1-2. (a) Nama tanya ke deka dipejuraika kitai? (b) Nama utai ke nunjukka Jehovah keran deka nulung kitai?

 JEHOVAH ulih nulung kitai tan napi penanggul sereta bulih pengaga ati lebuh gawa ke Iya. Nama utai ti dikereja Iya kena nulung kitai? Baka ni kitai bulih mayuh penguntung ari tulung ke diberi Jehovah ngagai kitai? Tanya tu deka disaut dalam artikel tu. Tang sebedau nya, aram kitai bejuraika tanya tu: Kati Jehovah amat bisi pengeran deka nulung kitai?

² Jaku ke dikena rasul Paul dalam surat iya ngagai orang Hebrew ulih nulung kitai tetemuka saut nya. Paul nulis: “Jehovah nya penulung aku. Aku enda takut. Nama utai ke ulih digaga orang ngagai aku?” (Heb. 13:6) Penerang Bup Kudus madahka leka jaku “penulung” dalam ayat tu dituju ngagai orang ke deka enggau lengkas nulung orang ke minta tulung. Gambarka Jehovah enggau lengkas nyelamatka orang ke benung tusah ati. Nuan tentu besetuju penerang tu nunjukka Jehovah bisi pengeran deka nulung kitai. Lebuh Jehovah nulung kitai, kitai ulih tan napi penguji enggau ati ti gaga.

3. Nama tiga iti chara ke dikena Jehovah nulung kitai tan napi penguji enggau ati ti gaga?

³ Nama sekeda chara ke dikena Jehovah nulung kitai tan napi penguji enggau ati ti gaga? Kena nyaut tanya nya, aram kitai macha begian ari bup Isaiah. Nama kebuah? Laban mayuh ari jaku benabi ke diayan Jehovah ngagai Isaiah dituju ngagai nembiak Petara kemayaharitu. Pia mega, Isaiah suah ngambarka Jehovah ngena rambai jaku ke senang dimeretika kitai. Isaiah bagi 30 bisi sekeda chunto. Ba bagi 30, Isaiah ngena mayuh sempama ti manah kena ngambarka chara Jehovah nulung nembiak Iya. Iya nuliska chara Jehovah nulung kitai  (1) enggau bejimat mendingka kitai sereta nyaut sampi kitai, (2) enggau nyediaka iring ti dikena kitai, sereta (3) enggau meri kitai berekat ke diatu sereta ke jemah ila. Kitai deka bejuraika tiga iti chara ke dikena Jehovah nulung kitai.

4. (a) Baka ni Jehovah ngambarka orang Judah maya jeman Isaiah, lalu nama utai ti dikemendarka Jehovah nyadi? (b) Nama harapan ke diberi Jehovah ngagai sida ke tetap ati? (Isaiah 30:18, 19)

⁴ Ba pun Isaiah bagi 30, Jehovah ngambarka orang Judah nya orang ke “angkat ngelaban,” ke “nugungka dosa sida.” Ku Iya agi: ‘Sida seruran angkat ngelaban Petara, . . . seruran enggai mendingka ajar Jehovah.’ (Isa. 30:1, 9) Ketegal sida enggai mending, Isaiah madahka Jehovah deka ngemendarka sida ngasaika pemerinsa. (Isa. 30:5, 17; Jer. 25:8-11) Lalu nya meh utai ke nyadi lebuh orang Babilon naban sida ngagai Babilon nyadi orang tangkap. Taja pia, bisi sekeda ari sida nya orang ke tetap ati, lalu Isaiah bisi siti pesan pasal harapan ke sida. Iya madah ngagai sida, bisi maya nya ila Jehovah deka ngemendarka sida pulai lalu diau ba Jerusalem baru. (Bacha Isaiah 30:18, lalu 19 b ari nota kaki.) Lalu nya meh utai ke udah amat nyadi. Jehovah ngelepaska sida ari Babilon. Taja pia, Jehovah enda ngelepaska sida tekala nya. Rambai jaku ‘Jehovah nganti maya Iya deka kasihka kita’ nunjukka pengudah sesiti timpuh baru meh orang ke tetap ati deka diselamatka. Kebendar iya, orang Israel nyadi orang tangkap ba Babilon pengelama 70 taun sebedau sekeda ari sida dikemendarka pulai baru ngagai Jerusalem. (Isa. 10:21; Jer. 29:10) Lebuh orang Israel nyadi orang tangkap ba Babilon, sida nyabak laban sida balat tusah ati. Tang lebuh sida pulai baru ngagai menua sida, sida nyabak laban sida balat gaga ati.

