1. Baka ni kitai nemu Jehovah deka semak ngagai kitai?

 JEHOVAH mai kitai datai semak ngagai Iya. (Jas. 4:8) Iya deka nyadi Petara kitai, Apai kitai, sereta Pangan kitai. Iya nyaut sampi kitai sereta nulung kitai ba maya ti tusah. Lalu Iya ngena gerempung Iya kena ngajar sereta ngelindung kitai. Tang nama patut digaga kitai ngambika ulih datai semak ngagai Jehovah?

2. Baka ni kitai ulih datai semak ngagai Jehovah?

² Kitai ulih datai semak ngagai Jehovah lebuh kitai besampi ngagai Iya sereta macha Jaku Iya lalu belematika nya. Seraya kitai ngereja nya, pengerindu sereta asai terima kasih kitai ngagai Iya deka dalam agi. Kitai diperansang deka ngasika Iya, sereta meri puji ke endang patut diterima Iya. (Pem. 4:11) Enti kitai ngelala Jehovah enggau dalam agi, kitai deka arap agi ke Iya sereta gerempung ke udah disediaka Iya kena nulung kitai.

3. Baka ni Sitan nguji deka nyeraraka kitai ari Jehovah, tang nama deka nulung kitai ngambika enda ninggalka Petara kitai enggau gerempung Iya? (Masmur 31:13, 14)

³ Taja pia, Sitan nguji deka nyeraraka kitai ari Jehovah, kelebih agi lebuh kitai napi mayuh penguji. Baka ni iya ngereja nya? Iya belubah-lubah nguji ngasuh kitai badu agi arapka Jehovah enggau gerempung Iya. Tang, kitai ulih ngetanka diri ari serang iya. Lebuh pengarap kitai tegap enggau pengandal kitai ngagai Jehovah enda bekinsit, tu deka nulung kitai enda ninggalka Petara kitai sereta gerempung Iya.—Bacha Masmur 31:13, 14.

4. Nama deka dipejuraika kitai dalam artikel tu?

 ⁴ Dalam artikel tu, kitai deka bejuraika tiga iti penguji ke engka datai ari orang bukai ke ukai ari raban gempuru. Tiap iti penguji tu engka ulih ngasuh kitai badu agi arapka Jehovah sereta gerempung Iya. Baka ni tiga iti penguji tu ulih nyeraraka kitai ari Jehovah? Lalu nama ulih digaga kitai ngambika ulih mengkang tetap ati ngagai Jehovah sereta gerempung Iya?

5. Baka ni penanggul ulih ngelemika pengarap kitai ngagai Jehovah sereta gerempung Iya?

⁵ Kekadang, kitai napi mayuh penanggul baka sakal ari diri sebilik, tauka lenyau kereja. Baka ni penguji ke baka tu ulih ngelemika pengarap kitai ngagai gerempung Jehovah sereta nyeraraka kitai ari Iya? Lebuh kitai napi penanggul ba timpuh ti lama, kitai engka berasai nadai daya sereta balat tusah ati. Sitan nguji ngena utai tu ngasuh kitai ngumbai Jehovah enda rinduka kitai. Sitan deka ngasuh kitai berunding sekalika Jehovah tauka gerempung Iya ke ngasuh kitai merinsa. Utai ti sama kala nyadi ngagai sekeda orang Israel ba menua Ejip. Terubah iya, sida pechaya Jehovah udah milih Moses seduai Aron kena nyelamatka sida ari nyadi ulun. (P-sut. 4:29-31) Tang pengudah nya, lebuh Raja Ejip ngasuh pengidup sida merinsa agi, sida nyalahka Moses seduai Aron ke penanggul ti ditapi sida. Ku sida: “Seduai udah ngasuh raja enggau bala pemesai iya begedika kami. Seduai udah meri sida tegal kena sida munuh kami.” (P-sut. 5:19-21) Sayau amat! Sida nyalahka nembiak Petara ti taluk. Enti nuan udah tan napi penguji ba timpuh ti lama, baka ni nuan ulih ngasuh pengarap nuan ngagai Jehovah sereta gerempung Iya mengkang tegap?

