Sebedau aku madahka utai ke nyadi pengudah tu, awakka aku madah ngagai nuan pasal baka ni aku berengkah gawa penuh jam ke Jehovah.

Aku ada kena taun 1942 ba pulau Caribbean di Curaçao. Menua asal apai aku ba Suriname, tang iya pindah ngagai pulau nya ketegal kereja. Beberapa taun sebedau aku ada, iya nyadi siku ari entara Saksi-Saksi Jehovah ti keterubah ke dibaptisa ba Curaçao. a Ninting minggu apai belajarka Bup Kudus enggau kami lima iku menyadi, taja pan kami enda seruran deka belajar. Lebuh aku beumur 14 taun, apai aku mai kami sebilik pindah ngagai Suriname kena nyaga indai iya ke udah tuai.

Ba Suriname, aku berengkah begulai enggau orang ke biak ti ransing gawa ke Jehovah ba raban gempuru. Sida tuai beberapa taun ari aku sereta udah nyadi pengerintis biasa. Lebuh sida bejaku pasal pengalaman ke diulih sida ba pengawa nginjil, aku ulih meda mua sida penuh enggau pengaga ati. Pengudah pengawa begempuru, aku enggau bala kaban mega bisi berandauka topik ari Bup Kudus. Kekadang kami berandau ba luar seraya meda bintang. Bala kaban tu udah nulung aku nemu utai ke dikedekaka aku ba pengidup; Aku deka gawa ke Jehovah. Nya alai lebuh aku beumur 16 taun aku dibaptisa. Udah nya, aku nyadi pengerintis biasa, maya aku beumur 18 taun.

Lebuh aku nyadi pengerintis, aku udah belajarka mayuh utai, lalu utai nya udah nulung aku sepemanjai pengawa aku ke gawa penuh jam ke Jehovah. Ambika chunto, siti ari utai ti penting dipelajarka aku nya ngelatih orang bukai. Lebuh aku berengkah nyadi pengerintis, siku pengerintis seberai tasik ke benama Willem van Seijl deka ngelatih aku. b Iya ngajar aku mayuh utai pasal  chara bejalaika tanggung pengawa teokratik. Maya nya, aku enda nemu diri amat begunaka latih tu. Ba taun ke nangkanka nya, aku dipilih nyadi pengerintis spesial, lalu aku berengkah nulung raban ti mit bala menyadi Kristian ke diau ba dalam utan Suriname. Lalu endur nya jauh ari raban gempuru ke bukai. Aku amat beterima kasihka latih ti diberi bala menyadi lebuh aku amat begunaka nya. Kenyau ari maya nya, aku keran deka nitihka teladan sida enggau magi awak kena ngelatih orang bukai.

Utai kedua ti dipelajarka aku iya nya pemanah ngembuan pengidup ti pengumbas iya sereta teratur. Tiap pun bulan, aku enggau kaling pengerintis spesial aku deka merambu utai ke diguna kami ba minggu-minggu ti deka datai. Udah nya, siku ari kami deka bejalai jauh ngagai bandar lalu meli utai ke diguna kami. Kami patut ngena duit elaun ke diterima kami ninting bulan enggau bejimat lalu magi utai ke dibeli kami nya ngambika ulih tan sepemanjai bulan. Enti utai ke diguna kami abis maya kami agi ba utan, nadai mayuh orang ulih nulung kami. Aku pechaya ketegal aku udah belajar chara idup enggau pengumbas iya sereta teratur lebuh agi biak, nya udah nulung aku mengkang betumpu ba pengawa Jehovah sepemanjai pengidup aku.

Utai ketiga ti dipelajarka aku, iya nya penguntung ulih ngajar orang ngena bansa jaku sida empu. Lebuh aku mansang besai aku ngena bansa jaku Belanda, Inggeris, Papiamento, enggau Sranantongo (ke mega dikumbai Sranan), jaku ke dikena ba Suriname. Tang ba dalam utan, aku meda orang deka agi ninga berita manah lebuh kami nginjil ngagai sida dalam bansa jaku sida empu. Aku tusah deka ngena sekeda ari bansa jaku sida baka Saramaccan, ke bisi ngena tiun nyawa ti tinggi enggau baruh. Taja pia, usaha aku ti bebendar udah mai asil ti manah. Sepemanjai betaun-taun udah nya, aku ulih ngajar pemendar ngagai mayuh agi orang laban aku ulih bejaku ngena bansa jaku sida.

Endang amat, aku bisi pengalaman ti ngemaluka. Ambika chunto, bisi sekali aku deka nanya pengerai siku pemelajar Bup Kudus ke bejaku Saramaccan, laban iya bisi pedis ba perut. Tang utai ke ditanya aku nya, ‘Kati iya ngandung?’ Endang amat, tanya nya ngasuh iya berasai malu. Taja pan aku ngaga penyalah ke baka tu, tang aku seruran nguji bejaku ngena bansa jaku orang ba endur alai aku gawa.

