1, 2. (a) Baka ni Isaiah 60:22 udah dikeamatka diatu? (b) Diatu, nama utai ti diguna gerempung Jehovah ke di dunya tu?

“SUKU raban bansa ti pemadu mit, ti pemadu baruh pendiau deh deka besai kuasa, baka bansa ti besai kuasa.” (Isa. 60:22) Jaku tu benung dikeamatka diatu. Endang amat, ba taun 2015, bisi 8,220,105 iku nembiak Jehovah ke nusui berita manah pasal Perintah Petara di serata dunya! Ku Petara madah pasal penyampau nembiak Iya ke nambah: ‘Aku deka ngasuh utai tu lengkas nyadi. Aku tu Jehovah!’ Nya alai, majak mayuh pengawa ke deka dikereja semua kitai. Kati kitai diatu enggau naka ulih nginjil sereta ngajar orang pasal berita manah? Mayuh bala menyadi Kristian udah nyadi pengerintis biasa tauka pengerintis sukung. Sekeda ari sida udah pindah ngagai endur bukai ngambika ulih nulung ba pengawa nginjil, lalu sida ke bukai bebendar gawa nirika Palan Gempuru.

² Tiap taun, kira-kira 2,000 buah gempuru ke baru ditumbuhka. Semua gempuru tu begunaka bala tuai gempuru enggau penulung gempuru. Ninting taun, beribu iku penulung gempuru patut nyadi tuai gempuru, lalu beribu iku menyadi Kristian lelaki ke bukai patut nyadi penulung gempuru. Endang amat, kitai patut  ‘bebendar gawa ke Tuan,’ ukai semina ke bala menyadi Kristian lelaki tang mega ke bala menyadi Kristian indu.—1 Kor. 15:58.

3, 4. Nama kebuah ngaga pemansang ba rohani nya beguna ba nuan?

³ Bacha 1 Timoti 3:1. Rasul Paul muji bala menyadi Kristian lelaki ke ngemansangka diri “deka nyadi” bala tuai. Ngambika chunto, enti kitai deka ngulihka utai ti pedis diulih, tentu kitai deka bebendar ngulihka iya. Diatu uji gambarka, seiku menyadi Kristian lelaki ke keran deka nyadi penulung gempuru. Iya nemu, iya patut enggau naka ulih ngemansangka kualiti Kristian iya. Udah nya, pengudah iya berengkah nyadi penulung gempuru, iya terus bebendar gawa ngambika iya ulih nyadi seiku tuai.

⁴ Sekeda bala menyadi Kristian ngaga ubah ba pengidup sida laban sida deka ngereja mayuh agi pengawa ke Jehovah. Ngambika chunto, sida engka deka nyadi pengerintis, gawa ba Betel, tauka nulung nirika Palan Gempuru. Aram kitai meda baka ni Bup Kudus ulih nulung semua kitai terus ngaga pemansang.

5. Baka ni orang ke biak ngena pengering sida ngereja pengawa ke Perintah Petara?

⁵ Orang ke biak ulih ngaga mayuh pengawa ke Jehovah laban sida kering sereta bepengerai. (Bacha Jaku-Dalam 20:29.) Sekeda bala menyadi Kristian lelaki ke biak ba Betel nulung nyelak enggau nanggam bup sereta Bup Kudus. Mayuh bala menyadi Kristian ke biak nulung nirika tauka nyeruri Palan Gempuru. Sekeda ari sida sukarela nulung lebuh bisi penusah ngenyit ke datai ari kuasa alam. Lalu mayuh pengerintis ke biak belajar bansa jaku bukai tauka mindah ngagai endur bukai ngambika ulih nusui berita manah.

6-8. (a) Baka ni seiku lelaki ke biak ngubah runding iya pasal ngereja pengawa ke Petara, lalu nama asil iya? (b) Baka ni kitai ulih ‘ngasaika pemadas Jehovah’?

⁶ Kitai rinduka Jehovah sereta deka meri Iya utai ti pemadu manah. Taja pia, kitai engka ngasaika utai ti sama baka ke diasaika seiku menyadi Kristian lelaki ke benama Aaron. Iya deka gawa ke Jehovah, tang iya enda lantang ati. Taja pan Aaron udah datai begempuru sereta enggau nginjil kenyau iya agi biak, ku iya madahka, “Aku ngasaika begempuru enggau pengawa nginjil nya enda ngerinduka ati.” Nya alai, nama udah digaga iya?

