1, 2. (a) Baka ni pengawa jadi melaki-bini berengkah? (b) Nama udah dimeretika Adam seduai Hawa pasal jadi melaki-bini? (Peda gambar ba pun artikel.)

MAYUH orang bisi ati deka bebini tauka belaki. Tang baka ni pengawa jadi melaki-bini berengkah, lalu nama tuju iya? Nemu kebuah iya deka nulung kitai bisi runding ti betul pasal pengawa jadi melaki-bini sereta berekat ke dibai iya. Petara nempa mensia keterubah, Adam, lalu ngasuh iya meri nama ngagai tiap iku jelu. Adam beratika, semua jelu nya bisi kaling “tang nadai siku sida nya ditemu tau nyadika penulung enggau kaling iya.” Nya alai, Petara ngasuh Adam tinduk jenak. Iya ngambi siti tulang kerigai Adam, lalu nempa seiku indu. Jehovah mai indu nya ngagai Adam, lalu indu nya nyadi bini Adam. (Bacha Pemungkal 2:20-24.) Baka ke ulih dipeda kitai, pengawa jadi melaki-bini nya pemeri ari Jehovah.

² Betaun-taun udah nya, Jesus nandu utai ti udah dipadah Jehovah ba Kebun Eden: “Lelaki deka ninggalka apai enggau indai iya, lalu begulai enggau bini iya, lalu seduai iya deka nyadi setubuh?” (Mat. 19:4, 5) Laban Petara udah ngambi siti tulang kerigai ari Adam dikena nempa seiku indu ti keterubah, seduai iya patut  nemu, seduai iya ukai agi dua iku tang nyadi seiku. Jehovah enggai laki bini sarak tauka ngembuan lebih ari seiku kaling pengidup.

3. Nama tuju besai pengawa jadi melaki-bini?

³ Adam lantang ati ke bini iya, lalu meri bini iya nama Hawa. Hawa nyadi kaling sereta penulung iya. Adam seduai Hawa deka sama lantang ati nyadi laki bini. (P-kal. 2:18) Siti tuju besai pengawa jadi melaki-bini iya nya ngemenuhka dunya enggau mensia. (P-kal. 1:28) Bala anak deka rinduka apai indai sida, tang nyau kelama sida deka bebini tauka belaki lalu ngembuan ruang bilik kediri empu. Mensia deka ngemenuhka dunya lalu ngaga serata dunya nyadi paradais.

4. Nama nyadi ngagai pengawa jadi melaki-bini ti keterubah?

⁴ Pengawa jadi melaki-bini ti keterubah rusak lebuh Adam seduai Hawa enda ngasika Jehovah. “Ular ti tuai,” iya nya Antu Sitan, nipu Hawa lalu madahka ngagai iya, makai buah ari “sepun kayu ti meri penemu kena ngelala bida entara utai ti manah ari utai ti jai” deka meri iya penemu ti manah agi. Sitan madahka, enti Hawa makai buah ari pun kayu nya, penemu nya deka nulung iya mutuska ni bagi utai ti manah enggau utai ti jai. Hawa enda ngayanka basa ngagai Adam ke nyadi tuai bilik, lebuh iya mutuska deka makai buah nya enggau enda nanya Adam pasal pekara nya. Lalu Adam enda ngasika Petara lebuh iya makai buah ke diberi bini iya.—Pem. 12:9; P-kal. 2:9, 16, 17; 3:1-6.

5. Nama ulih dipelajarka kitai ari saut ke diberi Adam seduai Hawa ngagai Jehovah?

⁵ Lebuh Jehovah nanya seduai iya, Adam nyalahka bini iya. Ku iya: “Indu ke diberi Nuan nyadika tawing kaling aku, ke meri buah ari kayu nya ngagai aku, lalu aku makai.” Lalu udah nya, Hawa nyalahka ular ke udah nipu iya. (P-kal. 3:12, 13) Adam seduai Hawa meri tegal ke enda nyengala kebuah seduai iya enda ngasi, lalu Jehovah ngakim orang ke ngelaban nya. Endang amat, seduai iya nyadika tangkan ngagai kitai! Ngambika pengawa jadi melaki-bini ulih mujur, laki bini patut ngasika Jehovah lalu betanggungjawap ke pengawa diri.

6. Baka ni nuan deka nerangka Pemungkal 3:15?

⁶ Enda ngira nama utai ti udah digaga Sitan ba Kebun Eden, Jehovah nentuka mensia bisi pengadang ke jemah ila. Pengadang tu bisi dipadah ba bup mit ti keterubah dalam Bup Kudus. (Bacha Pemungkal 3:15.) Jaku ba ayat nya nunjukka, Sitan deka diredakka “anak” ke datai ari “indu.” Mayuh melikat ti lurus ke gawa di serega ngembuan kaul ti rapat enggau Petara. Sida baka bini ke Jehovah. Iya deka ngirum seiku melikat ari raban melikat nya “ngeredakka” Sitan. Anak nya deka nulung mensia ke ngasi ngasaika utai ti udah dilenyauka laki bini ti keterubah.  Mensia ke ngasi deka bisi peluang idup belama iya di dunya, baka ke dikedekaka Jehovah.—Jhn. 3:16.

