1. Nitihka Matthew 7:13, 14, nama kebuah kitai ngumbai kitai benung ba jalai?

SEMUA kitai benung ba jalai. Tuju pejalai kitai iya nya nuju ngagai pengidup ba dunya baru di baruh Perintah Jehovah. Ninting hari kitai nguji nengah jalai ti nuju ngagai pengidup. Tang Jesus madah jalai nya mar ditengah kitai. (Bacha Matthew 7:13, 14.) Laban kitai enda sempurna, senang kitai deka ninggalka jalai nya.—Gal. 6:1.

2. Nama deka dipejuraika kitai ba artikel tu? (Peda mega kutak “ Pemaruh Ati Nulung Kitai Mengkang ba Jalai ti Mar.”)

² Enti kitai deka terus ba jalai ti mar nuju ngagai pengidup, kitai enda tau enda ngaga ubah ba runding sereta ulah. Rasul Paul meransang orang Kristian ke diau ba Korint terus “ngemetulka runding.” (2 Kor. 13:11, NWT) Jaku lalau nya mega ke kitai. Ba artikel tu, kitai deka bejuraika baka ni Bup Kudus ulih nulung kitai ngaga ubah sereta baka ni pangan ti tegap ba pengarap ulih nulung kitai mengkang ba jalai ti nuju ngagai pengidup. Kitai mega deka beratika nama kebuah kekadang tusah kitai deka nitihka iring ari gerempung Jehovah sereta baka ni pemaruh ati ulih nulung kitai ngaga ubah lalu ngetanka pengaga ati lebuh nyembah Jehovah.

3. Baka ni Bup Kudus ulih nulung nuan?

³ Nama kebuah kitai tusah deka meresa runding enggau asai ati diri empu? Laban ati kitai nemu ngakal, kitai enda  ulih arapka iya. (Jer. 17:9) Lalu kitai senang “nipu diri empu.” (Jas. 1:22) Nya alai, kitai enda tau enda ngena Bup Kudus meresa diri empu. Bup Kudus nulung kitai nemu “runding enggau niat ati” kitai ti bendar. (Heb. 4:12, 13) Kitai tau nyemaka Bup Kudus baka mesin X-ray ke nulung kitai meda pengelemi diri. Tang kitai patut baruh ati ngambika ulih nitihka jaku lalau ke diberi Bup Kudus tauka menyadi ti ngiring.

4. Baka ni kitai nemu Raja Saul nyadi orang ti sumbung?

⁴ Chunto Raja Saul nunjukka nama ulih nyadi enti kitai enda baruh ati. Saul nyadi amat sumbung nyentukka iya ngumbai diri enda ibuh ngaga ubah ba runding tauka ulah. (Mas. 36:1, 2; Hab. 2:4) Ambika chunto, lebuh Jehovah madah utai ke patut digaga Saul pengudah ngalahka orang Amalek, Saul enda ngasika Jehovah. Lalu lebuh nabi Samuel madahka penyalah Saul, Saul enggai ngaku. Iya ngumbai penyalah iya enda berat sereta nyalahka orang bukai. (1 Sam. 15:13-24) Sebedau tu, Saul mega kala ngayan ulah ti sama. (1 Sam. 13:10-14) Sayau amat, Saul enda ngemetulka runding iya lalu ngemendarka ati iya nyadi sumbung. Nya alai Jehovah nulak iya.

5. Nama ulih dipelajarka kitai ari Saul?

⁵ Kitai enggai nyadi baka Saul. Nya alai kitai deka nanya diri empu: ‘Lebuh aku macha jaku lalau ba Bup Kudus, kati aku ngiga tegal enda nitihka jaku lalau nya? Kati aku ngumbai penyalah ke digaga aku nya enda besai? Kati aku nyalahka orang bukai?’ Enti kitai nyaut au ngagai tiga iti tanya nya, kitai enda tau enda ngemetulka runding enggau ulah kitai. Enti kitai enda ngaga ubah, ati kitai deka nyadi sumbung lalu Jehovah enggai nyadi pangan kitai.—Jas. 4:6.

6. Nama bida entara Raja Saul enggau Raja David?

⁶ Peratika bida entara Raja Saul enggau Raja David. David rinduka ‘Adat Jehovah.’ (Mas. 1:1-3) David nemu Jehovah nyelamatka orang ti baruh ati, tang Iya nulak orang ke sumbung. (2 Sam. 22:28) Nya alai, David nejuka Adat Petara ngemetulka runding iya. Ku iya nulis: ‘Aku muji Jehovah, laban Iya ngiring aku, lalu lebuh malam hari ati aku empu ngajar aku.’—Mas. 16:7.

7. Nama deka digaga kitai enti kitai baruh ati?

⁷ Enti kitai baruh ati, kitai deka nejuka Jaku Petara ngemetulka runding kitai ti salah sebedau kitai ngereja nya. Jaku Petara baka munyi nyawa ke madah ngagai kitai: “Tu jalai. Titi jalai tu.” Iya deka nangkan kitai enti kita limpang ke kanan tauka ke kiba. (Isa. 30:21) Kitai deka bulih penguntung enti kitai mendingka Jehovah. (Isa. 48:17) Siti ari penguntung nya, kitai enda berasai malu enti kitai enda nganti orang ngemetulka kitai. Lalu kitai ulih semak enggau Jehovah laban kitai nemu Iya ibuhka kitai baka seiku apai.—Heb. 12:7.

