1. Nama dipadah Isaiah pasal Jesus, lalu nama kebuah nya meransang ati?

UTAI ti dipadah Isaiah pasal Jesus Kristus meransang kitai sereta meri pengadang. Isaiah madahka Jesus “enda ngakim beduduk ba utai ti dipeda iya, tauka ba utai ti ditusui orang ngagai iya” lalu iya “deka ngakim orang ke seranta ngena atur ti lurus.” (Isa. 11:3, 4) Nama kebuah tu meransang ati? Laban kitai diau ba dunya ke penuh enggau ulah ti bepilih mata, lalu orang ngakim pangan diri beduduk ba utai ti dipeda. Kitai amat begunaka Hakim ti sempurna, Jesus, ke enda ngakim beduduk ba utai ti dipeda!

2. Nama utai ti diasuh Jesus gaga kitai, lalu nama deka dipejurai kitai ba artikel tu?

² Ninting hari, kitai bisi runding kediri empu pasal orang. Tang kitai enda sempurna baka Jesus, nya alai utai ti dirunding kitai pasal orang engka salah. Kitai jampat dikuingka utai ti dipeda kitai. Tang Jesus bepesan: “Anang ngakim beduduk ba utai ti dipeda, tang ngakim ngena pengelurus.” (Jhn. 7:24) Nya alai Jesus deka kitai neladan iya lalu enda ngakim orang  beduduk ba utai ti dipeda. Ba artikel tu, kitai deka bejuraika tiga iti pekara ke ulih nguingka runding kitai: bansa tauka asal menua, pengaya, enggau umur seiku-seiku orang. Ba tiap iti pekara nya, kitai deka belajarka chara kitai ulih ngasika Jesus lalu enda ngakim orang beduduk ba utai ti dipeda.

3, 4. (a) Nama kebuah Peter ngubah runding iya pasal orang ari bansa bukai? (Peda gambar ba pun artikel.) (b) Nama penemu baru ti diajar Petara ngagai Peter?

³ Uji pikirka baka ni asai ati rasul Peter lebuh iya diasuh ke Siseria, ngagai rumah seiku orang ari bansa bukai ke benama Kornelius! (SKR. 10:17-29) Kenyau ari mit Peter pechaya, orang ari bansa bukai nya enda tuchi. Tang bedau lama ti udah, bisi sekeda utai nyadi ke ngasuh iya ngubah runding. Ambika chunto, iya nerima siti genera ari Petara. (SKR. 10:9-16) Dalam genera nya, Peter meda siti utai ke baka kain besai nurun ari langit. Utai nya ngundan mayuh macham jelu ke dikumbai enda tuchi. Udah nya Peter ninga munyi nyawa bejaku: “Angkat nuan Peter, bunuh lalu empa!” Peter majak enggai. Udah nya munyi nyawa nya bejaku: ‘Utai ti udah dituchi Petara, anang nuan ngumbai iya enda tuchi.’ Pengudah begenera, Peter enda meretika utai ti deka dipadahka munyi nyawa nya ngagai iya. Maya nya, seruan ari Kornelius pan datai. Roh kudus ngasuh Peter ngagai rumah Kornelius, nya alai iya mupuk enggau bala seruan nya.

⁴ Enti Peter amat ngakim “beduduk ba utai ti dipeda,” iya tentu enggai ngagai rumah Kornelius. Orang Judah nadai kala ngagai rumah orang ari bansa bukai. Nya alai nama kebuah Peter mupuk kin? Taja pan iya bepilih mata enggau orang ari bansa bukai, genera ke dipeda iya sereta iring ari roh kudus ngubah chara iya berunding. Pengudah Peter mendingka Kornelius, ku Peter madah: ‘Aku nemu Petara endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.’ (SKR. 10:34, 35) Penemu baru tu ngagitka ati Peter, lalu nya deka bekaul enggau semua orang Kristian. Nama kebuah?

5. (a) Jehovah deka semua orang Kristian nemu pasal utai nama? (b) Taja pan kitai nemu pemendar, asai ati ke baka ni engka agi bisi ba kitai?

