1. Baka ni chara kitai ulih sama bekereja enggau Jehovah?

 LEBUH Jehovah nempa mensia, Iya dekaka sida sama bekereja enggau Iya. Taja pan mensia kemayaharitu enda sempurna, orang ke tetap ati agi ulih sama bekereja enggau Jehovah ninting hari. Ambika chunto, kitai “sama bekereja enggau Petara” lebuh nusui berita manah pasal Perintah Petara sereta ngaga orang nyadi murid. (1 Kor. 3:5-9) Endang basa ti besai udah dipilih Penempa ti pemadu bekuasa ngereja pengawa ti beguna bendar! Tang, kitai ukai semina sama bekereja enggau Jehovah ba pengawa nginjil aja. Ba artikel tu, kitai deka nemu baka ni kitai mega sama bekereja enggau Iya lebuh kitai nulung diri sebilik sereta bala ke bukai ba eklisia, lebuh kitai ngelaluka temuai, lebuh nulung ba projek ke benung digaga gerempung Jehovah di serata dunya, sereta lebuh kitai ngereja mayuh agi pengawa ke Iya.—Kol. 3:23.

 2. Nama kebuah kitai enda patut mandingka utai ti dikereja kitai ke Jehovah enggau utai ti dikereja orang bukai?

² Lebuh belajarka artikel tu, kitai patut ingat umur, pengerai, penanggul, enggau penau tiap iku kitai bebida. Nya alai  anang mandingka utai ti ulih dikereja nuan ke Jehovah enggau utai ti ulih dikereja orang bukai. Rasul Paul madahka: “Genap iku orang patut meresa pengawa diri, lalu enggau nya, iya deka gaga ati ketegal utai ti udah digaga iya, ukai ketegal iya mandingka diri enggau orang bukai.”—Gal. 6:4, NW.

 3. Nama kebuah kitai ulih ngumbai orang ke ngintu diri sebilik nya sama bekereja enggau Petara?

³ Jehovah deka kitai ngintu diri sebilik. Ambika chunto, nuan patut ngulihka belanja ke diguna diri sebilik. Mayuh bala indai nyaga anak di rumah. Lalu bala anak ke udah besai nyaga apai indai ke enda agi ulih ngintu diri empu. Semua nya patut digaga. Bup Kudus madahka: “Barang sapa enda ngintu kaban belayan diri empu, kelebih agi sida sebilik, udah nulak pengarap, lalu jai agi ari orang ke enda arap.” (1 Tim. 5:8) Enti nuan bisi tanggungjawap ba ruang bilik, nuan engka enda ngereja mayuh pengawa ke Jehovah baka ti dikedekaka nuan. Tang anang berasai lemi! Jehovah lantang ati lebuh nuan nyediaka utai ti diguna diri sebilik.—1 Kor. 10:31.

 4. Baka ni apai indai ulih ngenuluka Perintah Petara, lalu nama nyadi lebuh sida ngereja nya?

⁴ Apai indai ke Kristian ulih sama bekereja enggau Jehovah lebuh nulung anak sida ngembuan juluk ati ba pengawa ke Jehovah. Mayuh apai indai udah ngereja tu. Ketegal tu, anak sida mutus deka gawa penuh jam ke Jehovah, taja pan jauh ari apai indai. Sekeda ari bala anak nyadi pengerintis seberai tasik, ngerintis ba endur ke begunaka mayuh agi penginjil, sereta gawa ba Betel. Lebuh anak ba endur ti jauh, apai indai enda ulih suah begulai enggau sida. Tang sida meransang bala anak terus gawa ke Jehovah enda ngira dini alai. Nama kebuah? Laban sida gaga ati meda anak sida ngenuluka Jehovah ba pengidup. (3 Jhn. 4) Mayuh ari apai indai nya berasai gaga baka Hanah, ke madahka diri “nyerahka” tauka nyali anak iya Samuel ngagai Jehovah. Sida ngumbai chara nya basa ti besai ulih sama bekereja enggau Jehovah.—1 Sam. 1:28.

