1. Nama nunjukka Jehovah nya gerah jari?

TERUBAH IYA, Jehovah kediri aja. Tang udah nya Iya nempa melikat enggau mensia lalu meri sida pengidup. Jehovah, ‘Petara ti beberekat’ tauka Petara ti gaga ati, rindu meri utai ti manah. (1 Tim. 1:11; Jas. 1:17) Lalu ketegal Jehovah deka kitai gaga ati, nya alai Iya ngajar kitai ngambika gerah jari.—Rom. 1:20.

2, 3. (a) Nama kebuah kitai gaga ati lebuh gerah jari? (b) Nama deka dipelajarka kitai ba artikel tu?

² Jehovah nempa mensia neladan gamal Iya. (P-kal. 1:27) Reti nya Iya nempa kitai ngambika ngembuan kualiti ti sebaka enggau Iya. Ngambika ulih gaga ati sereta bulih berekat ari Jehovah, kitai patut neladan Iya. Kitai patut ibuhka orang bukai sereta nyadi orang ke gerah jari. (Plp. 2:3, 4; Jas. 1:5) Nama kebuah? Laban kitai endang ditempa Iya baka nya. Taja pan kitai enda sempurna, kitai ulih neladan Jehovah sereta mega gerah jari.

 ³ Diatu kitai deka berandauka sekeda utai ke diajar Bup Kudus pasal gerah jari. Kitai deka belajarka kebuah Jehovah lantang ati lebuh kitai gerah jari. Kitai mega deka belajar baka ni gerah jari ulih nulung kitai ngereja pengawa ke udah diberi Jehovah sereta kebuah kitai gaga ati lebuh kitai gerah jari. Lalu kitai deka berandauka kebuah kitai patut seruran gerah jari.

4, 5. Baka ni Jehovah seduai Jesus nunjukka diri gerah jari, lalu nama kebuah kitai patut neladan seduai iya?

⁴ Jehovah deka kitai neladan Iya, nya alai Iya gaga ati lebuh kitai gerah jari. (Eps. 5:1) Jehovah mega deka mensia gaga ati. Kitai nemu tu amat laban kitai, dunya, sereta semua utai ke bisi ba dunya ditempa Iya enggau chara ti ngalitka ati lalu utai nya ngelantangka ati kitai. (Mas. 104:24; 139:13-16) Nya alai kitai ngemuliaka Jehovah lebuh kitai nguji ngagaka ati orang bukai.

⁵ Kitai mega neladan Jesus, ke netapka teladan ti badas pasal baka ni mensia ulih gerah jari. Ku iya madahka: ‘Anak Mensia ke datai ukai minta diri dibela, tang laban iya deka mela, lalu nyerahka nyawa diri kena nebus orang mayuh.’ (Mat. 20:28) Lalu rasul Paul meransang orang Kristian: ‘Gaga runding kita sebaka enggau runding Jesus Kristus . . . Iya ngelengkaka semua nya, lalu ngaga diri nyadi ulun.’ (Plp. 2:5, 7) Nya alai kitai ulih nanya diri empu, ‘Kati ulih aku nitihka teladan Jesus enggau manah agi?’—Bacha 1 Peter 2:21.

6. Nama ulih dipelajarka kitai ari cherita pasal orang Samaria ke ditusui Jesus? (Peda gambar ba pun artikel.)

⁶ Jehovah lantang ati lebuh kitai nitihka teladan badas ti udah ditetapka seduai iya Jesus. Kitai neladan seduai iya lebuh kitai ibuhka orang sereta ngiga chara nulung sida. Jesus nunjukka tu beguna lebuh iya nusui cherita pasal seiku orang Samaria. (Bacha Luke 10:29-37.) Iya ngajar bala murid iya nulung orang, enda ngira sapa orang nya tauka ari ni penatai sida. Kati nuan agi ingatka kebuah Jesus nusui cherita nya? Laban seiku orang Judah bisi nanya iya: “Sapa pangan aku?” Saut ari Jesus nunjukka kitai enda tau enda gerah jari baka orang Samaria nya enti deka ngelantangka ati Jehovah.

7. Baka ni kitai ngayanka diri pechaya chara Jehovah ngereja utai nya ti pemadu badas? Terangka.

⁷ Siti agi kebuah kitai patut gerah jari nya bekaul enggau utai ti nyadi ba Kebun Eden. Sitan madahka Adam seduai Hawa deka gaga agi ati enti enda ngasika Jehovah lalu berundingka diri empu aja. Hawa berundingka diri empu lalu deka nyadi baka Petara. Adam berundingka diri empu lalu deka agi ngelantangka ati Hawa, ukai ngelantangka ati Petara. (P-kal. 3:4-6) Pengujung iya balat ngenusahka. Nadai orang ulih gaga ati lebuh sida berundingka diri empu aja. Tang lebuh kitai gerah jari sereta enda berundingka diri empu, kitai ngayanka diri pechaya chara Jehovah ngereja utai nya ti pemadu badas.

