TAUN nyin kemari, beribu iku bala menyadi Kristian ke lelaki di serata dunya dipilih nyadi tuai gempuru enggau penulung gempuru. Enti nuan nya seiku ari sida ke baru dipilih megai tanggung pengawa nya, nuan tentu gaga ati ulih gawa ke Jehovah enggau ke bala menyadi.

Nuan engka mimit irau, tang tu utai ti suah nyadi. Jason, seiku tuai gempuru ke biak madahka: “Lebuh keterubah iya aku dipilih, aku ngasaika tanggung pengawa ti baru nya amat tusah.” Moses enggau Jeremiah mega ngasaika diri enda layak lebuh nerima tanggung pengawa ti baru ari Jehovah. (Pemansut 4:10; Jeremiah 1:6) Enti nuan ngasaika utai ti sama, baka ni nuan ulih andal agi sereta terus ngaga pemansang? Nuan ulih belajar ari chunto Timoti.—Kereja Rasul 16:1-3.

Maya Timoti berengkah bejalai jauh enggau rasul Paul, iya engka beumur kira-kira 20 taun. Lebuh keterubah iya nerima kangau nya, Timoti engka ngasaika diri enda layak ngajar sereta ngelalau orang bukai ketegal iya agi biak. (1 Timoti 4:11, 12; 2 Timoti 1:1, 2, 7) Tang iya enda ngetu ngaga pemansang. Lalu pengudah sepuluh taun, Paul madahka: ‘Enti Tuan nulung, aku ngarapka diri ulih ngasuh Timoti nemuai ngagai kita enda lama da agi.’ Nama kebuah Paul ngasaika baka nya? Ku iya nerangka: “Aku nadai orang bukai ke baka iya.”—Pilipi 2:19, 20.

Nama kebuah Timoti nya teladan ti badas ke bala tuai gempuru? Peratika enam iti kebuah.

1. Iya amat ibuhka orang. Paul madah ngagai bala menyadi Kristian di Pilipi pasal Timoti ke “balat ibuhka” sida. (Pilipi 2:20) Timoti dekaka sida mengkang rapat enggau Jehovah, lalu iya sanggup ngena awak sereta pengering diri nulung sida.

William, ke udah lebih ari 20 taun nyadi tuai gempuru, seruran madah ngagai bala tuai gempuru ke baru dipilih: “Rinduka bala menyadi. Beberatka utai ti diguna sida, ukai beberatka atur pengawa ba eklisia.” Anang baka orang ke deriba bas ti enda ngambi orang ke deka nepan bas ketegal iya deka datai ba stesen bas nitihka jam ti udah ditetapka.

2. Iya ngenuluka pengawa ke Jehovah. Paul madahka Timoti nya enda sama enggau sida ke “berundingka pekara diri empu aja, ukai berundingka pekara Jesus Kristus.” (Pilipi 2:21) Paul nemu bala menyadi Kristian ke ngelingi iya kelalu beberatka pengidup diri empu. Kadang-kadang sida beberat agi ke utai ti dikinginka sida lebih ari gawa ke Jehovah. Tang Timoti enda baka nya! Seagi-agi iya bisi peluang ngereja mayuh agi pengawa ke Petara, iya neladan Isaiah ke madahka: “Tu aku! Kirumka aku!”—Isaiah 6:8, NW.

Baka ni nuan ulih magi awak kena nyediaka utai ti diguna diri empu enggau utai ke diguna ba eklisia? Kesatu, titihka jaku lalau ke diberi Paul: “Milih utai ti pemadu badas.” (Pilipi 1:10) Kenuluka pengawa ke Jehovah. Kedua, seliahka pengawa ti ngena kelalu mayuh awak sereta pengering nuan. Paul ngasuh Timoti: “Seliahka semua pengingin nembiak, lalu bebendar ngulihka pengelurus, pengarap, pengerindu, enggau pemaik.”—2 Timoti 2:22.

