1. Sapa nulung ngepunka eklisia ba Pilipi?

LEBUH rasul Paul, Silas, Luke enggau Timoti datai ba menua Pilipi ke dipegai perintah Rome, sida tetemuka mayuh orang ke deka ninga berita manah pasal Perintah Petara. Sida empat nulung ngepunka siti eklisia, engka ba rumah seiku menyadi Kristian indu ke benama Lidia. Lidia amat gerah jari. Lalu mayuh murid begempuru ba rumah iya.—SKR. 16:40.

2. Nama penanggul ke ditapi eklisia nya enda lama pengudah iya ditumbuhka?

² Enda lama pengudah eklisia ba Pilipi ditumbuhka, eklisia nya napi penanggul. Sitan ngasuh orang ke begedika pemendar ngelaban pengawa nginjil Paul enggau bala kaling iya. Paul enggau Silas ditangkap, dipalu ngena batang kayu sereta dijil. Pengudah dilepaska ari jil, seduai iya ngelawa bala murid bukai ke agi baru lalu meransang sida. Udah nya, Paul, Silas enggau Timoti mupuk ari menua nya, tang Luke agi dia. Baka ni gaya bala menyadi ba eklisia nya pengudah diperansang? Enggau bantu ari roh kudus Jehovah, sida terus nyembah Jehovah enggau ransing. (Plp. 2:12) Paul amat temegah ati ke sida!

3. Nama utai ke disebut Paul dalam sampi ba Pilipi 1:9-11?

³ Kira-kira sepuluh taun udah nya, Paul nulis surat ngagai bala menyadi ba Pilipi. Lebuh macha surat nya, nuan ulih beratika penalam pengerindu Paul ngagai sida. Ku iya nulis: “Aku amat lelengauka kita ngena pengerindu Jesus Kristus.” (Plp. 1:8) Dalam surat nya, iya madahka diri besampika sida. Iya minta Jehovah nulung sida nambahka pengerindu, milih utai ti pemadu badas, nyadi tuchi, enda ngasuh orang labuh  ba pengarap sereta terus penuh laban buah pengelurus. Nuan tentu setuju, diatu kitai tau bulih penguntung ari surat ke ditulis Paul. (Bacha Pilipi 1:9-11.) * Ba artikel tu, kitai deka bejuraika pekara ke disebut iya sereta berandauka chara kitai ulih ngena nya ba pengidup kitai.

4. (a) Nitihka 1 John 4:9, 10, baka ni Jehovah ngayanka pengerindu Iya ke kitai? (b) Ni penalam pengerindu ke patut diayanka kitai ngagai Iya?

⁴ Jehovah ngayanka pengerindu ti besai enggau chara ngirumka Anak Iya nyadika tebus kena ngelepaska kitai ari dosa. (Bacha 1 John 4:9, 10.) Pengerindu ti diayanka Jehovah nengah chara tu meransang kitai rinduka Iya. (Rom. 5:8) Ni penalam pengerindu ke patut diayanka kitai ngagai Iya? Jesus nyaut tanya nya lebuh iya bejaku enggau seiku orang Parisi: ‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ (Mat. 22:36, 37) Kitai deka rinduka Jehovah enggau pengabis ati. Lalu kitai deka pengerindu nya majak nambah-menambah ninting hari. Paul madah ngagai bala menyadi ba Pilipi, pengerindu sida patut “majak nambah-menambah.” Nama ulih digaga kitai kena negapka pengerindu kitai ke Jehovah?

5. Baka ni pengerindu kitai ulih nyadi tegap?

⁵ Kitai patut ngelala Petara Jehovah ngambika kitai rinduka Iya. Bup Kudus madahka: ‘Barang sapa enda rinduka pangan diri, enda ngelala Petara, laban Petara endang pengerindu.’ (1 Jhn. 4:8) Rasul Paul madahka pengerindu kitai ke Petara deka tegap agi lebuh kitai bulih “penemu enggau penalam perening” pasal Iya. (Plp. 1:9) Lebuh kitai berengkah belajarka Bup Kudus, kitai berengkah rinduka Jehovah taja pan kitai enda nemu semua utai pasal Iya. Mayuh agi utai dipelajarka kitai pasal Jehovah, tegap agi pengerindu kitai ke Iya. Nya alai kitai ngumbai pengawa belajar sereta belematika Bup Kudus enggau suah nya siti ari pengawa ti beguna amat ke patut digaga dalam pengidup kitai!—Plp. 2:16.

