1. Nama patut digaga orang Kristian ngambika ulih nembuka lumba ke nuju ngagai pengidup?

ORANG Kristian enggau lumba ke nuju ngagai pengidup. Enda ngira kitai baru tauka udah lama enggau lumba nya, kitai patut terus belanda ngagai adan. Jaku ke diberi rasul Paul ngagai orang Kristian ba Pilipi meransang kitai nembuka lumba nya. Sekeda bala menyadi ba abad keterubah nya udah lama nyembah Jehovah enggau tetap ati lebuh sida nerima surat ari Paul. Tang Paul ngingatka sida, sida patut tan natka penanggul lalu terus nyembah Jehovah. Paul deka sida terus nitihka teladan iya “ngulihka prais.”—Plp. 3:14.

2. Nama kebuah jaku lalau ke diberi Paul ngagai bala menyadi ba Pilipi endang ba maya ti ngena?

² Jaku lalau ke diberi Paul ngagai bala menyadi ba Pilipi endang ba maya ti ngena. Orang ba Pilipi merinsaka bala menyadi Kristian kenyau ari eklisia nya berengkah ditumbuhka. Tu berengkah lebuh Paul enggau Silas nerima pesan ari Petara ke ngasuh seduai iya “ngagai menua Masedonia.” Seduai datai di Pilipi ba urung taun 50 M. (SKR. 16:9) Dia, seduai betemu engggau seiku indu ke benama Lidia. Iya ‘mendingka seduai iya . . . lalu Jehovah muka ati iya’ ngambika deka nerima berita manah. (SKR. 16:14) Enda lama udah nya, Lidia enggau semua sida ke diau ba rumah iya dibaptisa. Taja pia, Sitan berengkah ngasuh penusah nyadi ba sida. Sekeda orang ba Pilipi ngirit Paul enggau Silas ngagai pemerintah lalu nuduh seduai iya ngaga pengachau ba nengeri nya. Ketegal nya seduai dipalu, dijil, lalu diasuh pansut ari nengeri nya. (SKR. 16:16-40) Kati Paul enggau Silas mantul tauka lemi semengat? Enda! Lalu baka ni enggau bala menyadi ba eklisia ti baru ditumbuh nya? Kati sida lemi semengat? Enda, sida mega betan! Sida tentu berasai diperansang ari teladan manah ke ditunjukka Paul enggau Silas.

3. Nama utai ke ditemu Paul? Nama tanya ke deka dikerandauka kitai?

 ³ Paul keran deka betan lalu enggai mantul. (2 Kor. 4:16) Iya nemu iya patut terus nyembah Jehovah enggau tetap ati. Nama ulih dipelajarka kitai ari teladan Paul? Nama ulih dipelajar kitai ari bala menyadi Kristian ke tetap ati kemayaharitu ngambika kitai ulih betan taja pan napi penanggul? Lalu baka ni pengadang kitai ke jemah ila nulung kitai keran deka betan?

4. Taja pan napi penanggul, baka ni Paul mengkang kisuk ba pengawa nginjil ke diberi Jehovah ngagai iya?

⁴ Peratika utai ke dikereja Paul lebuh iya nulis surat ngagai bala menyadi ba Pilipi. Iya ditan ba sebuah rumah di Rome. Iya enda ulih pansut nginjil. Taja pia, iya mengkang kisuk nginjil ngagai temuai ke datai ngelawa iya sereta nulis surat ngagai eklisia ke jauh agi. Pia mega kemayaharitu, mayuh bala menyadi Kristian kitai ke enda ulih pansut nginjil ketegal udah tuai tauka sakit. Taja pia, sida enggau naka ulih nginjil ngagai orang ke datai ngagai rumah sida. Sida mega nulis surat ngagai orang ke bempu rumah ke enda ulih ditemu sida.

5. Nitihka utai ti dipadah Paul ba Pilipi 3:12-14, nama nulung iya mengkang nyembah Jehovah?

⁵ Paul enda ngelakka diri dilimpangka enggau pemujur ke diulih iya sebedau nya, tauka penyalah ke dikereja iya suba. Iya madah, “badu agi ngingatka utai ti udah.” Tu beguna ngambika ulih “bebendar ngulihka utai ti di mua,” iya nya, enggau mujur nembuka lumba ke nuju ngagai pengidup. (Bacha Pilipi 3:12-14.) Nama sekeda utai ke engka ulih ngelimpangka Paul? Kesatu, pemujur ke diulih iya sebedau nyadi orang Kristian. Iya ngumbai “semua utai nya uras magang.” (Plp. 3:3-8) Kedua, taja pan iya nesalka pengawa iya ke kala merinsaka orang Kristian, iya enda ngelakka asai ati tu nagang iya ari nyembah Jehovah. Lalu ketiga, iya enda ngumbai pengawa ke digaga iya ke Jehovah naka nya aja lalu tau ngetu gawa ke Iya. Taja pan Paul dijil, dipalu, dituku ngena batu, ditabanka kapal karam, sereta suntuk ba pemakai enggau gari, tang iya mujur ba pengawa nginjil. (2 Kor. 11:23-27) Enda ngira nama pemujur ke udah diulih sereta pemerinsa ke ditapi Paul, iya nemu iya patut terus nyembah Jehovah. Kitai mega patut neladan iya.