6. Nama ulih dipelajarka kitai ari nabi Habakuk pasal chara tan napi penanggul kitai? (Habakuk 3:17-19)

⁶ Bantaika asai ati nuan ngagai Jehovah nengah sampi lalu giga Iya kena bulih pengering. Nabi Habakuk napi mayuh penguji. Bisi sekali, iya baka ke kakang ati sekalika Jehovah ibuhka iya tauka enda. Nya alai, iya mantaika semua asai ati iya ngagai Jehovah nengah sampi. Ku iya: ‘O Jehovah, ni pengelama aku enda tau enda ngangau minta tulung, baru Nuan deka mending . . . Baka ni ku Nuan tan meda penyalah ti baka tu?’ (Hab. 1:2, 3) Jehovah nyaut sampi ari ati nembiak Iya ti taluk tu. (Hab. 2:2, 3) Pengudah Habakuk berunding enggau dalam pasal chara Jehovah udah nyelamatka nembiak Iya, iya nyadi gaga ati baru. Iya nyadi yakin agi Jehovah ibuhka iya lalu deka nulung iya tan napi sebarang penguji. (Bacha Habakuk 3:17-19.) Nama ulih dipelajarka kitai? Lebuh nuan napi penanggul, besampi meh ngagai Jehovah lalu madah ngagai Iya asai ati nuan. Udah nya, giga Iya kena bulih pengering. Lebuh nuan ngereja nya, nuan ulih yakin Jehovah deka meri nuan pengering ke diguna nuan kena tan. Lalu lebuh nuan ngasaika sukung ari Iya, pengarap nuan ngagai Iya deka majak tegap agi.

7. Kaban belayan Shirley nguji ngasuh iya pechayaka nama, lalu nama utai ke ngasuh iya mengkang arapka Jehovah?

⁷ Terus ngereja utai ke nulung nuan mengkang semak ngagai Jehovah. Tu meh utai ke udah nulung Shirley, siku menyadi indu ba Papua New Guinea ke napi mayuh penanggul. b Ruang bilik Shirley seranta lalu kekadang sida tusah deka bisi pemakai ti chukup. Siku ari kaban belayan iya nguji ngelemika pengarap iya ngagai Jehovah. Ku kaban belayan nya: “Nuan madah kuasa kudus Petara bisi nulung nuan, tang dini tulung nya deh? Ruang bilik nuan  agi seranta. Nuan masau jam enggau pengawa nginjil.” Shirley ngaku: “Aku nanya diri empu: ‘Kati Petara ibuhka kami tauka enda?’ Nya alai, aku tekala nya besampi ngagai Jehovah lalu madahka Iya semua utai ke bisi dalam runding aku. Aku enda ngetu macha Bup Kudus enggau litaricha kitai, sereta terus nginjil enggau datai begempuru.” Iya nyau nemu Jehovah benung nyaga ruang bilik iya. Ruang bilik iya enda kala nadai pemakai. Lalu sida mega seruran gaga ati. Shirley madah: “Aku ngasaika Jehovah nyaut sampi aku.” (1 Tim. 6:6-8) Enti nuan terus ngereja utai ti nulung nuan mengkang semak ngagai Jehovah, nuan mega tentu enda ngawakka penanggul tauka asai ati ti kakang nyeraraka nuan ari Jehovah.

8. Nama engka nyadi ngagai bala menyadi lelaki ke ngiring dalam gerempung Jehovah?

⁸ Nengah media sosial, bala munsuh kitai ngerembaika pemula sereta penerang ti pelesu pasal bala menyadi lelaki ke ngiring dalam gerempung Jehovah. (Mas. 31:13) Sekeda bala menyadi lelaki udah ditangkap sereta dituduh nyadi penjenayah. Orang Kristian abad keterubah mega napi situasi ti sama lebuh rasul Paul dituduh sereta ditangkap. Nama reaksi sida?

9. Nama reaksi sekeda orang Kristian lebuh rasul Paul dijil?

⁹ Sekeda orang Kristian abad keterubah ngetu nyukung rasul Paul lebuh iya dijil ba Rome. (2 Tim. 1:8, 15) Nama kebuah? Kati sida malu laban orang mayuh ngumbai Paul nya siku penjenayah? (2 Tim. 2:8, 9) Tauka kati sida takut enggaika sida mega diperinsa? Enda ngira nama tegal sida, Paul tentu balat tusah ati. Iya udah tan napi mayuh penguji sereta indah berambunka nyawa iya ke sida. (SKR. 20:18-21; 2 Kor. 1:8) Kitai enda patut nyadi baka orang ke enda nulung Paul lebuh iya begunaka bantu. Nama patut dikingatka kitai lebuh bala menyadi lelaki ke ngiring diperinsa?

