Nama kebuah nadai orang dikemendarka mandangka litaricha Saksi-Saksi Jehovah ba laman web bukai tauka ba media sosial?

Ketegal litaricha kitai diberi enggau pechuma, sekeda orang ngumbai sida ulih ngupi tauka mandangka litaricha kitai ba laman web bukai tauka ba media sosial. Tang tu ulih ngujungka penanggul ti besai sereta ngelanggar Syarat Ngena a (peda nota kaki) laman web kitai. Syarat Ngena enggau terang madahka nadai orang dikemendarka “ngengkahka asil lukis, litaricha elektronik, chap dagang, musik, gambar, video tauka artikel ari laman web tu ba Internet (sebarang laman web, laman bekunsi fail, laman bekunsi video, tauka media rama).” Nama kebuah enda tau ngelanggar syarat tu?

Semua utai ke bisi ba laman web kitai dilindung ngena undang-undang. Tu ulih nyeliahka salah guna. Orang ke limpang ari pemendar sereta sida ke bukai ti nagang pengawa kitai kadang-kadang nyimpan litaricha kitai dalam laman web sida ngambika ulih narit ati Saksi-Saksi Jehovah sereta orang bukai. Tang ba laman web nya sida mega nyimpan utai ke ulih ngelimpangka runding orang. (Masmur 26:4; Jaku Dalam 22:5) Sekeda nya ngena utai ke bisi ba laman web kitai tauka logo jw.org ba iklan, ba aplikasi telefon, sereta ba barang ke dijual sida. Tang ketegal utai ke bisi ba laman web kitai tauka logo kitai dilindung undang-undang, kitai ulih ngagai kot lalu ngetuka pengawa sida nya. (Jaku Dalam 27:12) Tang kot engka enda nyukung kitai enti kitai ngelakka sekeda orang, nyengkaum menyadi Kristian kitai, mandangka litaricha kitai ba laman web bukai tauka nyual barang ngena logo jw.org.

Enti kitai download litaricha kitai ari laman web bukai kelimpah ari jw.org, tu ulih ngenusahka. Jehovah meri kitai utai ti diguna ba pengarap nengah “ulun ke tetap ati sereta bepenemu-dalam.” (Matthew 24:45) “Ulun” nya semina nyediaka utai ti diguna ba pengarap nengah laman web baka www.pr418.com, tv.pr418.com sereta wol.pr418.com aja. Lalu kitai semina bisi tiga iti aplikasi ke perengka elektronik—JW Language^®, JW Library^®, sereta JW Library Sign Language^®. Ba laman web sereta aplikasi tu, kitai nadai tetemuka sebarang iklan tauka sebarang utai ari dunya Sitan. Tang enti kitai ngulihka litaricha kitai ari laman web tauka aplikasi bukai, tu ulih ngenusah laban utai nya engka udah diubah.—Masmur 18:26; 19:8.

Kelimpah ari nya, enti kitai mandangka litaricha kitai ba laman web ke alai orang ulih meri komen, tu mega meri peluang ngagai orang ke limpang ari pemendar sereta sida ke bukai bejaku jai pasal gerempung Jehovah. Udah nya sekeda bala menyadi kitai bekelikuh enggau orang tu, lalu utai nya mega enda ngenataika mulia ngagai Jehovah. Bekelakar ba Internet baka nya ukai chara ti betul kena ngubah runding orang tauka nulung orang meretika pemendar. (1 Timoti 6:3-5; 2 Timoti 2:23-25) Pia mega, sekeda orang ngaga laman web sereta media sosial baka ke datai ari gerempung kitai, tauka ari Raban ti Ngiring. Tang, tu utai ti bula. Nadai seiku ari Raban ti Ngiring bisi laman Web kediri empu tauka bisi akaun ba laman media sosial.

Lebuh kitai mai orang ngagai jw.org, kitai nyukung pengawa nusui ‘berita manah.’ (Matthew 24:14) Laman web enggau aplikasi kitai majak manah. Kitai deka semua orang bulih penguntung ari laman web enggau aplikasi kitai. Nya alai kitai dikemendarka nganjung litaricha ari laman web kitai nengah email ngagai orang bukai, tauka nganjung link laman web kitai ngagai sida. Enggau chara tu, kitai nulung orang nemu siti aja chara ke dikena Jehovah nyediaka utai ti diguna ba pengarap iya nya nengah “ulun ke tetap ati sereta bepenemu-dalam.”