1. Nama reti jaga meh runding kitai? (2 Timoti 4:5)

 LEBUH bisi utai nyadi ke ngasuh kitai pedis ati, penaluk kitai ngagai Jehovah sereta gerempung Iya ulih diuji. Baka ni kitai ulih mutarka penguji ke baka tu? Kitai patut nyaga runding kitai enggau mengkang bejaga sereta bepegai rat ba pengarap. (Bacha 2 Timoti 4:5.) Kitai nyaga runding kitai lebuh kitai mengkang tenang, berunding enggau manah, sereta nguji meda utai baka chara Jehovah meda utai nya. Lebuh kitai ngereja nya, asai ati kitai enda ulih ngachau utai ti diperundingka kitai.

2. Nama deka dikerandauka kitai ba artikel tu?

² Ba artikel sebedau tu, kitai udah bejuraika tiga iti penguji ke engka ditapi kitai ari orang bukai ke ukai ari raban gempuru. Ba artikel tu, kitai deka berandauka tiga iti penguji ke datai ari raban gempuru ke ulih nguji penaluk kitai ngagai Jehovah. (1) Lebuh kitai ngasaika bala menyadi Kristian enda ngintu kitai enggau adil, (2) lebuh kitai nerima disiplin, sereta (3) lebuh kitai tusah deka nelebaka diri enggau ubah ari gerempung. Baka ni kitai ulih nyaga runding kitai sereta mengkang taluk ngagai Jehovah sereta gerempung Iya lebuh kitai napi penguji ke baka tu?

3. Nama reaksi kitai lebuh kitai ngasaika bala menyadi Kristian enda ngintu kitai enggau adil?

³ Kala nuan ngasaika siku menyadi Kristian ngintu nuan enggau enda adil, engka indah siku orang ke bisi megai tanggung pengawa baka tuai gempuru? Menyadi nya engka enda sengaja deka ngemediska nuan. (Rom. 3:23; Jas. 3:2) Tang, ulah iya engka ngasuh nuan pedis ati. Nuan engka enda ulih tinduk ketegal  berundingka utai tu. Nuan indah engka berunding, ‘Enti menyadi Kristian bisi ulah ke baka tu, kati tu amat gerempung Petara?’ Sitan endang dekaka kitai berunding baka nya. (2 Kor. 2:11) Runding ti negatif ke baka nya ulih ngasuh kitai nyeraraka diri ari Jehovah enggau gerempung Iya. Nya alai, enti kitai ngasaika siku menyadi Kristian udah ngintu kitai enggau enda adil, baka ni kitai ulih nyaga runding kitai sereta nyeliah ari ngembuan runding ti tau ngemediska kitai?

4. Baka ni Josep nyaga runding iya lebuh iya diintu enggau enda adil, lalu nama ulih dipelajarka kitai ari teladan iya? (Pemungkal 50:19-21)

⁴ Anang bedendam. Lebuh Josep agi biak, bala menyadi tuai iya ngintu iya enggau enda adil. Sida begedika iya lalu sekeda ari sida indah deka munuh iya. (P-kal. 37:4, 18-22) Udah nya, sida nyual iya nyadi ulun. Ketegal nya, Josep napi penguji ti balat pengelama kira-kira 13 taun. Josep engka berunding sekalika Jehovah amat rinduka iya tauka enda. Lalu iya mega engka berunding sekalika Jehovah udah ninggalka iya ba maya iya begunaka tulung. Tang Josep enda bedendam. Taja pia, iya nyaga runding iya enggau mengkang tenang. Lebuh iya bisi peluang deka malas dendam ngagai bala menyadi tuai iya, iya enda ngereja nya tang iya ngayanka pengerindu sereta ngampunka sida. (P-kal. 45:4, 5) Josep enda malas dendam laban iya ulih berunding enggau manah. Iya enda berunding pasal penanggul iya empu, tang terus berunding pasal utai ti dikedekaka Jehovah. (Bacha Pemungkal 50:19-21.) Nama ulih dipelajarka kitai? Enti nuan diintu enggau enda adil, anang meh bedendam ngelaban Jehovah tauka berunding sekalika Iya udah ninggalka nuan. Tang berundingka pasal chara Iya benung nulung nuan tan napi penguji nya. Nambahka nya, lebuh orang bukai ngintu nuan enggau enda adil, ampun meh sida lalu ingat pengerindu ulih nutup mayuh penyalah.—1 Pet. 4:8.