Ba taun 1970, aku dipilih nyadi tuai ti ngabas. Ba taun nya aku mandangka program slide “Mengunjungi Kantor Pusat Sedunia Saksi-Saksi Yehuwa” ngagai mayuh raban ba endur pesisir ti jauh dalam utan. Kena ngelawa bala menyadi Kristian ba dia, aku enggau sekeda bala menyadi lelaki bejalai nengah sungai ngena perau ti panjai ke digaga ari kayu. Kami mai generator, minyak gas, lampu ke ngena minyak petrol, enggau perengka projektor. Lebuh kami sangkai ba endur ke dituju, kami patut mai semua perengka nya ngagai endur alai kami patut ngayanka program nya. Tang utai ti amat dikingatka aku pasal pejalai nya, iya nya pasal orang ba endur nya ke amat rinduka program ti diayan. Aku amat gaga ati ulih nulung orang bukai belajar pasal Jehovah sereta gerempung Iya ba dunya. Lebuh meda baka ni orang bukai datai semak ngagai Jehovah, aku berasai  gaga ati laban aku udah ngereja pengawa tu enggau bebendar.

Taja pan aku nemu idup bujang nya ulih ngasuh aku senang agi ngereja pengawa ke Jehovah, tang aku agi ngasaika diri begunaka kaling pengidup. Nya alai aku berengkah besampi enggau nyemetak kena ngiga bini ke deka gaga ati gawa enggau aku ba pengawa penuh jam di endur ti pesisir. Kira-kira setaun udah nya, aku berengkah dating enggau Ethel, siku pengerintis spesial ti deka gawa bebendar ke Jehovah taja pan nya enda senang ba iya. Kenyau ari mit, Ethel amat bebasaka rasul Paul lalu deka ngereja sebarang utai ke ulih digaga iya ba pengawa nginjil baka ke digaga rasul Paul. Kami kawin kena September 1971 lalu aku berengkah nyadi tuai ti ngabas enggau bini.

Maya Ethel mansang besai, ruang bilik iya nadai ngembuan mayuh utai. Nya alai iya ulih ngereja pengawa ngabas enggau aku ba endur ti pesisir enggau senang. Ambika chunto, lebuh nyediaka diri deka ngabas raban gempuru ti jauh dalam utan, kami enda mai mayuh utai enggau kami. Kami nuchi gari sereta mandi ba sungai. Kami mega udah teleba makai sebarang utai ke diberi bala menyadi ngagai kami baka ukui bali, ikan piranha, tauka nama-nama utai ke ulih digiga ba utan tauka ditangkap ba sungai. Enti nadai pinggai, kami makai ngena daun pisang. Enti nadai perengka kena makai, kami ngena jari. Aku enggau Ethel ngasaika utai ke dilengkaka kami duai lebuh gawa ke Jehovah udah nulung kami nyadi tali begembar tiga ti rat. (P-jar. 4:12) Kami enggai nukar pengalaman tu ke nama-nama utai!

Bisi sekali lebuh kami pulai ari pengawa ngabas bala menyadi ba endur pesisir, kami bisi pengalaman baka ke dipadah aku ba pun cherita tu tadi. Seraya perau kami nengah ai ti deras sereta bebatu, perau kami tama dalam ai tang udah nya jejampat pansut baru ari ai. Tang manah amat, kami bisi ngena jikit penyelamat lalu enda labuh ari perau. Taja pia perau kami penuh enggau ai. Kami muai pemakai ke bisi dalam periuk ngagai  sungai lalu ngena periuk nya nyauk ai pansut ari perau nya.

Ketegal kami nadai agi pemakai, kami berengkah nginti ba pejalai kami nengah sungai nya. Tang kami nadai bulih ikan. Nya alai kami besampi ngagai Jehovah lalu minta Iya meri kami pemakai ke diempa sehari nya. Sepengudah kami abis besampi, siku ari bala menyadi lelaki ke enggau kami ngulurka tali ginti iya lalu nangkap siku ikan ti besai ke chukup diempa lima iku orang. Malam nya kami kenyang sereta puas ati.

Pengudah lima taun nyadi tuai ti ngabas, aku enggau Ethel nerima berekat ti enda dijangka, iya nya kami duai deka bisi anak. Aku gaga ati lebuh ninga berita nya, tang aku enda nemu baka ni tu ulih meri kesan ngagai pengidup kami. Enti ulih, aku enggau Ethel amat keran deka terus gawa penuh jam. Ba taun 1976, anak lelaki kami ke benama Ethniël ada. Dua taun setengah pengudah nya, anak lelaki kami duai ti kedua Giovanni ada.