 5. Baka ni nuan ulih nulung bala menyadi Kristian ba eklisia? (Peda gambar ba pun artikel.)

⁵ Enti sema nuan nadai tanggungjawap ke patut diperumban ba ruang bilik, ulih nuan nulung bala menyadi Kristian ke sakit, ke tuai tauka sida ti begunaka bantu? Tauka ulih nuan nyaup orang ke ngibun sida? Giga orang ke begunaka bantu baka nya ba eklisia nuan. Ambika chunto, menyadi Kristian indu engka ngibun apai tauka indai ke udah tuai. Ulih nuan nulung iya nyaga apai tauka indai ngambika iya ulih mutarka pekara bukai? Tauka nuan engka nulung mai orang datai begempuru, bebelika barang, tauka ngabas orang ba sepital. Lebuh nuan ngereja nya, nuan sama bekereja enggau Jehovah nyaut sampi menyadi Kristian ke begunaka bantu.—Bacha 1 Korint 10:24.

 6. Baka ni kitai ulih ngayanka diri deka ngelaluka temuai?

⁶ Orang ke sama bekereja enggau Jehovah bisi ulah ke rindu nerima temuai. Ba Bup Kudus, rambai jaku Gerika “ngelaluka temuai” reti iya “manah enggau orang ke enda dikelala.” (Heb. 13:2) Kitai ulih macha sekeda chunto ba Bup Kudus ke ngajar kitai chara ngayanka penyiru baka nya. (P-kal. 18:1-5) Kitai ulih lalu patut  nulung orang lebuh bisi peluang ngereja nya, enda ngira sida ‘sama pengarap enggau kitai’ tauka enda.—Gal. 6:10.

 7. Nama penguntung lebuh nuan ngelaluka bala nembiak Petara ke gawa penuh jam?

⁷ Ulih nuan sama bekereja enggau Jehovah ngelaluka nembiak Iya ti gawa penuh jam ke begunaka endur diau? (Bacha 3 John 5, 8.) Lebuh ngereja nya, kitai enggau sida bela bulih penguntung. Bup Kudus ngumbai nya “sama diperansang.” (Rom. 1:11, 12) Peratika chunto Olaf. Lebuh iya agi biak, seiku tuai ti ngabas ke agi tubuh rumpas datai ngabas eklisia sida lalu begunaka endur diau. Tang nadai orang ba eklisia ulih nulung iya. Olaf nanya apai indai iya ke ukai Saksi, sekalika tuai ti ngabas nya ulih diau ba rumah sida. Apai indai iya setuju, tang Olaf patut tinduk ba kerusi panjai. Olaf tinduk dia, lalu enda nesalka nya. Iya gaga amat ulih enggau tuai ti ngabas minggu nya! Ninting pagi seduai iya dani tumu, lalu berandauka mayuh topik ti ngerinduka ati lebuh makai pagi. Jaku ari tuai ti ngabas meransang Olaf deka gawa penuh jam ke Jehovah. Kenyau 40 taun ti udah, Olaf nyadi pengerintis seberai tasik ba beberapa buah menua.

 8. Nama kebuah kitai patut manah enggau orang taja pan terubah iya sida enda beterima kasih? Beri siti chunto.

⁸ Kitai ulih ngayanka pengerindu ngagai orang ti enda dikelala ngena mayuh chara, taja pan terubah iya sida enda beterima kasih. Ambika chunto, seiku menyadi Kristian indu di Sepanyol belajarka Bup Kudus enggau Yesica, seiku indu ari menua Ecuador. Nyadi sekali lebuh belajarka Bup Kudus, Yesica enda badu-badu nyabak. Nya alai menyadi Kristian indu nya nanya. Yesica madahka iya orang ti seranta sebedau datai ke Sepanyol. Bisi sekali, iya semina ulih meri ai amat ngagai anak indu iya ke agi mit. Yesica besampi minta bantu lebuh iya nindukka anak iya. Enda lama udah nya, dua iku Saksi datai nginjil lalu meri Yesica siti majalah. Tang iya jai adat lalu nyarikka majalah nya. Ku Yesica: “Nama tu pemakai ke diasuh seduai beri ngagai anak aku?” Dua iku menyadi Kristian indu nya nguji ngelantangka ati Yesica, tang iya enggai ninga. Udah nya, seduai iya ninggalka sebakul pemakai ba mua pintu rumah Yesica. Nya alai lebuh benung belajar, iya nyabak laban nyau nemu diri enda bedulika Petara ti udah nyaut sampi iya. Amat, ulah dua iku menyadi Kristian indu ke gerah jari nya ngenataika asil ti manah.—P-jar. 11:1, 6.

