KATI bisi pengawa ke deka dikereja nuan ba eklisia tang enda ulih ngereja nya diatu? Engka pengawa nya dikereja orang bukai. Tauka engka pengawa nya kala dikereja nuan. Taja pia, umur, pengerai ti enda manah, penanggul ba penatai pemisi, tauka tanggung pengawa ba ruang bilik ngasuh nuan enda ulih ngereja pengawa nya diatu. Tauka nuan patut ngetu ngereja pengawa ti udah lama dikereja nuan ketegal ubah ba gerempung kitai. Enda ngira nama kebuah iya, nuan engka ngasaika diri enda ngereja pengawa ke Jehovah enggau naka ulih. Ba maya ke baka nya, kadang-kadang nuan engka berasai asa. Taja pia, baka ni nuan ulih nyeliahka asai ati ti negatif baka asai ati ti asa, pedis ati, tauka kepapas tumbuh ba ati nuan? Baka ni nuan ulih mengkang gaga ati?

Kitai ulih belajarka pekara ti beguna pasal chara kitai ulih mengkang gaga ati ari teladan John Pemaptisa. John rindu ngereja pengawa iya, tang iya engka enda ngadang utai ke deka nyadi ngagai iya. Iya engka enda nyangka iya deka dijil lama agi ari iya ngereja pengawa nginjil. Taja pia, John agi mengkang gaga ati. Nama nulung iya? Lalu baka ni kitai ulih mengkang gaga ati taja pan napi asai ati ti asa?

Kena urung bulan April 29 M., John berengkah ngereja pengawa ke diberi Jehovah ngagai iya, iya nya nyikap orang nerima penatai Messiah. Ku iya madahka: “Nesal ati ke dosa kita, laban Perintah serega nyau semak!” (Mat. 3:2; Luk. 1:12-17) Mayuh amat orang datai ari jauh laban deka ninga pesan iya. Mayuh ari sida nesal ati lalu dibaptisa. John mega enggau berani nangkan tuai pengarap ke ngumbai diri pama agi ari orang bukai. Iya madahka sida deka diukum enti sida enda berubah. (Mat. 3:5-12) John ngereja pengawa ti pemadu besai ba pengawa nginjil lebuh iya maptisa Jesus kena urung bulan Oktober 29 M. Kenyau ari nya, John ngiring orang bukai nitihka Jesus, Messiah ti disemaya.—Jhn. 1:32-37.

Bekaul enggau pengawa John, Jesus madahka: “Ari semua orang ke udah diadaka, nadai siku ke besai agi ari John Pemaptisa.” (Mat. 11:11) John tentu gaga ati ke berekat ti diterima iya. Baka  John, mayuh ari kitai nerima berekat ari Petara. Ambika chunto, seiku menyadi Kristian lelaki ke benama Terry. Iya enggau bini iya Sandra ngereja pengawa ke Jehovah penuh jam lebih ari 50 taun. Ku Terry madahka: “Aku bisi mayuh pengawa. Aku udah kala nyadi pengerintis, gawa ba Betel, nyadi pengerintis spesial, tuai ti ngabas, tuai ti ngemataka pengawa ba pelilih, lalu diatu aku sekali agi nyadi pengerintis spesial.” Kitai chukup gaga ati lebuh nerima pengawa ari Jehovah. Tang kitai patut bebendar ngemansangka pengaga ati ngambika kitai ulih mengkang gaga ati enda ngira sebarang ubah ke ditapi kitai. Kitai ulih belajarka tu ari teladan John.

John Pemaptisa mengkang gaga ati laban iya beterima kasihka pengawa ke diberi ngagai iya. Peratika siti chunto. Pengudah Jesus dibaptisa, penyampau murid ke enggau Jesus majak nambah. Tang penyampau murid ke enggau John majak kurang. Nya alai murid John irau lalu madah ngagai John: ‘Pengajar, iya . . . maptisa orang, lalu semua orang bela datai ngagai iya.’ (Jhn. 3:26) Ku John nyaut: “Lelaki ke ditikah nya meh orang ke bempu bini. Pangan lelaki ke ditikah, ke bediri semak iya lalu ninga iya, gaga ati ninga munyi nyawa iya. Nya kebuah ati aku pemadu gaga.” (Jhn. 3:29) John enda bepekit enggau Jesus. Iya mega enda ngumbai pengawa ke dikereja iya enda beguna ketegal pengawa Jesus besai agi. John mengkang gaga ati ketegal iya terus ngumbai pengawa ke dikereja iya ke nyadi “pangan lelaki ke ditikah” nya berega.

Runding John nulung iya mengkang gaga ati taja pan pengawa iya enda senang dikereja. Ambika chunto, John nyadi Nasir ari ada lalu iya enda ulih ngirup wain tauka ai bisa. (Luk. 1:15) Ku Jesus madahka pasal pengidup John ti pengumbas iya: “John datai ukai deka makai ngirup.” Tang, Jesus enggau bala murid iya enda di baruh sempekat nyadi Nasir lalu sida ulih idup baka orang bukai. (Mat. 11:18, 19) Pia mega, lebuh John enda agi ulih ngereja kereja ajih, iya nemu bala murid Jesus nyengkaum sekeda sida ke kala nyadi murid iya ulih ngereja kereja ajih. (Mat. 10:1; Jhn. 10:41) Ari ke berunding kelalu mayuh pasal bida entara murid iya enggau murid Jesus, John tetap kisuk ngereja pengawa ke diberi Jehovah ngagai iya.

