1-2. Nama “pengawa ti manah” ke dikereja tuai gempuru?

 ENTI nuan siku penulung gempuru, nuan engka udah bebendar ngemansangka mayuh sifat ngambika ulih layak nyadi tuai gempuru. Kati nuan deka ngereja “pengawa ti manah” ke digaga bala tuai gempuru?—1 Tim. 3:1.

² Nama pengawa ke digaga bala tuai gempuru? Bala tuai gempuru ransing ba pengawa nginjil, bebendar nyaga enggau ngajar bala menyadi, sereta negapka pengarap bala menyadi ngagai Jehovah nengah utai ti disebut tauka dikereja sida. Nya kebuah Bup Kudus nyemaka bala tuai gempuru ti bagas nya baka “pemeri.”—Eps. 4:8.

3. Baka ni menyadi lelaki ulih layak nyadi tuai gempuru? (1 Timoti 3:​1-7; Titus 1:​5-9)

³ Baka ni nuan ulih layak nyadi tuai gempuru? Nyadi tuai gempuru ukai semina bepanggai ba pengelandik ke dikembuan sesiku orang. Kesuah iya, enti nuan bisi pengelandik ke digiga siku tuke, nuan tau bulih kereja nya. Tang utai nya enda sama enti nuan deka nyadi tuai gempuru. Enti nuan deka nyadi tuai gempuru, enda chukup enti nuan semina landik ngajar tauka nginjil. Nuan mega patut nitihka syarat ke dipadah ba 1 Timoti 3:​1-7 enggau Titus 1:​5-9. (Bacha.) Artikel tu deka berandauka sekeda ari syarat ke dipadah dalam ayat nya. Kitai deka berandauka baka ni siku menyadi lelaki ulih ngembuan reputasi ti manah, nyadi tuai bilik ti manah, sereta gaga ati lebuh nulung bala menyadi ba raban gempuru.

NGEMBUAN REPUTASI TI MANAH

4. Baka ni menyadi lelaki tau ngembuan reputasi ti manah?

⁴ Ngambika layak nyadi tuai gempuru, nuan mesti “bisi pendiau ti manah ngambika orang nadai kebuah deka nyalahka [nuan].”  Reti iya, bala menyadi ba raban gempuru bisi runding ti manah pasal nuan laban ulah nuan ti manah. Lalu, orang nadai kebuah ti patut nuduh nuan ngereja utai ti salah. Kelimpah ari nya, nuan mega “patut bisi nama ti manah ba bala orang ke ukai ari raban gempuru.” Endang amat, orang ke enda nyembah Jehovah engka bejaika pengarap nuan. Tang sida enda patut kakang ati sekalika nuan orang ti jujur enggau manah. (Dan. 6:​4, 5) Nyadi, tanya diri empu: ‘Kati aku bisi reputasi ti manah enggau bala menyadi Kristian sereta sida ke enda nyembah Jehovah?’

5. Baka ni nuan ulih nunjukka diri “rinduka utai ti manah”?

⁵ Enti nuan “rinduka utai ti manah,” nuan deka beratika sifat manah ba orang bukai, lalu muji sida. Nuan mega gaga ati ngereja utai ti manah ke orang bukai, taja pan sida enda minta nuan ngereja nya. (1 Tes. 2:8) Nama kebuah sifat tu amat penting ke bala tuai gempuru? Laban bala tuai gempuru ngena mayuh awak nyaga bala menyadi Kristian sereta ngereja tanggungjawap ke bukai ba raban gempuru. (1 Pet. 5:​1-3) Taja pan tu reti iya bala tuai gempuru bisi mayuh pengawa, tang enti sida rinduka utai ti manah, sida deka gaga ati nulung orang bukai.—SKR. 20:35.

