1. Nama kebuah kitai deka belajar ari orang ke tuai?

 SEMUA kitai begunaka jaku lalau ngambika ulih ngaga pemutus ti manah ba pengidup. Kitai ulih nanya penemu bala tuai gempuru sereta menyadi bukai ti matang. Enti sida jauh tuai agi ari kitai, kitai enggai terus ngumbai jaku lalau sida enda sesuai ba kitai. Jehovah deka kitai belajar ari sida ke tuai. Sida udah idup lama agi ari kitai, lalu bisi mayuh pengalaman ba pengidup. Ketegal nya, sida bepenemu-dalam agi.—Jop 12:​12, 13.

2. Nama deka dipelajarka kitai dalam artikel tu?

² Ba jeman Bup Kudus, Jehovah ngena orang ke tuai sereta tetap ati kena meransang sereta ngiring bala nembiak Iya. Ambika chunto, baka Moses, David, enggau Rasul John. Sida idup ba jeman ti bebida, lalu situasi ba pengidup sida mega enda sama. Ba pengujung pengidup sida, sida meri jaku lalau ti bepenemu-dalam ngagai bala ke biak agi. Tiap iku sida bejaku pasal kebuah nya penting ngasika Petara. Jehovah nyimpan utai ke dipadah sida dalam Bup Kudus ngambika kitai ulih belajar ari sida. Enda ngira kitai tuai tauka biak, semua kitai tau bulih penguntung lebuh kitai beratika jaku lalau sida. (Rom. 15:4; 2 Tim. 3:16) Dalam artikel tu, kitai deka berandauka jaku ti penudi ari tiga iku lelaki tu sereta utai ke ulih dipelajarka kitai ari jaku sida.

“IYA ULIH NGASUH KITA IDUP LAMA”

3. Nama sekeda pengawa ke dikereja Moses?

³ Moses bebendar gawa ke Jehovah enggau pengabis ati iya. Iya gawa nyadi siku nabi, hakim, ketuai soldadu, enggau penulis.  Moses belajar mayuh utai ari utai ke nyadi ba pengidup iya. Moses mai orang Israel, ke nyadi ulun ba Ejip, pansut ari menua nya lalu meda mayuh ari kereja ajih Jehovah. Jehovah ngena iya nulis lima iti bup ti keterubah dalam Bup Kudus, Masmur 90, sereta engka Masmur 91. Moses mega engka nulis bup Jop.

4. Moses meransang sapa, lalu nama kebuah?

⁴ Moses mati maya iya beumur 120 taun. Sebedau iya mati, iya ngangauka orang Israel kena ngingatka sida pasal utai ke udah dikereja Jehovah ke sida. Betaun-taun sebedau nya, sekeda ari orang Israel udah meda kereja ajih ke digaga Jehovah sereta chara Iya ngukum orang Ejip. (P-sut. 7:​3, 4) Sida udah meraka nengah Tasik Mirah ti tebelah sereta meda Jehovah munuh Firaun enggau raban soldadu iya. (P-sut. 14:​29-31) Lebuh sida ba menua puang, Jehovah ngelindung sereta nyaga sida. (U-dat. 8:​3, 4) Enda lama da agi, orang Israel deka tama ngagai Menua ti Udah Disemaya. Nyadi, sebedau Moses mati, iya deka meransang orang Israel. a

5. Baka ni jaku ti penudi ari Moses ba Ulang Adat 30:​19, 20 ngelantangka ati orang Israel?

⁵ Nama utai ke dipadah Moses? (Bacha Ulang Adat 30:​19, 20.) Iya ngingatka orang Israel, sida bisi harapan ti manah. Enggau berekat ari Jehovah, orang Israel ulih diau lama ba menua ti udah disemayaka Jehovah ngagai sida. Lalu menua nya endang amat manah sereta subur! Ku Moses ngambarka endur nya ngagai sida: “Mayuh kuta ti besai sereta manah, ke ukai digaga kita. Rumah ba dia penuh enggau utai ti manah ke ukai diulih kita kediri empu. Lalu bisi telaga ke ukai ditumbak kita, enggau kebun anggur sereta kebun pun kayu kana ti ukai ditanam kita.”—U-dat. 6:​10, 11.

6. Nama kebuah Petara nejuka menua bukai ngalahka orang Israel?

⁶ Moses mega meri orang Israel siti jaku tangkan. Enti sida deka terus diau ba menua nya, sida mesti ngasika pesan Jehovah. Moses meransang sida “milih pengidup,” iya nya mendingka Jehovah sereta “mengkang setia ngagai Iya.” Tang orang Israel enggai ngasika Jehovah. Nyadi, nyau kelama Petara nejuka orang Asiria, lalu udah nya orang Babilon, ngalahka orang Israel lalu mai sida nyadi orang tangkap.—2 Raj. 17:​6-8, 13, 14; 2 Ban. 36:​15-17, 20.

