1-2. Nama sekeda situasi ti enda lurus ke engka ditapi kitai?

 JESUS madahka siti sempama pasal siku indu balu, ke suah minta tulung ari siku hakim laban bisi orang ngintu iya enggau enda lurus. Bala murid Jesus ulih faham asai ati indu dalam sempama nya, laban mayuh orang ba jeman nya diintu enggau enda lurus. (Luk. 18:​1-5) Kitai mega ulih faham asai ati indu nya laban semua kitai engka kala napi utai ti enda lurus.

² Mayuh orang ba dunya kemayaharitu bepilih mata, ngintu orang bukai enggau enda manah, sereta amu. Ketegal nya, kitai enda tekenyit lebuh kitai diintu enggau enda lurus. (P-jar. 5:8) Tang kitai engka asa agi ati enti bala menyadi Kristian ngintu kitai enggau enda manah. Endang amat, bala menyadi Kristian kitai ukai sengaja deka ngintu kitai enggau enda lurus, baka orang ke nyakal tauka merinsaka kitai. Taja pia, bala menyadi kitai enda sempurna. Nyadi, nama ulih nulung kitai? Kitai ulih belajar mayuh ari utai ke digaga Jesus lebuh bala penyakal ngintu iya enggau enda lurus. Enti kitai ulih sabar enggau bala penyakal, kitai tentu ulih sabar agi lebuh bala menyadi Kristian ngintu kitai enggau enda manah. Nama asai ati Jehovah lebuh bala menyadi Kristian tauka orang bukai ngintu kitai enggau enda lurus? Kati Iya ibuhka kitai?

3. Kati Jehovah ibuhka bala nembiak Iya ke napi utai ti enda lurus, lalu nama kebuah?

³ Jehovah deka kitai diintu enggau manah, lalu Iya meda lebuh orang ngintu kitai enggau enda lurus. Bup Kudus madahka: “Jehovah rinduka atur ti lurus.” (Mas. 37:28) Jesus madahka, ba maya ti chun, ‘Petara deka jampat ngakim enggau lurus.’ (Luk. 18:​7, 8) Lalu enda lama da agi, Iya deka muai semua utai ke ngasuh kitai merinsa. Pia mega, Iya deka nentuka  kitai enda agi diintu enggau enda lurus.—Mas. 72:​1, 2.

4. Nama tulung ke disediaka Jehovah ke kitai kemayaharitu?

⁴ Endang amat, kitai patut nganti ngagai maya Jehovah deka muai semua penanggul kitai. Taja pia, indah diatu, Iya benung nulung kitai lebuh orang bukai ngintu kitai enggau enda lurus. (2 Pet. 3:13) Ambika chunto, Iya ngajar kitai utai ke ulih digaga kitai lebuh diintu enggau enda lurus, ngambika ulih nyeliah ari penanggul ke bukai. Nengah Jesus, Jehovah meri kitai siti teladan ti sempurna pasal utai ke ulih digaga kitai lebuh napi utai ti enda lurus. Lalu Jehovah mega meri kitai jaku lalau dalam Bup Kudus pasal utai ke ulih dikereja kitai lebuh diintu enggau enda lurus.

BEJIMAT ENGGAU UTAI KE DIKEREJA NUAN LEBUH NAPI UTAI TI ENDA LURUS

5. Nama kebuah kitai patut bejimat enggau utai ke digaga kitai lebuh napi utai ti enda lurus?

⁵ Lebuh napi utai ti enda lurus, kitai engka balat tusah ati sereta asa ati. (P-jar. 7:7) Bala nembiak Jehovah ti tetap ati, baka Jop enggau Habakuk, kala berasai baka nya. (Jop 6:​2, 3; Hab. 1:​1-3) Asai ati ke baka nya endang biasa. Tang kitai patut bejimat enggau utai ke digaga kitai ngambika enda ngereja utai ti beli.