5. Nama pengandal ke diberi Isaiah 30:19 ngagai kitai?

⁵ Kemayaharitu kitai ulih berasai diperansang ari rambai jaku tu: “Lebuh nuan nyabak minta tulung ari Iya, Petara deka kasihka nuan.” (Isa. 30:19, NWT) Isaiah ngasuh kitai andal Jehovah deka mendingka kitai lebuh kitai minta tulung ari Iya, lalu Iya deka enggau jampat nyaut sampi kitai. Ku Isaiah agi: “Lebuh Iya ninga kangau nuan, Iya deka terus nyaut tekala nya.” Rambai jaku tu ngingatka kitai pasal Apai kitai ti keran deka nulung orang ke minta tulung ari Iya. Nemu utai tu nulung kitai tan enggau ati ti gaga.

6. Baka ni jaku ari Isaiah nunjukka Jehovah mendingka sampi tiap iku nembiak Iya?

⁶ Nama agi utai bukai ke ulih dipelajarka kitai pasal sampi ari ayat tu? Jehovah mendingka sampi tiap iku kitai enggau manah. Nama kebuah kitai ulih nyebut baka nya? Ba begian keterubah Isaiah bagi 30, leka jaku “kita” dikena laban Jehovah bejaku ngagai seraban nembiak Iya. Tang ba ayat 19 leka jaku “nuan” dikena laban pesan nya dituju ngagai orang siku-siku. Isaiah nulis: “Nuan enda agi nyabak”; “Petara deka kasihka nuan”; “Iya deka terus nyaut nuan.” Laban Jehovah nya Apai ti bepengerindu, Iya enda madah ngagai anak lelaki tauka anak indu Iya ti benung tusah ati, “Nuan patut kering baka menyadi nuan.” Tang Iya ibuh sereta mendingka sampi tiap iku kitai.—Mas. 116:1; Isa. 57:15.

7. Baka ni Isaiah enggau Jesus nunjukka kebuah nya penting kitai terus besampi?

⁷ Lebuh kitai besampi ngagai Petara lalu madah ngagai Iya pasal utai ti ngasuh kitai irau, utai ti keterubah ke engka digaga  Jehovah nya meri kitai pengering ti diguna kitai kena tan napi situasi nya. Lalu enti penguji nya enda lenyau baka ke dikearapka kitai, kitai engka patut minta mayuh kali ngagai Jehovah ngambika bulih pengering kena tan napi penguji nya. Iya mai kitai ngereja nya. Isaiah 62:7 madahka: “Sida enda tau nejuka [Jehovah] belelak.” Nama reti ayat tu? Kitai patut terus besampi ngagai Jehovah baka ke kitai enda nejuka Jehovah belelak. Jaku ari Isaiah ngingatka kitai pasal sempama Jesus ke bekaul enggau sampi ke bisi ba Luke 11:8-10, 13. Dia Jesus meransang kitai besampi enggau “enda ngetu minta” sereta “anang badu minta” kuasa kudus Petara. Kitai mega ulih minta Jehovah ngiring kitai ngambika kitai ngaga pemutus ti manah.

8. Baka ni Isaiah 30:20, 21 dikeamatka ba jeman kelia?

⁸ Bacha Isaiah 30:20, 21 ari nota kaki. c Lebuh soldadu Babilon ngelulung Jerusalem pengelama setaun setengah, orang ba dia ngasaika mayuh amat pemerinsa nyentukka sida ngumbai nya utai ti biasa baka roti enggau ai. Tang nitihka ayat 20 enggau 21, Jehovah besemaya ngagai orang Judah, enti sida nesal ati sereta ngaga ubah ba ulah sida, Iya deka nyelamatka sida. Isaiah ngangau Jehovah nya “Pengajar ti Pemadu Tinggi,” lalu Isaiah besemaya Jehovah deka ngajar sida chara nyembah Iya enggau betul. Semaya tu dikeamatka lebuh orang Judah dilepaska ari nyadi orang tangkap. Jehovah nunjukka Diri nya Pengajar ti Pemadu Tinggi ke sida. Lalu di baruh iring Iya, nembiak Iya ulih mujur ngaduka baru sembah ti tuchi. Kitai amat gaga ati laban Jehovah nya Pengajar ti Pemadu Tinggi kemayaharitu.

9. Nama siti ari chara kitai ulih nerima iring ari Jehovah kemayaharitu?

⁹ Ba ayat tu, Isaiah madah kitai baka pemelajar ke benung diajar Jehovah ba dua iti chara. Kesatu, Isaiah madah: “Kita deka meda Pengajar ti Pemadu Tinggi enggau mata kita empu.” Ba sempama tu, Isaiah madah Pengajar nya bediri ba mua pemelajar iya. Kitai endang gaga ati laban Petara ngajar kitai kemayaharitu. Baka ni Jehovah ngajar kitai? Iya ngereja nya nengah gerempung Iya. Kitai amat beterima kasih ke iring ti nyemetak ke diterima kitai ari gerempung Jehovah. Iring ke diterima kitai ari gempuru, gempuru  besai, konvensyen, litaricha, program Berita JW enggau utai bukai nulung kitai tan enggau ati ti gaga maya napi penusah.