⁵ Jehovah ngena Peter nulung semua orang Kristian nemu pasal Iya ke enda bepilih mata. Bansa, asal menua, etnik, tauka jaku kitai ukai pekara ti besai ba Jehovah. Seagi-agi kitai nangika Jehovah lalu ngereja utai ti ngena, kitai endang diterima Iya. (Gal. 3:26-28; Pem. 7:9, 10) Nuan engka udah nemu pasal utai tu. Tang baka ni enti sema nuan dibesai ba menua tauka ruang bilik ke ngembuan ulah ti bepilih mata? Taja pan nuan engka ngumbai diri enda bepilih mata, kati asai ati ke ngasuh bepilih mata agi bisi ba nuan? Indah Peter agi nunjukka diri bepilih mata taja pan iya udah nulung orang nemu pasal Jehovah ke enda baka nya. (Gal. 2:11-14) Baka ni  kitai ulih ngasika Jesus lalu badu ngakim orang beduduk ba utai ti dipeda?

6. (a) Nama ulih nulung kitai muai ulah ti bepilih mata? (b) Nama ulih ditemu kitai ari riput ti ditulis seiku menyadi Kristian lelaki?

⁶ Kena nemu sekalika kitai agi bisi asai ati ti baka nya tauka nadai, kitai patut meresa diri empu. Kitai patut mandingka runding sereta asai ati kitai enggau utai ti dipelajar ba Jaku Petara. (Mas. 119:105) Kitai mega ulih ngasuh pangan kitai beratika sekalika kitai bepilih mata tauka enda, laban kitai enda ulih meda ulah nya ba diri empu. (Gal. 2:11, 14) Kitai engka udah sebulu enggau asai ati ke baka nya nyentukka kitai nyau enda nemu diri bepilih mata! Tu nyadi ba seiku menyadi Kristian lelaki ke bisi megai tanggung pengawa ba eklisia. Iya nulis riput ngagai pampang opis pasal sepasang laki bini ke bagas gawa penuh jam ke Jehovah. Laki nya ari raban etnik ke dikemaruhka mayuh orang. Mayuh utai manah ditulis menyadi Kristian lelaki nya pasal laki nya. Tang ku iya nambah: “Taja pan iya ari [bansa tu], ulah enggau chara pengidup iya nulung orang bukai nemu, ukai reti nya datai [ari bansa tu] ngembuan gaya pengidup ti kamah, ti baruh, baka ke selalu dikembuan mayuh sida ari bansa [tu].” Nama ulih dipelajarka kitai? Enda ngira ni pemesai tanggung pengawa ti dikembuan kitai ba gerempung Jehovah, kitai patut meresa diri empu lalu nerima bantu ngambika ulih nemu sekalika kitai agi bisi asai ati ke ngasuh bepilih mata tauka enda. Nama agi ulih digaga kitai?

7. Baka ni kitai mandangka diri “udah nukangka ati”?

⁷ Enti kitai “udah nukangka ati,” kitai deka nganti ulah ti bepilih mata ngena pengerindu. (2 Kor. 6:11-13) Kati nuan rindu agi begulai enggau orang ke sama bansa, asal menua, etnik, tauka jaku enggau nuan? Enti pia, uji begulai enggau orang bukai mega. Nuan tau minta sama nginjil enggau bala menyadi Kristian ke ngembuan gaya pengidup ti enda sama. Tauka nuan tau mai sida makai ba rumah. (SKR. 16:14, 15) Nyau kelama, ati nuan deka penuh laban pengerindu lalu enda agi bepilih mata. Diatu aram kitai bejuraika utai bukai ke engka ngasuh kitai ngakim “beduduk ba utai ti dipeda.”

8. Nama ulih dipelajar kitai ari Adat Lewi 19:15 pasal baka ni pengaya tauka penyeranta ulih nguingka runding kitai pasal orang?

⁸ Pengaya enggau penyeranta ulih nguingka runding kitai pasal orang. Adat Lewi 19:15 madahka: “Anang meri atur ti enda lurus lebuh kita ngatur pechara. Anang bepilih mata enggau orang ke seranta, tauka nangika orang ke kaya. Kita patut ngakim orang bukai enggau lurus.”