7. Nama ulih dipelajarka kitai ari jaku Moses? (Peda mega gambar.)

⁷ Nama ulih dipelajarka kitai? Enti kitai ngasika Jehovah, kitai ulih idup belama iya. Baka orang Israel ke nyauka tama ngagai Menua ti Udah Disemaya, kitai pan amat semak enggau dunya baru ke disemayaka Petara. Enda lama da agi, dunya tu deka nyadi Paradais baru. (Isa. 35:1; Luk. 23:43) Sitan enggau bala melikat iya ti jai deka nadai agi. (Pem. 20:​2, 3) Jalai pengarap ke ngajar pemula pasal Jehovah pan deka nadai agi. (Pem. 17:16) Nadai agi perintah mensia ke nekan bala rayat sida. (Pem. 19:​19, 20) Jehovah enda nejuka orang ke angkat ngelaban terus diau ba Paradais. (Mas. 37:​10, 11) Semua orang ke idup ba Paradais deka ngasika adat Jehovah. Ketegal nya, sida ulih idup dalam pemaik. Sida mega deka rindu sereta pechayaka pangan diri. (Isa. 11:9) Kitai enda sabar nganti semua utai tu nyadi! Lalu enti kitai ngasika Jehovah,  kitai ulih idup belama iya ba dunya Paradais.—Mas. 37:29; Jhn. 3:16.

8. Baka ni semaya pasal idup belama iya nulung siku menyadi lelaki? (Jude 20, 21)

⁸ Enti kitai seruran belematika semaya Petara pasal pengidup belama iya, nya deka nulung kitai ngasika Iya, enda ngira nama penguji ke ditapi kitai. (Bacha Jude 20, 21.) Semaya nya mega ulih meri kitai pengering kena ngelaban pengelemi diri. Peratika utai ke nyadi ngagai siku menyadi lelaki ke udah lama nyadi pengerintis seberai tasik ba Afrika. Iya madahka, iya suah belaban enggau pengelemi diri ke ulih ngujungka iya ngereja utai ti enda ngerinduka ati Jehovah. Ku iya madah: “Aku nyau sedar, enti aku enda ngasika Jehovah, aku enda ulih idup belama iya ba Paradais. Ketegal nya, aku keran agi deka belaban enggau pengelemi diri, lalu bebendar agi besampi ngagai Jehovah pasal pekara nya. Enggau tulung ari Jehovah, aku ulih mutarka pengelemi diri nya.”

“NUAN DEKA MUJUR”

9. Nama penanggul ke ditapi David ba pengidup iya?

⁹ David siku raja ke merintah nembiak Jehovah, lalu iya setia ngagai Petara. Iya mega siku pemusik, penulis syair, pahlawan, enggau nabi. Iya napi mayuh penanggul. Pengelama betaun-taun iya patut ngelalaika diri laban Raja Saul deka munuh iya. Pengudah David nyadi raja, iya sekali agi patut ngelalaika diri laban anak iya Absalom deka munuh iya lalu nyadi raja. Taja pan David napi penanggul tu sereta ngereja sekeda penyalah ti besai, tang iya mengkang setia ngagai Petara nyentukka iya mati. Jehovah madahka, David nya “siku lelaki ke ngagaka ati [Iya].” Nyadi, kitai patut mendingka jaku lalau ari David.—SKR. 13:22; 1 Raj. 15:5.

10. Nama kebuah David meri jaku lalau ngagai anak iya Solomon, ke deka nganti iya nyadi Raja?

¹⁰ Ambika chunto, peratika jaku lalau ke diberi David ngagai anak iya Solomon, ke deka nganti iya nyadi raja Israel. Jehovah udah milih Solomon nirika Rumah Sembiang alai orang ulih nyembah Jehovah. (1 Ban. 22:5) Solomon deka napi mayuh penanggul. Nama dipadah David ngagai iya? Aram kitai meda.

11. Nitihka 1 Raja 2:​2, 3, nama jaku lalau ke diberi David ngagai Solomon, lalu nama nyadi lebuh Solomon ngasika jaku lalau nya? (Peda mega gambar.)