5. Baka ni Miqueas nyaga runding iya lebuh iya ngasaika diri udah diintu enggau enda adil?

⁵ Peratika pengalaman kemayaharitu pasal siku tuai gempuru ari Amerika Selatan ke benama Miqueas. b Iya ngenang baru maya sekeda bala menyadi lelaki ke bisi megai tanggung pengawa ba gerempung Jehovah udah ngintu iya enggau kasar. Ku iya: “Aku enda kala ngasaika stres ke baka nya. Aku balat irau. Aku enda ulih tinduk maya malam hari, lalu aku nyabak ketegal aku ngasaika nadai utai ke ulih digaga aku.” Taja pia, Miqueas nyaga runding iya sereta bebendar ngawal asai ati iya. Iya seruran besampi, minta Jehovah meri iya kuasa kudus sereta pengering kena tan. Iya mega ngiga penerang ba litaricha kitai ke ulih nulung iya. Nama ulih dipelajarka kitai? Enti nuan ngasaika siku menyadi Kristian udah ngintu nuan enggau enda adil, nuan ulih mengkang tenang sereta nguji ngawal asai ati ti negatif ke engka dikemisi nuan. Nuan engka enda nemu utai ke ngasuh orang nya bejaku tauka ngereja utai ke baka nya. Nya alai, bejaku meh enggau Jehovah nengah sampi, lalu minta Iya nulung nuan meda utai baka chara orang nya meda pekara nya. Enggau ngereja tu, nya deka nulung nuan berunding menyadi Kristian nya enda sengaja ngereja utai ti jai ngagai nuan, lalu deka ngampunka iya. (J-lam. 19:11) Kingatka, Jehovah nemu situasi nuan lalu Iya deka meri nuan pengering ke diguna nuan kena tan.—2 Ban. 16:9; P-jar. 5:8.

6. Nama kebuah nya penting kitai meda disiplin ari Jehovah nya siti chara Iya ngayanka pengerindu ngagai kitai? (Hebrew 12:5, 6, 11)

⁶ Lebuh Jehovah meri kitai disiplin, nya ulih  ngasuh kitai amat tusah ati. Tang enti kitai semina berunding pasal penusah ba ati kitai, kitai ulih berengkah ngumbai disiplin nya enda adil sereta enda ulih dikena ba kitai tauka disiplin nya kelalu kasar. Tu ulih nagang kitai ari meretika utai ti amat penting, iya nya Jehovah meri kitai disiplin ketegal Iya rinduka kitai. (Bacha Hebrew 12:5, 6, 11.) Lalu enti kitai nejuka asai ati kitai ngawal kitai, kitai meri peluang ngagai Sitan nyerang kitai. Sitan deka kitai nulak disiplin ke diberi lalu ke balat agi, iya deka kitai ngenyauhka diri ari Jehovah sereta ari raban gempuru. Enti nuan bisi nerima disiplin, baka ni nuan ulih nyaga runding nuan?

7. (a) Baka ke ulih dipeda ba gambar, baka ni Peter dikena Jehovah pengudah iya nerima disiplin? (b) Nama ulih dipelajarka nuan ari teladan Peter?