6. Nama reti “rindu ngelaluka orang”? (Hebrew 13:​2, 16; peda mega gambar.)

⁶ Nuan nunjukka diri “rindu ngelaluka orang” lebuh nuan ngereja utai ti manah ke orang bukai, nyengkaum sida ke ukai kaban rapat nuan. (1 Pet. 4:9) Siti kamus Bup Kudus madahka: “Lelaki ke rindu ngelaluka orang ngayanka pemanah indah ngagai orang ke enda dikelala iya, lalu iya enggau gaga ati mai sida ngagai rumah iya.” Nyadi, tanya diri empu: ‘Kati aku ngayanka pemanah ngagai bala temuai ba raban gempuru aku?’ (Bacha Hebrew 13:​2, 16.) Lelaki ke rindu ngelaluka orang ngayanka pemanah ngagai semua orang. Ambika chunto, ngagai sida ke miskin, pencheramah ari raban gempuru bukai, sereta sida ke bebendar gawa meransang bala menyadi Kristian, baka tuai ti ngabas.—P-kal. 18:​2-8; J-lam. 3:27; Luk. 14:​13, 14; SKR. 16:15; Rom. 12:13.

7. Baka ni tuai gempuru nunjukka iya “ukai orang ke rinduka duit”?

⁷ “Ukai orang ke rinduka duit.” Tu reti iya, nuan enda ngumbai duit tauka reta tengkira utai ti pemadu penting dalam pengidup nuan. Enda ngira nuan kaya tauka miskin, utai ti pemadu penting ba pengidup nuan nya, nyembah  Jehovah. (Mat. 6:33) Nuan ngena awak, pengering, sereta utai ke dikemisi nuan nyembah Jehovah, nyaga ruang bilik nuan, sereta nulung ba raban gempuru. (Mat. 6:24; 1 Jhn. 2:​15-17) Nyadi, tanya diri empu: ‘Nama runding aku pasal duit? Kati aku puas ati enggau utai ke diguna kena beridup? Tauka, kati aku seruran deka ngulihka mayuh agi duit sereta reta tengkira?’—1 Tim. 6:​6, 17-19.

8. Nama reti “ngereja semua utai enggau pengumbas iya” sereta “nemu nagang diri”?

⁸ Enti nuan “ngereja semua utai enggau pengumbas iya” sereta “nemu nagang diri,” tu reti iya nuan seimbang ba semua pekara dalam pengidup nuan. Ambika chunto, nuan enda udu makai tauka ngirup, chara nuan begari sereta gaya buk nuan enda kelalu, sereta nuan milih rekreasi ti manah. Nuan enda nunda chara pengidup ke dititihka orang ke enda nyembah Jehovah. (Luk. 21:34; Jas. 4:4) Nuan mega mengkang tenang taja pan orang jai enggau nuan. Nuan “ukai orang ke pemabuk,” tauka ngembuan reputasi sebagai orang ke udu ngirup. Nyadi, tanya diri empu: ‘Kati chara pengidup aku nunjukka aku ngereja semua utai enggau pengumbas iya sereta nemu nagang diri?’

9. Nama reti “nemu berunding enggau manah” sereta “teratur”?

⁹ Enti nuan “nemu berunding enggau manah,” nuan deka berunding pasal prinsip Bup Kudus lebuh bisi utai nyadi ba pengidup nuan. Nuan berunding enggau dalam pasal prinsip Bup Kudus ti ngena ba situasi nuan, lalu ketegal nya, nuan ulih faham agi pasal utai nya, lalu ngaga pemutus ti manah. Nuan enda berumban ngaga pemutus bepelasarka infomasi ti mimit aja. Tang, nuan deka nentuka nuan bisi semua fakta ke diguna nuan. (J-lam. 18:13) Asil iya, pemutus ke digaga nuan deka mandangka runding Jehovah. Enti nuan “teratur,” reti iya nuan ngereja utai enggau tersusun sereta nuan mega datai nitihka jam ke udah disemaya. Bala menyadi nemu nuan ulih dikearapka sereta seruran nitihka iring. Lebuh nuan ngemansangka utai ti dikerandauka ba anak tajuk tu, tu deka nulung nuan ngembuan reputasi ti manah. Diatu, aram berandauka syarat ke dipadah Bup Kudus ngambika nuan ulih netapka teladan ti manah sebagai tuai bilik.

NETAPKA TELADAN TI MANAH SEBAGAI TUAI BILIK

10. Baka ni menyadi lelaki ulih “ngintu ruang bilik iya enggau manah”?

¹⁰ Enti nuan siku laki lalu deka nyadi tuai gempuru, ruang bilik nuan mega patut bisi reputasi ti manah. Nyadi, nuan patut “ngintu ruang bilik [nuan] enggau manah.” Reti iya, nuan patut ngintu ruang bilik nuan enggau chara ti bepengerindu sereta ngaga pemutus ti manah ke ruang bilik nuan. Tu mega nyengkaum ngulu ba pengawa rohani baka belajarka Bup Kudus ba diri sebilik, datai begempuru, sereta ransing nginjil. Nama kebuah tu amat penting? Ku Rasul Paul: “Enti orang enda nemu ngintu ruang bilik diri, baka ni ku iya deka ngintu raban gempuru Petara?”—1 Tim. 3:5.

