1. Nama utai ke ulih nyadi lebuh kitai nginjil, lalu nama utai ke ulih dipechayaka kitai?

 KITAI nemu sekeda orang deka nyakal kitai lebuh kitai bejalaika pengawa nginjil. Ba jemah ila, kitai engka deka napi mayuh agi sakal. (Dan. 11:44; 2 Tim. 3:12; Pem. 16:21) Tang kitai ulih pechaya Jehovah deka meri kitai tulung ke diguna kitai. Nama kebuah? Jehovah seruran nulung nembiak Iya nembuka pengawa sida indah ba pengawa ti tusah dikereja. Nama chunto iya? Aram kitai berandauka sekeda utai ke nyadi ba pengidup nabi Esekiel ke nginjil ngagai orang Judah ke nyadi orang tangkap ba Babilon.

2. Baka ni Jehovah ngambarka orang ba endur alai Esekiel patut nginjil, lalu nama deka dikerandauka kitai ba artikel tu? (Esekiel 2:3-6)

² Baka ni gaya orang ba endur alai Esekiel patut nginjil? Jehovah ngambarka sida nya orang ke rindu “angkat ngelaban,” “kieh,” sereta “enda bebasaka” Iya. Sida ulih ngemedis baka duri, lalu tau nganu baka kala. Nya kebuah, Jehovah mayuh kali madah ngagai Esekiel, iya “enda tau takutka sida.” (Bacha Esekiel 2:3-6.) Esekiel ulih nembuka pengawa nginjil iya laban (1) Jehovah ke nganjung iya, (2) kuasa kudus Petara meri iya pengering ke diguna iya, lalu (3) Jaku Petara negapka pengarap iya. Baka ni tiga iti pekara tu udah nulung Esekiel? Lalu baka ni tiga iti pekara tu ulih nulung kitai kemayaharitu?

3. Nama rambai jaku ke udah ngeringka Esekiel, lalu baka ni Jehovah ngasuh Esekiel pechayaka sukung ari Iya?

³ Jehovah madah ngagai Esekiel: “Aku ngasuh nuan mansang.”  (Esk. 2:3, 4) Rambai jaku nya tentu udah ngeringka Esekiel. Nama kebuah? Laban Esekiel tentu ingat pasal Jehovah ke udah madah ngagai Moses enggau Isaiah utai ti sama lebuh Iya milih sida nyadi nabi Iya. (P-sut. 3:10; Isa. 6:8) Esekiel mega nemu chara Jehovah udah nulung dua iku nabi nya nembuka pengawa ti tusah. Nya alai, lebuh Jehovah dua kali madah ngagai Esekiel: “Aku ngasuh nuan mansang,” nabi nya bisi kebuah ti manah pechayaka sukung ari Jehovah. Pia mega ba bup Esekiel, kitai tetemuka rambai jaku tu mayuh kali: ‘Jehovah bejaku ngagai aku.’ (Esk. 3:16) Nambahka nya, bup Esekiel udah mayuh nulis rambai jaku tu: ‘Ku Jehovah bejaku ngagai aku.’ (Esk. 6:1) Endang amat, Esekiel tentu pechaya iya udah dianjung Jehovah. Kelimpah ari nya, apai Esekiel nya siku imam. Iya engka udah ngajar Esekiel pasal Jehovah ke seruran madah ngagai bala nabi Iya pasal Iya ke deka nulung sida. Ambika chunto, lebuh Jehovah bejaku ngagai Isak, Jakop enggau Jeremiah, Iya ngena rambai jaku tu: “Aku bisi enggau nuan.”—P-kal. 26:24; 28:15; Jer. 1:8.

4. Nama runding ti ngelantangka ati ke udah ngeringka Esekiel?

⁴ Nama reaksi mayuh orang Israel lebuh Esekiel nginjil? Jehovah madahka: “Orang Israel enggai mendingka nuan. Indah Aku Empu deh enda dipendingka sida.” (Esk. 3:7) Lebuh sida enggai mendingka Esekiel, reti iya sida nulak Jehovah. Rambai jaku nya ngasuh Esekiel pechaya lebuh orang enggai mendingka utai ti dipadah iya, tu ukai mai reti iya siku nabi ti enda mujur. Jehovah mega ngasuh Esekiel andal lebuh utai ke dipadah iya dikeamatka, sida deka “nemu siku nabi bisi udah begulai enggau sida.” (Esk. 2:5; 33:33) Endang amat, runding ti ngelantangka ati nya udah meri Esekiel pengering ke diguna iya kena nembuka pengawa nginjil iya.

