Paul: Kami amat gagit ati! Maya nya November 1985. Kami benung terebai ngagai Liberia, Afrika Barat, alai kami deka berengkah nyadi pengerintis seberai tasik. Bilun kami sangkai ba Senegal. Anne madahka: “Sejam da agi tua deka datai ba Liberia!” Tang udah nya, kami ninga siti jaku gerah ke madahka: “Bala penumpang ke nuju ngagai Liberia mesti nurun ari bilun tu. Sekeda orang benung angkat ngelaban perintah ba din. Nyadi kitai enda ulih terebai ngagai Liberia.” Pengelama 10 hari pengudah nya, kami diau enggau bala pengerintis ke dianjung ngagai menua Senegal. Maya nya, kami ninga berita ke madahka amat mayuh orang dibunuh ba Liberia, lalu piak perintah enda ngemendarka sapa-sapa pansut ari rumah sida maya lemai hari. Enti sida ngelanggar atur tu, piak perintah deka munuh sida tekala nya.

Anne: Kami duai orang ti amat bejimat. Orang indah meri aku nama kangau lebuh aku agi mit laban aku suah berasai takut. Indah ngelayang jalai pan, aku takut! Taja pia, kami duai keran deka ngagai Liberia taja pan tu engka bahaya.

Paul: Aku enggau Anne besai ba endur ti sama, iya nya ba begian barat England. Apai indai aku enggau indai Anne seruran meransang kami ngerintis. Nyadi, kami duai pan berengkah ngerintis pengudah abis sekula. Sida amat gaga ati laban kami duai deka ngena pengidup kami gawa penuh jam ke Jehovah. Maya aku beumur 19 taun, aku dikangau ngagai Bethel, lalu Anne enggau aku ba Bethel pengudah kami kawin ba 1982.

Anne: Kami rindu gawa ba Bethel. Tang kenyau ari suba kami bisi pengingin deka nulung ba menua ke begunaka mayuh agi penginjil. Ba Bethel, kami gawa enggau bala menyadi ke kala nyadi pengerintis ke dianjung ngagai menua bukai. Teladan sida sereta pengalaman sida ngasuh kami keran agi nyapai pengingin nya. Nyadi, tiap malam pengelama tiga taun, kami besampi ngagai Jehovah pasal pengingin tu. Kami amat gaga ati lebuh dikangau ngagai Sekula Gilead kelas ke-79 ba taun 1985. Kami dianjung ngagai Liberia, Afrika Barat.

Paul: Kami nepan bilun ti keterubah ngagai Liberia. Orang ba Liberia amat takut, lalu sida agi enda dikemendarka ninggalka rumah sida maya lemai hari. Sida amat takut nyentukka bunyi ti besai ari kerita pan tau ngasuh sida nyerauh lalu rari. Ngambika ulih mengkang tenang, kami macha begian ari Masmur ninting malam. Taja pan situasi ba menua nya tusah, tang kami rinduka pengawa kami. Ninting hari Anne nurun nginjil,  lalu aku gawa begulai enggau John Charuk a ba Bethel. Aku belajar mayuh utai ari iya laban iya udah lama diau ba Liberia. Iya amat nemu cabaran enggau situasi bala menyadi din.

Anne: Nama kebuah kami amat jampat rinduka pengawa kami ba Liberia? Nya ketegal bala menyadi udah ngayanka pengerindu ti besai ngagai kami, lalu sida mega tetap ati ngagai Jehovah. Kami nyadi kaban rapat lalu sida pan nyadi baka ruang bilik kami ti baru. Sida meri kami mayuh nasihat sereta meransang kami. Pengawa nginjil din mega amat manah! Orang ke bempu rumah enda rindu enti kami beguai mupuk ari rumah sida. Orang berandau pasal Bup Kudus ba dini-dini endur. Kami pan senang enggau randau sida. Kami bisi kelalu mayuh pemelajar Bup Kudus nyentukka kami nadai chukup awak belajar enggau semua sida. Tu endur nginjil ti amat manah!