¹¹ Nama dipadah David? (Bacha 1 Raja 2:​2, 3.) David madah ngagai Solomon, enti Solomon ngasika Jehovah, iya deka mujur ba pengidup iya. Lalu pengelama betaun-taun, Jehovah nulung Solomon sereta meri iya mayuh utai ti manah. (1 Ban. 29:​23-25) Solomon nirika Rumah Sembiang ti chukup manah, nulis sekeda bup dalam Bup Kudus, lalu sekeda ari jaku iya bisi dalam begian bukai dalam Bup Kudus. Iya nyadi tebilang ketegal penemu-dalam  sereta pengaya iya. (1 Raj. 4:34) Tang baka ke dipadah David, Solomon semina deka mujur seagi-agi iya ngasika Petara Jehovah. Sayau amat, lebuh Solomon udah tuai, iya berengkah nyembah petara bukai. Jehovah enda rinduka utai ke digaga Solomon. Ketegal nya, Jehovah badu agi meri Solomon penemu-dalam kena merintah bala rayat iya enggau chara ti manah sereta adil.—1 Raj. 11:​9, 10; 12:4.

12. Nama ulih dipelajarka kitai ari utai ti dipadah David?

¹² Nama ulih dipelajarka kitai? Lebuh kitai ngasika Jehovah, Iya deka merekat sereta nulung kitai. (Mas. 1:​1-3) Endang amat, Jehovah enda besemaya deka ngasuh kitai nyadi kaya tauka tebilang baka Solomon. Tang enti kitai ngasika Jehovah, Iya deka ngiring kitai sereta meri kitai penemu-dalam ngambika ulih ngaga pemutus ti manah. (J-lam. 2:​6, 7; Jas. 1:5) Jaku lalau ari Jehovah ulih nulung kitai lebuh kitai ngaga pemutus pasal kereja, sekula, duit, sereta pemerindang. Enti kitai nitihka jaku lalau Iya, kitai deka nyaga kaul kitai enggau Iya sereta bulih pengidup ti meruan belama iya. (J-lam. 2:​10, 11) Kitai mega deka bisi bala kaban ti manah, lalu diri sebilik kitai deka gaga ati.

13. Nama nulung Carmen mujur ba pengidup iya?

¹³ Carmen, ke diau ba Mozambique, ngumbai pelajar tinggi deka nulung iya mujur ba pengidup. Nyadi, iya tama ngagai universiti. Ku iya madah: “Aku rindu enggau utai ke dipelajarka aku. Tang nya ngena mayuh awak enggau pengering aku. Aku ba universiti ari 7:30 pagi nyentuk ngagai 6:00 lemai. Ketegal nya, aku tusah deka datai gempuru, lalu kaul aku enggau Jehovah mega majak lemi. Aku sedar aku benung nyadi ulun dua iku tuan.” (Mat. 6:24) Iya besampi pasal situasi iya lalu ngaga pansik ngena litaricha kitai. Ku Carmen nampung baru: “Pengudah aku nerima nasihat ari bala tuai gempuru enggau indai aku, aku mutuska badu agi belajar ba universiti lalu gawa penuh jam ke Jehovah. Aku ngasaika, aku udah ngaga pemutus ti pemadu manah lalu aku amat gaga ati.”

14. Nama pesan ti penting ke deka dipadah Moses enggau David?

¹⁴ Moses enggau David rinduka Jehovah, lalu seduai iya nemu kebuah nya penting  ngasika iring Iya. Ba jaku seduai iya ti penudi, seduai iya meransang orang bukai neladan seduai iya, sereta mengkang tetap ati ngagai Jehovah. Seduai iya mega nangkan orang bukai, enti sida enda mengkang setia ngagai Jehovah, sida enda ulih agi nyadi kaban Jehovah lalu enda ulih nerima berekat ari Iya. Jaku lalau ari seduai iya mega penting ke kitai kemayaharitu. Beratus taun pengudah nya, siku agi nembiak Jehovah madahka kebuah nya penting kitai mengkang tetap ati ngagai Petara.

“NADAI UTAI KE BALAT NGAGAKA ATI”

15. Padahka sekeda utai ke nyadi ba pengidup Rasul John.

¹⁵ John siku kaban rapat sereta rasul Jesus Kristus. (Mat. 10:2; Jhn. 19:26) Iya ngena mayuh awak begulai nginjil enggau Jesus, lalu meda Jesus ngereja kereja ajih. Iya enda ninggalka Jesus, indah ba maya ti tusah. Iya meda Jesus diukum bunuh, lalu meda Jesus pengudah iya diangkatka idup baru. Iya mega meda raban gempuru Kristian ba abad keterubah majak nambah. Ba pengidup iya, John sempat meda Berita Manah “ditusui ngagai semua utai ke udah ditempa ba baruh langit.”—Kol. 1:23.

