1. Taja pan pengawa jadi melaki-bini suah berengkah enggau pengaga ati, nama utai ti dikearapka orang ke jadi melaki-bini? (Peda gambar ba pun artikel.)

LEBUH pengantin lelaki meda pemajik pengantin indu maya hari seduai iya jadi, seduai iya balat gaga ati. Lebuh seduai iya bedating, pengerindu seduai iya ngagai pangan diri majak dalam, lalu seduai iya deka jadi sereta besemaya deka mengkang tetap ati ngagai pangan diri. Pengudah seduai iya jadi, seduai iya berengkah idup begulai. Seduai iya patut ngaga ubah ngambika ulih mengkang beserakup. Jehovah, Pengepun pengawa jadi melaki-bini, dekaka tiap iku laki bini lantang ati sereta mujur ba pengidup jadi melaki-bini, nya alai Iya meri jaku ajar ti manah ari Bup Kudus. (J-lam. 18:22) Taja pia, Bup Kudus madah ngagai kitai, mensia enda sempurna ke jadi melaki-bini deka napi penanggul tauka “dituntung penusah.” (1 Kor. 7:28) Baka ni laki bini ulih ngurangka penanggul nya? Lalu baka ni pengawa jadi melaki-bini orang Kristian ulih mujur?

2. Pengerindu ke baka ni patut diayanka laki bini?

 ² Bup Kudus madahka, pengerindu nya kualiti ti beguna. Tang bisi bemacham bengkah pengerindu ke patut diayanka laki bini ngagai pangan diri. Ngambika chunto, seduai iya patut ngayanka pengerindu baka entara kawan enggau pangan diri sereta pengerindu ti romantik entara pangan diri. Lalu enti seduai iya bisi anak, pengerindu entara diri sebilik deka dikemeratka agi. Tang, pengerindu ti bepelasarka prinsip Bup Kudus ti ngasuh pengawa jadi melaki-bini nya mujur. Rasul Paul nerangka pengerindu ke baka tu, lebuh iya nyebut: “Genap iku kita patut rinduka bini diri, baka kita ke rinduka diri empu, lalu bini patut masa laki.”—Eps. 5:33.

3. Ni peneguh pengerindu ke patut bisi ba pengawa jadi melaki-bini?

³ Paul nulis: ‘Kita ke laki, rinduka bini kita, baka Kristus ke rinduka eklisia, lalu nyerahka diri empu ke eklisia.’ (Eps. 5:25) Orang Kristian kemaya hari tu nunda teladan Jesus enggau chara rinduka pangan diri baka Jesus rinduka bala murid iya. (Bacha John 13:34, 35; 15:12, 13.) Laki bini ke Kristian patut rinduka pangan diri enggau dalam nyentukka seduai iya sanggup mati ke pangan diri. Tang lebuh bisi penanggul ti besai ba pengawa jadi melaki-bini, sekeda ngasaika pengerindu sida ngagai pangan diri engka udah kurang. Nama ulih nulung sida? Pengerindu ti bepelasarka prinsip Bup Kudus, “natka semua utai, arapka semua utai, ngadang semua utai, tan dalam semua utai.” Pengerindu ke baka nya “enda nemu abis.” (1 Kor. 13:7, 8) Laki bini enda tau enda ingatka semaya seduai iya. Seduai iya udah besemaya deka rindu sereta tetap ati ngagai pangan diri. Ngingatka tu deka meransang laki bini ke Kristian ngiga tulung ari Jehovah sereta sama bekereja mutarka sebarang penanggul.

4, 5. (a) Nama tanggung pengawa laki ke nyadi tuai bilik? (b) Nama runding bini pasal laki ke nyadi tuai bilik? (c) Nama ubah ke patut digaga orang ke udah jadi melaki-bini?