10. Baka ni kitai ninga “munyi nyawa Iya bejaku ari belakang [kitai]”?

¹⁰ Isaiah nulis chara kedua ti dikena Jehovah ngajar kitai. Ku Isaiah: “Kita deka ninga munyi nyawa Iya bejaku ari belakang kita.” Nabi tu madahka, Jehovah nya pengajar ti ibuh ke bejalai di belakang bala pemelajar Iya, lalu madahka jalai ke patut dititihka sida kena ngiring sida. Kemayaharitu, kitai ninga munyi nyawa Petara ari belakang kitai. Baka ni? Jaku Petara ke bisi dalam Bup Kudus udah lama ditulis sebedau jeman kitai. Nya alai, lebuh kitai macha Bup Kudus, nya baka ke kitai benung ninga munyi nyawa Petara ke datai ari belakang kitai.—Isa. 51:4.

11. Nama patut digaga kitai ngambika ulih tan enggau ati ti gaga, lalu nama kebuah?

¹¹ Baka ni kitai tau bulih mayuh penguntung ari iring ke disediaka Jehovah nengah gerempung sereta Jaku Iya? Peratika dua iti utai ti dipadah Isaiah. Kesatu, “tu jalai.” Kedua, “titi jalai tu.” (Isa. 30:21, NWT) Enda chukup enti kitai semina nemu “jalai.” Kitai mega patut ‘niti jalai’ nya. Jaku Jehovah sereta penerang ari gerempung Iya ngajar kitai utai ti dikedekaka Jehovah kereja kitai. Kitai mega belajar chara nitihka utai ti dipelajarka kitai. Ngambika ulih tan enggau ati ti gaga lebuh gawa ke Jehovah, kitai patut ngereja dua iti utai tu. Kitai ulih pechaya Jehovah semina deka merekatka kitai enti kitai belajar sereta nitihka utai ti dipelajarka kitai.

12. Nitihka Isaiah 30:23-26, baka ni Jehovah merekatka nembiak Iya?

¹² Bacha Isaiah 30:23-26. Baka ni jaku benabi tu dikeamatka ba orang Judah ke pulai baru ngagai Israel pengudah nyadi orang tangkap ba Babilon? Jehovah meri sida mayuh utai ke dikena sida beridup sereta ngambika ulih terus nyembah Iya. Jehovah meri sida mayuh amat pemakai. Tang utai ke pemadu penting, Jehovah meri sida semua utai ke diguna sida kena datai semak ngagai Iya sereta kena berengkah baru nyembah Iya enggau chara ti betul. Nembiak Petara maya nya enda kala nerima mayuh utai ti manah ari Petara sebedau tu. Ba ayat 26 nunjukka, Jehovah meri sida penampak ti terang agi, iya nya Iya nulung sida meretika Jaku Iya. (Isa. 60:2) Berekat ari Jehovah nulung nembiak Iya terus nyembah Iya enggau gaga ati sereta bisi pengering “laban ati sida penuh enggau pengelantang.”—Isa. 65:14, NWT.

13. Baka ni jaku benabi pasal sembah ti tuchi ke diaduka baru dikeamatka maya jeman kitai?

 ¹³ Kati jaku benabi pasal sembah ti tuchi ke diaduka baru dituju ngagai kitai kemayaharitu? Au! Baka ni? Kenyau ari taun 1919 M., bejuta iku orang udah dilepaska ari nyadi orang tangkap ba Babilon ti Besai, iya nya gerempung pengarap pelesu sedunya. Sida udah diiring ngagai endur ti jauh manah agi ari Menua ti Udah Disemaya ngagai orang Israel. Sida udah diiring ngagai Paradais rohani. (Isa. 51:3; 66:8) Nama reti Paradais rohani?

14. Nama reti Paradais rohani, lalu sapa diau ba Paradais rohani nya kemayaharitu? (Peda Penerang Jaku.)

¹⁴ Kenyau ari taun 1919 M., orang ke dipilih ngagai serega udah enggau gaga ati diau ba Paradais rohani. d Sida ke bisi harapan idup ba dunya, iya nya “bedus ti bukai,” mega udah tama ngagai Paradais rohani tu lalu ngasaika mayuh berekat ari Jehovah.—Jhn. 10:16; Isa. 25:6; 65:13.