11-12. Baka ni ulah bala anak nentuka sekalika menyadi lelaki nya layak nyadi tuai gempuru tauka enda? (Peda mega gambar.)

¹¹ Enti nuan siku apai, bala anak nuan ke baruh umur 18 taun sereta agi diau enggau nuan mesti “ngasi sereta manah ulah.” Nuan patut ngajar sereta ngelatih sida enggau chara ti bepengerindu. Endang amat, nuan deka sida gaga ati, ketawa, sereta main baka anak ke bukai. Tang nuan mega patut ngajar sida ngasika nuan, bebasaka orang bukai, sereta manah ulah. Pia mega, nuan mesti bebendar nulung bala anak nuan ngembuan kaul sida empu enggau Jehovah, idup sejalai enggau prinsip Bup Kudus, sereta mansang nyentukka dibaptisa.

¹² “Bala anak iya patut sama arap lalu enda dituduh orang bisi pengidup ti enda menuku  tauka udu ngelaban.” Enti anak ke udah dibaptisa tauka benung mansang nyentukka dibaptisa ngereja penyalah ti besai, nama kesan nya ngagai apai iya? Enti menyadi lelaki nya enda ngelatih sereta disiplin anak iya, iya engka enda layak nyadi tuai gempuru.—Peda majalah Menara Jaga, 15 Oktober 1996, lamb. 21, gent. 6-7, dalam jaku Indonesia.

NULUNG BALA MENYADI BA RABAN GEMPURU

13. Baka ni nuan ulih nunjukka diri “masuk akal” sereta “enda bekeras enggau penemu diri”?

¹³ Bala menyadi lelaki ke ngembuan sifat Kristian ti manah amat berega ba raban gempuru. Orang ti “masuk akal” berusaha ngulihka kaul ti manah enggau orang bukai. Pia mega, orang ti masuk akal ningaka utai ke dipadah orang bukai sereta nguji meretika runding sida. Gambarka enti nuan udah nyadi tuai gempuru. Lebuh bala tuai gempuru baum, kati nuan deka nyukung pemutus ke digaga mayuh ari bala tuai gempuru nya enti pemutus nya enda ngelanggar prinsip Bup Kudus? “Enda bekeras enggau penemu diri” reti iya, nuan enda mejal orang ngereja utai nitihka chara ti dikedekaka nuan. Nuan nemu nya penting ningaka runding orang bukai. (P-kal. 13:​8, 9; J-lam. 15:22) Nuan mega “ukai orang ke rindu belaya” tauka “jampat ringat.” Tu reti iya, nuan bebasaka orang bukai sereta enda bekelikuh enggau sida. Nuan mega ngayanka pemanah ngagai sida. Nuan bebendar ngulihka kaul ti manah enggau orang bukai, taja pan ba situasi ti tusah. (Jas. 3:​17, 18) Lebuh nuan bejaku enggau nelap ngagai orang bukai, nyengkaum sida ke balat nyakal pengarap kitai, nya ulih ngasuh sida kurang agi ringat.—P-ulu. 8:​1-3; J-lam. 20:3; 25:15; Mat. 5:​23, 24.

14. Nama reti “ukai orang ke baru arap” sereta “tetap ati”?

¹⁴ Menyadi lelaki ke layak nyadi tuai gempuru nya “ukai orang ke baru arap.” Taja pan nuan enda ibuh dibaptisa pengelama betaun-taun sebedau nuan ulih nyadi tuai gempuru, tang nuan begunaka awak ngambika ulih nyadi orang  Kristian ti matang. Baka Jesus, nuan mesti baruh ati sereta sanggup ngereja sebarang utai ke Jehovah enda ngira nama pengawa ke diberi ngagai nuan. Nuan deka sabar sereta nganti Jehovah meri nuan mayuh agi pengawa ba raban gempuru. (Mat. 20:23; Plp. 2:​5-8) Nuan nunjukka diri “tetap ati” lebuh nuan mengkang setia ngagai Jehovah, idup nitihka standard pengelurus Iya, sereta nitihka sebarang iring ke diterima ari gerempung Iya.—1 Tim. 4:15.