7. (a) Nama udah nyadi ngagai pengawa jadi melaki-bini pengudah Adam seduai Hawa ngelaban Petara? (b) Nama dikearapka Jehovah ari laki bini?

⁷ Pengawa Adam seduai Hawa ke ngelaban balat ngachau tikah seduai iya sereta semua tikah peturun seduai iya. Ngambika chunto, Hawa enggau semua bala peturun iya ke indu deka balat pedis lebuh beranak. Sida ke indu ingin deka dikerindu sereta dikeibuhka laki sida, tang bala laki deka bekuasa atas bini sida. Kekadang sida merinsaka bini sida baka ke dipeda kitai kemaya hari tu. (P-kal. 3:16) Jehovah ngarapka laki nyadi tuai bilik ti bepengerindu, lalu Iya ngarapka bini nunduk ngagai laki sida. (Eps. 5:33) Lebuh laki bini ke Kristian sama besaup enggau pangan diri, mayuh penanggul ulih diputarka.

8. Baka ni gaya sejarah pengawa jadi melaki-bini kenyau ari jeman Adam nyentuk ngagai Bah Besai?

⁸ Sebedau Adam seduai Hawa mati, seduai iya bisi anak indu enggau lelaki. (P-kal. 5:4) Anak lelaki seduai iya ti keterubah, Kain, udah nya jadi enggau seiku ari kaban belayan ke indu. Lamek, peturun Kain, nya lelaki keterubah ti dipadah dalam Bup Kudus ke ngembuan dua iku bini. (P-kal. 4:17, 19) Kenyau ari jeman Adam nyentuk ngagai jeman Noah, semina mimit aja orang ke nyembah Jehovah. Sekeda ari sida ke tetap ati tu, Abel, Enok, sereta Noah enggau sida sebilik. Maya jeman Noah, Bup Kudus madahka: ‘Anak Petara meda sida indu nya bajik gamal. Nya alai sida lalu jadi enggau indu ke dikerinduka sida.’ Tang tu ukai utai ke patut nyadi, lalu bala melikat nya enggau bala indu nya bisi anak lelaki ke besai gamal sereta mangah ke dikumbai Nefilim. Maya nya, “penyai semua orang di dunya tu” mayuh, lalu ‘runding sida seruran jai.’—P-kal. 6:1-5.

9. Nama digaga Jehovah ngagai orang ke jai maya jeman Noah, lalu nama ulih dipelajarka kitai ari utai ke nyadi maya nya?

⁹ Jehovah madahka, Iya deka ngenataika bah ti besai ngagai dunya kena ngerusak semua orang ke jai. “Noah, ke ngajar pasal pengelurus,” nangkan orang pasal Bah Besai ke deka datai. (2 Pet. 2:5) Tang sida enggai mendingka Noah laban sida kisuk enggau pengawa ninting hari, nyengkaum jadi melaki-bini. Jesus nyemaka jeman Noah enggau jeman kitai. (Bacha Matthew 24:37-39.) Kemaya hari tu, mayuh orang enggai mendingka pesan pasal berita manah ari Perintah Petara. Kitai nusui pesan tu sebedau dunya ti jai dirusak. Nama ulih dipelajarka kitai ari jeman Bah Besai? Kitai enda patut ngelakka pengawa jadi melaki-bini sereta ngembuan anak nyadi utai ti patut dikemeratka nyentukka kitai enda bedulika Hari Jehovah nya semak.

10. (a) Ba mayuh menua, ulah seks ti baka ni suah nyadi? (b) Baka ni Abraham seduai Sarah netapka teladan ti manah ba pengawa jadi melaki-bini?

¹⁰ Noah enggau tiga iku anak lelaki iya sama bela bisi seiku bini aja. Taja pia, pengudah Bah Besai, mayuh lelaki  ngembuan lebih ari seiku bini. Ba mayuh menua, ulah seks ti kamah suah nyadi, lalu iya indah dikemendarka dalam pengarap. Lebuh Abraham seduai Sarah pindah ngagai menua Kanaan, seduai iya dikelingi orang ke ngereja ulah ti kamah, ke enda bebasaka pengawa jadi melaki-bini. Jehovah ngerusak nengeri Sodom sereta Gomorah laban orang ke diau dia udu ngereja ulah ti kamah. Abraham enda baka sida. Iya nyadi tuai bilik ti manah, lalu Sarah netapka teladan ti manah nyadi bini ke nunduk. (Bacha 1 Peter 3:3-6.) Abraham nentuka anak lelaki iya, Isak, jadi enggau seiku indu ke nyembah Jehovah. Lalu Isak ngereja utai ti sama ngagai anak lelaki iya, Jakop, lalu bala anak Jakop nyadi peturun 12 raban bansa orang Israel.