Enti kitai mega beterima kasihka pengawa ke diberi Jehovah ngagai kitai, kitai ulih mengkang gaga ati. Terry, ke disebut tadi, madahka: “Aku betatika tiap iti pengawa ke diberi.” Lebuh iya ngenang baru pengawa iya ke gawa ke Jehovah penuh jam, ku iya madah: “Aku enda nesal ke nya laban aku bisi mayuh utai manah ke ulih dikenang.”

Kitai ulih gaga agi enti kitai berunding pasal utai ke ngasuh siti-siti pengawa ke Jehovah nya amat berega. Endang peluang ti manah ulih sama ‘bekereja enggau Petara.’ (1 Kor. 3:9) Sama baka siti-siti utai ti berega ke deka mengkang manah enti kitai siru nyaga iya, kitai mega deka mengkang gaga ati enti kitai majak berunding pasal diri empu ke ulih sama gawa enggau Jehovah, laban nya basa ti besai. Kitai tentu enggai mandingka pengawa ke dikereja kitai enggau pengawa ke dikereja orang bukai. Kitai mega enda ngumbai pengawa ke diberi Jehovah nya enda tentu beguna enti dibandingka enggau pengawa ke diberi Iya ngagai orang bukai.—Gal. 6:4.

John engka nemu pengawa iya ke Jehovah enda ulih diteruska, tang iya engka enda nyangka pengawa nya deka jampat diketuka. (Jhn. 3:30) Ba taun 30 M., kira-kira enam bulan pengudah Jesus dibaptisa, Raja Herod ngejil John. Taja pia, John terus meri saksi enggau naka ulih. (Mrk. 6:17-20) Nama nulung iya mengkang gaga ati napi semua tu? Iya mengkang betatika pekara ti beguna ba Jehovah.

Lebuh dijil, John nerima berita pasal pengawa Jesus ke majak ngerembai. (Mat. 11:2; Luk. 7:18) John pechaya Jesus nya Messiah. Tang iya engka berunding baka ni Jesus deka ngamatka semua utai ti dipadah Petara pasal Messiah. Ketegal John nemu Messiah deka nyadi raja, iya engka berunding sekalika Jesus deka nyadi raja enda  lama agi. Iya mega engka berunding sekalika Jesus deka ngelepaska iya ari rumah jil. Ketegal iya deka nemu enggau mayuh agi pasal Jesus, iya ngasuh dua iku murid iya nanya Jesus: ‘Kati nuan tu orang ke deka datai, tauka kami nganti orang bukai?’ (Luk. 7:19) Udah nya Jesus ngasuh seduai iya pulai madah ngagai John: “Orang ke buta meda, orang ke lemi bejalai, orang ke sakit lan, dituchi, orang ke bengal ninga, orang ke mati diangkatka idup baru, lalu Berita Manah dipadahka ngagai orang ke seranta.” (Luk. 7:20-22) Pengudah seduai iya datai betemu enggau John, John tentu mendingka utai ke dipadah seduai iya pasal Jesus ke udah ngereja kereja ajih lebuh ngeraika orang.

Utai ke dipadah dua iku murid nya tentu meransang John. Nya nunjukka Jesus ngamatka jaku Petara pasal Messiah. Taja pan Jesus enda ngelepaska John ari rumah jil, John nemu pengawa iya ke Jehovah nya beguna bendar. Taja pan napi penanggul, iya bisi kebuah ulih gaga ati.

Baka John, enti kitai ngenuluka pengawa ke Jehovah, kitai ulih gaga ati sereta sabar lebuh betan. (Kol. 1:9-11) Kitai ulih betan enggau chara macha Bup Kudus lalu belematika iya. Tu deka nulung kitai nemu, semua utai ke digaga kitai ngagai Petara nya amat beguna. (1 Kor. 15:58) Ku Sandra: “Macha siti bagi ba Bup Kudus ninting hari nulung aku semak agi enggau Jehovah. Nya mega nulung aku ngenuluka Iya, ukai diri empu.” Kitai mega ulih betatika berita pasal pengawa ke digaga bala menyadi kitai ba Berita JW, lalu tu ulih nulung kitai badu berunding pasal diri empu aja. Ku Sandra nampung: “Program ninting bulan ba Berita JW nulung kitai berasai semak agi enggau gerempung kitai, lalu nya mega nulung kitai mengkang gaga ati ngereja pengawa ke diberi Jehovah.”

Taja pan John Pemaptisa enda lama bejalaika pengawa nginjil, tang iya nginjil enggau ransing sereta ngena kuasa Elijah. Lalu baka Elijah, iya mega bisi asai ati baka kitai. (Luk. 1:17; Jas. 5:17) Enti kitai neladan chunto iya ke beterima kasih sereta ngenuluka pengawa ke Jehovah, kitai mega ulih mengkang gaga ati ba pengawa kitai ke Jehovah, enda ngira nama utai ke nyadi.