1-3. Nama sekeda kebuah ke engka ngasuh sida ti gawa ke Jehovah penuh jam enda ulih agi neruska pengawa sida?

ROBERT enggau Mary Jo madahka: “Pengudah nyadi pengerintis seberai tasik pengelama 21 taun, apai indai kami duai nyau enda tentu dapat. Kami gaga ati ngintu sida. Tang, kami agi berasai sinu laban enda ulih agi neruska pengawa ti dikerinduka kami.”

² Ku William enggau Terrie madahka: “Lebuh kami duai nyau nemu diri enda bepengerai lalu enda ulih ngereja pengawa kami agi, kami nyabak. Juluk ati kami ke deka gawa ke Jehovah ba endur bukai nyau puntan.”

³ Aleksey madahka: “Kami nemu perintah deka nutup pampang opis ke alai aku gawa. Lebuh Betel ditutup, kami berasai tusah ati. Tang kami patut ninggalka Betel.”

4. Nama tanya ke deka dikerandauka kitai ba artikel tu?

⁴ Pia mega, mayuh menyadi Kristian ti tetap ati ke gawa ke Jehovah penuh jam, nyengkaum sida ke gawa ba Betel, diberi pengawa ti baru. * Tu engka enda senang ba sida laban sida enda agi ulih neruska pengawa ti balat dikerinduka sida. Nama ulih nulung sida napi ubah tu? Baka ni nuan ulih nulung sida? Saut ngagai tanya tu ulih nulung semua kitai napi ubah ba pengidup kitai.

5. Baka ni ubah ba pengawa ulih ngachau kitai?

⁵ Enda ngira kitai gawa ba Betel tauka ngereja pengawa bukai ke Jehovah penuh jam, kitai tentu rindu ngagai orang sereta endur ke alai kitai gawa. Enti sema kitai enda agi ulih neruska pengawa kitai ba endur nya, kitai tentu berasai asa. Kitai lelengau sereta irauka bala menyadi Kristian ke ditinggalka kitai, kelebih agi enti kitai patut ninggalka sida ketegal orang ke nyakal merinsaka kitai. (Mat. 10:23; 2 Kor. 11:28, 29) Pia mega, kitai engka tusah nelebaka diri enggau chara idup ti baru lebuh pindah ngagai endur bukai tauka pulai ngagai menua diri. Ku Robert enggau Mary Jo: “Kami duai enda teleba enggau gaya pengidup bansa diri sereta ngena bansa jaku diri empu lebuh nginjil. Ketegal udah lama gawa ba endur bukai, kami ngasaika diri baka orang kampar ba menua diri.” Sekeda sida ke bisi ubah ba pengawa engka napi penanggul ba duit. Sida engka mimit irau, asa, sereta enda diperansang. Nama ulih nulung?

6. Baka ni kitai ulih mengkang semak enggau Jehovah?

⁶ Mengkang semak enggau Jehovah. (Jas. 4:8) Baka ni chara iya? Kitai andalka Iya ninga sampi kitai. (Mas. 65:2) Masmur 62:8 madahka: “Padahka ngagai Iya semua penusah kita.” Jehovah ulih “ngereja utai lebih ari ti dipinta tauka diperagam kitai.” (Eps. 3:20) Jehovah ukai semina nyediaka utai ke dipinta kitai nengah sampi, tang Iya mega mutarka penanggul ke ditapi kitai enggau chara ti enda disadang kitai.

7. (a) Nama ulih nulung kitai mengkang semak enggau Jehovah? (b) Nitihka Hebrew 6:10-12, nama asil iya enti kitai terus gawa ke Jehovah enggau tetap ati?

⁷ Enti kitai deka mengkang semak enggau Jehovah, kitai patut macha Bup Kudus ninting hari lalu belematika iya. Ku seiku menyadi Kristian lelaki ke kala nyadi pengerintis seberai tasik: “Terus belajarka Bup Kudus ba diri sebilik enggau tetap sereta nyediaka utai ke dikena ba gempuru baka ke udah digaga nuan ngelama tu.” Pia mega, enggau naka ulih meh nginjil enggau eklisia baru nuan. Jehovah ingatka sida ke terus gawa ke Iya enggau tetap  ati, taja pan sida enda ulih ngereja mayuh baka ke udah.—Bacha Hebrew 6:10-12.

8. Baka ni jaku ba 1 John 2:15-17 ulih nulung nuan idup enggau pengumbas iya?

⁸ Idup enggau pengumbas iya. Anang ngelakka pengirau ba dunya Sitan nagang nuan ari gawa ke Jehovah. (Mat. 13:22) Seliahka jaku ari bala bakih, tauka kaban belayan, tauka sida ke enda nyembah Jehovah ke nguji ngasuh nuan beberatka duit ba pengidup. (Bacha 1 John 2:15-17.) Arap meh ke Jehovah ti besemaya deka meri semua utai ke diguna ba pengarap, emosi, sereta utai ke diguna besehari-sehari “lebuh kitai begunaka iya.”—Heb. 4:16; 13:5, 6.