9, 10. (a) Ba sekeda pekara ni orang Israel ulih gawa sukarela? (b) Baka ni chara bala menyadi Kristian lelaki ulih nulung ba eklisia kemayaharitu?

⁹ Kelia menya, orang Israel ulih enggau mayuh bengkah pengawa sukarela. (P-sut. 36:2; 1 Ban. 29:5; Neh. 11:2) Kemayaharitu, kitai mega bisi mayuh peluang ngena jam, reta, sereta pengelandik kitai enggau sukarela nulung bala menyadi Kristian. Lebuh ngereja nya, nuan deka gaga ati lalu Jehovah deka merekatka nuan.

 ¹⁰ Jaku Petara meransang sida ke lelaki ba eklisia nyadi penulung gempuru sereta tuai gempuru ngambika ulih sama bekereja enggau Jehovah ngintu bala menyadi Kristian. (1 Tim. 3:1, 8, 9; 1 Pet. 5:2, 3) Sida ke ngereja tu deka meri bantu sereta nulung orang nyembah Petara. (SKR. 6:1-4) Bisi tuai gempuru ngasuh nuan nyadi atendan tauka nulung ba pekara ke bekaul enggau litaricha, endur nginjil, nyeruri, tauka utai bukai? Bala menyadi Kristian lelaki ke nulung ba pekara nya madahka diri gaga ati.

11. Nama penguntung ke diulih seiku menyadi Kristian indu ke enggau projek nirika bengunan?

¹¹ Orang ke gawa sukarela ba projek nirika bengunan suah bulih bala pangan ti baru. Seiku menyadi Kristian indu ke benama Margie udah 18 taun enggau projek nirika Palan Gempuru. Lebuh enggau projek tu, iya ibuhka bala menyadi Kristian indu ke biak lalu nulung ngelatih sida. Iya madahka tu meh chara manah kena sida ke gawa sukarela meransang pangan diri. (Rom. 1:12) Lalu lebuh iya napi penusah ba pengidup, iya bulih jaku peransang ari bala pangan ke udah ditemu iya ba projek nya. Kala nuan gawa sukarela ba projek nirika bengunan? Nuan tau enggau siti-siti projek taja pan nadai pengelandik ngereja pengawa nya.

12. Baka ni nuan ulih nulung pengudah pengerusak alam nyadi?

¹² Kitai mega ulih sama bekereja enggau Jehovah lebuh nulung bala menyadi Kristian udah bekau pengerusak alam. Ambika chunto, kitai ulih meri duit pemeri. (Jhn. 13:34, 35; SKR. 11:27-30) Siti agi chara kitai ulih nulung nya enggau meresi tauka ngaduka utai rusak udah bekau pengerusak alam. Gabriela nya seiku menyadi Kristian indu ari menua Poland. Rumah iya balat rusak ketegal bah besai. Iya berasai gaga amat meda bala menyadi Kristian  ari eklisia bukai datai nulung. Lebuh ngenang pasal pekara nya, iya madahka diri enda irauka reta iya ti udah nadai agi. Iya beberatka utai ti diulih iya. Ku iya madahka: “Utai ke nyadi tu ngasuh aku pechaya, ulih enggau eklisia Kristian nya peluang ti spesial sereta pun pengaga enggau pengelantang.” Mayuh bala menyadi Kristian ke bulih tulung pengudah pengerusak alam ngasaika utai ti sama. Lalu sida ke sama bekereja enggau Jehovah nulung bala menyadi Kristian nya berasai gaga sereta puas ati.—Bacha Kereja Rasul 20:35; 2 Korint 9:6, 7.