Paul: Pengelama empat taun, situasi ba menua nya baka ke bisi pemaik. Tang ba taun 1989, semua utai berubah. Bisi perang nyadi dalam menua nya. Kena 2 Julai 1990, orang ke angkat ngelaban perintah nguasa endur semak Bethel. Pengelama tiga bulan, kami enda ulih bejaku enggau sapa-sapa ba menua bukai, nyengkaum diri sebilik kami sereta bala menyadi ba indu opis. Utai ti ganas enggau penyarut nyadi ba semua endur. Bisi penyuntuk ba pemakai, lalu mayuh indu mega dirugul. Situasi ti ngenusahka ati tu terus nyadi pengelama 14 taun ba serata menua nya.

Anne: Sekeda raban bansa belaban sereta munuh pangan diri. Ba serata endur, bisi orang ke angkat ngelaban. Sida bisi mayuh senyata, lalu chara sida begari amat nyelai! Sida nyerungkai tiap buah rumah lalu ngambi sebarang utai ti dikedekaka sida. Ba sekeda ari sida, munuh orang nya sama baka “munuh manuk.” Sida nutup jalai kena ngawal orang, lalu kesuah iya sida munuh orang ke deka mansa endur nya. Pengudah nya, sida nugungka semua bangkai nya. Utai tu mega nyadi semak Bethel. Sekeda ari bala menyadi kitai mega dibunuh, nyengkaum dua iku pengerintis ke dianjung ngagai menua tu.

Tiap kali orang ke angkat ngelaban tetemuka orang ari bansa ti dipegedika sida, sida deka munuh orang nya! Bala menyadi kitai berambunka nyawa kena ngelalai sereta nyelamatka bala menyadi kitai ke ari bansa nya. Bala pengerintis ke dianjung ngagai menua tu sereta bala menyadi ba Bethel mega ngereja utai ti sama. Ba Bethel, sekeda bala menyadi ke patut ngerarika diri tinduk ba tingkat baruh, lalu ke bukai enggau kami ba bilik kami ba atas. Kami bekunsika bilik kami enggau siti ruang bilik ke bisi tujuh iku orang.

 Paul: Tiap hari, orang ke angkat ngelaban nya nguji tama ngagai Bethel kena meda sekalika kami bisi ngelalaika orang tauka enda. Tiap kali utai tu nyadi, dua iku ari kami pansut ngagai luar pagar Bethel kena bejaku enggau sida, lalu dua iku da agi beratika semua utai ke benung nyadi ari jenila. Enti jari dua iku menyadi ke benung berandau nya ba depan, reti iya nadai utai ti bahaya ke deka nyadi. Tang enti jari seduai iya ba belakang, reti iya orang ke angkat ngelaban nya besikap kasar. Nyadi, dua iku menyadi ke meda ari jenila nya patut jejampat ngelalaika bala menyadi kitai.

Anne: Bisi sekali, bala menyadi lelaki enda ulih nagang seraban orang ke angkat ngelaban ari tama ngagai rumah kami. Aku enggau siku menyadi indu tama ngagai bilik mandi, lalu ngunchi pintu. Ba bilik mandi nya, bisi siti perabot ke bisi alai belalai ba baruh. Menyadi indu nya tama ngagai endur ti mit nya kena ngelalaika diri. Maya nya, orang ke angkat ngelaban nya udah niki ke atas, bebaika senyata. Sida malu pintu kami enggau kuat. Paul nguji nagang sida ari tama. Iya madah: “Bini aku benung ngena bilik mandi.” Lebuh aku nutup endur alai menyadi nya belalai, tu ngasuh bunyi inggar nyadi. Udah nya, aku patut ngena awak nusun baru semua utai ba rak nya. Aku nemu, sida tentu berunding nama utai ke benung digaga aku. Ketegal nya, aku nyadi amat takut nyentukka semua tubuh aku getar-getar. Aku nemu, aku patut tenang sebedau muka pintu nya. Nyadi, nama digaga aku? Aku besampi dalam ati minta tulung ari Jehovah. Udah nya, aku muka pintu nya, lalu ulih nabi sida enggau tenang. Siku ari sida nulak aku ke tisi, lalu terus ngagai perabot nya, muka iya, lalu nyerungkai semua barang ba atas rak nya. Iya tekenyit laban iya enda ulih tetemuka nama-nama utai. Udah nya, sida mega ngiga ba bilik ke bukai sereta endur ba baruh perabung. Tang sama mega, sida nadai tetemuka nama-nama utai.