9. Nama pekara nyinuka ati ke ditulis Solomon, lalu nama ulih dipelajarka kitai?

⁹ Baka ni pengaya enggau penyeranta  ulih nguingka runding kitai pasal orang? Nengah iring roh kudus, Solomon nulis pekara ti nyinuka ati tu: “Nadai orang deka rinduka orang ke seranta. Indah orang ke berimbai pendiau enggau sida deh enda rinduka sida, tang orang ke kaya mayuh pangan.” (J-lam. 14:20) Nama dipelajar kitai ari jaku dalam tu? Enti kitai enda bejimat, kitai engka deka begulai enggau bala menyadi Kristian ke kaya aja, enggai begulai enggau sida ke seranta. Nama kebuah nya enda patut ngakim orang beduduk ba sekalika sida bisi reta tauka nadai?

10. James nangkan orang Kristian pasal utai nama?

¹⁰ Enti kitai ngakim orang beduduk ba sekalika orang nya kaya tauka seranta, kitai ngujungka bala menyadi Kristian bepechah-belah. Tu nyadi ba sekeda orang Kristian ba abad keterubah, lalu James nangkan sida pasal utai tu. (Bacha James 2:2-5.) Kitai enda tau nejuka bala menyadi Kristian kitai bepechah-belah. Tang baka ni kitai ulih nyeliahka diri ari ngakim orang beduduk ba utai ti dikemisi sida?

11. Ulih reta ngachau kaul orang enggau Jehovah? Terangka.

¹¹ Kitai patut ngembuan runding ti sama baka Jehovah pasal bala menyadi Kristian kitai. Ukai pengaya tauka penyeranta ke ngasuh orang enda beguna ba Jehovah. Kaul kitai enggau Jehovah enda bepanggai ba pemayuh duit tauka  reta ti dikemisi kitai. Jesus amat bisi nyebut “mar amat meh orang ke kaya tama ngagai Perintah serega,” tang iya nadai madahka sida enda ulih tama. (Mat. 19:23) Jesus mega madahka: ‘Beberekat meh kita ke seranta, laban kita deka bempu Perintah Petara!’ (Luk. 6:20) Tang tu ukai reti semua orang ke seranta deka ningaka Jesus lalu bulih berekat ti spesial. Bisi mayuh orang ke seranta enda nitihka Jesus. Iya ke bendar, kitai enda ulih ngakim kaul orang enggau Jehovah beduduk ba reta ti dikemisi sida.

12. Nama ulih dipelajarka orang ke kaya enggau ke seranta ari Bup Kudus?

¹² Bala nembiak Jehovah bisi nya kaya, bisi nya seranta. Tang semua sida rinduka Jehovah sereta nyembah Iya enggau pengabis ati. Bup Kudus enda ngasuh orang ke kaya ‘manggaika pengadang sida ba pengaya ti tau lenyau, tang ba Petara.’ (Bacha 1 Timoti 6:17-19.) Jaku Petara mega nangkan semua nembiak Jehovah, baik sida nya kaya tauka seranta, ngambika enda angkunka duit laban nya tau ngemedis. (1 Tim. 6:9, 10) Enti kitai ngembuan runding ti sama baka Jehovah pasal bala menyadi Kristian, kitai tentu enggai ngakim sida beduduk ba utai ti dikemisi sida. Tang baka ni enggau umur seiku-seiku orang? Kati nya tau dikena ngakim orang?

13. Nama diajar Bup Kudus pasal mandangka basa ngagai orang ke tuai umur?

¹³ Bup Kudus suah madahka kitai patut bebasaka orang ke tuai umur. Adat Lewi 19:32 madahka: ‘Bediri lebuh orang ke tuai umur mansa, lalu bebasaka sida. Nangika Petara kita. Aku tu Jehovah.’ Jaku Dalam 16:31 madahka: “Upah orang ke lurus nya umur ti panjai; bulu pala ti buban nya makota ti bemulia.” Paul enda ngasuh Timoti ngembuan runding ti enda manah ngagai orang ke tuai umur, tang deka Timoti begulai manah enggau sida baka apai iya empu. (1 Tim. 5:1, 2) Taja pan Timoti ngembuan penuduk ti tinggi agi ari sida lalu ulih meri iring ngagai sida, iya seruran kasih sereta bebasaka sida.