⁷ Terima meh disiplin, lalu gaga ubah ti patut. Lebih ari sekali, Jesus ngerara Peter ba mua bala rasul ke bukai. (Mrk. 8:33; Luk. 22:31-34) Nya engka ngasuh Peter berasai amat malu! Taja pia, Peter mengkang taluk ngagai Jesus. Iya nerima disiplin nya lalu belajar ari penyalah iya empu. Asil iya, Jehovah merekatka penaluk Peter lalu meri iya tanggung pengawa ti penting dalam raban gempuru. (Jhn. 21:15-17; SKR. 10:24-33; 1 Pet. 1:1) Nama ulih dipelajarka kitai ari teladan Peter? Lebuh kitai enda betumpu ba asai ati kitai ti malu, tang nerima disiplin nya sereta ngaga ubah ke patut, kitai empu enggau orang bukai deka bulih penguntung. Lebuh kitai ngereja nya, kitai deka nyadi berega agi ba Jehovah sereta ngagai bala menyadi Kristian kitai.

8-9. Pengudah diberi disiplin, nama asai ati Bernardo terubah iya, tang nama utai ke udah nulung iya ngemetulka runding iya?

⁸ Peratika utai ke udah nyadi ba Bernardo, siku menyadi lelaki ari Mozambique. Bernardo enda agi diasuh nyadi tuai gempuru. Nama asai ati Bernardo terubah iya? Ku iya, “Aku balat ringat laban aku enda rinduka disiplin ke diterima aku.” Iya irau bala menyadi Kristian ba raban gempuru engka bisi runding ti enda manah pasal iya. Ku iya ngaku, “Aku begunaka beberapa bulan kena meda disiplin nya enggau chara ti ngena sereta kena pechayaka baru ngagai Jehovah enggau gerempung Iya.” Nama nulung Bernardo ngaga ubah ba ulah iya?

⁹ Bernardo ngemetulka chara iya berunding. Ku iya: “Lebuh aku nyadi siku tuai gempuru, aku ngena ayat Hebrew 12:7 kena nulung orang bukai bisi runding ti betul pasal disiplin  ari Jehovah. Diatu aku nanya diri empu, ‘Sapa ke patut nitihka ayat tu?’ Semua nembiak Jehovah—nyengkaum aku.” Udah nya, Bernardo ngaga ubah ke bukai kena ngemansangka pengarap iya ba Jehovah enggau gerempung Iya. Iya mayuh agi macha Bup Kudus sereta ngena mayuh awak belematika utai ti dibacha iya. Taja pan iya agi berasai irau pasal runding bala menyadi Kristian ngagai iya, tang iya terus gawa enggau sida ba pengawa nginjil sereta ngambi begian ba gempuru. Nyau kelama, Bernardo dipilih baru nyadi tuai gempuru. Baka Bernardo, enti nuan nerima disiplin, uji meh enda berunding kelalu mayuh pasal asai ati nuan ti malu, tang terima jaku lalau nya lalu gaga meh ubah ti patut. c (J-lam. 8:33; 22:4) Enti nuan ngereja nya, nuan ulih pechaya Jehovah deka merekat nuan ketegal penaluk nuan ngagai Iya sereta gerempung Iya.

10. Nama ubah ke engka udah nguji penaluk sekeda orang Israel?

¹⁰ Ubah ba gerempung ulih nguji penaluk kitai. Enti kitai enda bejimat, kitai engka nejuka utai tu nyeraraka kitai ari Jehovah. Ambika chunto, peratika baka ni utai berubah ba orang Israel. Sebedau Jehovah meri sida Adat Moses, tuai bilik ngereja utai ti digaga imam. Sida nirika alta sereta meri pemeri ngagai Jehovah ngarika ruang bilik sida. (P-kal. 8:20, 21; 12:7; 26:25; 35:1, 6, 7; Jop 1:5) Tang pengudah Adat Moses diberi, tuai bilik enda dikemendarka ngereja utai nya. Jehovah milih imam ari peturun Aron kena meri pemeri. Kenyau ari maya nya, enti tuai bilik ke ukai ari peturun Aron berengkah ngereja pengawa imam, iya deka diukum mati. d (Lew. 17:3-6, 8, 9) Kati ubah tu siti ari kebuah Korah, Datan, Abiram enggau 250 iku tuai orang Israel angkat ngelaban Moses enggau Aron? (P-pau. 16:1-3) Kitai enda pasti. Tang kitai nemu Korah sereta orang bukai ke enggau iya enda mengkang tetap ati ngagai Jehovah. Enti ubah ba gerempung nguji penaluk nuan, nama ulih digaga nuan?