9. (a) Nitihka Jaku Dalam 22:3, 7, nama kebuah kitai patut nyeliahka diri ari berutang? (b) Nama ulih nulung kitai ngaga pemutus ti manah? Beri siti chunto.

⁹ Nguji nyeliahka diri ari berutang. (Bacha Jaku Dalam 22:3, 7.) Mayuh belanja dikena enti pindah ngagai endur bukai, lalu nya tau ngujungka kitai berutang. Anang nginjau duit kena meli utai ke enda tentu diguna, kena ngurangka utang. Endang tusah deka mutuska penyampau duit ti deka dipinjau lebuh kitai napi penanggul. Ambika chunto, lebuh kitai ngintu diri sebilik ke sakit. Nya alai, lebuh napi utai ke baka tu, kingatka meh, sampi ulih nulung nuan ngaga pemutus enggau manah. Kena nyaut sampi nuan, Jehovah ulih meri pemaik ke “deka nyaga ati enggau runding,” ngambika nuan ulih berunding enggau manah.—Plp. 4:6, 7; 1 Pet. 5:7.

10. Baka ni kitai ulih ngiga bakih ti baru?

¹⁰ Mengkang semak enggau sida ke ulih meransang nuan. Bekunsika asai ati sereta penusah ke ditapi ngagai bakih rapat nuan, kelebih agi ngagai sida ke napi utai ti sama baka nuan. Ngereja nya ulih ngasuh ati nuan lantang agi. (P-jar. 4:9, 10) Bakih ba eklisia ke dulu mengkang nyadi bakih nuan. Diatu, nuan bisi pengawa ti baru lalu nuan begunaka bakih ti baru. Kingatka, enti nuan deka bisi bakih, nuan patut rindu begulai enggau orang. Baka ni nuan ulih ngereja nya? Padah ngagai orang pasal utai manah ke udah nyadi ba nuan lebuh gawa ke Jehovah ngambika sida ulih meda pengaga ati nuan. Taja pan sekeda bala menyadi ba eklisia engka enda meretika kebuah nuan rindu gawa ke Jehovah penuh jam, tang bisi mega sida ti bukai ke engka deka nemu mayuh agi pasal nya lalu deka nyadi bakih ti manah. Pia mega, anang kelalu bejaku pasal diri empu tauka temegah pasal pemujur ke diulih nuan ba pengawa ke Jehovah, sereta pasal asai ati ti enda manah ke engka dikembuan nuan.

11. Baka ni nuan ulih ngelantangka tikah nuan?

¹¹ Enti nuan enda ulih neruska pengawa ketegal kaling pengidup nuan sakit, anang nyalahka iya. Tauka enti nuan empu ke sakit, anang nyalahka diri empu lalu ngumbai diri ngasaka  ati kaling pengidup nuan. Kingatka, seduai udah “nyadi setubuh,” lalu seduai besemaya ba mua Jehovah deka nyaga pangan diri enda ngira nama nyadi. (Mat. 19:5, 6) Enti nuan enda ulih neruska pengawa ketegal bini nuan nyau betubuh-bisi, tentuka anak nuan nemu, iya beguna agi ari pengawa nuan. Suah meh madah ngagai anak nuan, iya “berekat” ari Petara. (Mas. 127:3-5) Pia mega, padah ngagai iya pasal berekat ke kala diulih nuan lebuh gawa ke Jehovah penuh jam. Ngereja nya ulih meransang anak nuan ngena pengidup iya gawa ke Jehovah penuh jam baka ke udah dikereja nuan.

12. (a) Baka ni kitai ulih nulung sida ti gawa ke Jehovah penuh jam neruska pengawa sida? (b) Baka ni kitai ulih nulung sida nelebaka diri enggau ubah ti baru?

¹² Mayuh bala menyadi Kristian nulung ngambika sida ti gawa ke Jehovah penuh jam ulih neruska pengawa ngagai Jehovah. Bala menyadi ngereja nya enggau meri jaku peransang, meri bantu ngena duit tauka utai bukai. Sida ke gawa penuh jam nya bisi diri sebilik ba eklisia di menua asal sida. Bala menyadi ba menua asal sida ulih nulung ngintu orang ke sebilik enggau sida. (Gal. 6:2) Enti sida ke gawa penuh jam nerima pengawa ti baru ba eklisia nuan, anang ngumbai sida enda mujur tauka sida udah ngereja utai ti salah. * Tulung meh sida nelebaka diri enggau ubah ti baru tu. Ngelaluka sida enggau manah sereta puji pengawa ti udah digaga sida taja pan sida enda ulih ngereja mayuh utai ketegal enda bepengerai. Bekelala enggau sida lalu belajar ari penemu, latih, sereta peneleba sida.