6. Nitihka 1 John 4:11, 20, 21, sapa mega patut dikerinduka kitai?

⁶ Pengerindu ti besai ke diayanka Jehovah ngagai kitai meransang kitai rinduka bala menyadi Kristian. (Bacha 1 John 4:11, 20, 21.) Kitai engka ngumbai nya senang deka ngayanka pengerindu ngagai sida. Tu ketegal kitai semua nyembah Jehovah sereta bebendar deka neladan Iya. Kitai nitihka teladan Jesus. Pengerindu iya chukup besai nyentukka iya sanggup meri nyawa diri ke kitai. Tang, kadang-kadang kitai engka tusah deka ngasika pesan ke ngasuh rinduka pangan diri. Peratika siti chunto ke nyadi ba eklisia di Pilipi.

7. Nama ulih dipelajarka kitai ari jaku tangkan Paul ngagai Eudia enggau Sintike?

⁷ Eudia enggau Sintike amat ransing. Seduai iya sama bekereja enggau rasul Paul. Taja pia, seduai iya engka bekelikuh enggau pangan diri lalu enda bebakih agi. Ba surat ke ditulis Paul ngagai eklisia di Pilipi, endur Eudia enggau Sintike nyembah Jehovah, Paul nangkan seduai iya “besetuju enggau pangan diri.” (Plp. 4:2, 3) Paul mega deka nangkan menyadi Kristian bukai ba eklisia nya: “Anang mutap tauka bekelikuh lebuh kita ngereja semua utai.” (Plp. 2:14) Jaku tangkan ke diberi Paul ukai semina nulung Eudia enggau Sintike, tang mega nulung sida ke bukai ba eklisia nya ngambika majak rinduka pangan diri.

8. Nama ngasuh kitai tusah deka rinduka bala menyadi Kristian kitai? Baka ni kitai ulih mutarka nya?

 ⁸ Kadang-kadang kitai engka baka Eudia enggau Sintike. Kitai tusah deka rinduka bala menyadi laban betatika penyalah ke digaga sida. Semua kitai ngereja penyalah ninting hari. Enti kitai majak betatika penyalah orang bukai, kitai tusah deka rinduka sida. Ambika chunto, enti seiku menyadi Kristian ke lelaki enda ingat meresi Palan Gempuru, kitai engka ringat. Enti kitai beratika tiap iti penyalah ke digaga iya, kitai deka majak ringat ngagai iya lalu tu ngasuh pengerindu kitai ke iya majak kurang. Enti nuan ngasaika baka nya, pikirka tu: Jehovah meda penyalah kitai sereta bala menyadi Kristian kitai. Taja pia, Iya agi rinduka semua kitai. Nya alai kitai patut neladan pengerindu Jehovah sereta terus beratika pemanah bala menyadi kitai. Enti kitai enggau naka ulih rinduka sida, tu ngasuh semua kitai majak beserakup enggau pangan diri.—Plp. 2:1, 2.

9. Nama sekeda utai ti disengkaum ba “utai ti pemadu badas” ke disebut Paul ba surat iya ngagai orang Kristian ba Pilipi?

⁹ Nengah iring roh kudus, Jehovah meransang Paul madah ngagai orang Kristian ba Pilipi ngambika sida “nemu milih utai ti pemadu badas.” Kitai mega patut ngereja nya. (Plp. 1:10) “Utai ti pemadu badas” tu nyengkaum chara meri basa ngagai nama Jehovah, pasal semaya Iya ke dikeamatka, sereta pemaik enggau penyerakup ba eklisia. (Mat. 6:9, 10; Jhn. 13:35) Enti kitai ngumbai semua tu pekara ti beguna bendar ba pengidup kitai, kitai nunjukka diri rinduka Jehovah.