⁷ Aaron bebendar macha Bup Kudus enggau tetap, nyediaka utai ti dikena begempuru, lalu meri komen ba gempuru. Iya mega berengkah bejarit agi besampi. Semua tu udah nulung iya ngaga pemansang ba rohani. Iya berengkah ngelala Jehovah enggau manah agi sereta berengkah rinduka Jehovah enggau dalam agi. Asil iya, Aaron berasai lantang agi ati. Iya nyadi pengerintis, nulung orang bukai maya bisi penusah ngenyit ke datai ari kuasa alam, lalu nginjil ngagai menua bukai. Diatu, iya nyadi tuai gempuru sereta gawa ba Betel. Baka ni asai ati iya diatu? Aaron madahka: “Aku udah ‘ngasaika pemadas Jehovah.’ Ketegal berekat ari Iya, aku berasai beterima kasih ngagai Iya sereta diperansang ngereja mayuh agi pengawa ke Iya, lalu tu ngenataika mayuh agi berekat.”

⁸ Ku pemasmur madahka: ‘Awakka kita  empu ngasaika pemadas Jehovah.’ Iya nambahka: ‘Orang ke ngasika Jehovah, nadai suntuk utai.’ (Bacha Masmur 34:8-10.) Amat, lebuh kitai ngereja pengawa ke Jehovah enggau pengabis manah, kitai berasai amat lantang ati laban nemu diri ngerinduka ati Iya. Lalu Iya deka ngamatka semaya Iya ke deka ngintu kitai.

9, 10. Nama kebuah nya beguna nuan ngembuan ulah ke deka “nganti”?

⁹ Kitai engka keran deka ngereja mayuh agi pengawa ke Jehovah. Tang, baka ni enti kitai udah lama nganti siti-siti peluang ba gempuru tauka gaya utai ba pengidup kitai berubah? Kitai patut sabar. (Mik. 7:7) Taja pan Jehovah engka ngelakka utai nya terus nyadi ba pengidup kitai, kitai ulih pechaya, Iya seruran deka nyukung kitai. Kitai ulih belajar ari teladan Abraham. Jehovah besemaya ngagai iya, iya deka bisi seiku anak lelaki, tang iya enda tau enda nganti betaun sebedau Isak ada. Maya nya, Abraham sabar sereta enda lenyau pengarap ba Jehovah.—P-kal. 15:3, 4; 21:5; Heb. 6:12-15.

¹⁰ Endang amat, nganti enda senang. (J-lam. 13:12) Tang enti kitai terus berunding pasal gaya utai ba pengidup sereta pasal asai ati ke asa, kitai deka ngasaika diri balat enda diperansang. Taja pia, kitai ulih ngena awak tu ngemansangka kualiti ke deka diguna kitai ngambika ulih bejalaika sekeda tanggung pengawa ba gempuru.

11. Nama kualiti ke patut dikemansangka kitai, lalu nama kebuah nya beguna?

¹¹ Ngemansangka kualiti sereta penau ke diguna nuan. Enggau macha Bup Kudus sereta belematika utai ti dibacha, nuan ulih belajar nyadi pintar, nemu berunding, nemu meri saut enggau terang, sereta nemu ngaga pemutus ti manah. Iya ke amat, bala menyadi Kristian lelaki begunaka kualiti sereta penau ke baka tu kena ngintu gempuru. (J-lam. 1:1-4; Tit. 1:7-9) Lebuh kitai belajarka Bup Kudus, kitai ulih nemu baka ni asai ati Jehovah pasal mayuh pekara. Tiap hari, kitai ulih ngena utai ti dipelajarka kitai kena ngaga pemutus ti ngerinduka ati Petara. Ngambika chunto, kitai deka nemu chara begulai enggau orang bukai, chara ngena duit, chara milih pemerindang sereta gari.