8. Nama kebuah Adam seduai Hawa patut ngira orang bukai?

⁸ Taja pan Adam seduai Hawa kediri ba Kebun Eden, tang seduai iya patut ngira orang bukai. Nama kebuah? Jehovah udah meri seduai iya pengawa. Iya ngasuh  seduai iya ngemenuhka dunya enggau bala anak sereta ngaga dunya nyadi paradais. (P-kal. 1:28) Adam seduai Hawa patut nulung bala anak seduai iya ke dudi hari ila gaga, sama baka Jehovah ti dekaka semua orang ba dunya gaga. Semua sida deka bekerejasama ngaga serata dunya nyadi paradais. Nya siti pengawa ti besai!

9. Nama kebuah mensia ulih gaga ati lebuh ngaga dunya nyadi paradais?

⁹ Mensia ti sempurna patut mega sama bekereja enggau Jehovah enti deka ngaga dunya nyadi paradais sereta ngamatka peneka Iya. Uji gambarka pengaga sereta ati ti puas ke diulih ari ngereja pengawa tu! Jehovah tentu merekat seduai iya ketegal ibuhka orang bukai sereta enda ngira diri empu.

10, 11. Nama ulih nulung kitai nginjil sereta ngaga orang nyadi murid?

¹⁰ Kemayaharitu, Jehovah udah meri kitai siti pengawa ti spesial. Iya deka kitai nginjil sereta ngaga orang nyadi murid. Ngambika ulih ngereja tu, kitai patut ibuhka orang. Lalu kitai ulih terus ngereja pengawa tu enti kitai bisi tuju ti betul: rinduka Jehovah sereta orang.

¹¹ Paul madahka iya enggau bala menyadi Kristian ke bukai ba abad keterubah nya orang ke ‘sama bekereja enggau Petara’ laban sida nginjil sereta ngajar orang pemendar. (1 Kor. 3:6, 9) Kemayaharitu, kitai mega ulih ‘sama bekereja enggau  Petara’ enti kitai gerah jari ngena jam, pengering, sereta reta kitai lebuh bejalaika pengawa nginjil ke udah diberi Petara. Tu endang basa ti besai!

12, 13. Nama berekat ke deka diulih enti ngaga orang nyadi murid?

¹² Kitai gaga ati enti kitai gerah jari ngena jam enggau pengering kitai lebuh nginjil sereta ngajar orang. Nya meh utai ti dipadah mayuh bala menyadi Kristian ke bisi peluang ngajar orang Bup Kudus. Kitai gaga ati meda pemelajar kitai gagit ati lebuh sida meretika utai ti diajar Bup Kudus, mansang ba pengarap, ngaga ubah ba pengidup, lalu berengkah madahka utai ti dipelajar ngagai orang. Jesus mega gaga ati lebuh 70 iku penginjil ke dianjung iya “pulai enggau ati ti gaga” ketegal bulih asil ti manah.—Luk. 10:17-21.

¹³ Bala menyadi Kristian kitai di serata dunya gaga ati lebuh meda pesan Bup Kudus ngemanahka agi pengidup orang. Ambika chunto, Anna, seiku menyadi Kristian indu ke agi biak sereta rumpas deka ngereja mayuh agi pengawa ke Jehovah. * (Peda nota kaki.) Nya alai iya pindah ngagai siti endur ke begunaka mayuh agi penginjil di Eropah Timur. Ku iya nulis: “Ditu bisi mayuh peluang ngajar orang Bup Kudus, lalu aku rindu amat enggau utai nya. Pengawa aku nya ngagaka ati. Lebuh udah pulai ke rumah, aku nadai hari berundingka penanggul diri. Aku berundingka penanggul sereta pengirau ti ditapi orang ke diajar aku. Aku ngiga chara dikena meransang sereta nulung sida. Lalu aku pechaya ‘gaga ati agi orang ke meri, ari orang ke nerima.’”—SKR. 20:35.

14. Nama patut digaga nuan ngambika ulih gaga ati nginjil taja pan orang enggai mending?

¹⁴ Taja pan orang enggai mendingka kitai, kitai ulih gaga ati laban kitai meri sida peluang mendingka berita manah. Jehovah deka kitai ngereja utai ti sama baka ke diasuh Iya kereja Esekiel: “Nuan deka madahka ngagai sida sebarang utai ti diasuh Aku sebut nuan, nemuka sida mending tauka enda.” (Esk. 2:7; Isa. 43:10) Nya alai, sekalika orang mending tauka enda, Jehovah gaga ati enggau pengawa kitai ke bebendar nginjil. (Bacha Hebrew 6:10.) Ku seiku menyadi Kristian lelaki madah pasal pengawa nginjil: “Kitai nanam, manjah, lalu ngarapka Jehovah nulung orang ngaga pemansang.”—1 Kor. 3:6.