10. Nama patut dikingatka kitai lebuh bala menyadi lelaki ke ngiring diperinsa, lalu nama kebuah?

¹⁰ Kingatka kebuah kitai diperinsa sereta sapa ke ngasuh nya nyadi. Dua Timoti 3:12 madahka: “Semua murid Jesus Kristus ke ingin deka nyembah Petara enggau ati ti enda bebagi  mega deka diperinsa.” Nya alai kitai enda patut tekenyit, kelebih agi lebuh Sitan nujuka serang iya ngagai bala menyadi lelaki ke ngiring. Iya dekaka bala menyadi lelaki tu badu agi tetap ati ngagai Jehovah, lalu iya mega deka ngenakutka kitai.—1 Pet. 5:8.

11. Nama ulih dipelajarka kitai ari teladan Onesiporus? (2 Timoti 1:16-18)

¹¹ Terus nyukung bala menyadi lelaki ke ngiring lalu enggau tetap ati nitihka sida. (Bacha 2 Timoti 1:16-18.) Onesiporus nya siku orang Kristian abad keterubah ke bisi reaksi ti bebida lebuh Paul dijil. “Iya enda malu pasal [Paul] ke dijil.” Tang Onesiporus ngiga Paul, lalu lebuh iya tetemuka Paul, Onesiporus nguji nulung iya ngulihka utai ke diguna iya. Enggau ngereja nya, Onesiporus udah berambunka nyawa iya empu. Nama ulih dipelajarka kitai ari nya? Kitai enda patut nejuka asai ati ti takut ke mensia nagang kitai ari nyukung bala menyadi lelaki ke ngiring ti diperinsa. Tang aram meh kitai enggau naka ulih nulung sida. (J-lam. 17:17) Sida begunaka pengerindu sereta sukung ari kitai.

12. Nama ulih dipelajarka kitai ari bala menyadi Kristian ba Rusia?

¹² Peratika baka ni bala menyadi Kristian ba Rusia udah nulung bala menyadi ke bukai ti dijil. Lebuh sekeda ari bala menyadi lelaki ke ngiring dipechara, mayuh ari bala menyadi Kristian datai ngagai mahkamah kena nyukung sida. Nama ulih dipelajarka kitai ari tu? Anang nyadi takut lebuh bala menyadi lelaki ke ngiring dipetenah, ditangkap tauka diperinsa. Besampika sida, nyaga diri sebilik sida, sereta ngiga chara bukai ke ulih dikena nuan ngayanka diri nyukung sida.—SKR. 12:5; 2 Kor. 1:10, 11.

13. Baka ni jaku kelese ulih ngelemika pengarap kitai ngagai Jehovah enggau gerempung Iya?

¹³ Kaban belayan ti enda sama pengarap, orang ke sama enggau gawa, tauka orang ke sama sekula enggau kitai engka ngelese kitai ketegal pengawa nginjil tauka ketegal kitai idup nitihka standard moral Jehovah ti tinggi. (1 Pet. 4:4) Sida engka madah: “Aku rinduka nuan, tang pengarap nuan nya kelalu terit lalu enda sesuai enggau jeman diatu.” Sekeda engka ngutuk kitai ketegal chara kitai ngintu orang ke udah dibuai ari gerempung enggau madahka: “Baka ni nuan ulih ngumbai diri orang ke bisi pengerindu?” Jaku ke baka tu ulih ngasuh kitai berunding sekalika Adat Jehovah nya adil tauka enda. Kitai engka berengkah berunding: ‘Kati Jehovah ngarapka kelalu mayuh utai ari aku? Kati gerempung Iya kelalu terit?’ Enti nuan napi situasi ke baka nya, baka ni nuan ulih mengkang semak ngagai Jehovah sereta gerempung Iya?

14. Baka ni reaksi kitai lebuh orang bukai ngeleseka kitai ketegal kitai idup nitihka standard Jehovah? (Masmur 119:50-52)

¹⁴ Keran deka ngasika standard Jehovah. Jop nya siku lelaki ke ngasika standard Jehovah taja pan iya dikelese ketegal ngereja nya. Siku ari lelaki ke pepura nyadi kaban Jop indah nguji ngasuh Jop pechaya Petara enda beduli sekalika iya ngereja utai ti betul tauka enda. (Jop 4:7, 18; 22:3) Tang Jop enggai pechayaka pemula ke baka nya. Iya nemu standard Jehovah pasal utai ti betul enggau salah nya seruran ngena, lalu iya keran deka ngasika nya. Iya enda nejuka orang bukai ngerampas penetap ati iya. (Jop 27:5, 6) Nama ulih dipelajarka kitai ari utai nya? Anang nejuka jaku kelese ngasuh nuan kakang ati enggau standard Jehovah. Pikirka baru pasal utai ke udah nyadi ba pengidup nuan. Nuan engka udah mayuh kali ngasaika pengidup nuan nya manah agi lebuh nuan ngereja utai ti betul nitihka standard Jehovah. Keran meh deka nyukung gerempung ke ngasika semua standard tu. Enti  pia, enda ngira berapa mayuh orang ngeleseka kitai, kitai tentu enggai nejuka utai nya nyeraraka kitai ari Jehovah.—Bacha Masmur 119:50-52.