6. Nama ulih dipelajarka kitai ari chunto Absalom? (Peda mega gambar.)

⁶ Lebuh orang ngintu kitai tauka orang ke dikesayauka kitai enggau chara ti enda lurus, kitai engka deka malas dendam. Tang tu engka ngasuh penanggul nya nyadi balat agi. Peratika chunto anak Raja David, Absalom. Iya balat ringat lebuh menyadi indu iya, Tamar, dirugul Amnon, menyadi lelaki iya ke enda sama indai. Nitihka Adat Moses, Amnon patut dibunuh ketegal utai ke digaga iya. (Lew. 20:17) Endang enda salah enti Absalom ringat, tang utai ti salah ke dikereja iya nya, iya munuh Amnon.—2 Sam. 13:​20-23, 28, 29.

7. Nama reaksi keterubah siku pemasmur lebuh iya meda utai ti enda lurus?

⁷ Lebuh kitai meda orang ke ngereja utai ti enda lurus enda diukum, kitai engka berunding sekalika bisi penguntung ngereja utai ti betul. Siku pemasmur meda orang ti manah diintu enggau enda lurus, lalu orang ke ngereja utai ti enda lurus nya baka ke ngembuan pengidup ti nyamai. Ku iya madahka: “Nya meh gaya orang ke jai. Sida endang mayuh utai.” (Mas. 73:12) Iya berasai amat  tusah ati ketegal utai ti enda lurus ke dipeda iya, lalu nya ngasuh iya ngumbai nadai penguntung iya nyembah Jehovah. Iya madah: “Aku udah nguji berundingka pasal penusah tu, tang utai tu kelalu mar ke aku.” (Mas. 73:​14, 16) Iya mega madahka: “Pengarap aku nyau deka abis.” (Mas. 73:2) Tu meh utai ti nyadi ngagai Alberto. a

8. Nama utai ti enda lurus ke ditapi siku menyadi lelaki, lalu nama kesan nya ngagai iya?

⁸ Alberto dituduh ngenchuri duit ari raban gempuru. Ketegal nya, iya enda ulih agi nyadi tuai gempuru. Lalu mayuh bala menyadi ke nemu pasal tuduhan nya enda agi bebasaka iya. Ku iya ngenang baru: “Aku berasai ringat sereta asa ati.” Iya amat ringat nyentukka iya badu agi datai begempuru, lalu iya mega nyadi enda aktif pengelama lima taun. Pengalaman tu ngajar kitai utai ti ulih nyadi enti kitai enda ngawal pengeringat kitai lebuh kitai diintu enggau enda lurus.

NELADAN UTAI KE DIGAGA JESUS LEBUH NAPI UTAI TI ENDA LURUS

9. Nama utai ti enda lurus ke ditapi Jesus? (Peda mega gambar.)

⁹ Jesus netapka teladan ti manah lebuh napi utai ti enda lurus. Mayuh orang ngintu iya  enggau enda lurus, nyengkaum diri sebilik iya empu. Bala kaban belayan iya ngumbai iya udah gila, bala tuai pengarap madahka kuasa iya datai ari bala melikat ti jai, lalu bala soldadu Rome ngelese, merinsa, sereta munuh iya. (Mrk. 3:​21, 22; 14:55; 15:​16-20, 35-37) Tang Jesus ngenatka semua utai ti enda lurus nya, lalu iya enda kala malas penyai sida. Nama ulih dipelajarka kitai ari teladan iya?

10. Nama digaga Jesus lebuh napi utai ti enda lurus? (1 Peter 2:​21-23)

¹⁰ Bacha 1 Peter 2:​21-23. b Jesus nunjukka teladan ti manah pasal utai ke ulih digaga kitai lebuh napi utai ti enda lurus. Iya nemu ni maya iya patut bejaku sereta ni maya iya patut diau diri. (Mat. 26:​62-64) Kekadang, lebuh orang nyebut utai ti bula pasal iya, iya enda nyaut sida. (Mat. 11:19) Tang lebuh iya bejaku, iya enda ngemaluka tauka ngugut bala penyakal iya. Jesus ulih nagang diri laban “iya nyerahka semua nya ngagai Hakim ti lurus.” Jesus nemu, runding Jehovah pasal situasi nya meh ke penting agi. Iya yakin, Jehovah deka mutarka semua utai ti enda lurus ba maya ti chun.