5. Nama utai ke dipadah Isaiah 44:8 ke deka meri kitai pemerani?

⁵ Kitai mega bisi pemerani laban kitai nemu Jehovah ke udah nganjung kitai kena nginjil. Jehovah ngayanka basa lebuh Iya ngangau kitai “saksi” Iya. (Isa. 43:10) Nya endang basa ti besai! Baka Jehovah ke udah meransang Esekiel: Nuan “enda tau takutka sida,” Jehovah mega meransang kitai: “Anang takut.” Nama kebuah kitai enda patut takut ngagai orang ke nyakal? Baka Esekiel, kitai dianjung Jehovah lalu kitai bisi sukung ari Iya.—Bacha Isaiah 44:8.

6. (a) Baka ni Jehovah ngasuh kitai andalka sukung ari Iya? (b) Nama utai ke ngasuh kitai berasai diperansang?

⁶ Jehovah besemaya Iya deka nulung kitai. Ambika chunto, sebedau Jehovah madahka: “Kita nyadika saksi Aku,” Iya madah: “Lebuh kita bejalai nengah ai ti dalam, Aku deka meruan enggau kita. Penusah ti nuntung kita enda ulih ngalahka kita. Lebuh kita bejalai ngerenchah api, kita enda betu. Penguji ti besai ti deka datai, enda ulih ngemediska kita.” (Isa. 43:2) Lebuh kitai nginjil, kitai kekadang napi mayuh amat penanggul ke ulih dibandingka baka ai ti dalam, lalu penguji ke amat tusah nya baka api. Taja pia, enggau tulung ari Jehovah, kitai deka terus nginjil. (Isa. 41:13) Baka maya jeman Esekiel, mayuh orang kemayaharitu enggai nerima pesan ke dibai kitai. Tang nya ukai reti iya kitai enda nginjil enggau manah. Kitai diperansang lebuh nemu Jehovah gaga ati meda kitai enggau tetap ati terus ngerembaika pesan Iya. Rasul Paul madahka: “Tiap iku orang deka nerima upah nitihka pengawa ke dikereja siku-siku.” (1 Kor. 3:8; 4:1, 2) Siku menyadi indu ke udah lama nyadi pengerintis madahka: “Aku berasai gaga laban nemu Jehovah meri upah ketegal kitai bebendar ngereja pengawa ke Iya.”

7. Nama utai ke diasaika Esekiel lebuh iya berundingka genera ke dipeda iya? (Peda gambar ba mua majalah.)

⁷ Esekiel meda kuasa kudus Petara nya amat besai. Utai ke dipeda Esekiel dalam genera nya nulung iya nemu kuasa kudus Petara nya benung nulung bala melikat ti bekuasa sereta mindahka kaki kerita perang ti amat besai. (Esk. 1:20, 21) Nama reaksi Esekiel? Iya nuliska utai ke udah nyadi: “Lebuh aku meda utai nya, aku lalu nyungkurka diri ke tanah.” Esekiel amat alit ati, nyentukka iya nyungkurka diri ke tanah. (Esk. 1:28) Udah nya, lebuh Esekiel berunding pasal genera ti ngalitka ati nya, nya tentu ngasuh iya andal, enggau tulung ari kuasa kudus Petara, iya ulih nembuka pengawa nginjil iya.

8-9. (a) Nama nyadi ngagai Esekiel lebuh Jehovah ngasuh iya “bediri”? (b) Nama agi chara bukai ke dikena Jehovah ngeringka Esekiel ke pengawa iya ti tusah?

⁸ Jehovah ngasuh Esekiel: “Anak mensia, bediri nuan. Aku deka bejaku enggau nuan.” Pesan ke diberi sereta kuasa kudus ari Petara meri Esekiel pengering ngambika ulih bediri. Esekiel nulis: ‘Kuasa kudus Petara lalu tama ngagai aku, lalu ngangkatka aku bediri.’ (Esk. 2:1, 2) Udah nya sereta sepemanjai pengawa nginjil iya, Esekiel diiring kuasa kudus Petara. (Esk. 3:22; 8:1; 33:22; 37:1; 40:1) Kuasa kudus Petara ngeringka Esekiel kena ngereja pengawa ke diterima iya, iya nya nginjil ngagai orang ke “kieh sereta deka ngelaban” ba endur iya nginjil. (Esk. 3:7) Jehovah madah ngagai Esekiel: “Aku deka ngasuh nuan kieh sereta kering ati baka sida. Aku deka ngasuh nuan teguh baka batu, kering baka intan. Anang takutka sida ke angkat ngelaban nya.” (Esk. 3: 8, 9) Nya baka ke Jehovah madah ngagai Esekiel: ‘Anang nejuka orang ke kieh ngelemika nuan. Aku deka ngeringka nuan.’

