Luke, mutus deka enggau Paul ngagai Rome. * Seduai iya sanggup berambunka nyawa enggau Paul ba pejalai ti tusah nya taja pan Jesus nadai besemaya ngagai seduai iya ulih datai enggau selamat ba Rome. Nya alai, lebuh Aristarkus enggau Luke nepan kapal di Sisera, Paul tentu meri sampi terima kasih ngagai Jehovah, laban udah meri tulung nengah dua iku menyadi ti berani tu.—SKR. 27:1, 2, 20-25.

17. Baka ni Jehovah ngena bala menyadi Kristian nulung Paul?

¹⁷ Bala menyadi Kristian nulung Paul beberapa kali ba pejalai iya. Ambika chunto, lebuh sida sangkai di Sidon, Julius ngemendarka Paul “betemu enggau pangan iya, ngambika sida ngintu iya.” Lalu udah nya, lebuh sida datai di Puteoli, Paul enggau bala menyadi ke belayar enggau iya ‘tetemuka sekeda sida ke arap, lalu dibai diau enggau sida tujuh hari.’ Lebuh bala menyadi Kristian ba endur nya ngintu Paul enggau bala pangan iya, sida tentu diperansang lebuh Paul bekunsika peneleba ti meransang enggau sida. (Bandingka Kereja Rasul 15:2, 3) Pengudah diperansang, Paul enggau bala pangan iya neruska pejalai sida.—SKR. 27:3; 28:13, 14.

18. Nama ngasuh Paul beterima kasihka Petara lalu diperansang?

¹⁸ Lebuh Paul bejalai ngagai Rome, iya engka ngenang baru utai ke ditulis iya tiga taun sebedau nya ngagai eklisia di Rome: “Laban aku lama udah lelengauka kita, aku deka nemuai ngagai kita.” (Rom. 15:23) Tang iya enda nyangka lebuh iya datai ba Rome iya nyadi orang tangkap. Iya tentu berasai diperansang lebuh meda bala menyadi ari Rome datai ngambat iya. “Lebuh Paul meda sida, iya meri terima kasih ngagai Petara lalu berasai diperansang.” (SKR. 28:15) Peratika Paul beterima kasihka Petara laban ulih betemu enggau bala  menyadi. Nama kebuah? Laban Paul nemu Jehovah ngena bala menyadi meransang iya.

19. Nitihka 1 Peter 4:10, baka ni Jehovah ngena kitai nulung bala menyadi Kristian?

¹⁹ Nama ulih digaga kitai? Kati nuan nemu menyadi Kristian ba eklisia nuan ke merinsa ketegal sakit, tauka orang ti dikesayauka sida udah nadai, tauka napi penanggul bukai? Enti kitai nemu menyadi Kristian ke begunaka tulung, kitai ulih minta Jehovah nulung kitai nyebut tauka ngereja utai ti manah ke menyadi nya. Jaku sereta ulah kitai engka ulih meransang menyadi Kristian ke begunaka tulung. (Bacha 1 Peter 4:10.) * Enti kitai nulung sida, sida engka arap baru semaya Jehovah ke madahka: “Aku enggai sekali-kali ninggalka kita, tauka ngelengkaka kita.” Endaka tu ngasuh nuan gaga ati?

20. Nama kebuah kitai ulih enggau andal nyebut: ‘Jehovah endang penyaup aku’?

²⁰ Baka Paul enggau bala pangan iya, kitai mega napi penanggul ba pengidup. Tang kitai ulih berani laban Jehovah bisi enggau kitai. Iya ngena Jesus enggau bala melikat nulung kitai. Pia mega, enti sejalai enggau tuju Iya, Jehovah ulih ngena orang ke bisi kuasa ba perintah nulung kitai. Lalu kitai kala ngasaika Jehovah ngena roh kudus Iya meransang bala menyadi Kristian nulung kitai. Nya alai, baka Paul, kitai ulih andal lebuh nyebut: ‘Jehovah endang penyaup aku, nya alai aku enda takut. Nama utai ulih dikereja orang ngagai aku?’—Heb. 13:6.