⁴ Paul nerangka tanggung pengawa tiap iku laki bini lebuh iya nyebut: ‘Kita ke bini, nunduk ngagai laki kita, baka ke nunduk ngagai Tuan. Laban laki nyadi kepala bini, baka Kristus ke nyadi kepala eklisia.’ (Eps. 5:22, 23) Tu ukai reti nya laki manah agi ari bini iya. Lebuh madahka pasal tanggung pengawa bini ti beguna, ku Jehovah: “Enda manah orang tu diau kediri. Aku deka ngaga siku penulung ke iya, nyadika tawing kaling iya.” (P-kal. 2:18) Bini patut nulung laki iya nyadi tuai bilik ti manah. Lalu laki patut neladan pengerindu Jesus ke “nyadi kepala eklisia.” Lebuh laki ngereja tu, bini iya berasai likun sereta senang agi deka masa sereta nyukung iya.

⁵ Cathy, ke jadi enggau Fred, ngaku: “Lebuh aku agi dara, aku enda bepanggai ba orang bukai. Aku nemu nyaga diri empu. Pengudah belaki aku patut ngaga ubah sereta belajar bepanggai ba laki aku. Tu enda seruran senang, tang kami duai majak rapat ngagai pangan diri enggau ngereja utai nitihka chara Jehovah.” ^[1] (Peda nota penutup.) Fred madahka: “Pengudah jadi melaki-bini, kami duai patut sama ngaga pemutus. Ngaga pemutus enda senang ba kami duai. Tang enggau ngiga iring ari Jehovah nengah sampi sereta  mendingka penemu ari bini aku, nulung kami duai senang agi ngaga pemutus. Aku ngasaika kami duai amat siti tim!”

6. Baka ni pengerindu “ngempung semua utai nyadi siti” lebuh penanggul bisi nyadi ba pengawa jadi melaki-bini?

⁶ Pengawa jadi melaki-bini ulih tegap enti laki bini ‘sabar enggau pangan diri, lalu ngampun pangan diri.’ Laban seduai iya enda sempurna, seduai iya tentu bisi ngereja penyalah. Enti tu nyadi, seduai iya ulih belajar ari penyalah diri, belajar ngampun pangan diri sereta ngayanka pengerindu ti bepelasarka prinsip Bup Kudus. Pengerindu tu “ngempung semua utai nyadi siti.” (Kol. 3:13, 14) Laki bini ulih ngayanka pengerindu tu enggau chara ti sabar, bisi pengasih sereta enda “bedendam.” (1 Kor. 13: 4, 5) Lebuh laki bini belaya, seduai iya patut nguji mutarka laya nya enggau jampat sebedau apus hari. (Eps. 4:26, 27) Tu begunaka pemaruh ati sereta pemerani deka nyebut “Aku minta ampun laban ngemedis ati nuan,” tang ngereja tu nulung mutarka penanggul sereta ngerapatka agi kaul entara laki bini.

7, 8. (a) Nama jaku ajar ke dipadah Bup Kudus pasal pengawa besetubuh entara laki bini? (b) Nama kebuah laki bini patut ngayanka penyiru?

⁷ Bup Kudus meri jaku ajar ti manah ke ulih nulung laki bini ngembuan runding ti patut pasal pengawa besetubuh entara laki bini. (Bacha 1 Korint 7:3-5.) Endang beguna enti laki tauka bini berundingka asai ati sereta utai ti diguna pangan diri. Enti laki enda siru enggau bini iya, bini iya tusah deka lantang ati lebuh seduai iya besetubuh. Laki “enda tau enda siru” enggau bini sida. (1 Pet. 3:7) Pengawa besetubuh enda patut dipejal tauka ditagih, tang iya patut datai kediri empu. Kesuah agi, sida ke lelaki jampat agi ba pengawa tu ari sida ke indu. Taja pia, laki bini patut bisi pengingin ti sama ba pengawa tu.

⁸ Bup Kudus enda madahka enggau nyemetak pasal bansa pengerindu sereta penyampau pengerindu ke patut diayanka laki bini ngagai pangan diri. Tang Bup Kudus bisi madah pasal pengerindu nya. (P-dai. 1:2; 2:6) Laki bini ke Kristian patut mentas enggau pangan diri.