11. Nama sekeda chara kitai ulih ngawal jaku kitai? (Peda mega gambar.)

¹¹ Lebuh napi utai ti enda lurus, kitai ulih neladan Jesus lalu bejimat enggau utai ti disebut kitai. Kekadang, sekeda utai ti enda lurus ke ditapi kitai mit aja. Nyadi, kitai enda ibuh nyebut tauka ngereja nama-nama utai. Kitai engka milih diau diri, enggaika utai ke disebut kitai ngasuh penanggul nya nyadi besai agi. (P-jar. 3:7; Jas. 1:​19, 20) Ba maya bukai, kitai engka patut bejaku lebuh meda orang bukai diintu enggau enda lurus tauka lebuh  kitai patut ngetanka pengarap kitai. (SKR. 6:​1, 2) Enti kitai patut bejaku, kitai enggau naka ulih ngereja nya enggau nelap sereta basa.—1 Pet. 3:15. c

12. Baka ni kitai ulih nunjukka diri bepanggai ba “Hakim ti lurus”?

¹² Kitai mega ulih neladan Jesus lebuh kitai manggaika diri ngagai “Hakim ti lurus.” Lebuh kitai napi utai ti enda lurus, kitai pechaya Jehovah nemu utai ti amat nyadi. Lebuh kitai nemu Jehovah deka mutarka semua utai ti enda lurus, tu deka nulung kitai tan lebuh napi utai ke baka nya. Enti kitai bepanggai ba Jehovah lalu nganti Iya mutarka semua utai ti enda lurus, tu deka nulung kitai nyeliahka diri ari mengkang ringat tauka begedika orang bukai. Asai ati ke baka nya ulih ngasuh kitai ngereja utai ti enda manah, lenyau pengaga ati, sereta ngachau kaul kitai enggau Jehovah.—Mas. 37:8.

13. Nama ulih nulung kitai enggau sabar ngenatka utai ti enda lurus?

¹³ Endang amat, kitai enda ulih nitihka teladan Jesus enggau sempurna. Kekadang, kitai engka berasai besalah pengudah nyebut tauka ngereja utai ke enda patut. (Jas. 3:2) Lalu kekadang, utai ti enda lurus ke kala ditapi kitai agi ulih ngemediska kitai tauka ngasuh kitai tusah ati, seagi-agi kitai idup ba dunya ti jai tu. Enti tu situasi nuan, andal meh Jehovah nemu utai ti benung ditapi nuan. Jesus mega nemu asai ati nuan laban iya kala diintu enggau enda lurus. (Heb. 4:​15, 16) Kelimpah ari meri kitai teladan Jesus ti sempurna, Jehovah mega meri kitai jaku lalau dalam Bup Kudus ke ulih nulung kitai lebuh kitai diintu enggau enda lurus. Aram kitai beratika dua iti ayat ke ulih nulung kitai ari bup Rome.

“AWAKKA PETARA NGAYANKA PENGERINGAT IYA”

14. Nama reti “awakka Petara ngayanka pengeringat Iya”? (Rome 12:19)

¹⁴ Bacha Rome 12:19. Rasul Paul meransang orang Kristian: “Awakka Petara ngayanka pengeringat Iya ngagai penyai ke udah digaga.” Baka ni kitai ulih ngereja nya? Kitai ngawakka Jehovah nentuka kemaya sereta baka ni Iya deka mutarka utai ti enda lurus nya. Pengudah siku menyadi lelaki ke benama John diintu enggau enda lurus, iya madahka: “Aku patut ngawal pengeringat aku ngambika enda ngereja utai ti salah, tang nya enda senang. Rome 12:19 nulung aku sabar sereta arapka Jehovah.”