Ketegal Suriname maya nya begunaka bantu, pampang opis ngasuh aku terus gawa nyadi tuai ti ngabas seraya kami ngemesaika bala anak kami. Lebuh bala anak kami agi mit, aku diasuh ngemataka pengawa pelilih ba beberapa iti raban gempuru. Kesuah iya, tu ulih ngasuh aku gawa beberapa minggu ninting bulan nyadi tuai ti ngabas lalu ngena awak ke bukai ba bulan nya nyadi pengerintis ba raban gempuru kami. Ethel enggau bala anak kami deka enggau aku lebuh aku ngereja pengawa ngabas ba raban gempuru ke semak enggau endur kami diau. Taja pia, aku bejalai kediri lebuh aku ngereja pengawa ngabas ba raban gempuru tauka gempuru besai ba utan Suriname.

Aku patut merambu pelan enggau bejimat ngambika ulih bejalaika semua tanggung pengawa aku. Aku nentuka kami bejalaika pengawa belajarka Bup Kudus ba diri sebilik ninting minggu. Lebuh aku bisi pengawa ngabas raban gempuru ba dalam utan Suriname, Ethel deka ngiring pengawa belajarka Bup Kudus ba diri sebilik enggau bala anak kami ba rumah. Tang, kami enggau naka ulih ngereja mayuh utai begulai, baka ke digaga diri sebilik. Aku enggau Ethel mega seruran bekunsika pemerindang ti manah enggau bala anak kami. Kami main game tauka ngelawa endur ti manah semak alai kami diau. Aku suah laun tinduk, laban deka nyediaka pengawa teokratik. Lalu Ethel, baka bini ti disebut ba Jaku Dalam 31:15, deka angkat tumu sebedau rerak tawas kena nentuka kami sebilik ulih macha ayat ninting hari sereta begulai makai pagi sebedau bala anak kami nurun ke sekula. Aku amat gaga ati laban bisi bini ti enda berundingka diri empu ke seruran  nulung aku ba semua tanggung pengawa ke udah diberi Jehovah ngagai aku.

Kami ke nyadi apai indai, bebendar nulung bala anak kami rinduka Jehovah sereta pengawa nginjil. Kami dekaka bala anak kami milih gawa penuh jam ke Jehovah ukai ketegal nya utai ti dikedekaka kami tang ketegal nya pilih ke digaga sida empu. Kami seruran madah ngagai sida pasal pengaga ati ke diulih lebuh gawa penuh jam ke Jehovah. Kami nerangka baka ni Jehovah udah nulung sereta merekatka kami sebilik, taja pan bisi napi mayuh penanggul. Kami mega nentuka bala anak kami bekaban enggau bala Saksi ke ngenuluka Jehovah dalam pengidup sida.

Jehovah nyediaka semua utai ke diguna kami ba diri sebilik. Endang amat, aku seruran ngereja utai ke ulih digaga aku kena melanja kami sebilik. Pengalaman aku ba dalam utan Suriname lebuh aku agi bujang sereta nyadi pengerintis spesial udah ngajar aku merambu dulu utai ke patut dibeli kami. Tang taja pan kami bebendar ngereja nya, kekadang kami enda bulih semua utai ke diguna kami. Ba timpuh nya aku pechaya Jehovah udah nulung kami. Ambika chunto, ari taun 1986 ngagai taun 1992 bisi perang sivil nyadi ba Suriname. Dalam kandang beberapa taun nya, kekadang kami tusah deka ngulihka utai ke amat diguna kami. Taja pia, Jehovah udah nyediaka utai nya ke kami.—Mat. 6:32.

Sepemanjai pengidup kami, Jehovah udah nyaga kami sereta nulung kami berasai gaga enggau puas ati. Bala anak kami udah ngasuh kami amat gaga ati, lalu kami amat beterima kasih laban kami ulih ngemesaika sida kena gawa ke Jehovah. Kami mega amat gaga ati laban sida milih deka gawa penuh jam ke Jehovah ba pengidup sida. Ethniël seduai Giovanni udah graduet ari sekula teokratik lalu diatu gawa ba pampang opis di Suriname enggau bini sida.

Diatu aku enggau Ethel udah amat tuai, tang kami agi kisuk gawa ke Jehovah nyadi pengerintis spesial. Kebendar iya, kami amat kisuk nyentukka aku nadai awak kena belajar chara nyemerai! Tang aku enda ngesal ati. Lebuh aku ngenang baru pengidup aku, aku ulih enggau baruh ati madahka pemutus ke digaga aku gawa penuh jam ke Jehovah lebuh agi biak nya siti ari pemutus ti pemadu manah ke kala digaga aku.