11. Baka ni Adat Moses nyaga orang Israel?

¹¹ Udah nya, Jehovah ngaga siti sempekat enggau orang Israel. Iya meri sida Adat Moses, ke ulih nyaga laki bini dalam sembah sida ngagai Iya. Ngambika chunto, bisi adat pasal pengawa jadi melaki-bini, nyengkaum pengawa bebini lebih ari seiku, lalu bansa Israel enda dikemendarka jadi enggau penyembah petara pelesu. (Bacha Ulang Adat 7:3, 4.) Lebuh bisi penanggul ti besai nyadi ba laki bini, bala tuai orang Israel ulih meri bantu. Bisi mega adat ke ngasuh tetap ati sereta enda ninding. Sarak dikemendarka, tang bisi atur digaga kena nyaga tiap iku kaling pengidup. Ngambika chunto, laki ulih nyarak bini iya enti “iya bisi tetemuka utai pasal bini iya ti ngasuh ati iya enda lantang.” (U-dat. 24:1) Bup Kudus nadai nerangka bagi utai “ti ngasuh ati iya enda lantang,” tang laki enda tau ngena penyalah ti mit nyadika tegal deka nyarak bini iya.—Lew. 19:18.

12, 13. (a) Nama digaga sekeda lelaki ngagai bini sida maya jeman Malaki? (b) Kemaya hari tu, enti orang ke udah dibaptisa butang enggau kaling pengidup orang bukai, nama deka nyadi?

¹² Maya jeman nabi Malaki, mayuh laki ke bansa Judah ngena mayuh macham tegal deka nyarak bini sida. Sida nyarak bini sida ngambika ulih jadi enggau indu ke biak agi tauka indu ke enda nyembah Jehovah. Maya jeman Jesus, lelaki ke bansa Judah agi muai bini sida “atas sebarang tegal.” (Mat. 19:3) Petara Jehovah begedika pengawa sarak ke baka nya.—Bacha Malaki 2:13-16.

¹³ Kemaya hari tu, ulah ke enda taluk ngagai kaling pengidup enda diterima entara nembiak Jehovah, lalu tu jarang amat nyadi. Uji gambarka, kaling pengidup ke udah dibaptisa butang enggau kaling pengidup orang bukai, lalu minta sarak ngambika iya ulih jadi enggau orang nya. Enti orang nya enda nesal ati, iya deka dibuai ari gerempung ngambika gempuru mengkang tuchi. (1 Kor. 5:11-13) Orang nya patut ‘ngereja utai kena nunjukka [iya] amat udah nesal ati’ sebedau iya diterima pulai baru ke gempuru. (Luk. 3:8; 2 Kor. 2:5-10) Nadai timpuh ti nyemetak kemaya orang nya ulih diterima pulai baru. Iya ke amat, tu engka begunaka setaun tauka lebih kena orang ke bedosa nya nunjukka diri amat udah nesal ati, lalu ulih diterima pulai baru ke gempuru. Taja pia, orang nya agi patut ‘bediri di mua Petara, lalu diakim Iya.’—Rom. 14:10-12; peda The Watchtower, 15 November 1979, lambar 31-32.

14. Nama tuju Adat Moses?

¹⁴ Menua Israel di baruh Adat Moses lebih ari 1,500 taun. Adat nya nulung nembiak Petara dalam mayuh chara. Ngambika chunto, Adat nya ngembuan prinsip ke ulih nulung sida mutarka penanggul ba ruang bilik sereta ngiring sida ngagai Messiah. (Gal. 3:23, 24) Pengudah Jesus mati, Adat nya enda dikena agi, lalu Petara ngaga siti atur ti baru. (Heb. 8:6) Nya alai, sekeda utai ke dikemendarka dalam Adat Moses suba enda dikemendarka agi.

15. (a) Ba gempuru Kristian, nama standard ke dikena ba pengawa jadi melaki-bini? (b) Nama utai ke patut diperundingka orang Kristian pasal sarak?