15. Nama kebuah nya manah nganti Jehovah mutarka utai ti enda lurus?

¹⁵ Kitai deka bulih mayuh penguntung enti kitai nganti Jehovah mutarka utai ti enda lurus. Kitai ulih nyeliahka asai stres sereta asa ati ke datai lebuh kitai nguji mutarka penanggul nya kediri empu. Jehovah madahka, Iya deka nulung kitai. Iya ngasuh kitai arapka Iya lalu Iya besemaya deka mutarka semua utai ti enda lurus. Enti kitai pechayaka semaya Jehovah ti deka ngukum orang ke ngereja utai ti enda lurus, kitai enda ibuh mengkang berasai ringat, laban kitai nemu Jehovah deka ngereja utai ti betul. Nya meh utai ti nulung John, ke dipadah tadi. Ku iya madahka: “Enti aku ulih nganti Jehovah mutarka penanggul aku, asil iya tentu jauh manah agi ari chara aku empu.”

“TERUS MEH NGALAHKA PENYAI NGENA PEMANAH”

16-17. Baka ni sampi nulung kitai ‘terus ngalahka penyai ngena pemanah’? (Rome 12:21)

¹⁶ Bacha Rome 12:21. Paul mega meransang orang Kristian: “Terus meh ngalahka penyai  ngena pemanah.” Dalam Jaku Ajar Jesus ba Atas Bukit, Jesus ngajar: “Anang ngetu rinduka munsuh kita, lalu besampika sida ke merinsaka kita.” (Mat. 5:44) Nya meh utai ti dikereja Jesus. Gambarka pemerinsa ke ditapi Jesus lebuh bala soldadu Rome mantang iya ba tiang perinsa. Jesus diintu enggau amat kejam, lalu iya patut tan ngenatka pemedis ti amat balat. Kitai tusah deka faham pemedis ke diasaika Jesus maya nya.

¹⁷ Taja pan Jesus balat merinsa, tang iya mengkang rindu sereta tetap ati ngagai Jehovah. Ari ke minta Jehovah ngukum bala soldadu nya, iya besampi: “Apai, ampun meh sida, laban sida enda nemu utai ke dikereja diri.” (Luk. 23:34) Lebuh kitai besampi minta Jehovah nulung sida ke ngintu kitai enggau enda lurus, tu deka nulung kitai berasai tenang agi sereta kurang agi ringat. Tu indah ulih ngubah runding kitai pasal sida.

18. Baka ni sampi nulung Alberto enggau John ngenatka utai ti enda lurus?

¹⁸ Sampi udah nulung dua iku menyadi lelaki ke dipadah tadi, tan ngenatka utai ti enda lurus. Alberto madahka: “Aku besampika bala menyadi ke ngintu aku enggau enda lurus. Aku mayuh kali minta Jehovah nulung aku badu agi ringat pasal utai ti udah nyadi ngagai aku.” Kitai gaga ati laban Alberto udah berengkah nyembah Jehovah baru. Ku John madahka: “Aku suah besampika menyadi nya, ke ngintu aku enggau enda lurus. Aku minta Jehovah nulung aku ngampunka iya. Lalu Jehovah nulung aku badu agi ringat sereta enda ngakim iya. Sampi ke baka tu mega nulung aku ngembuan pengelantang ba runding.”

19. Nama patut digaga kitai nyentuk ngagai pengujung dunya ti jai tu? (1 Peter 3:​8, 9)

¹⁹ Seagi-agi kitai idup ba dunya ti jai tu, kitai engka napi utai ti enda lurus. Tang enda ngira nama utai ke ditapi kitai, anang meh ngetu besampi minta tulung ari Jehovah. Pia mega, tunda meh utai ke digaga Jesus lebuh orang ngintu iya enggau enda lurus. Lalu terus meh nitihka jaku lalau dalam Bup Kudus. Enti kitai ngereja semua utai tu, kitai ulih yakin Jehovah deka merekatka kitai.—Bacha 1 Peter 3:​8, 9.