15. Kati tuai gempuru mesti amat landik meri cheramah? Terangka.

¹⁵ Bup Kudus enggau terang madahka, bala tuai gempuru mesti “layak ngajar.” Kati tu reti iya, nuan mesti landik meri cheramah? Enda. Ukai semua tuai gempuru amat landik meri cheramah. Taja pia, lebuh sida nginjil sereta ngabas bala menyadi, bala tuai gempuru patut ulih ngena Bup Kudus enggau manah kena ngajar sereta meransang bala menyadi Kristian. (Banding 1 Korint 12:​28, 29 enggau Epesus 4:11.) Taja pan nuan enda ibuh nyadi pencheramah ti landik, tang nuan patut terus ngemansangka chara nuan ngajar. Baka ni nuan ulih ngereja nya?

16. Baka ni nuan ulih ngemansangka agi chara nuan ngajar? (Peda mega gambar.)

¹⁶ “Bepegai rat ba pesan ke tau dikearapka.” Ngambika ulih nyadi siku pengajar ti manah, tentuka utai ti disebut nuan lebuh nuan ngajar sereta meri jaku lalau ngagai bala menyadi Kristian nya seruran bepelasarka Bup Kudus. Kena ngereja tu, nuan patut belajarka Bup Kudus enggau litaricha kitai enggau manah. (J-lam. 15:28; 16:23) Maya nuan belajar, peratika baka ni litaricha kitai nerangka ayat Bup Kudus ngambika nuan ulih ngena nya ba pengidup. Lalu lebuh ngajar, uji meh nyapai ati bala peninga nuan. Nuan mega ulih ngajar enggau manah agi enti nuan minta sereta nitihka cadangan ari bala tuai gempuru ti bepeneleba. (1 Tim. 5:17) Bala tuai gempuru patut “ulih meransang” bala menyadi Kristian. Taja pia, bisi maya iya, bala tuai gempuru mesti meri jaku lalau tauka “ngerara” sida. Enda ngira nama situasi nya, tuai gempuru mesti ngereja nya enggau nelap. Enti nuan nelap, bepengerindu, sereta ngajar bepelasarka Jaku Petara, nuan ulih nyadi siku pengajar ti manah baka Jesus,  Pengajar ti Manah.—Mat. 11:​28-30; 2 Tim. 2:24.

TERUS NGAGA PEMANSANG

17. (a) Nama ulih nulung bala penulung gempuru terus ngaga pemansang? (b) Nama patut dikingatka bala tuai gempuru lebuh berandau sekalika siku menyadi lelaki ulih nyadi tuai gempuru? (Peda kutak “ Ayanka Pemaruh Ati lebuh Berandau pasal Kelayakan Menyadi Bukai.”)

¹⁷ Pengudah beratika syarat-syarat deka nyadi tuai gempuru, sekeda penulung gempuru engka ngasaika diri enda ulih nyadi tuai gempuru. Tang kingatka meh, Jehovah enggau gerempung Iya enda ngarapka nuan nyapai semua syarat tu enggau sempurna. (Jas. 3:2) Kingatka mega, kuasa kudus Jehovah meh ke deka nulung nuan nyapai syarat-syarat nya. (Plp. 2:13) Nyadi, kati bisi utai ke deka dikemansangka nuan? Besampi meh ngagai Jehovah pasal utai nya. Pansik pasal utai nya, lalu minta cadangan ari siku tuai gempuru pasal chara nuan ulih ngaga pemansang.

18. Semua penulung gempuru diperansang ngereja nama?

¹⁸ Arapka semua kitai, nyengkaum sida ke udah nyadi tuai gempuru, enda ngetu ngemansangka sifat-sifat ke dipadah dalam artikel tu. (Plp. 3:16) Enti nuan siku penulung gempuru, terus meh ngaga pemansang. Pinta Jehovah ngelatih nuan ngambika nuan ulih dikena enggau mayuh agi ba pengawa ke Iya sereta ke raban gempuru. (Isa. 64:8) Jehovah tentu deka merekatka usaha nuan ti deka layak nyadi tuai gempuru!