Paul: Bebulan-bulan, kami suntuk pemakai. Kesuah iya, kami nadai pemakai maya makai pagi. Tang program sembah pagi ba Bethel nya baka makai pagi kami. Semua kami nemu, macha sereta belajarka Bup Kudus deka meri kami pengering tan ninting hari.

Kami nemu, enti kami pansut ngiga pemakai tauka ai, kami enda ulih nyaga bala menyadi ke benung belalai, lalu sida engka dibunuh. Kesuah iya, Jehovah nyediaka utai ke diguna kami ba maya ti chun, lalu enggau chara ti ngalitka ati. Jehovah nyaga kami lalu nulung kami mengkang tenang.

Taja pan situasi ba menua nya majak charut, lalu baka ke nadai harapan, tang pemendar meri semua kami pengering. Mayuh ari bala menyadi patut ngerarika diri mayuh kali kena nyelamatka nyawa sida. Tang sida nentuka pengarap sida mengkang tegap, lalu sida mega mengkang tenang taja pan napi semua penusah tu. Sekeda ari sida madahka, penusah ke ditapi sida tu baka “latihan ke Penusah ti Besai.” Bala tuai gempuru enggau bala menyadi lelaki ti biak enggau berani ngereja semua utai ke ulih sida kena nulung bala menyadi. Bala menyadi ke ngerarika diri ngagai endur bukai nulung pangan diri, lalu sida mega berengkah nginjil ba endur ke digagai sida. Sida ngena nama-nama utai ke ditemu sida dalam utan kena ngaga Palan Gempuru, lalu begempuru. Ba maya ti tusah nya, datai begempuru sereta nginjil ngagai orang bukai meri bala menyadi harapan sereta meransang sida. Lebuh kami nyadung  pemakai, gari, enggau utai bukai, mayuh ari bala menyadi minta beg nginjil ari ke minta gari. Nya amat meransang kami. Mayuh orang ke udah meda sereta napi mayuh penusah ketegal perang nya deka ningaka Berita Manah. Sida alit ati lebuh meda bala Saksi amat gaga ati sereta bisi runding ti positif taja pan napi utai ti tusah. Bala menyadi kitai baka penampak ke manchar dalam pemetang. (Mat. 5:​14-16) Ketegal bala menyadi kitai amat ransing, indah sekeda ari orang ke angkat ngelaban nya nyadi menyadi kitai.

Paul: Kekadang, kami patut ninggalka Liberia. Tiga kali kami patut ninggalka menua nya enda lama, lalu dua kali kami patut ninggalka menua nya pengelama setaun. Siku menyadi indu ke nyadi pengerintis seberai tasik nerangka asai ati kami lebuh kami patut ninggalka menua nya: “Ba Gilead, sida ngajar kami rinduka bala menyadi ba endur kami dianjung enggau pengabis ati. Lalu nya meh utai ke dikereja kami. Nyadi, lebuh kami patut ninggalka bala menyadi kami ba situasi ti tusah tu, nya balat ngenusahka ati kami!” Tang kami gaga ati laban kami agi ulih nulung bala menyadi sereta nyukung pengawa nginjil ba Liberia ari menua ke semak dia.