15. Dini alai Paradais rohani nya?

¹⁵ Dini alai Paradais rohani kemayaharitu? Bala penyembah Jehovah diau ba serata dunya, nya alai Paradais rohani ke diuan sida mega bisi ba serata dunya. Nyadi, kemayaharitu enda ngira dini alai kitai diau ba dunya tu, kitai ulih nyadi sebagi ari Paradais rohani tu seagi-agi kitai nyukung sembah ti tuchi enggau bebendar.

16. Baka ni kitai ulih terus meda pemanah ke bisi ba Paradais rohani?

¹⁶ Ngambika ulih terus diau ba Paradais rohani, kitai patut terus beterima kasih ke raban gempuru Kristian di serata dunya lebih agi ari utai bukai. Baka ni kitai ulih ngereja nya? Kitai betumpu ba utai ti manah ukai ba utai ti enda sempurna ba orang ke diau ba endur nya. (Jhn. 17:20, 21) Nama kebuah nya amat penting? Perundingka sempama tu. Kitai nemu kitai deka meda bemacham bansa pun kayu ba taman, tauka kebun ti manah. Baka nya mega, raban gempuru kitai kemayaharitu bisi mayuh bansa orang ke baka pun kayu. (Isa. 44:4; 61:3) Kitai patut nentuka  diri terus befokus ba pemanah ke bisi ba “utan” ukai penimpang ke bisi ditemu ba siti-siti “pun kayu” ti semak enggau kitai. Kitai enda patut nejuka pengelemi diri empu tauka orang bukai ba raban gempuru ngelimpangka kitai ari pemanah ke bisi ba raban gempuru Kristian ti beserakup ba serata dunya.

17. Nama ulih digaga tiap iku kitai kena nentuka raban gempuru kitai mengkang beserakup?

¹⁷ Nama ulih digaga tiap iku kitai kena nentuka raban gempuru kitai mengkang beserakup? Enggau bebendar ngulihka kaul ti manah enggau orang bukai. (Mat. 5:9; Rom. 12:18) Tiap kali kitai nguji ngemansangka pemaik enggau orang bukai ba raban gempuru, kitai ngasuh Paradais rohani manah agi. Kitai patut ingat, Jehovah ke mai tiap iku orang ke diau ba Paradais rohani ngagai sembah ti tuchi. (Jhn. 6:44) Naka meh pengaga ati Jehovah lebuh meda kitai bebendar ngetanka pemaik sereta penyerakup entara bala nembiak Iya ti amat berega ba Iya!—Isa. 26:3; Hag. 2:7.

18. Nama utai ke patut suah dibelematika kitai enggau dalam, lalu nama kebuah?

¹⁸ Jehovah meri nembiak Iya mayuh utai ti manah. Nyadi baka ni kitai tau bulih mayuh penguntung ari utai nya? Kitai ulih berunding enggau dalam pasal utai ti dipelajarka kitai dalam Bup Kudus sereta ba litaricha kitai ti bepelasarka Bup Kudus. Pengawa belajarka Bup Kudus sereta belemati deka nulung kitai ngemansangka sifat Kristian ke ngasuh kitai “rinduka pangan diri baka diri menyadi” ba raban gempuru. (Rom. 12:10) Lebuh kitai belematika berekat ke diasaika kitai diatu, kaul kitai enggau Jehovah deka tegap agi. Lalu lebuh kitai berundingka utai manah ke udah disemayaka Jehovah ti deka diberi Iya ngagai kitai jemah ila, kitai bepegai rat ba harapan kitai ke deka nyembah Jehovah belama iya. Semua utai tu deka nulung kitai nyembah Jehovah enggau gaga agi diatu.

19. (a) Nitihka Isaiah 30:18, nama utai ke ulih diandalka kitai? (b) Nama utai ke deka nulung kitai tan enggau ati ti gaga?

¹⁹ Jehovah “sedia deka” ngarika kitai lebuh Iya mai pengujung ngagai dunya ti jai tu. (Isa. 30:18) Kitai andal Jehovah “endang seruran ngereja utai ti ngena.” Iya enda ngelakka dunya Sitan ti jai tu mengkang bisi ngelui sehari ari ke udah ditetapka Iya. (Isa. 25:9) Kitai enggau sabar nganti hari Jehovah deka nyelamatka kitai. Seraya nganti maya nya, kitai keran deka terus ngenuluka peluang kena besampi, kena belajar enggau ngasika Jaku Petara, sereta kena belematika berekat kitai. Seraya kitai ngereja nya, Jehovah deka nulung kitai tan enggau ati ti gaga ba sembah kitai ngagai Iya.