9. Nama kebuah enda manah bisi pengingin seks ti enda patut ngagai orang ke ukai kaling pengidup diri?

⁹ Enti kitai bisi pengerindu ti dalam ngagai Petara sereta orang bukai, kitai enda ngelakka orang tauka utai ngachau tikah kitai. Sekeda orang ngerusak tikah diri enggau nyadi gian meda pornografi. Kitai patut nyeliahka sebarang pengingin deka meda pornografi tauka bisi pengingin seks ti enda patut. Kitai indah patut nyeliahka diri ari ngereja sebarang utai ke ulih ngasuh kitai betundi enggau orang ke ukai kaling pengidup kitai, laban nya enda ngayanka pengerindu. Anang enda ingat, Petara nemu semua runding sereta pengawa kitai. Tu deka nulung kitai ngeringka  pengeran ke deka ngerinduka ati Iya sereta mengkang taluk ngagai kaling pengidup kitai.—Bacha Matthew 5:27, 28; Hebrew 4:13.

10, 11. (a) Baka ni kitai nemu pengawa sarak suah nyadi? (b) Nama dipadah Bup Kudus pasal beserara? (c) Nama ulih nulung laki bini ngambika enda beguai deka beserara?

¹⁰ Sekeda laki bini engka milih deka beserara tauka sarak, lebuh sida enda ulih mutarka penanggul ti besai. Ba sekeda menua, lebih ari setengah orang ke jadi laki bini minta sarak. Endang amat, pengawa tu ukai utai ti suah nyadi entara bala menyadi Kristian kitai. Taja pia, majak mayuh laki bini ke Kristian bisi penanggul ti besai ba tikah sida iya.

¹¹ Bup Kudus meri jaku lalau tu: “Bini enda tau ninggalka laki. (Tang enti iya ninggalka laki iya, iya enda tau jadi enggau lelaki bukai, tauka iya mulaika diri baru ngagai laki iya empu), lalu laki enda tau muai bini.” (1 Kor. 7:10, 11) Sekeda laki bini engka ngasaika penanggul sida kelalu besai, nyentukka sida deka beserara. Taja pia Jesus madahka, pengawa beserara ukai pekara ti mit lebuh iya nandu baru utai ti dipadah Petara pasal pengawa jadi melaki-bini. Lalu iya nambahka: ‘Nadai orang tau nyeraraka utai ti udah ditampilka Petara.’ (Mat. 19:3-6; P-kal. 2:24) Nya alai Jehovah dekaka laki bini mengkang begulai. (1 Kor. 7:39) Anang enda ingat, semua kitai betanggungjawap ke pengawa kitai ngagai Jehovah. Tu ulih nulung kitai mutarka penanggul enggau jampat sebedau iya nyadi besai agi.

12. Nama ulih ngasuh laki tauka bini berunding deka beserara?

¹² Nama kebuah sekeda laki bini napi penanggul ti besai? Lebuh pengidup jadi melaki-bini enda nyadi baka ke dikearapka sida, sida berasai asa ati tauka pedis ati. Kesuah agi, penanggul nyadi ketegal chara laki bini dibesaika tauka chara sida nunjukka asai ati diri enda sama. Penanggul mega nyadi ketegal enda ulih begulai enggau bala entua tauka enda sepenemu ba chara ngena duit tauka ngemesaika anak. Taja pia, endang ngelantangka ati ulih meda mayuh laki bini ke Kristian tetemuka chara kena mutarka penanggul nya laban sida ngawakka Petara ngiring sida.

13. Nama tegal ke ulih ngasuh beserara?

¹³ Bisi tegal ke ulih ngasuh laki bini tau beserara. Ba penanggul ti kelalu balat, baka sengaja enggai melanja anak bini, udu nyamah sereta balat nyakal sembah ngagai Petara, nya kebuah ke ngasuh sekeda orang milih deka beserara. Lebuh bisi penanggul ti besai, laki bini patut minta tulung ari bala tuai gempuru. Bala tuai gempuru tu bisi mayuh peneleba, lalu ulih nulung laki bini ngena jaku lalau ari Petara ba pengidup sida. Lalu lebuh laki bini minta roh kudus ari Jehovah, roh kudus ulih nulung sida ngena prinsip Bup  Kudus sereta ngayanka kualiti Kristian. (Gal. 5:22, 23) ^[2]—Peda nota penutup.