10. Nama patut digaga kitai enti deka nyadi tuchi?

¹⁰ Paul mega madahka kitai patut “nyadi tuchi.” Tu ukai reti kitai enda tau enda nyadi sempurna. Kitai enda ulih nyadi tuchi sama baka Petara Jehovah. Tang Iya deka ngumbai kitai tuchi enti kitai enggau naka ulih ngenalamka pengerindu kitai sereta ngenuluka utai ti pemadu beguna ba pengidup kitai. Siti chara kitai ngayanka pengerindu iya nya enggau naka ulih nyeliahka diri ari ngereja utai ti tau ngasuh orang labuh ba pengarap.

11. Nama patut diseliahka kitai ngambika menyadi Kristian kitai enda labuh ba pengarap?

¹¹ Pesan ke ngasuh kitai nyeliahka diri ari ngereja utai ti tau ngasuh orang labuh ba pengarap nya pekara ti chukup berat. Baka ni kitai ulih ngujungka orang labuh ba pengarap? Kitai engka ngereja nya ari pemerindang, gari, tauka kereja ke dipilih kitai. Tang enti utai ke dipilih kitai ngachau pengasai ati menyadi Kristian lalu ngasuh iya labuh ba pengarap, tu pekara ti chukup berat. Jesus madahka manah agi enti batu kisar ti besai ditanchangka ba rekung kitai, lalu kitai dibuai ngagai tasik ari ke ngasuh menyadi Kristian kitai labuh ba pengarap.—Mat. 18:6.

12. Nama ulih dipelajarka kitai ari chunto sepasang laki bini ke nyadi pengerintis?

¹² Peratika baka ni sepasang laki bini ke nyadi pengerintis nitihka jaku tangkan Jesus. Seduai iya sama enggau sepasang laki bini ke baru dibaptisa nulung ba siti eklisia. Laki bini ke baru dibaptisa nya dibesaika ba ruang bilik ti terit lalu mayuh utai ke enda ulih dikereja seduai iya. Seduai ngumbai diri enda tau meda cherita ba wayang taja pan cherita nya nadai ngembuan utai ti enda patut. Seduai tekenyit lebuh nemu laki bini ke nyadi pengerintis nya meda wayang. Pengudah laki bini ke nyadi pengerintis nemu pasal nya, seduai iya enda meda cherita ba wayang nyentuk ngagai laki bini ke baru dibaptisa nya ulih ngelatih pengasai ati diri lalu meretika utai ti  betul enggau salah. (Heb. 5:14) Ari chara tu, laki bini ke nyadi pengerintis nunjukka diri rinduka menyadi Kristian. Seduai iya ukai semina ngereja tu nengah jaku aja, tang ngena ulah.—Rom. 14:19-21; 1 Jhn. 3:18.

13. Baka ni kitai ulih ngujungka orang ngereja dosa?

¹³ Siti agi chara kitai ngasuh orang labuh ba pengarap iya nya ngujungka orang ngereja dosa. Baka ni nya tau nyadi? Uji gambarka tu. Seiku pemelajar Bup Kudus bebendar deka muai gian ngirup ai bisa. Nyau kelama, nya baru iya ulih muai gian iya. Iya sedar iya endang enda tau ngirup agi. Iya ngaga mayuh ubah, mansang ba pengarap, lalu ulih dibaptisa. Tang bisi sekali, seiku menyadi Kristian lelaki mai iya beserumpu makai enggau bala menyadi ke bukai, lalu meri iya ai bisa. Ku menyadi Kristian lelaki ke mai iya madah: “Nuan udah nyadi orang Kristian diatu; bisi roh kudus Petara. Siti ari buah roh kudus nya nemu nagang diri. Enti nuan nemu nagang diri, enda salah ngirup mimit aja.” Enti sema menyadi Kristian ke baru nya mendingka jaku lalau ti salah nya lalu gian baru ngirup ai bisa, nya tentu ukai utai ti manah.