¹⁵ Bisi sekali sekeda orang Parisi nanya Jesus pasal pengawa jadi melaki-bini. Jesus madahka, Petara udah ngemendarka orang Israel sarak nitihka Adat Moses, taja pan tu ukai utai ti dikedekaka Iya ari pun. (Mat. 19:6-8) Saut Jesus nunjukka, standard asal Petara bekaul enggau pengawa jadi melaki-bini deka nyadi standard ke dikena orang Kristian kemaya hari tu. (1 Tim. 3:2, 12) Ketegal “nyadi setubuh,” laki bini enda tau ninggalka pangan diri. Pengerindu seduai iya ke Petara sereta ke pangan diri deka nulung seduai iya mengkang beserakup. Laki bini ke sarak enti ukai ketegal ulah seks ti kamah, enda tau kawin baru. (Mat. 19:9) Kaling pengidup ke enda salah ulih milih sekalika deka ngampun kaling pengidup ke ngereja ulah seks ti kamah tauka enda, asal aja iya udah nesal ati. Tu utai ke nyadi lebuh nabi Hosea ngampun bini iya, Gomer, ke ngereja ulah ti kamah enggau lebuh Jehovah ngampun orang Israel ke nesal ati. (Hos. 3:1-5) Nambahka nya, enti iya nemu kaling pengidup iya ngereja ulah ti kamah, tang milih deka terus besetubuh enggau kaling pengidup iya ke ngereja penyalah, reti nya, iya udah ngampun kaling pengidup iya. Lalu seduai iya nadai agi kebuah ari Bup Kudus ke tau ngasuh sarak.

16. Nama dipadah Jesus pasal enda belaki tauka bebini?

¹⁶ Jesus madahka, orang Kristian ti bendar semina ulih sarak ketegal ulah seks ti kamah. Udah nya iya nyebut pasal “semina orang ke diberi ajar tu,” iya nya orang ke milih enda belaki tauka bebini. Jesus madahka: “Awakka orang ke ulih nerima ajar tu, nerima iya.” (Mat. 19:10-12) Mayuh orang milih mengkang enda belaki tauka bebini ngambika sida enda dilimpangka ari nyembah Jehovah, lalu sida patut dipuji ketegal pemutus ke digaga sida!

17. Nama ulih nulung orang Kristian mutuska sekalika iya deka bebini tauka belaki?

¹⁷ Nama ulih nulung orang ngaga pemutus sekalika deka mengkang bujang dara tauka deka bebini belaki? Orang nya patut mutuska sekalika iya ulih ngena pemeri nya enggau manah. Rasul Paul meransang orang enda bebini tauka belaki. Tang iya mega madahka: “Laban ulah ti kamah kelalu suah udah nyadi, lelaki patut bisi bini ke diri empu, lalu indu patut bisi laki ke diri empu.” Paul nambahka: “Enti sida enda tetagangka pengingin diri, sida patut jadi enggau pangan diri, laban manah agi sida jadi melaki-bini, ari ke merinsa natka diri tetengukka pangan diri.” Nya alai, orang nya patut kawin ngambika ulih nyeliahka pengingin seks ti balat ke ulih ngujungka iya ngeluchu tauka ngereja ulah seks ti kamah. Taja  pia, orang ke bujang tauka dara patut berunding sekalika iya udah chukup tuai bebini tauka belaki. Paul madahka: “Enti orang ngira diri udah enda manah ulah enggau tunang iya, enti iya enda ulih nagang pengingin diri, lalu utai nya enda tau enda nyadi, awakka iya ngereja utai ti dikedekaka iya: awakka seduai iya jadi enggau pangan diri. Utai tu nadai pulai ke dosa.” (1 Kor. 7:2, 9, 36; 1 Tim. 4:1-3) Orang nya enda patut diasuh bebini tauka belaki ketegal iya bisi pengingin seks ti balat ke diasaika mayuh orang lebuh sida agi biak. Orang nya engka bedau entu nemu ngatur ruang bilik kediri empu.

18, 19. (a) Baka ni pengawa jadi melaki-bini orang Kristian patut berengkah? (b) Nama deka dikerandauka ba artikel pengudah tu?

¹⁸ Pengawa jadi melaki-bini orang Kristian patut berengkah entara lelaki enggau indu ke udah dibaptisa ke rinduka Jehovah enggau pengabis ati seduai iya. Seduai iya mega patut balat rinduka pangan diri, lalu deka sama idup begulai. Jehovah deka merekatka seduai iya laban seduai iya ngasika jaku lalau ke ngasuh jadi enggau ‘nembiak Tuan’ aja. (1 Kor. 7:39) Lalu tikah seduai iya deka mujur enti seduai iya terus ngasika jaku lalau ari Bup Kudus.

¹⁹ Diatu, kitai benung idup ba “hari ti penudi,” lalu mayuh orang nadai ngembuan kualiti ke patut ngambika pengawa jadi melaki-bini tau mujur. (2 Tim. 3:1-5) Ba artikel pengudah tu, kitai deka berandauka prinsip Bup Kudus ti berega ke ulih nulung orang Kristian mujur ba pengawa jadi melaki-bini sereta lantang ati, taja pan dikelingi mayuh penanggul. Tu deka nulung sida terus nengah jalai ke nuju ngagai pengidup ti meruan belama iya.—Mat. 7:13, 14.