12. Baka ni bala menyadi Kristian ba gempuru nunjukka diri tau dikearapka?

¹² Bebendar ngereja sebarang pengawa ke diberi ngagai nuan. Lebuh nembiak Petara nirika baru Rumah Sembiang, Nehemiah begunaka mayuh orang kena bejalaika mayuh tanggung pengawa. Iya milih orang ke ngembuan nama ti manah. Iya nemu, sida rinduka Petara sereta deka bebendar ngereja sebarang pengawa ke diberi ngagai sida. (Neh. 7:2; 13:12, 13) Sama mega kemaya hari tu, orang ke tetap ati sereta bebendar gawa deka bulih nama ti manah, lalu deka diberi mayuh agi tanggung pengawa. (1 Kor. 4:2) Nya alai sekalika kitai menyadi Kristian lelaki tauka  indu, kitai patut seruran enggau naka ulih ngereja sebarang pengawa ke diberi ngagai kitai.—Bacha 1 Timoti 5:25.

13. Baka ni nuan ulih nunda teladan Josep enti orang bukai bechiping enggau nuan?

¹³ Bepanggai ba Jehovah. Nama ulih digaga nuan enti orang bukai bechiping enggau nuan? Nuan engka ulih nerangka ngagai sida baka ni asai ati nuan. Tang enti nuan terus ngetanka diri empu sereta majak ngumbai diri betul, nuan ulih ngasuh penanggul nya nyadi besai agi. Kitai ulih belajar mayuh agi ari teladan Josep. Bala menyadi iya jai enggau iya. Orang bebula pasal iya, lalu iya dijil ketegal utai ke enda dikereja iya. Tang Josep bepanggai ba Jehovah. Iya berundingka pasal semaya Jehovah, lalu iya mengkang tetap ati. (Mas. 105:19) Ba maya ti tusah tu, iya ngemansangka mayuh kualiti manah ke ulih nulung iya dudi hari, lebuh iya diberi pengawa ti besai. (P-kal. 41:37-44; 45:4-8) Enti orang bukai bechiping enggau nuan, besampi ngagai Jehovah minta penemu-dalam. Iya deka nulung nuan mengkang sabar sereta nelap lebuh bejaku enggau sida.—Bacha 1 Peter 5:10.

14, 15. (a) Nama kebuah kitai patut ‘nyaga’ chara kitai nginjil? (b) Baka ni nuan deka berubah nitihka gaya utai ti nyadi? (Peda gambar ba pun artikel sereta kutak “Kati Nuan Deka Nguji Chara ke Enda Sama?”)

¹⁴ Paul ngasuh Timoti terus ngemansangka chara iya nerangka ayat Bup Kudus. Paul madahka: “Jaga diri empu, lalu jaga mega ajar ti diberi nuan ngagai  orang.” (1 Tim. 4:13, 16) Timoti udah betaun nginjil. Tang nama kebuah iya patut ngaga pemansang? Timoti nemu, orang enggau gaya utai ulih berubah. Iya dekaka orang terus mendingka iya, nya alai iya patut terus ngaga pemansang sereta ngubah chara iya ngajar sida. Seraya kitai nginjil kemaya hari tu, kitai pan patut ngereja utai ti sama.

¹⁵ Ba sekeda endur, mayuh orang nadai ba rumah lebuh kitai nginjil ari rumah ke rumah. Ba endur bukai, orang engka bisi ba rumah, tang kitai enda ulih berandau enggau sida, engka ketegal kitai enda dikemendarka tama ngagai begunan ke endur sida diau. Enti tu bisi nyadi ba kandang endur nuan nginjil, ulih nuan nguji ngena chara bukai ngiga orang?

16. Baka ni nginjil ba endur orang mayuh ulih mujur?

¹⁶ Mayuh bala menyadi Kristian rindu nginjil ba endur orang mayuh. Ngambika chunto, sida ngagai stesen kerita api, stesen bas, makit, sereta taman ngambika ulih betemu enggau orang ke deka berandau. Seiku Saksi ulih berengkah berandau pasal utai ti nyadi baru-baru tu ke bisi ba berita. Tauka Saksi nya ulih nyebut utai ti manah pasal bala anak orang nya tauka nanya utai ke bekaul enggau kereja iya. Enti orang nya rindu deka berandau, penginjil nya ulih madahka siti batang pekara ari Bup Kudus, lalu nanya runding iya pasal pekara nya. Kesuah agi, orang deka nemu mayuh agi pasal Bup Kudus.