11. Nama ulih dipelajarka kitai ari teladan sekeda orang Lewi ke ari raban bansa Kohat?

¹¹ Sukung meh ubah ba gerempung enggau pengabis ati. Maya pejalai sida ba menua puang, orang ari raban bansa Kohat bisi tanggung pengawa ti amat istimewa. Ninting kali orang Israel patut mindahka kem, sekeda ari raban bansa Kohat deka mai Peti Lampang Batu Adat dulu agi ari semua orang. (P-pau. 3:29, 31; 10:33; Jos. 3:2-4) Tu peluang ti amat istimewa! Taja pia, utai berubah ke sida lebuh orang Israel diau ba Menua ti Udah Disemaya. Peti Lampang Batu Adat enda ibuh seruran dipindahka agi. Nya alai, lebuh Solomon nyadi raja, sekeda orang ari raban bansa Kohat diberi pengawa nyadi kepala koir, sekeda bekereja nyadi jejaga ba rumah sembiang, lalu ke bukai diasuh betanggungjawapka sarang reta rumah sembiang. (1 Ban. 6:31-33; 26:1, 24) Bup Kudus nadai madahka orang ari raban bansa Kohat mutap tauka minta pengawa ti penting agi laban sida bisi pengawa ti istimewa sebedau tu. Nama utai ke ulih dipelajarka kitai? Sukung meh ubah ke digaga gerempung Jehovah enggau pengabis ati, nyengkaum ubah ke bisi mai kesan ngagai pengawa nuan. Giga meh pengaga ati ba sebarang pengawa ke diberi ngagai nuan. Anang enda ingat, ukai pengawa nuan ke nentuka  nuan nya berega ba Jehovah tauka enda. Jehovah ngumbai ulah nuan ke ngasi nya penting agi ari sebarang pengawa nuan.—1 Sam. 15:22.

12. Baka ni asai ati Zaina ke gawa ba Betel lebuh iya diasuh nyadi pengerintis spesial?

¹² Peratika teladan Zaina, siku menyadi ke nerima ubah ba pengawa sereta lenyau pengawa ti istimewa ba iya. Iya diasuh nyadi pengerintis spesial pengudah gawa ba Betel lebih ari 23 taun. Ku iya: “Aku amat tekenyit lebuh nerima ubah ba pengawa aku. Aku ngasaika diri nadai guna, lalu suah nanya diri empu, ‘Nama penyalah ke digaga aku?’” Sekeda bala menyadi Kristian ba raban gempuru nambahka agi penusah ba ati iya enggau madahka: “Enti nuan udah ngereja pengawa enggau bebendar, gerempung tentu deka ngasuh nuan terus gawa ba Betel.” Ba siti timpuh, Zaina berasai amat tusah ati nyentukka iya nyabak tiap malam. Tang ku iya: “Aku enda kala nejuka diri kakang ati enggau gerempung tauka pengerindu Jehovah.” Baka ni Zaina ulih nyaga runding iya?