⁹ Pengudah nya, kuasa kudus Petara ngiring Esekiel sepemanjai pengawa nginjil iya ba endur nya. Esekiel nulis: ‘Kuasa Jehovah lalu balat amat nurun atas aku.’ Nabi nya begunaka awak seminggu kena belajar sereta meretika pesan nya enggau pengabis iya ngambika iya ulih nginjil enggau andal. (Esk. 3:14, 15) Udah nya, Jehovah ngasuh iya mupuk ngagai lebak alai ‘kuasa kudus Petara tama ngagai [iya].’ (Esk. 3:23, 24) Esekiel udah besedia bejalaika pengawa nginjil iya.

10. Nama tulung ke diguna kitai kena bejalaika pengawa nginjil kitai, lalu nama kebuah?

¹⁰ Nama tulung ke diguna kitai kena bejalaika pengawa nginjil kitai? Kena nyaut tanya nya, perundingka baru utai ke udah nyadi ngagai Esekiel. Sebedau iya berengkah nginjil, kuasa kudus Petara udah meri iya pengering ke diguna iya. Baka Esekiel, kemayaharitu kitai mega ulih nginjil semina ketegal kuasa kudus Petara nulung kitai. Nama kebuah? Laban Sitan beperang ngelaban kitai ngambika iya ulih ngetuka pengawa nginjil kitai. (Pem. 12:17) Mayuh orang ngumbai Sitan nya kelalu bekuasa, lalu kitai enda ulih menang ngelaban iya. Tang nengah pengawa nginjil kitai, kitai ulih ngalahka iya! (Pem. 12:9-11) Baka ni? Lebuh kitai nginjil, kitai nunjukka diri enda takutka emba ari Sitan. Tiap kali kitai nginjil, Sitan alah. Nyadi, nama utai ke ulih ditemu kitai lebuh kitai ulih bejalaika pengawa nginjil taja pan disakal? Kitai nemu Jehovah meri kitai pengering nengah kuasa kudus Iya, lalu kitai mega bisi sukung ari Iya.—Mat. 5:10-12; 1 Pet. 4:14.

11. Nama deka digaga kuasa kudus Petara ke kitai, lalu baka ni kitai ulih terus nerima nya?

¹¹ Nama agi utai bukai ke ulih dipelajarka kitai lebuh kitai berundingka chara Jehovah meri Esekiel pengering ke diguna iya  kena nginjil? Kuasa kudus Petara ulih meri kitai pengering ke diguna kitai kena mutarka sebarang penanggul ke ditapi kitai ba pengawa nginjil. (2 Kor. 4:7-9) Enti pia, nama ulih digaga kitai ngambika ulih terus nerima kuasa kudus Petara? Kitai patut seruran besampi sereta andal Jehovah deka ningaka sampi kitai. Jesus ngajar bala murid iya: “Anang badu minta, . . . anang badu ngiga, . . . anang badu nekung.” Laban Jehovah “deka meri kuasa kudus ngagai orang ke minta ari Iya.”—Luk. 11:9, 13; SKR. 1:14; 2:4.

12. Bepelasarka Esekiel 2:9–3:3, ari ni penatai gulung surat nya, lalu nama utai ke bisi dalam nya?

¹² Kuasa kudus Petara meri Esekiel pemerani ke diguna iya kena nginjil, tang ukai nya aja, jaku Petara mega negapka pengarap Esekiel. Ba genera, Esekiel meda siti jari megai siti gulung surat. (Bacha Esekiel 2:9–3:3.) Ari ni penatai gulung surat nya? Nama utai ke bisi dalam gulung surat nya? Baka ni utai ke bisi dalam gulung surat nya negapka pengarap Esekiel? Aram kitai meda. Gulung surat nya datai ari kerusi diraja Petara. Jehovah engka udah ngena siku ari empat iku melikat ke dipeda Esekiel tadi nyua gulung surat nya ngagai Esekiel. (Esk. 1:8; 10:7, 20) Gulung surat nya ngundan jaku Petara, iya nya jaku ngakim ti panjai ke patut dipadah Esekiel ngagai orang tangkap ke angkat ngelaban. (Esk. 2:7) Pesan nya ditulis ba mua sereta belakang gulung surat nya.

13. Nama utai ke diasuh Jehovah kereja Esekiel enggau gulung surat nya, lalu nama kebuah gulung surat nya manis?

¹³ Jehovah ngasuh nabi iya makai gulung surat nya “ngambika perut [iya] kenyang.” Esekiel ngasika pesan Jehovah lalu makai semua gulung surat nya. Nama reti begian tu dalam genera nya? Esekiel patut nemu semua pesan ke deka dikenataika iya enggau silik. Iya patut pechayaka pesan nya ngambika pesan nya ulih meransang iya deka nginjil. Udah nya, bisi utai ti ngalitka ati nyadi. Esekiel ngasaika gulung surat nya “manis asai ai manyi.” (Esk. 3:3) Nama kebuah? Ba Esekiel, ulih ngarika Jehovah nya pengalaman ti manis sereta ngelantangka ati. (Mas. 19:8-11) Esekiel amat gaga ati laban Jehovah udah nerima iya nyadika nabi Jehovah.