Anne: Ba Mei 1996, empat iku kami mupuk ngena kerita ke diempu pampang opis. Kami mai mayuh dokumen ti penting pasal pengawa ba Liberia. Kami deka deriba ngagai endur ti selamat agi ba bandar nya, iya nya kira-kira 16 kilometer penyauh iya. Enda memukai, endur kami diserang. Orang ke angkat ngelaban nya nimbak ke udara, ngetuka kerita kami, lalu narit tiga iku ari kami pansut. Udah nya, sida mai kerita nya, tang Paul agi bisi dalam dia. Kami balat tekenyit! Pengudah nya, kami meda Paul bejalai mansang ngagai kami. Pala iya bedarah. Terubah iya, kami ngumbai iya udah kena timbak. Tang udah nya, kami sedar, enti iya udah kena timbak, iya tentu enda ulih bejalai. Siku ari sida ke dalam kerita nya malu iya, lalu nulak iya pansut ari kerita. Baik ga, telih iya enda besai.

Ba dia, bisi siti lori soldadu ke penuh enggau orang ti takut sereta benung sedia deka mupuk. Terubah iya, kami deka tama dalam lori nya, tang lori nya udah penuh. Nyadi, kami semina bepaut ba lori nya ari luar aja. Tang nadai entu bisi utai ke ulih dipegai kami. Orang ke mai lori nya pan deriba enggau laju nyentukka kami nyauka labuh. Kami nyerauh minta iya ngetu, tang iya kelalu takut deka ngereja nya. Baik ga, kami mujur datai ngagai destinasi kami. Tang kami amat lelak ketegal bebendar bepaut ba lori nya, lalu tubuh kami mega getar-getar ketegal takut.

Paul: Gari kami kamah sereta charik. Kami meda pangan diri lalu enda ulih pechaya, kami agi idup. Ba semak kami dia, bisi siti helikopter ke bisi mayuh lubang ketegal peluru, lalu baka ke ulih runtuh barang maya. Tang nya meh ke deka mai kami ngagai Sierra Leone ba hari siti. Nyadi, kami pan tinduk dia. Pengudah kami datai ba Sierra Leone, kami besyukur laban kami agi idup. Taja pia, kami agi irauka bala menyadi kami ba Liberia.

Anne: Kami selamat datai ba Bethel di Freetown, Sierra Leone. Ba dia, bala menyadi nyaga kami enggau manah. Tang udah nya, bisi utai ke enda dijangka nyadi. Aku seruran tekenangka utai ti jai ke nyadi ba Liberia. Ninting hari, aku berasai amat takut enggaika utai ti enda manah nyadi. Lalu nya ngasuh aku enda ulih berunding enggau manah. Utai ke ngelingi aku baka ke enda amat. Maya malam, aku suah tedani lalu getar-getar takut laban ngumbai utai ti enda manah deka nyadi. Maya nya aku tusah deka enseput. Paul merap aku lalu besampi enggau aku. Kami belaguka lagu Perintah Petara nyentukka aku badu agi getar-getar. Aku ngasaika diri baka ke ka gila, lalu enda ulih agi nyadi pengerintis seberai tasik.

Aku seruran ingatka utai ti nyadi pengudah nya. Minggu nya kami nerima dua iti majalah. Siti nya majalah Sedarlah! 8 Jun 1996. Majalah nya ngundan artikel ke betajuk “Menghadapi Serangan Panik.” Diatu aku nemu nama kebuah aku seruran getar-getar sereta amat takut. Majalah kedua nya majalah Menara Jaga 15 Mei 1996. Dalam majalah nya bisi siti artikel ke betajuk, “Dari Manakah Mereka Mendapat Kekuatan?” Majalah nya bisi siti gambar pasal siku kebembang ke udah jai sayap. Artikel nya mandingka kitai enggau siku kebembang ke agi ulih terebai taja pan sayap iya balat rusak. Taja pan kitai berasai lemi ketegal utai ti enda manah ke nyadi dalam pengidup kitai, tang Jehovah agi ulih ngena kitai terus nulung orang bukai. Dua iti artikel tu endang utai ke diguna aku maya nya. (Mat. 24:45) Aku ngiga mayuh agi artikel ke baka tu lalu nyimpan nya dalam siti pail. Artikel ke baka tu mayuh nulung aku. Nyau kelama, aku enda agi kelalu balat merinsa ketegal pengingat ti jai ke udah nyadi.