17, 18. (a) Baka ni nuan ulih nyadi berani agi lebuh nginjil ba endur orang mayuh? (b) Nama kebuah nuan ngumbai jaku David ke muji Jehovah ulih nulung lebuh nuan enggau ba pengawa nginjil?

¹⁷ Nuan engka ngasaika tusah deka ngepunka randau enggau orang ke enda dikelala nuan ba jalai. Tu meh utai ti diasaika Eddie, seiku pengerintis ari New York City. Tang iya tetemuka chara ke ulih nulung iya berani agi nginjil. Iya madahka: “Maya belajarka Bup Kudus ba diri sebilik, aku enggau bini aku ngaga pansik pasal chara dikena mutarka jaku bantah sereta runding ke dibantai orang. Kami duai mega minta penemu ari bala Saksi ke bukai.” Diatu Eddie enda sabar deka enggau nginjil ba endur orang mayuh.

¹⁸ Enti kitai rindu agi ngereja pengawa nginjil sereta mansang ba chara bejaku enggau orang pasal berita manah, orang bukai deka meda pemansang kitai ba rohani. (Bacha 1 Timoti 4:15.) Lalu kitai ulih nulung orang nyadi nembiak Jehovah. David madahka: ‘Aku deka seruran meri terima kasih ngagai Jehovah. Aku enggai badu muji Iya. Aku deka muji Iya ketegal utai ti udah dikereja Iya. Awakka semua orang ke kena tekan, mending lalu gaga ati!’—Mas. 34:1, 2.

19. Nama kebuah nembiak Jehovah ke taluk patut lantang ati, taja pan bisi utai nekul ba pengidup?

¹⁹ David mega madahka: ‘Semua utai ti idup ti udah digaga Nuan, O Jehovah, deka meri terima kasih ngagai Nuan, lalu semua nembiak Nuan deka muji Nuan. Sida deka bejakuka pasal mulia diraja Nuan lalu madahka pasal kuasa Nuan, ngambika semua orang nemu pemesai pengawa Nuan enggau pemesai mulia perintah Nuan.’ (Mas. 145:10-12) Semua orang ke rinduka Jehovah sereta taluk ke Iya bisi pengeran ti balat deka madah ngagai orang bukai pasal Iya. Tang baka ni enti pengerai tauka umur ke udah tuai ngasuh  nuan enda ulih ngena mayuh jam nginjil ari rumah ke rumah? Anang enda ingat, nuan muji Jehovah tiap kali nuan bejaku pasal Iya ngagai orang ke ngelingi nuan baka bala misi tauka lutur. Enti nuan dijil ketegal pengarap nuan, nuan agi ulih madah ngagai orang bukai pasal Jehovah, lalu tu ngelantangka ati Iya. (J-lam. 27:11) Iya mega balat lantang ati enti nuan nyembah Iya, taja pan orang ke sebilik enggau nuan enda. (1 Pet. 3:1-4) Indah ba maya ti balat tusah, nuan ulih muji Jehovah, majak semak agi ngagai Iya sereta ngaga pemansang ba rohani.

20, 21. Enti nuan diberi mayuh agi pengawa ba gerempung Jehovah, baka ni nuan ulih nyadi berekat ke orang bukai?

²⁰ Jehovah tentu deka merekatka nuan enti nuan majak semak agi ngagai Iya sereta enggau naka ulih nyembah Iya. Engka enggau ngaga sekeda ubah ba jadual tauka gaya pengidup, nuan deka bisi mayuh agi peluang nulung orang belajar pasal semaya Petara ti ngerinduka ati. Nuan mega ulih nulung bala menyadi Kristian lelaki enggau mayuh agi. Lalu pikirka penalam pengerindu ari bala menyadi Kristian ngagai nuan lebuh sida nemu nuan bebendar gawa ba gempuru!

²¹ Enda ngira ni pengelama kitai udah nyembah Jehovah, semua kitai ulih terus majak semak agi ngagai Iya sereta ngaga pemansang ba rohani. Ba artikel pengudah tu, kitai deka berandauka chara kitai ulih nulung orang bukai ngaga pemansang ke baka nya.