14. Nama utai ke nulung Esekiel besedia nerima pengawa iya?

¹⁴ Udah nya, Jehovah madah ngagai Esekiel: “Dingaka enggau manah, lalu kingatka semua utai ti dipadahka Aku ngagai nuan.” (Esk. 3:10) Enggau iring nya, Jehovah ngasuh Esekiel nguji ngingatka utai ke bisi ditulis dalam gulung surat nya sereta belematika utai dalam nya. Lebuh Esekiel ngereja nya, pengarap iya deka nyadi tegap agi. Pia mega, nya nyediaka iya ke pesan ti amat penting ti patut dikenataika iya ngagai orang bukai. (Esk. 3:11) Lebuh Esekiel amat mereti sereta pechayaka pesan ari Petara, nya baru iya udah besedia deka berengkah sereta nembuka pengawa iya.—Banding Masmur 19:14.

15. Ngambika ulih tan, nama utai ke patut ‘didingaka enggau manah’?

¹⁵ Ngambika ulih tan ba pengawa nginjil, kitai mega patut ngawakka Jaku Petara terus negapka pengarap kitai. Kitai patut ‘ninga enggau manah’ semua utai ke dipadah Jehovah ngagai kitai. Kemayaharitu, Jehovah bejaku ngagai kitai nengah Jaku Iya, iya nya Bup Kudus. Baka ni kitai ulih nentuka Jaku Petara terus meri kesan ba runding, asai ati, sereta pengeran kitai?

16. Nama utai ke patut digaga kitai enggau Jaku Petara, lalu baka ni kitai ulih nentuka ati kitai meretika Jaku nya enggau manah?

 ¹⁶ Lebuh kitai makai pemakai, tubuh kitai deka nyadi kering agi. Lalu lebuh kitai belajarka Jaku Petara sereta belematika iya, pengarap kitai deka nyadi tegap agi. Jehovah dekaka kitai belajarka utai tu. Jehovah deka “perut [kitai] kenyang” enggau Jaku Iya, iya nya meretika Jaku Iya enggau manah. Kitai ulih ngereja nya enggau besampi, macha, sereta belemati. Keterubah, kitai besampi kena nyediaka ati kitai nerima runding Petara. Udah nya, kitai macha ayat Bup Kudus. Lalu pengudah nya, kitai ngetu kena belemati tauka berunding enggau dalam pasal utai ke udah dibacha kitai. Nama deka nyadi udah nya? Dalam agi kitai belemati, mayuh agi utai ke deka dimeretika kitai pasal Jaku Petara, lalu nya deka negapka pengarap kitai.

17. Nama kebuah nya penting belematika utai ke dibacha kitai dalam Bup Kudus?

¹⁷ Nama kebuah nya penting kitai macha Bup Kudus sereta belematika iya? Enggau ngereja nya, kitai deka bisi pengering ke diguna kena nginjil diatu pasal pesan Perintah Petara sereta madahka pasal pesan ngakim ke engka deka ditusui kitai jemah ila. Pia mega, lebuh kitai belematika kualiti Jehovah ti ngalitka ati, kaul kitai enggau Iya deka majak tegap agi. Asil iya, kitai deka ngasaika utai ti manis tauka ngelantangka ati, iya nya pemaik ba ati sereta puas ati.—Mas. 119:103.

18. Nama utai ke patut diterima orang ba endur alai kitai nginjil, lalu nama kebuah?

¹⁸ Esekiel nya siku nabi, tang kitai ukai. Taja pia, kitai keran deka terus ngerembaika pesan Jehovah ke bisi dalam Jaku Iya nyentukka pengawa nginjil kitai tembu dipejalaika. Maya timpuh ngakim datai, orang ba kandang endur kitai nginjil nadai kebuah deka madahka sida nadai nerima jaku tangkan tauka Petara enda bedulika sida. (Esk. 3:19; 18:23) Tang sida enda tau enda ngaku pesan ke dibai kitai nya datai ari Petara.

19. Nama utai ke deka meri kitai pengering kena nembuka pengawa nginjil kitai?

¹⁹ Nama utai ke deka meri kitai pengering kena nembuka pengawa nginjil kitai? Tiga iti utai ti sama ke udah negapka Esekiel. Kitai terus nginjil laban kitai nemu kitai udah dianjung Jehovah, kitai nerima pengering ari kuasa kudus Petara, lalu pengarap kitai ditegapka nengah Jaku Petara. Enggau tulung ari Jehovah, kitai diperansang bejalaika pengawa nginjil kitai sereta “tan datai ke ujung.”—Mat. 24:13.