KATI nuan tusah deka belajarka Bup Kudus kediri empu ninting minggu? Kati nuan kekadang ngasaika pengawa nya boring? Engka semua kitai kala ngasaika nya. Tang perundingka utai bukai ke dikereja nuan enggau tetap, baka mandi. Lebuh kitai mandi, nya begunaka awak enggau usaha. Tang pengudah nya, kitai berasai nyamai agi. Baka nya mega, pengudah kitai belajarka Bup Kudus, kitai berasai nyamai agi. (Eps. 5:26) Peratika sekeda cadangan ke ulih nulung kitai belajarka Bup Kudus enggau tetap:

• Gaga jadual. Belajarka Bup Kudus kediri empu nya siti ari “utai ke beguna agi” ke enda patut dilengkaka orang Kristian. (Plp. 1:10) Ngambika nuan ingat maya nuan patut belajar, nuan ulih nuliska hari enggau jam nya ba siti keretas. Udah nya, nuan ulih ngelekatka keretas nya ba endur ke senang dipeda nuan. Tauka nuan ulih netapka alarm ba talipun nuan ngambika ulih ngingatka nuan jam belajar.

• Tetapka pengelama jam belajar ke sesuai enggau nuan. Bisi orang ulih fokus belajar pengelama sejam. Lalu bisi sekeda rindu agi belajar ba timpuh ti pandak tang suah agi. Baka ni enggau nuan? Semina nuan aja ke nemu ni bagi ke sesuai enggau nuan. Nyadi, tetapka meh pengelama jam belajar ke sesuai enggau nuan. Baka ni enti nuan berasai lembau ba maya nuan patut belajar? Uji meh belajar pengelama 10 minit aja. Taja pan nuan belajar enda lama, tang nya manah agi ari ke enda belajar langsung. Engka pengudah 10 minit nya, nuan deka terus belajar laban nuan rindu enggau utai ke dipelajar nuan.—Plp. 2:13.

• Pilih topik sebedau nuan belajar. Bup Kudus meransang kitai: “Kena meh awak kita enggau manah.” (Eps. 5:16) Baka ni nuan ulih ngereja nya? Nuan ulih milih topik ke deka dipelajar nuan sebedau nuan belajar. Uji nuliska sekeda utai ke deka dipelajarka nuan ba siti lis. Ambika chunto, enti nuan bisi tanya pasal sekeda utai ke enda entu dimeretika nuan, tulis tanya nya ba lis ke udah digaga nuan. Lalu pengudah nuan abis belajar, nuan ulih nambahka topik ke bukai ke deka dipelajarka nuan ba lis nya.

• Sedia ngaga ubah. Utai ti pemadu penting nya nuan belajar ninting minggu. Ngambika nuan ulih ngereja nya, nuan engka patut ngubah hari tauka jam nuan belajar, pengelama nuan belajar, tauka topik ke deka dipelajarka nuan.

Enti nuan belajar ninting minggu, nuan deka bulih penguntung. Kaul nuan enggau Jehovah deka majak rapat. Nuan deka belajar ngaga pemutus ti manah ba pengidup sereta berasai dikeringka.—Jos. 1:8.