14. Baka ni gempuru Kristian nulung kitai nitihka pesan ba Pilipi 1:10?

¹⁴ Gempuru Kristian nulung kitai nitihka pesan ke disebut ba Pilipi 1:10 dalam mayuh chara. Keterubah, utai ke dipelajar kitai ba gempuru nunjukka runding Jehovah nya beguna bendar. Kedua, kitai belajarka chara ngena utai ke dipelajar kitai ba pengidup ngambika kitai tuchi. Lalu ketiga,  kitai diperansang ngayanka “pengerindu lalu ngereja pengawa ti badas.” (Heb. 10:24, 25) Lebuh bala menyadi Kristian meransang kitai, pengerindu kitai ke Jehovah enggau sida deka majak nambah. Enti kitai enggau pengabis ati rinduka Jehovah sereta bala menyadi, kitai deka enggau naka ulih nyeliahka diri ari ngujungka bala menyadi labuh ba pengarap.

15. Nama reti “penuh laban buah pengelurus”?

¹⁵ Paul bebendar besampika bala menyadi ba Pilipi ngambika sida “penuh laban buah pengelurus.” (Plp. 1:11) “Buah pengelurus” nya tentu nyengkaum pengerindu sida ke Jehovah enggau nembiak Iya. Tu mega nyengkaum bejaku enggau orang bukai pasal pengarap sida ba Jesus sereta pengadang sida ti badas. Pilipi 2:15 ngena siti agi sempama ke dikumbai “manchar baka [‘penampak,’ NW] di dunya tu.” Sempama tu ngena, laban Jesus ngumbai murid iya “penampak dunya.” (Mat. 5:14-16) Iya mega ngasuh bala murid iya ngaga orang nyadi murid, lalu iya madahka sida deka “nyadi saksi . . . ngagai ujung dunya.” (Mat. 28:18-20; SKR. 1:8) Kitai ngasilka “buah pengelurus” lebuh kitai enggau naka ulih ngereja pengawa ti pemadu beguna tu.

16. Baka ni Pilipi 1:12-14 nunjukka kitai ulih manchar baka penampak taja pan napi penanggul? (Peda gambar ba kulit majalah.)

¹⁶ Enda ngira nama utai ke ditapi kitai, kitai ulih manchar baka penampak. Kadang-kadang, penanggul ti dikumbai ulih nagang kitai ari nginjil, tau nyadi peluang kitai nginjil. Ambika chunto, rasul Paul ditan ba sebuah rumah di Rome lebuh iya nulis surat ngagai bala menyadi di Pilipi. Taja pan Paul dijil, iya tetap nginjil. Iya nginjil ngagai bala jejaga ke nyaga iya sereta ngagai orang ke ngelawa iya. Paul enggau ransing nginjil taja  pan maya nya iya napi penanggul, lalu tu meransang bala menyadi andal sereta ‘berani agi nusui pesan Petara.’—Bacha Pilipi 1:12-14; 4:22.

17. Baka ni sekeda bala menyadi Kristian ulih terus nginjil taja pan napi penanggul?

¹⁷ Mayuh bala menyadi Kristian kitai ngayanka pemerani baka Paul. Taja pan sida diau ba menua ke nyekat sida ari nginjil ba mua mayuh, tauka ari rumah ke rumah, sida ngiga chara bukai ngerembaika berita manah. (Mat. 10:16-20) Ba siti ari menua ke nyekat pengawa kitai, tuai ti ngabas meransang tiap iku penginjil nginjil ngagai kaban belayan, orang ke berimbai pendiau enggau sida, bala ke sama sekula, sama kereja, enggau bala bukai ke dikelala sida. Dalam urung dua taun, penyampau eklisia ba endur nya majak nambah. Kitai engka diau ba menua ke enda nyekat kitai nginjil. Taja pia, kitai ulih belajar ari sida: Enti nuan enggau naka ulih nginjil ngagai orang bukai, Jehovah tentu deka meri nuan pengelandik ngambika ulih terus nginjil taja pan napi penanggul.—Plp. 2:13.

18. Nama patut digaga kitai?

¹⁸ Kelebih agi kemayaharitu, aram meh kitai nitihka jaku lalau ke disebut ba surat Paul ngagai bala menyadi ba Pilipi. Kitai deka milih utai ti pemadu badas, nyadi tuchi, nyeliahka diri ari ngereja utai ti tau ngasuh orang labuh ba pengarap, sereta terus penuh laban buah pengelurus. Nya baru pengerindu kitai deka majak nambah lalu tu meri basa ngagai Apai kitai, Jehovah.