15. Nama kebuah Brizit dikelese?

¹⁵ Perundingka pengalaman Brizit, siku menyadi indu ari India. Ruang bilik iya ngeleseka iya ketegal pengarap iya. Enda lama pengudah iya dibaptisa kena taun 1997, laki iya ke ukai Saksi lenyau kereja. Nya alai, laki Brizit mai sida sebilik pindah ngagai rumah apai indai iya ke diau ba bandar bukai. Tang Brizit deka napi penguji ti amat besai. Ketegal laki iya nadai kereja, iya patut gawa penuh jam kena melanja ruang bilik iya. Nambahka nya, raban gempuru ti pemadu semak kira-kira 350 kilometer (220 batu) ari endur iya. Sinu amat, ruang bilik sepiak laki Brizit nyakal iya ketegal pengarap iya. Sakal nya kelalu balat nyentukka ruang bilik Brizit patut mindah baru. Bisi utai ke enda dijangka nyadi, laki iya mati. Udah nya, siku ari anak indu iya ke baru aja beumur 12 taun mega mati ketegal kanser. Kena nambahka agi penusah iya, kaban belayan Brizit nyalahka iya ketegal utai ke nyadi. Sida madahka, enti iya enda nyadi siku ari Saksi-Saksi Jehovah, tentu semua penusah nya enda nyadi. Tang, Brizit terus arapka Jehovah sereta mengkang semak enggau gerempung Iya.

16. Baka ni Brizit diberekat ketegal mengkang semak ngagai Jehovah sereta gerempung Iya?

¹⁶ Ketegal Brizit diau kelalu jauh ari raban gempuru, siku tuai ti ngabas meransang iya nginjil ba kandang endur iya diau sereta ngatur pengawa begempuru ba rumah iya. Keterubah, iya ngasaika utai nya kelalu tusah. Tang iya nitihka iring ke diberi. Iya bekunsika Berita Manah enggau orang bukai, ngatur pengawa begempuru ba rumah iya, sereta magi awak ngambika ulih enggau tetap ngereja pengawa belajarka Bup Kudus ba diri sebilik enggau bala anak iya. Nama asil iya? Brizit ulih ngepun sereta ngajar mayuh pemelajar Bup Kudus, lalu mayuh ari pemelajar Bup Kudus iya udah dibaptisa. Kena taun 2005, iya berengkah nyadi pengerintis biasa. Brizit udah diberekat  ketegal iya arapka Jehovah sereta tetap ati ngagai gerempung Jehovah. Bala anak indu iya tetap ati nyembah Jehovah, lalu diatu bisi dua iti raban gempuru ba endur nya! Brizit yakin Jehovah udah meri iya pengering kena napi semua penanggul iya, sereta kena tan napi jaku kelese ari diri sebilik iya.

17. Kitai keran deka ngereja nama?

¹⁷ Sitan dekaka kitai pechaya, Jehovah deka ninggalka kitai maya kitai napi penanggul, lalu enti kitai nyukung gerempung Jehovah, tu semina deka ngasuh pengidup kitai majak tusah agi. Sitan mega dekaka kitai berasai takut lebuh bala menyadi lelaki ke ngiring dipetenah, diperinsa tauka dijil. Lalu nengah jaku kelese, Sitan deka ngelemika pengarap kitai ba standard Jehovah sereta ba gerempung Jehovah. Taja pia, kitai amat nemu chara Sitan lalu kitai enda ulih ditipu. (2 Kor. 2:11) Bebendar meh nulak pemula ari Sitan, lalu mengkang tetap ati ngagai Jehovah sereta gerempung Iya. Anang enda ingat, Jehovah enda kala ninggalka nuan. (Mas. 28:7) Nya alai, anang nejuka sebarang utai nyeraraka nuan ari Jehovah!—Rom. 8:35-39.

18. Nama deka dikerandauka kitai ba artikel pengudah tu?

¹⁸ Dalam artikel tu, kitai udah bejuraika sekeda penguji ke engka ditapi kitai ari orang bukai ke ukai ari raban gempuru. Tang pengarap kitai ba Jehovah sereta gerempung Iya mega ulih diuji ari dalam raban gempuru. Baka ni kitai ulih mujur mutarka penguji ke baka nya? Kitai deka berandauka utai nya ba artikel pengudah tu.