Aku ada ba taun 1983. Keterubah iya, aku baka anak mit biasa aja. Tang lebuh aku beumur 10 taun, aku ngasaika pemedis ti balat ba tubuh aku. Kira-kira dua taun udah nya, lebuh aku dani pagi, aku enda ulih engkebut. Bendar aku deka ngangkatka kaki aku tang enda ulih. Kenyau hari nya, aku enda ulih bejalai agi. Ketegal penyakit tu, aku enda ulih mansang besai. Diatu aku agi baka anak mit.

Aku udah diau ba rumah beberapa bulan lebuh dua iku Saksi-Saksi Jehovah datai ngabas aku. Lebuh orang datai, aku suah agi belalai. Tang sehari nya, aku ningaka jaku dua iku indu nya. Lebuh seduai iya bejaku pasal Paradais, aku ingat baru utai ke didinga aku maya umur lima taun. Maya nya, seiku pengerintis seberai tasik ke banama Jethro, datai ke kampung kami sebulan sekali lalu belajar Bup Kudus enggau apai aku. Jethro amat manah enggau aku, nya alai aku rindu enggau iya. Pia mega, aki ini aku kala mai aku ngagai gempuru Saksi-Saksi Jehovah. Nya alai, lebuh seiku ari indu nya ke benama Florence, nanya enti aku deka nemu mayuh agi, aku madah au.

Florence enggau laki iya, Justus, berengkah ngajar aku Bup Kudus. Lebuh seduai nemu aku enda nemu macha, seduai lalu ngajar aku macha. Enda lama udah nya, aku ulih macha kediri empu. Bisi sekali seduai madah ngagai aku, seduai iya deka dianjung ngagai Suriname. Sinu amat laban nadai orang ba Orealla deka ngajar aku Bup Kudus. Tang aku gaga ati laban Jehovah seruran ingatka aku.

Enda lama udah nya, seiku pengerintis ke benama Floyd datai ba Orealla. Iya tetemuka aku lebuh nginjil ari rumah ke rumah. Lebuh iya nanya enti aku deka belajar Bup Kudus, aku tuchum. “Nama kebuah nuan tuchum?” ku iya. Aku madahka, udah kala belajar brosur Nama Diguna Petara ari Kitai? lalu udah berengkah belajarka bup Pengetahuan yang Membimbing kepada Kehidupan Abadi. * Aku madahka kebuah aku diatu nadai belajar. Udah nya Floyd nyambung belajar ngena bup Pengetahuan. Tang iya mega dianjung ngagai endur bukai. Sekali agi aku nadai pengajar Bup Kudus.

 Taja pia ba taun 2004, dua iku pengerintis spesial iya nya Granville enggau Joshua, dianjung ngagai Orealla. Sida tetemuka aku lebuh nginjil ari rumah ke rumah. Sida nanya enti aku deka belajar, aku tuchum. Aku minta seduai iya ngajar aku bup Pengetahuan ari pun. Aku deka nemu sekalika seduai iya deka ngajar utai ti sama baka pengajar aku suba. Granville madahka bisi gempuru ba kampung kami. Taja pan aku enda kala ningalka rumah pengelama sepuluh taun, tang aku deka datai ngagai gempuru. Nya alai, Granville ngambi aku ari rumah lalu ngengkahka aku ba kerusi roda sereta mai aku ngagai Palan Gempuru.

Udah nya Granville meransang aku enggau Sekula Kereja Teokratik. Ku iya: “Taja pan nuan enda ulih bejalai, tang nuan ulih bejaku. Ila nuan deka meri cheramah. Tu deka nyadi.” Jaku iya meri aku peransang.

Aku berengkah nginjil enggau Granville. Taja pia, mayuh jalai enda manah ba kampung nya, nyadi tusah deka ngasurka kerusi roda. Nya alai, aku minta Granville ngengkahka aku ba kerita surung lalu mai aku bejalai. Tu chara ti manah. Ba April 2005, aku dibaptisa. Enda lama udah nya, seiku menyadi lelaki ngajar aku nyaga litaricha sereta perengka audio ba Palan Gempuru.

Sinu amat, kena taun 2007, apai aku mati ketegal kena kipas enjin perau. Kami sebilik amat tusah ati ninga rita nya. Granville besampi enggau kami lalu bekunsika ayat Bup Kudus ti meransang. Dua taun udah nya, kami amat tekenyit lebuh ninga berita Granville mati ketegal perau karam.

Eklisia kami nadai agi tuai gempuru. Semina bisi penulung gempuru. Aku sinu ati laban kaban aku ti manah, Granville udah nadai. Iya seruran meransang aku semak ngagai Jehovah sereta nyediaka utai ke diguna aku. Ba gempuru pengudah iya ke nadai, aku bisi pengawa macha Menara Jaga. Pengudah aku macha dua iti genteran, aku berengkah nyabak lalu enda ulih badu nyentukka aku patut ninggalka pangau.

Aku berasai nyamai agi lebuh bala menyadi datai ari eklisia bukai nulung kami ba Orealla. Pampang opis nganjung pengerintis spesial ke benama Kojo. Aku berasai gaga laban indai enggau menyadi lelaki aku ke biak berengkah belajarka Bup Kudus lalu dibaptisa. Ba bulan Mac 2015 aku dipilih nyadi penulung gempuru. Enda lama udah nya, aku meri cheramah keterubah. Maya nya aku tuchum sereta nyabak lebuh ngenang jaku ke disebut Granville: “Ila nuan deka meri cheramah. Tu deka nyadi.”

Ari Berita JW^®, aku nemu bisi mayuh bala menyadi ke sama penanggul baka aku. Taja pan sida sakit, sida agi ngereja mayuh utai lalu gaga ati. Aku pan deka gawa ke Jehovah enggau naka ulih. Nya kebuah aku berengkah nyadi pengerintis biasa. Lalu udah nya aku nerima berita ke enda disadang aku. Kena September 2019, aku nyadi tuai gempuru ba eklisia ke bisi 40 iku penginjil.

Aku beterima kasih ke bala menyadi ke udah ngajar aku sereta nulung aku ba pengawa nginjil. Kelebih agi, aku amat beterima kasih ngagai Jehovah laban Iya seruran ingatka aku.