MAYUH menyadi Kristian mindah ngagai menua bukai ngambika ulih ngemanahka pengidup sida. Tang diatu sida udah pulai baru ngagai menua diri empu. Nama kebuah? Laban diperansang pengerindu ke Jehovah sereta orang bukai. Nya alai sida mindah ngagai endur ke begunaka mayuh penginjil. (Mat. 22:37-39) Nama utai ke patut dilengkaka sida lalu baka ni Jehovah merekatka sida? Kena nemu, aram meh kitai beratika peneleba bala menyadi ba menua Cameroon di Afrika barat.

Ba taun 1998, Onésime mindah ari menua asal iya Cameroon ngagai menua bukai. Iya diau dia 14 taun. Bisi sekali, ba gempuru Kristian, iya ninga siti sempama bekaul enggau pengawa nginjil. Ku pencheramah, “Bisi dua iku kaban nurun nginti. Tang seduai iya nginti ba endur ti enda sama. Seiku ari seduai iya bulih mayuh ikan. Nama patut digaga seiku agi kaban nya ngambika bulih mayuh agi ikan? Tentu iya deka pindah ngagai endur ke mayuh ikan.”

Sempama nya nulung Onésime berunding enti iya patut pulai ke Cameroon kena nulung penginjil din, laban bisi mayuh orang deka belajarka Bup Kudus. Tang iya bisi pengirau. Kati iya ulih nelebaka diri ba menua diri empu pengudah lama diau ba menua bukai? Nya alai Onésime pulai ngagai Cameroon pengelama enam bulan. Lalu ba taun 2012, iya pindah ngagai Cameroon.

Onésime madah: “Aku patut nelebaka diri enggau gaya hari ti angat sereta gaya pengidup orang ba dia. Ba Palan Gempuru, aku patut nelebaka diri duduk ba bangku kayu. Tang lebuh aku nyau mendingka program ba gempuru nya, aku enda entu berundingka pasal bangku ti bisi kusyen ba Palan Gempuru suba.”

Ba taun 2013, Onésime jadi enggau Géraldine, ke pulai baru ngagai Cameroon pengudah semilan taun diau ba Perancis. Baka ni Jehovah merekatka seduai iya ketegal ngenuluka peneka Iya ba pengidup? Ku Onésime madah: “Kami ngagai Sekula Penginjil Perintah Petara lalu gawa ba Betel. Taun nyin tadi, bisi 20 iku pemelajar Bup Kudus ari eklisia kami dibaptisa. Diatu aku ngasaika diri ba endur ti ngena kena ngulihka mayuh agi ‘ikan.’” (Mrk. 1:17, 18) Ku Géraldine nampung: “Berekat ti diulih aku nyau lebih agi ari dijangka aku.”

Judith pindah ngagai Amerika Serikat, tang iya deka ngereja mayuh agi ba pengawa nginjil. Ku iya, “Tiap kali aku pulai ari Cameroon, aku nyabak laban ninggalka pemelajar Bup Kudus ke baru berengkah belajar.” Taja pia, Judith agi irau deka pindah baru ngagai Cameroon. Iya bisi kereja ti begaji besai ke ulih nulung iya mayar ungkus berubat apai iya di Cameroon. Tang iya arapka Jehovah, lalu pindah pulai ngagai Cameroon. Iya ngaku bisi lelengauka sekeda utai ba Amerika Serikat. Iya besampi minta Jehovah nulung iya ngaga ubah. Iya mega bulih peransang ari tuai ti ngabas enggau bini iya.

Ku Judith ngenang, “Dalam timpuh tiga taun aku pulai ngagai Cameroon, aku udah nulung empat iku orang dibaptisa. Tu ngasuh aku gaga ati.” Judith berengkah nyadi pengerintis spesial. Kemayaharitu, iya enggau laki iya, Sam-Castel, seiku tuai ti ngabas, ngereja pengawa ba pelilih. Tang nama nyadi ngagai apai Judith? Judith enggau diri sebilik ulih tetemuka sepital ba menua bukai ke sanggup mayar ungkus kena apai iya beputung. Lalu apai iya majak gerai.

Seiku menyadi benama Victor pindah ngagai Kanada. Pengudah iya macha siti artikel ba Menara Jaga pasal sekula tinggi, iya berunding pasal pelajar iya. Ketegal nya, iya badu belajar ba universiti lalu ngambi kursus teknikal ti enda panjai. Ku iya: “Aku ulih bulih kereja enggau jampat, lalu nyadi pengerintis.” Udah nya Victor jadi enggau Caroline, lalu seduai iya ngabas Cameroon. Lebuh seduai iya ngelawa pampang opis, sekeda menyadi meransang seduai iya berunding enti ulih nginjil ba Cameroon. Ku Victor: “Kami duai nadai kebuah deka nulak, lalu ketegal nadai utai nekul pengidup kami, kami ulih nerima pengawa nya.” Taja pan Caroline enda bepengerai, tang seduai iya ngaga pemutus deka pindah.