8. Nitihka James 1:22-25, baka ni kitai ulih ngena Bup Kudus nyadika cheremin?

⁸ Jaku Petara tau disemaka baka cheremin. (Bacha James 1:22-25.) Tiap pagi kitai meda diri ba cheremin sebedau mupuk ari rumah. Enggau chara nya, kitai ulih ngaga ubah ke patut sebedau betemu enggau orang. Pia mega, lebuh kitai macha Bup Kudus ninting hari, kitai ulih nemu ubah ke patut digaga ba runding sereta ulah kitai. Mayuh orang meresa ayat Bup Kudus ninting pagi sebedau sida mupuk ari rumah. Sida nejuka utai ke dibacha ngemetulka runding sida. Lalu ba hari nya, sida ngiga chara deka nitihka jaku lalau ayat nya ba pengidup sida.  Nambahka nya, kitai enda tau enda belajar sereta belematika Bup Kudus ninting hari. Tu baka senang dikereja. Tang, nya meh utai ti pemadu beguna kena nulung kitai terus nengah jalai ti mar nuju ngagai pengidup.

9. Ni maya pangan nuan patut meri jaku lalau ngagai nuan?

⁹ Kala nuan berengkah ngereja utai ti ulih ngerusak kaul nuan enggau Jehovah? (Mas. 73:2, 3) Enti bisi pangan nuan ti tegap ba pengarap meri jaku lalau, kati nuan mending sereta nitihka jaku iya? Enti nuan udah mendingka iya, nuan udah ngereja utai ti betul. Nuan tentu beterima kasih laban pangan nuan udah ngelalau nuan.—J-lam. 1:5.

10. Nama patut digaga nuan enti bisi pangan ngelalau nuan?

¹⁰ Bup Kudus ngingatka kitai: “Pangan nganu enggau ati ti manah, taja pen nuan pedis dianu sida.” (J-lam. 27:6) Nama reti ayat tu? Peratika chunto tu: Lebuh nuan deka ngelayang jalai, talipaun nuan bemunyi. Lalu nuan meda talipaun nuan, tang nuan enda meda kerita ke datai. Pangan nuan jampat-jampat narit lengan nuan. Ketegal iya narit lengan nuan enggau balat, lengan nuan berasai pedis. Tang utai ke digaga iya, udah nyelamatka nuan ari dilantak kerita. Ketegal lengan nuan pedis ditarit iya, kati nuan ringat ngagai iya? Tentu enda! Nuan deka beterima kasih laban iya udah nyelamatka nuan. Baka nya mega, enti pangan nuan ngelalau pasal jaku tauka ulah nuan ti enda sejalai enggau standard Jehovah, nuan engka berasai enda nyamai ati. Tang anang meh ringat, laban Bup Kudus ngumbai ulah nya beli. (P-jar. 7:9) Beterima kasih meh laban kaban nuan berani ngelalau nuan.

11. Nama ulih ngasuh orang nulak jaku lalau ke diberi pangan sida?

¹¹ Nama ulih ngasuh kitai nulak jaku lalau ti manah ke diberi pangan kitai? Orang ti sumbung rindu ninga “utai ti dikerinduka sida” lalu “limpang ari ajar ti bendar.” (2 Tim. 4:3, 4) Sida ngumbai diri enda begunaka jaku lalau laban sida pandai agi ari orang bukai. Tang rasul Paul nulis: “Enti orang ngumbai diri pama agi ari ti patut, iya nipu diri empu.” (Gal. 6:3) Raja Solomon nyimpulka pekara tu enggau manah lebuh iya nulis: “[Raja] nyau tuai lalu kelalu beli lalu enggai ningaka jaku lalau, iya deka tusah agi ari orang bujang ke seranta tang nemu berunding.”—P-jar. 4:13, 14.

12. Nitihka Galatia 2:11-14, nama ulih dipelajarka kitai ari rasul Peter?

¹² Pikirka utai ke digaga Peter lebuh Paul ngemetulka iya ba mua orang mayuh. (Bacha Galatia 2:11-14.) Ari ke ringat enggau Paul, Peter nerima jaku lalau ke diberi Paul lalu iya enda ngambi ati. Taja pan utai nya udah nyadi, Peter agi ngumbai Paul “menyadi.”—2 Pet. 3:15.