3. Iya bebendar gawa ke Jehovah. Ku Paul madah pasal Timoti: ‘Iya ke sama bekereja enggau aku nusui berita manah,  baka anak ke nulung apai.’ (Pilipi 2:22) Timoti nya orang ke bagas. Iya bebendar gawa enggau Paul, lalu nya ngeringka kaul seduai iya.

Bisi mayuh pengawa ke ulih digaga dalam gerempung Jehovah kemayaharitu. Pengawa tu amat ngemuaska ati sereta ulih nulung nuan semak agi enggau bala menyadi Kristian. Nya alai, tentuka nuan ‘seruran bebendar gawa ke Tuan.’—1 Korint 15:58.

4. Iya ngena utai ti udah dipelajar iya. Paul nulis ngagai Timoti: “Nuan udah nemu ajar aku, ulah aku, tuju pengidup aku, pengarap aku, pengeliat ati aku, pengerindu aku, penegap aku.” (2 Timoti 3:10) Timoti ngena utai ti udah dipelajar iya, nya alai iya ulih megai mayuh agi tanggung pengawa.—1 Korint 4:17.

Ulih nuan ngiga seiku tuai gempuru ti bepeneleba ke tau nyadi teladan? Tom, ke udah betaun-taun nyadi tuai gempuru, agi ingatka pasal seiku tuai gempuru ti bepeneleba ke ibuhka iya lalu ngelatih iya enggau manah. Ku iya madahka: “Aku seruran minta lalau ari iya sereta nitihka lalau nya. Tu ngasuh aku andal agi ngereja utai.”

5. Iya enda ngetu ngelatih diri. Paul meri jaku lalau ngagai Timoti: “Patihka diri idup nangika Petara.” (1 Timoti 4:7) Taja pan seiku atlet bisi jurulatih, tang iya agi patut ngelatih diri empu. Paul meransang Timoti: “Bacha Bup Kudus di mua orang mayuh, [“beri peransang,” NW], lalu ajar sida. . . . Kena semua pemeri nya enggau pengabis ati nuan, ngambika semua orang ulih meda pemansang nuan.”—1 Timoti 4:13-15.

Nuan mega patut ngemansangka penau nuan. Bagas belajarka Bup Kudus, lalu seruran nitihka iring ti pemadu baru ari gerempung kitai. Anang kelalu bepanggai ba diri empu. Endang salah enti ngumbai diri udah mayuh peneleba ke ulih nulung nuan mutarka sebarang pekara enggau nadai mansik dulu. Baka Timoti, “jaga diri empu, lalu jaga mega ajar ti diberi nuan ngagai orang.”—1 Timoti 4:16.

6. Iya bepanggai ba roh kudus Jehovah. Lebuh berandau pasal pengawa nginjil Timoti, Paul ngingatka iya: ‘Ngena saup roh kudus ke diau dalam kitai, jaga pesaka ti badas ti udah diserahka ngagai nuan.’ (2 Timoti 1:14) Timoti patut bepanggai ba roh kudus Jehovah.

Donald, ke udah betaun-taun nyadi tuai gempuru, madahka: “Menyadi lelaki ke dipilih enda tau enda ngetanka kaul sida enggau Petara. Nya baru sida deka mansang ‘kering-sekering.’ Enti sida besampi minta roh kudus sereta ngemansangka buah roh kudus, sida deka nyadi berekat ke bala menyadi Kristian sida.”—Masmur 84:7; 1 Peter 4:11.

Kitai berasai diperansang lebuh meda penulung gempuru sereta tuai gempuru ti baru, baka nuan, terus ngaga pemansang dalam pengawa ke Jehovah. Jason, ke disebut ba pun tadi madahka: “Maya aku nyadi tuai gempuru, aku mayuh belajar lalu tu ngasuh aku andal agi. Diatu aku amat gaga enggau pengawa aku sereta ngumbai nya siti peluang ti manah!”

Kati nuan deka terus ngaga pemansang? Enti nuan nitihka teladan Timoti, nuan deka mega nyadi berekat ke bala menyadi Kristian.