Victor enggau Caroline nyadi pengerintis biasa lalu nulung ba endur ti begunaka mayuh penginjil. Seduai iya ngena duit simpan kena nampung pengidup din. Pengudah nya, seduai iya gawa ba Kanada beberapa bulan ngambika ulih pulai ngagai Cameroon lalu terus ngerintis. Nama berekat ke diulih seduai? Seduai iya ulih enggau Sekula Penginjil Perintah Petara, nyadi pengerintis spesial lalu diatu nyadi pekereja ke nirika bengunan. Ku Victor, “Ketegal kami duai ngelengkaka pengidup ti nyamai, kami patut bepanggai ba Jehovah, lalu Iya nyaga kami.”

Ba taun 2002, Alain, pelajar universiti ba Jerman, macha siti surat mit Youths—What Will You Do With Your Life? Penerang nya meransang iya netapka juluk ati. Ba taun 2006, iya enggau Ministerial Training School lalu dianjung ngagai Cameroon, menua asal iya empu.

Ba Cameroon, Alain ngiga kereja part-time. Udah nya, iya tetemuka kereja ti manah agi gaji. Tang iya irau, enggaika enda chukup awak ngereja pengawa nginjil. Nya alai, lebuh iya dikangau nyadi pengerintis spesial, iya terus nerima nya. Bos iya deka meri gaji ti besai tang Alain nulak. Enda lama udah nya, Alain jadi enggau Stéphanie, ke udah lama diau ba Perancis. Nama penanggul ke ditapi Stéphanie pengudah pindah ngagai Cameroon?

 Ku Stéphanie: “Aku bisi sekeda penyakit sereta alergi. Tang aku tetap berubat lalu berinsur gerai.” Laki bini tu diberekat laban ulih napi penanggul tu. Ku Alain: “Lebuh kami duai nginjil ngagai siti kampung ti jauh ke dikumbai Katé, kami tetemuka sekeda orang ke deka belajarka Bup Kudus. Kami ulih belajar enggau sida ngena talipaun. Dua iku ari sida dibaptisa, lalu diatu bisi lima iku penginjil dia.” Ku Stéphanie: “Ulih nulung orang nyerahka diri ngagai Jehovah nya ngagaka ati. Ketegal kami duai nginjil ba Cameroon, kami ulih ngasaika pengaga ati nya.” Kemayaharitu, Alain enggau Stéphanie ngereja pengawa ba pelilih.

Gisèle dibaptisa lebuh iya ba sekula berubat di Itali. Iya alit ati enggau laki bini ke ngajar iya Bup Kudus, idup enggau pengumbas iya. Lalu iya deka ngereja mayuh agi ba pengawa nginjil. Nya alai, Gisèle berengkah nyadi pengerintis biasa lebuh nyauka abis sekula.

Gisèle deka ngereja mayuh agi ke Jehovah ba Cameroon, tang iya irau. Ku iya: “Aku patut ngelengkaka hak aku diau ba Itali, lalu jauh ari bala pangan sereta diri sebilik ke diau ba Itali.” Taja pia, ba Mei 2016, Gisèle pindah ngagai Cameroon. Enda lama udah nya, iya jadi enggau Léonce, lalu pampang opis ba Cameroon meransang seduai iya pindah ngagai Ayos, endur ti begunaka mayuh penginjil.

Baka ni pengidup ba Ayos? Ku Gisèle: “Ba dia, selalu nadai karan, lalu kami tusah deka ngecas talipaun. Aku belajar berapi ngena kayu api. Lebuh malam hari, kami ngambi ai ngena kerita surung enggau lampu pichit lebuh nadai mayuh orang.” Baka ni seduai iya napi semua penanggul nya? Ku Gisèle: “Roh kudus Jehovah nulung kami betan. Aku enggau laki aku nyukung pangan diri. Pia mega, diri sebilik sereta bala pangan meransang kami, lalu kadang-kadang nulung kami ba belanja.”

Kati Gisèle gaga ati pulai baru ngagai menua asal iya? Au! Ku iya, “Taja pan terubah iya kami duai napi mayuh penanggul lalu bisi asai asa, tang pengudah kami mutar semua nya, aku enggau laki aku ngasaika kami udah ngereja utai ti patut. Kami andal ngagai Jehovah sereta berasai semak enggau Iya.” Léonce enggau Gisèle enggau Sekula Penginjil Perintah Petara, lalu diatu seduai iya nyadi pengerintis spesial sementara.

Baka orang berikan ke sanggup napi mayuh gaya penanggul ngambika ulih nangkap mayuh ikan, baka nya mega sida ke pulai ngagai menua asal sanggup ngelengkaka mayuh utai ngambika ulih nulung mayuh orang nerima pemendar Bup Kudus. Jehovah tentu ingatka semua utai ti udah dikereja sida ke nama Iya. (Neh. 5:19; Heb. 6:10) Enti nuan diau ba menua bukai, lalu ba menua asal nuan begunaka penginjil, kati nuan ulih pulai? Enti nuan ngereja nya, berekat ti besai nganti nuan.—J-lam. 10:22.