SIKU orang Judah ke benama Mordikai bisi tanggung pengawa ti besai ba utai ke nyadi dalam bup Ester ba Bup Kudus. Iya siku orang tangkap ke gawa ba istana menua Persia. Utai tu nyadi enda lama pengudah 500 S.M., iya nya lebuh “Raja Serses merintah nyadi raja.” Mordikai ngetuka pengawa orang ti bepekat deka munuh raja. Kena nunjukka diri beterima kasih, raja nya ngatur ngambika Mordikai dipebasaka ba mua orang mayuh. Lalu, raja ngelantik Mordikai nyadi Perdana Menteri pengudah Haman mati, iya nya munsuh Mordikai enggau orang Judah ke bukai. Ketegal nyadi Perdana Menteri, Mordikai ulih nyelamatka orang Judah ba perintah Persia ari pengawa bebunuhka sesiti bansa.—Ester 1:1; 2:5, 21-23; 8:1, 2; 9:16.

Sekeda pakar sejarah madahka bup Ester nya bup cherita lalu Mordikai nya enda amat. Taja pia, ba taun 1941, pakar arkeologi tetemuka bukti ti engka nyukung utai ti dipadah Bup Kudus pasal Mordikai. Nama utai ti ditemuka sida?

Bala pemansik nya bisi tetemuka lampang tanah liat ke nyebut pasal siku lelaki ke benama Marduka. Iya gawa ngemataka reta tengkira Haman ba Susa. Maya lampang tanah liat tu ditemu, siku pakar sejarah pasal endur nya Arthur Ungnad madahka, “tu keterubah kali Mordikai disebut dalam riput ti ukai sebagi ari Bup Kudus.”

Kenyau ari riput Ungnad, pakar sejarah udah nyalin beribu iti rikut sejarah orang Persia ke bukai. Entara utai ti disalin sida nya, lampang tanah liat ti mit, ke ditemu ba kuta Persepolis ke udah nyadi tembawai. Sida tetemuka lampang tanah liat tu ba endur nyimpan reta ke semak dinding kuta. Sekeda lampang tanah liat tu bisi ari jeman maya Serses I merintah. Utai tu ditulis ngena bansa jaku Elam lalu ngundan sekeda nama ke bisi dalam bup Ester. a

Sekeda ari lampang tanah liat Persepolis nya bisi nyebut nama Marduka, ti gawa nyadi sekretari ke raja ba istana Susa maya Serses I merintah. Siti lampang nya madahka Marduka nya siku penyalin. Penerang tu sejalai enggau utai ti dipadah Bup Kudus pasal Mordikai. Iya siku pemesai perintah ke dipilih nyadi ulun Serses I lalu iya ulih bejaku abis kurang ngena dua iti bansa jaku. Mordikai seruran duduk ba pintu penama raja ba istana di Susa. (Ester 2:19, 21; 3:3) Pintu penama tu siti bengunan ti besai alai pemesai perintah istana gawa.

Bisi mayuh utai ke sama ti ngalitka ati entara Marduka ke disebut dalam lampang tanah liat enggau Mordikai ke disebut dalam Bup Kudus. Sida idup ba jeman ti sama sereta ba endur ti sama, lalu gawa nyadi pemesai perintah ba endur gawa ti sama. Semua fakta tu engka nunjukka Marduka enggau Mordikai nya orang ti sama.