14. Ni maya kitai patut ngerara sida ke tuai umur?

¹⁴ Baka ni enti sema orang ke tuai umur nya sengaja ngereja pengawa ti bedosa tauka ngereja utai ti enda ngelantangka ati Jehovah? Jehovah tetap ngukum iya, taja pan iya orang ke tuai umur sereta dipebasa. Peratika prinsip ba Isaiah 65:20, NW: “Lalu orang ke bedosa deka disumpah, taja pan umur iya seratus taun.” Kitai beratika prinsip ti sama dalam genera Esekiel. (Esk. 9:5-7) Utai ke berat agi nya, kitai bebasaka Jehovah ke idup belama iya. (Dan. 7:9, 10, 13, 14) Ulah kitai ti bebasaka Iya nulung kitai berani ngerara orang ke begunaka bantu, enda ngira penuai umur orang nya.—Gal. 6:1.

15. Nama dipelajarka kitai ari rasul Paul pasal mandangka basa ngagai bala menyadi Kristian lelaki ke biak?

¹⁵ Kati enti menyadi Kristian lelaki nya biak? Kati iya patut dipebasa? Au. Ku Paul nulis ngagai Timoti: “Anang nejuka orang ngemaruhka nuan ketegal nuan agi biak, tang awakka nuan empu, ari jaku, ulah, pengerindu, pengarap enggau pengidup nuan ti tuchi, nyadi teladan ke orang ti arap.” (1 Tim. 4:12) Lebuh Paul nulis tu, umur Timoti engka kira-kira 30 taun. Tang Paul udah meri iya tanggung pengawa ti besai. Nama ulih dipelajarka kitai? Kitai enda patut ngakim bala menyadi lelaki ke biak beduduk ba umur sida. Uji  pikirka semua utai ti udah digaga Jesus lebuh umur iya 33 taun!

16, 17. (a) Baka ni bala tuai gempuru nentuka menyadi Kristian lelaki nya layak nyadi penulung gempuru tauka tuai gempuru? (b) Baka ni penemu diri tauka adat ba siti-siti menua engka ngelaban standard Bup Kudus?

¹⁶ Ba sekeda menua, orang enda bebasaka bala lelaki ke biak. Tu ngasuh sekeda tuai gempuru enda nganjung nama sida lelaki ke biak taja pan sida layak nyadi penulung gempuru tauka tuai gempuru. Tang Bup Kudus nadai natak umur orang ke tau dipadu nyadi penulung gempuru tauka tuai gempuru. (1 Tim. 3:1-10, 12, 13; Tit. 1:5-9) Tuai gempuru enda nitihka Jaku Petara enti iya netapka atur pasal utai tu beduduk ba adat menua diri. Bala tuai gempuru enda tau ngakim sida lelaki ke biak beduduk ba penemu diri tauka adat ba menua diri, tang beduduk ba standard dalam Jaku Petara.—2 Tim. 3:16, 17.

¹⁷ Enti bala tuai gempuru enda nitihka standard Bup Kudus, sida ngenan bala menyadi lelaki ke layak ari dipadu nyadi penulung gempuru tauka tuai gempuru. Ba siti menua, seiku penulung gempuru bejalaika pengawa iya enggau manah, lalu bala tuai gempuru beratika iya nitihka syarat nyadi tuai gempuru. Taja pia, sekeda tuai gempuru ke tuai umur ngumbai iya kelalu biak nyadi tuai gempuru, nya alai sida enda nganjung nama iya. Sayau amat, iya enda nyadi dipadu ketegal iya agi biak. Lalu runding ke baka tu bisi ba mayuh menua. Manah agi bepanggai ba Bup Kudus, ukai bepanggai ba penemu diri tauka adat ba menua diri. Enggau nya, kitai deka ngasika Jesus lalu badu ngakim orang bukai beduduk ba utai ti dipeda.

18, 19. Nama deka nulung kitai ngembuan runding ti sama baka Jehovah pasal bala menyadi Kristian kitai?

¹⁸ Kitai enda sempurna, tang kitai agi ulih belajar enda bepilih mata enggau orang bukai baka Jehovah. (SKR. 10:34, 35) Nya alai kitai patut seruran beratika jaku tangkan ari Jaku Petara. Lebuh kitai nitihka jaku tangkan nya, kitai ngasika pesan Jesus ke enda ngasuh “ngakim beduduk ba utai ti dipeda.”—Jhn. 7:24.

¹⁹ Enda lama agi, Raja kitai Jesus Kristus, deka ngakim semua orang. Iya ngereja nya ngena standard Petara ti lurus, ukai beduduk ba utai ti dipeda tauka didinga. (Isa. 11:3, 4) Kitai enda sabar nganti maya nya datai!