13. Nama patut dikingatka kitai sebedau meri jaku lalau?

¹³ Enti nuan ngasaika diri patut meri jaku lalau ngagai pangan, nama patut dikingatka nuan? Sebedau nuan madah ngagai pangan nuan, tanya diri empu, ‘Kati aku ngumbai diri “kelalu manah”?’ (P-jar. 7:16) Orang ke ngumbai diri kelalu manah ngakim orang bukai ngena standard diri empu, ukai standard Jehovah. Lalu iya enda entu bisi pengasih. Pengudah nuan meresa tuju diri empu lalu agi ngasaika nuan patut meri jaku lalau ngagai pangan nuan, padahka penanggul iya lalu ngena tanya ngambika  iya nemu nama penyalah iya. Tentuka utai ti dipadah nuan bepelasarka ayat Bup Kudus. Ari ke ngakim iya, tulung iya nemu asai ati Jehovah pasal utai ke digaga iya. (Rom. 14:10) Bepanggai meh ba penemu-dalam ari Jaku Petara. Lalu lebuh meri jaku lalau, tunda meh penyiru Jesus. (J-lam. 3:5; Mat. 12:20) Nama kebuah? Laban Jehovah deka kasihka kitai enti kitai kasihka orang bukai.—Jas. 2:13.

14. Nama udah disediaka gerempung Petara ke kitai?

¹⁴ Jehovah ngena gerempung Iya ba dunya ngiring kitai nengah jalai ti nuju ngagai pengidup. Gerempung Iya nyediaka video, litaricha enggau gempuru kena nulung kitai nitihka jaku lalau ti bisi ba Bup Kudus. Penerang tu ulih dikearapka laban datai ari Bup Kudus. Lebuh Raban ti Ngiring ngaga pemutus bekaul enggau pengawa nginjil, sida bepanggai ba roh kudus. Taja pia, sida seruran meresa baru pemutus ke udah digaga kena nentuka enti bisi ubah patut digaga. Nama kebuah? Laban “gaya dunya ti diatu deka lenyau [‘deka berubah,’ NWT].” Nya alai gerempung Jehovah enda tau enda nitihka gaya utai ti nyadi ba dunya.—1 Kor. 7:31.

15. Nama penanggul ke ditapi sekeda penginjil?

¹⁵ Lebuh gerempung Petara meri kitai penerang baru bekaul enggau ajar Bup Kudus tauka meri iring bekaul enggau standard moral, kitai sedia nerima sereta ngena nya. Tang baka ni enti gerempung Petara ngaga ubah ke ngeruga pengidup kitai? Ambika chunto, beberapa taun tu ungkus kena ngaga sereta nyeruri Palan Gempuru majak nambah. Nya alai, Raban ti Ngiring meri iring ngambika beberapa iti eklisia ngena Palan Gempuru ti sama. Asil iya, mayuh eklisia disegulaika lalu sekeda Palan Gempuru udah dijual. Duit ke diulih dikena nirika Palan Gempuru ba endur ti amat begunaka nya. Nuan engka berasai tusah laban patut bekunsi Palan Gempuru enggau eklisia bukai. Sekeda penginjil patut bejalai jauh agi ngambika ulih datai gempuru. Menyadi bukai ke bebendar nirika tauka nyeruri Palan Gempuru engka berunding nama kebuah palan nya dijual. Sida engka ngasaika awak sereta pengering sida  lebu ngapa. Taja pia, sida nerima iring ti baru tu lalu patut dipuji.

16. Baka ni nitihka 2 Korint 6:1 nulung kitai ngetanka pengaga ati?

¹⁶ Kitai ulih ngetanka pengaga ati enti kitai ingat kitai bekereja ke Jehovah lalu Iya ke ngiring gerempung Iya. (Bacha 2 Korint 6:1.) Raja David netapka teladan ti manah lebuh iya meri duit kena nirika rumah sembiang. Ku iya: “Aku enggau nembiak aku enda tentu ulih meri Nuan utai, laban semua utai endang pemeri ari Nuan, lalu kami semina meri pulai baru utai ti endang enggi Nuan.” (1 Ban. 29:14) Lebuh kitai meri pemeri, kitai mega meri pulai utai ti endang enggi Jehovah. Taja pia, Jehovah gaga ati lebuh kitai meri awak, pengering enggau duit kena ngereja peneka Iya.—2 Kor. 9:7.

17. Nama kebuah nuan enda ibuh tusah ati enti nuan patut ngaga ubah?

¹⁷ Ngambika terus ba jalai ti mar nuju ngagai pengidup, semua kitai enda tau enda nitihka singkang Jesus. (1 Pet. 2:21) Enti nuan patut ngaga ubah, anang meh tusah ati. Tu nunjukka nuan deka nitihka iring ari Jehovah. Kingatka, Jehovah nemu kitai enda sempurna. Nya alai, Iya nemu kitai enda ulih neladan Jesus enggau sempurna.

18. Nama patut digaga kitai kena nyapai juluk ati?

¹⁸ Arapka semua kitai merening ngagai jemah ila, lalu sanggup ngaga ubah ba runding sereta ulah. (J-lam. 4:25; Luk. 9:62) Aram meh kitai mengkang baruh ati, “terus meh gaga ati, ngemetulka runding.” (2 Kor. 13:11, NWT) Enti kitai ngereja nya, ‘Petara ti pun pengerindu enggau pemaik deka meruan enggau [kitai].’ Iya deka nulung kitai gaga ati diatu sereta meri kitai pengidup ba dunya baru.