14. Nama dipadah Bup Kudus ngagai orang Kristian ke bisi kaling pengidup ke enda nyembah Jehovah?

¹⁴ Bup Kudus bisi madahka kebuah laki bini patut mengkang begulai taja pan seiku ari seduai iya enda nyembah Jehovah. (Bacha 1 Korint 7:12-14.) Kaling pengidup ke enda arap “digaga lurus” laban iya udah jadi enggau nembiak Petara. Anak seduai iya deka dikumbai “kudus,” lalu di baruh jaga Petara. Paul meransang laki bini ke Kristian: “Nuan ke bini, baka ni ku nuan nemu diri deka, tauka enda, nyelamatka laki nuan? Nuan ke laki, baka ni ku nuan nemu diri deka, tauka enda, nyelamatka bini nuan?” (1 Kor. 7:16) Bisi mayuh chunto ti manah ari bala laki tauka bini ke Kristian ti udah nulung kaling pengidup sida nyadi nembiak Jehovah.

15, 16. (a) Nama jaku lalau ari Bup Kudus ngagai bala bini ke Kristian ke bisi laki ke enda nyembah Jehovah? (b) Nama patut digaga orang Kristian “enti tawing ke ukai orang Kristian nyarakka diri”?

¹⁵ Rasul Peter ngasuh bala bini ke Kristian nunduk ngagai laki sida, ‘ngambika enti sida enda ngasika jaku Petara, sekeda sida ulih dibai arap ketegal ulah kita, ukai ketegal jaku kita, lebuh sida meda pengudus enggau pemadas ulah kita.’ Ari ke selalu bejaku pasal utai ti dipechaya diri, bini ulih nulung laki deka nerima pemendar enti iya ngayanka diri ‘nelap sereta imun, ti pemadu berega di mua Petara.’—1 Pet. 3:1-4.

¹⁶ Baka ni enti kaling pengidup ke enda nyembah Jehovah milih deka beserara? Bup Kudus madahka: ‘Enti tawing ke ukai orang Kristian nyarakka diri, awakka iya nyarakka diri. Ba pekara ti baka nya,  tawing ke orang Kristian nadai utai nanchang, laban Petara udah ngangauka kita ngagai pemaik.’ (1 Kor. 7:15) Taja pan beserara engka mai pemaik, tang nitih ku Bup Kudus, laki tauka bini ke Kristian enda tau jadi enggau indu tauka lelaki bukai. Tang iya enda patut nguji ngansak kaling pengidup terus begulai enggau iya. Nyau kelama, kaling pengidup ke enda nyembah Jehovah engka deka pulai baru, lalu neruska pengawa jadi melaki-bini seduai iya. Lalu dudi hari ila, iya engka nyembah Jehovah.

17. Nama patut dikenuluka laki bini ke Kristian?

¹⁷ Laban kitai idup ba pengujung “hari ti penudi,” kitai ngasaika “mayuh macham penusah.” (2 Tim. 3:1-5) Nya kebuah kitai begunaka jaga ari kaul ti rapat enggau Jehovah. Paul nulis: “Kitai nyau suntuk hari. Berengkah ari diatu, awakka orang ke bisi bini idup baka orang ke nadai bini, . . . lalu orang ke ngereja pengawa dunya, baka orang ke ukai ngereja pengawa dunya.” (1 Kor. 7:29-31) Ditu Paul ukai ngumbai, laki bini tau enda ibuhka pangan diri. Tang, laban kitai benung idup ba hari ti penudi, kitai patut ngenuluka sembah kitai ngagai Jehovah.—Mat. 6:33.

18. Nama kebuah orang Kristian tau bulih pengelantang sereta pemujur ba pengawa jadi melaki-bini?

¹⁸ Ba maya ti mayuh penusah tu, kitai meda mayuh pengawa jadi melaki-bini ke enda mujur. Kati ulih pengawa jadi melaki-bini ke ngelantangka ati sereta mujur dijapai? Ulih, enti kitai mengkang semak ngagai Jehovah sereta ngagai nembiak Iya, nitihka prinsip Bup Kudus sereta nerima iring ari roh kudus Jehovah. Enti kitai ngereja tu, kitai bebasaka ‘utai ti udah ditampilka Petara.’—Mrk. 10:9.