Paul: Kami amat gaga ati tiap kali kami pulai ngagai Liberia. Nyentuk ngagai ujung taun 2004, kami udah ba Liberia nyauka 20 taun. Perang udah abis. Bisi pelan nirika bengunan ba pampang opis. Tang enda memukai, kami diberi pengawa ti baru.

Tu amat tusah ke kami. Kami amat sayauka bala menyadi kami ba Liberia. Sida baka ruang bilik kami, lalu kami enggai ninggalka sida. Tang kami udah meda baka ni Jehovah merekatka kami lebuh kami ninggalka ruang bilik kami empu ngambika ulih ngagai Gilead. Nyadi, kami pan nerima pengawa ti baru nya. Kami dianjung ngagai Ghana, siti menua ti semak dia.

Anne: Kami bendar nyabak lebuh kami ninggalka Liberia. Frank, siku menyadi lelaki ke tuai sereta bepenemu-dalam, nyebut utai ti balat ngenyitka ati kami: “Seduai anang agi ngenang pasal kami.” Ku iya nerangka: “Kami nemu seduai deka seruran ingatka kami, tang seduai patut rinduka bala menyadi ba Ghana enggau pengabis ati seduai. Pengawa seduai datai ari Jehovah. Nyadi, jaga meh bala menyadi din enggau manah.” Utai ke dipadah iya nulung kami besedia ngiga kaban ti baru ba endur alai mimit aja menyadi nemu kami sereta alai semua utai baru magang ba kami.

Paul: Tang kami enggau jampat rinduka bala menyadi ba Ghana. Ba din bisi mayuh bala Saksi. Kami belajar mayuh utai ari penetap ati sereta pengarap sida ti tegap. Pengudah nulung ba Ghana pengelama 13 taun, kami nerima siti agi pengawa ti baru, iya nya ba pampang opis Afrika Timur, di Kenya. Taja pan kami balat lelengauka bala menyadi ba Ghana sereta ba Liberia, tang kami enggau jampat bekaban enggau bala menyadi ba Kenya. Lalu, baka ba Ghana enggau ba Liberia, ba Kenya mega bisi mayuh pengawa ke patut digaga.

Anne: Aku udah napi mayuh situasi ti amat tusah, lalu kekadang aku berasai amat takut. Lebuh kami diau ba endur ti bahaya sereta napi situasi ti balat ngenakutka, nya mai kesan ngagai tubuh sereta emosi kami. Kami enda ngarapka Jehovah ngaga kereja ajih kena ngelindung kami ari semua utai tu. Indah diatu, enti aku ninga bunyi orang betimbak, aku asai ka mutah, lalu jari aku kebas. Tang aku udah belajar bepanggai ba tulung ke diberi Jehovah kena ngeringka kitai, baka nengah bala menyadi Kristian. Lalu enti kitai terus belajarka Bup Kudus, besampi, begempuru, sereta nginjil, Jehovah deka nulung kitai terus ba pengawa ke diberi Iya.

Paul: Sekeda engka nanya: “Kati nuan rinduka pengawa nuan?” Taja pan semua menua cantik, tang situasi ba menua ulih berubah nyadi enda stabil sereta bahaya. Nyadi, nama utai ke ngerinduka ati kami lebih agi ari menua nya? Iya nya bala menyadi kitai ti amat berega. Taja pan kitai bisi latar belakang ti enda sama, tang runding enggau asai ati kitai pasal Jehovah sama. Kami ngumbai kami dianjung kena meransang sida, tang kebendar iya, sida ke udah meransang kami.

Menyadi Kristian kitai ba serata dunya siti kereja ajih ari Jehovah. Tiap kali kami pindah kami bisi ruang bilik. Seagi-agi kitai sebagi ari raban gempuru, kitai bisi ruang bilik sereta endur alai kitai ulih berasai selamat. Kami andal, enti kami enda ngetu bepanggai ba Jehovah, Iya deka meri kami pengering ngambika ulih tan napi sebarang utai.—Plp. 4:13.