15. Kati kitai semina gerah jari lebuh orang beterima kasih ngagai kitai? Terangka.

¹⁵ Jesus deka kitai gerah jari laban nya ulih ngagaka ati kitai. Lebuh kitai gerah jari, mayuh orang deka gerah jari ngagai kitai. Nya alai iya meransang kitai: “Telebaka diri meri, lalu orang bukai mega deka meri ngagai kita. Sida deka nepu ba gari luar kita takar ti chukup, ti dienyak, ti digusak, ti meruap lalu lilih. Laban takar ti dikena kita nakar deka dikena nakar utai ke kita.” (Luk. 6:38, NW) Amat, ukai semua orang deka beterima kasih lebuh nuan gerah jari. Tang taja pan orang enda beterima kasih, anang ngetu gerah jari.  Nuan enda nemu pemayuh pemanah ke ulih dikereja nuan ketegal siti pengawa ti gerah jari.

16. Ngagai sapa kitai patut gerah jari, lalu nama kebuah?

¹⁶ Orang ke gerah jari enda ngarapka balas. Jesus madahka: “Tang lebuh nuan nyendiaka pengerami makai besai, ambi ngabang orang ke seranta, ke kait-kupit, ke lemi, enggau ke buta. Nya baru nuan deka bulih berekat, laban sida enda ulih malas pemanah nuan.” (Luk. 14:13, 14) Bup Kudus mega madahka: “Orang ke gerah mudah . . . deka bulih berekat,” sereta ‘Gaga ati meh orang ke nemu siru enggau orang ke seranta.’ (J-lam. 22:9; Mas. 41:1) Kitai patut gerah jari ketegal kitai keran deka nulung orang.

17. Nama sekeda chara gerah jari ke ngasuh kitai gaga ati?

¹⁷ Lebuh Paul ngambi jaku Jesus ke madahka ‘gaga ati agi orang ke meri, ari orang ke nerima,’ iya ukai semina bejaku pasal meri duit tauka barang. Kitai mega ulih meri orang jaku peransang, jaku ajar ari Bup Kudus, sereta bantu. (SKR. 20:31-35) Ari jaku enggau pengawa, Paul ngasuh kitai gerah jari enggau jam, pengering, pengibuh, sereta pengerindu kitai.

18. Nama dipadah bala pakar pasal gerah jari?

¹⁸ Bala pakar ke mansik pendiau mensia mega pechaya, ulah ke gerah jari ngagaka ati orang. Nitihka siti artikel, orang madahka diri gaga agi ati pengudah sida ngereja utai ti manah ke orang bukai. Bala pemansik madahka pengidup kitai  bisi tuju sereta reti lebuh kitai nulung orang. Nya alai sekeda pakar madahka orang ke enggau pengawa sukarela deka gerai sereta gaga agi. Amat, utai ke ditemu sida tu enda ngenyitka ati kitai laban Penempa kitai, Jehovah, seruran madahka gerah jari nya ngagaka ati kitai.—2 Tim. 3:16, 17.

19, 20. Nama kebuah nuan deka gerah jari?

¹⁹ Lebuh orang ke ngelingi kitai semina ibuhka diri empu aja, tu ngasuh kitai tusah deka mengkang gerah jari. Tang Jesus ngingatka kitai, dua iti pesan ti pemadu besai nya rinduka Jehovah enggau pengabis ati, pengabis semengat, pengabis runding, enggau pengabis pengering kitai sereta rinduka orang bukai baka diri empu. (Mrk. 12:28-31) Ba artikel tu kitai belajar, orang ke rinduka Jehovah neladan Iya. Jehovah enggau Jesus bela gerah jari. Seduai iya meransang kitai neladan seduai iya laban seduai iya nemu tu ulih ngagaka ati kitai. Enti kitai gerah jari ngereja utai ke Jehovah sereta ke orang ti berimbai pendiau enggau kitai, kitai deka ngemuliaka Jehovah lalu ngenataika penguntung ke diri empu sereta orang bukai.

²⁰ Nuan tentu udah enggau naka ulih gerah jari sereta nulung orang kelebih agi ngagai bala menyadi Kristian kitai. (Gal. 6:10) Enti nuan enda ngetu ngereja nya, orang deka beterima kasih sereta sayauka nuan, lalu nuan deka gaga ati. Bup Kudus madahka: “Orang ke meri enggau ati ti gerah mudah, deka nyadi kaya-raja. Orang ke nulung orang bukai, deka bulih tulung ari orang.” (J-lam. 11:25) Ba pengidup enggau pengawa Kristian kitai, kitai bisi mayuh chara kena mandangka diri enda berundingka diri empu, siru sereta gerah jari. Aram kitai berandauka sekeda chara nya ba artikel pengudah tu.