13. Nama digaga Zaina kena ngelaban asai ati iya ti negatif?

¹³ Zaina ulih ngelaban asai ati iya ti negatif. Baka ni? Iya macha artikel ari litaricha kitai ke bisi nyebut pasal utai ke ditapi iya sereta chara ke ulih nulung iya tan. Ambika chunto, iya tetemuka siti artikel ke nerang pasal baka ni penulis Bup Kudus ke benama Mark engka napi asai ati ti sama lebuh iya nerima ubah ba pengawa. Ku Zaina ngenang baru, “Teladan Mark tu meh ke diguna aku ngambika ulih badu agi berasai asa ati.” Zaina mega mengkang semak enggau bala kaban iya. Iya enda nyeraraka diri tauka badu agi nginjil enggau bala menyadi Kristian tauka nejuka diri berasai sinuka diri empu. Iya nyau sedar kuasa kudus Petara ke ngiring pemutus ke digaga gerempung Jehovah, lalu bala menyadi ke ngiring amat ibuhka iya. Tang iya mega sedar, gerempung Jehovah tentu ngereja utai ti pemadu manah ngambika pengawa Jehovah ulih tembu.

14. Nama ubah ba gerempung ke ngasuh Vlado tusah deka nelebaka diri, lalu nama udah nulung iya?

¹⁴ Vlado nya siku tuai gempuru ke beumur 73 taun ari Slovenia. Iya berasai tusah deka nerima lebuh raban gempuru iya digabung enggau raban gempuru bukai, lalu Palan Gempuru iya udah ditutup. Ku iya: “Aku enda mereti nama kebuah kami enda ulih ngena Palan Gempuru ti manah nya. Aku berasai pedis ati laban kami baru aja ngaduka baru Palan Gempuru nya.  Aku siku tukang kayu, lalu aku udah ngaga sekeda kereban ke dikena ba dalam Palan Gempuru nya. Pia mega, atur ti baru tu begunaka mayuh ubah ke enda senang ba kami ke penginjil ke udah tuai.” Nama udah nulung Vlado nyukung iring tu? Ku iya: “Nelebaka diri enggau ubah ke digaga gerempung Jehovah seruran mai mayuh berekat. Pemansang ke baka tu nyediaka kami ke ubah ti besai agi ba jemah ila.” Kati nuan tusah deka nerima ubah ketegal raban gempuru nuan udah digabung enggau raban gempuru ke bukai, tauka ketegal bisi ubah ba pengawa nuan? Pechaya meh Jehovah meretika asai ati nuan. Lebuh nuan nyukung ubah ke baka tu sereta mengkang taluk ngagai Jehovah enggau gerempung ke dikena Iya, nuan tentu deka diberekat.—Mas. 18:25.

15. Baka ni kitai ulih nyaga runding kitai lebuh kitai napi penguji dalam raban gempuru?

¹⁵ Seraya kitai majak semak enggau pengujung sistem dunya tu, kitai ulih nyangka deka napi penguji ke datai ari dalam raban gempuru. Penguji ke baka tu ulih nguji penaluk kitai ngagai Jehovah. Nya alai, kitai patut nyaga runding kitai. Enti nuan ngasaika siku menyadi Kristian ngintu nuan enggau enda adil, anang nejuka nuan empu bedendam. Enti nuan nerima disiplin, anang semina betumpu ba asai ati nuan ti malu aja, tang terima lalau nya lalu gaga ubah ti patut. Lalu lebuh gerempung Jehovah bisi ngaga ubah ke mai kesan ngagai nuan, terima sereta ngasika iring nya enggau pengabis ati.

16. Baka ni nuan ulih mengkang arapka Jehovah enggau gerempung Iya?

¹⁶ Nuan ulih mengkang arapka Jehovah enggau gerempung Iya lebuh penaluk nuan diuji. Tang kena ngereja nya, nuan patut nyaga runding nuan. Reti iya, mengkang tenang, berunding enggau dalam, sereta meda utai ari chara Jehovah meda utai nya. Bebendar meh belajarka teladan ari Bup Kudus ke udah mujur napi penguji ti sama sereta belematika teladan ari sida. Besampi meh ngagai Jehovah kena minta tulung. Lalu anang nyeraraka diri ari raban gempuru. Enti pia, enda ngira nama utai ke deka nyadi, Sitan enda ulih nyeraraka nuan ari Jehovah tauka gerempung Iya.—Jas. 4:7.