13. Baka ni kitai ulih neguhka pengerindu kitai ke Jehovah lebuh bekereja sukarela? Beri siti chunto.

¹³ Stephanie enggau bala penginjil ke bukai gaga ati sama bekereja enggau Petara nulung bala Saksi ke nyadi pelari datai ngagai Amerika Serikat ketegal perang. Sida nulung bala pelari nya ngiga rumah sereta kereban rumah. Ku iya madahka: “Ati kami berasai ditegu ulih pengaga enggau terima kasih sida lebuh sida ngasaika pengerindu bala menyadi Kristian di serata dunya. Sida ngumbai kami udah nulung sida, tang ke bendar, sida ke udah mayuh nulung kami. Pengerindu, penyerakup, enggau ulah ti bepanggai ba Jehovah ke dipeda kami udah neguhka pengerindu kami ke Jehovah, lalu tu ngasuh kami balat agi beterima kasih ke semua utai ti udah diterima kami nengah gerempung Iya.”

14, 15. (a) Nama runding ke dikembuan nabi Isaiah? (b) Baka ni orang Kristian ulih neladan Isaiah?

¹⁴ Kati nuan deka bekereja mayuh agi ke Jehovah? Kati nuan deka pindah ngagai endur ke begunaka mayuh penginjil? Kitai enda ibuh pindah jauh enti deka nyadi orang ke gerah jari. Tang bisi sekeda bala menyadi Kristian kitai ulih ngereja nya. Sida bisi runding ti sama enggau nabi Isaiah. Lebuh Jehovah nanya, “Sapa orang ke patut dikirumka Aku? Sapa orang ke deka nyadi seruan kitai?” aku lalu nyaut, “Tu aku! Kirumka aku!” (Isa. 6:8, NW) Kati nuan sanggup sereta ulih nulung gerempung Jehovah? Baka ni nuan ulih nulung?

¹⁵ Ku Jesus madah pasal pengawa nginjil enggau pengawa nyadika orang murid: “Utai ti diketau mayuh, tang orang ke ngetau mimit. Nya alai besampi minta orang ke bempu umai ngirumka mayuh agi orang ngetau.” (Mat. 9:37, 38) Ulih nuan nyadi pengerintis ba endur ke begunaka mayuh penginjil? Tauka ulih nuan nulung orang bukai ngereja nya? Mayuh  bala menyadi Kristian kitai ngumbai ngerintis ba endur ke begunaka mayuh penginjil nya chara ti pemadu manah kena mandangka pengerindu sida ngagai Petara sereta orang bukai. Ulih nuan berundingka chara bukai kena ngereja mayuh agi pengawa ke Jehovah? Enti ngereja nya, nuan deka gaga ati.

16, 17. Nama chara bukai nuan ulih ngereja mayuh agi pengawa ke Jehovah?

¹⁶ Kati nuan sanggup gawa ba Betel tauka nulung ba projek nirika bengunan, nemuka nya enda lama tauka semina sehari dua aja dalam seminggu? Gerempung Jehovah seruran begunaka orang ke sanggup gawa ba sebarang endur ti begunaka sida sereta ke sanggup ngereja sebarang pengawa ti diberi taja pan sida nadai pengelandik ngereja pengawa nya. Jehovah gaga ati enggau orang ke sanggup ngelengkaka sekeda utai sereta gawa ba sebarang endur ke begunaka sida.—Mas. 110:3.

¹⁷ Kati nuan deka nerima mayuh agi latih ngambika ulih gawa mayuh agi ke Jehovah? Nuan engka tau minta enggau Sekula Penginjil Perintah Petara. Sekula tu ngelatih bala menyadi Kristian ke tegap ba pengarap ke udah gawa penuh jam ke Jehovah ngambika gerempung Jehovah ulih ngena sida enggau mayuh agi. Orang ke enggau sekula tu patut deka gawa ba sebarang endur ke alai sida dianjung. Kati nuan sanggup ngereja mayuh agi pengawa ke Jehovah ngena chara tu?—1 Kor. 9:23.

18. Nama penguntung enti sama bekereja enggau Jehovah ninting hari?

¹⁸ Ketegal kitai nembiak Jehovah, kitai gerah jari, manah, nelap sereta ngembuan pengerindu. Ninting hari kitai ibuhka orang bukai. Lalu tu mai pengaga, pemaik sereta pengelantang ngagai kitai. (Gal. 5:22, 23) Enda ngira nama penanggul ke ditapi, nuan deka gaga ati seagi-agi nuan neladan personaliti Jehovah ke gerah jari sereta nyadi orang ke sama bekereja enggau Iya!—J-lam. 3:9, 10.