16. Sapa bulih penguntung ari surat ke ditulis John?

¹⁶ Lebuh John udah amat tuai, iya diberi basa nulis siti bup ti ngagitka ati, iya nya bup Pemandang. (Pem. 1:1) John mega nulis siti ari bup Injil sereta nulis tiga iti surat, ke diatu dikumbai Satu, Dua, enggau Tiga John. Surat ti ketiga nya ditujuka ngagai siku menyadi ti tetap ati ke benama Gaius, ke dikumbai John baka anak iya empu. (3 Jhn. 1) Maya nya, tentu bisi mayuh bala menyadi ke dikumbai John baka anak iya empu. Utai ke ditulis lelaki ti tuai sereta tetap ati tu udah meransang semua murid Jesus nyentukka kemayaharitu.

17. Nitihka 3 John 4, nama utai ti balat ngagaka ati?

¹⁷ Nama utai ke ditulis John? (Bacha 3 John 4.) Dalam surat iya ti ketiga, John madahka iya amat gaga ati lebuh meda bala menyadi ngasika Petara. Maya nya, sekeda orang ngerembaika ajar ti pelesu sereta ngachau penyerakup dalam raban gempuru. Taja pia, ke bukai terus “bejalai dalam pemendar.” Sida ngasika Jehovah sereta “bejalai nitihka semua pesan Iya.” (2 Jhn. 4, 6) Menyadi Kristian ti tetap ati tu ukai aja ngagaka ati John, tang mega ngagaka ati Jehovah.—J-lam. 27:11.

18. Nama ulih dipelajarka kitai ari jaku John?

 ¹⁸ Nama ulih dipelajarka kitai? Enti kitai mengkang tetap ati ngagai Jehovah, kitai deka gaga ati lalu kitai mega deka ngasuh orang bukai gaga ati. (1 Jhn. 5:3) Ambika chunto, kitai gaga ati laban kitai udah ngasuh Jehovah gaga ati. Iya lantang ati lebuh kitai ngelaban penguji sereta ngasika jaku Iya. (J-lam. 23:15) Bala melikat ba serega mega gaga ati. (Luk. 15:10) Kitai mega gaga ati lebuh kitai meda bala menyadi mengkang tetap ati, taja pan sida diperinsa tauka diuji ngereja utai ti salah. (2 Tes. 1:4) Lalu lebuh dunya Sitan ti jai tu dirusakka, kitai deka gaga ati laban kitai udah setia ngagai Jehovah.

19. Nama utai ke dipadah Rachel pasal ngajar pemendar ngagai orang bukai? (Peda mega gambar.)

¹⁹ Kitai kelebih agi gaga ati lebuh ngajar orang bukai pasal Jehovah. Rachel, ke diau ba Republik Dominika, ngasaika nya siti basa ti besai lebuh ngajar orang bukai pasal Petara Jehovah. Iya udah nulung sekeda orang berengkah nyembah Jehovah. Ku iya madah: “Aku tusah deka ngambarka pengaga ati aku lebuh aku meda pemelajar aku majak rinduka Jehovah, arapka Iya, sereta ngubah pengidup sida kena ngagaka ati Iya. Pengaga ati nya jauh besai agi ari sebarang usaha sereta pengorbanan ke digaga aku lebuh ngajar sida.”

BULIH PENGUNTUNG ARI JAKU TI PENUDI BALA LELAKI TI TETAP ATI

20. Nama utai ti sama entara kitai enggau Moses, David, sereta John?

²⁰ Moses, David, enggau John idup ba jeman ti bebida ari kitai. Situasi sida mega enda sama enggau kitai. Taja pia, bisi mayuh utai ti sama entara kitai enggau sida. Baka sida, kitai nyembah Petara ti bendar, kitai besampi ngagai Jehovah, bepanggai ba Iya, sereta ngiga iring ari Iya. Lalu baka sida, kitai andal, Jehovah deka merekatka orang ke ngasika Iya.

21. Baka ni Jehovah deka merekatka kitai enti kitai nitihka nasihat ari Moses, David, enggau John, lalu ngasika Jehovah?

²¹ Aram meh kitai nitihka nasihat ari Moses, David, enggau John, lalu ngasika pesan Jehovah. Lebuh kitai ngasika Jehovah, Iya deka merekatka kitai sereta nulung kitai. Kitai ulih idup belama iya. (U-dat. 30:20) Lalu kitai deka bulih pengaga ati laban udah ngelantangka ati Apai kitai ti ba serega, lalu Iya deka ngupah kitai enggau chara ti ngalitka ati.—Eps. 3:20.