13. Baka ni kitai ulih nulung sida ke nerima pengawa ti baru?

 ¹³ Terubah, sida ke nerima pengawa ti baru engka begunaka tulung nuan ngiga rumah alai diau, perengka pengangkut, kereja, sereta utai bukai ke diguna. Sida mega deka nemu penerang pasal pekara besehari-sehari baka mayar chukai tauka bil. Kelebih agi, sida deka kitai meretika sida. Sida empu tauka diri sebilik engka napi penanggul ba pengerai. Sida engka agi berasai tusah ati ketegal lenyau orang ke dikesayau * tauka lelengauka bala bakih ba eklisia sida suba. Nya alai, sida begunaka awak kena mutarka asai ati ke baka tu.

14. Baka ni bala menyadi ba siti eklisia nulung seiku menyadi Kristian indu nelebaka diri ba pengawa iya ti baru?

¹⁴ Nuan ulih nulung sida nelebaka diri enggau chara mai sida nginjil sereta meransang sida nengah ulah ti manah. Ku seiku menyadi Kristian indu ti gawa betaun-taun ba menua ti jauh: “Ba pengawa aku ke suba, ninting hari aku ngajar orang Bup Kudus. Ba pengawa aku ti baru tu, tusah deka macha Bup Kudus tauka mandangka video lebuh nginjil. Tang, bala menyadi ba eklisia ke baru tu mai aku datai ngabas sereta ngajar orang Bup Kudus enggau sida. Lebuh aku meda pengeransing sereta penetap ati sida lebuh ngajar pemelajar Bup Kudus, tu ngasuh aku bisi runding ti positif agi pasal endur aku nginjil. Aku mega belajar ari bala menyadi chara ngepunka randau enggau orang ba endur nginjil ti baru tu. Semua tu ngasuh aku bulih pengaga ati baru.”

15. Baka ni nuan tau bulih asil ti manah ba pengawa ti baru?

¹⁵ Nuan tau bulih asil ti manah ba pengawa ti baru. Anang ngumbai diri enda beguna agi tauka enda mujur ba pengawa ke dikereja nuan suba. Belematika chara Jehovah nulung nuan diatu, lalu anang ngetu nginjil. Titihka teladan  nembiak Kristian ke tetap ati ba abad keterubah. Enda ngira dini endur, sida “bejalai ari endur siti ngagai endur siti, nusui Berita Manah.” (SKR. 8:1, 4) Enti nuan enda ngetu nginjil, nuan deka bulih asil ti manah. Ambika chunto, sekeda bala pengerintis ke diburu ari siti menua pindah ngagai menua bukai ke semak ti bisi ngena bansa jaku ke dikena sida nginjil. Dalam beberapa bulan aja, penyampau orang ke enggau beberapa iti raban ke ngena bansa jaku ti dikena bala pengerintis nya nginjil jampat amat nambah.

16. Baka ni nuan tau bulih pengaga ati lebuh ngereja pengawa ti baru?

¹⁶ Nehemiah 8:10 madahka: ‘Pengaga ti diberi Jehovah ngagai kita, deka ngasuh kita kering.’ Nya alai, pengaga ati patut datai ari kaul kitai enggau Jehovah, ukai datai ari pengawa ke dikereja kitai taja pan kitai rinduka pengawa nya. Enti kitai deka gaga ati, kitai patut mengkang semak enggau Jehovah sereta bepanggai ba Iya ngambika bulih penemu-dalam, iring, sereta sukung. Nuan rinduka pengawa ti dikereja nuan suba laban nuan enggau naka ulih nulung orang ba endur nya. Nya alai, bebendar meh ngereja pengawa baru nuan lalu peratika mega chara Jehovah nulung nuan rinduka pengawa baru nya.—P-jar. 7:10.

17. Nama patut dikingatka kitai pasal pengawa ke digaga kitai diatu?

¹⁷ Kitai patut ingat, semua kitai deka gawa ke Jehovah belama iya, tang pengawa ke digaga kitai diatu engka ukai pengawa ke digaga kitai ke Iya ba dunya baru. Aleksey ke disebut tadi madahka, ubah ba pengawa nulung iya besedia enggau ubah ti deka nyadi jemah ila. Ku iya madah: “Aku nemu Jehovah enggau dunya baru nya nyata. Tang baru diatu aku amat ngasaika diri semak enggau Jehovah, lalu andalka dunya baru nya majak semak.” (SKR. 2:25) Enda ngira nama pengawa ke diberi Jehovah, kitai deka terus semak enggau Iya. Iya enda ninggalka kitai, lalu Iya deka nulung kitai bulih pengaga ati ba semua pengawa ke diberi enda ngira dini alai nya.—Isa. 41:13.