6. Nama sekeda “utai ti udah” ke enda patut dikingatka kitai agi?

⁶ Baka ni kitai ulih neladan Paul ke “badu agi ngingatka utai ti udah”? Sekeda ari kitai engka nesalka penyalah ke kala digaga kitai suba. Enti pia, ulih nuan milih topik pasal tebus Jesus Kristus lebuh belajarka Bup Kudus kediri empu? Enti kitai belajar, belemati, sereta besampi pasal utai ke dipelajar kitai nya, kitai deka badu berasai besalah ketegal Jehovah udah ngampun kitai. Peratika siti agi utai ke ulih dipelajarka ari Paul. Sekeda bala menyadi engka udah ngelengkaka pengawa ke ulih ngasuh sida nyadi kaya ngambika sida ulih ngereja mayuh agi ke Jehovah. Baka ni enggau kitai? Ulih kitai “badu agi ngingatka utai ti udah” enggau enda nginginka utai ti udah dilengkaka kitai suba? (P-pau. 11:4-6; P-jar. 7:10) “Utai ti udah” engka nyengkaum pemujur ke dijapai kitai lebuh ngereja pengawa ke Jehovah tauka ulih betan lebuh napi penanggul suba. Endang amat, enti kitai ngenang baru chara Jehovah ke udah merekat sereta nulung kitai suba, tu ulih nulung kitai semak agi ngagai Iya. Taja pia, kitai enggai ngumbai pengawa ke dikereja kitai ke Jehovah naka nya aja, lalu enggai bebendar ngereja nya agi.—1 Kor. 15:58.

7. Nitihka 1 Korint 9:24-27, nama utai ke patut digaga ngambika ulih menang ba lumba ke nuju ngagai pengidup? Beri siti chunto.

 ⁷ Paul amat meretika utai ku Jesus lebuh Jesus madahka kitai patut ngereja pengawa enggau naka ulih. (Luk. 13:23, 24) Baka Jesus, Paul nemu iya patut enggau naka ulih nembuka lumba ke nuju ngagai pengidup. Nya alai, iya nyemaka pengidup orang Kristian baka siti lumba. (Bacha 1 Korint 9:24-27.) Orang ke belanda ba lumba betatika adan ba mua iya, lalu nyeliahka nama-nama utai ke tau ngelimpangka iya. Ambika chunto, orang ke lumba belanda ba jalai alun engka dikelingi kedai sereta utai bukai ke ulih ngelimpangka sida. Kati nuan ngumbai orang ke belanda nya deka ngetu lalu betatika utai ke diayanka ba kedai? Enda, sida tentu enggai ngereja nya enti sida deka menang. Pia mega, ba lumba ke nuju ngagai pengidup, kitai mega patut nyeliahka nama-nama utai ke tau ngelimpangka kitai. Enti kitai terus betatika juluk ati sereta nyembah Jehovah enggau ransing baka Paul, kitai ulih nerima berekat!

8. Nama tiga iti penanggul ke deka diperatika kitai?

⁸ Aram kitai beratika tiga iti penanggul ke ulih ngasuh kitai lemi semengat. Tiga iti penanggul nya: (1) utai ke disadang enda nyadi, (2) nyau enda kering agi ketegal majak tuai, enggau (3) napi penanggul ke enda ulih diseliah tauka diputarka. Kitai deka beratika chara orang bukai mutarka penanggul tu.—Plp. 3:17.

9. Nama ulih nyadi lebuh utai ke disadang kitai enda nyadi?

⁹ Utai ke disadang enda nyadi. Kitai endang deka utai manah ke disemaya Jehovah amat nyadi. Nabi Habakuk mega dekaka utai ti sama. Iya madahka diri deka Jehovah muai penyai ke nyadi ba menua Judah. Tang, Jehovah ngasuh iya: “Anti aja utai nya.” (Hab. 2:3) Lebuh utai ke disadang kitai bedau nyadi diatu, nya ulih ngasuh kitai lenyau pengeransing, berasai lemi semengat tauka asa. (J-lam. 13:12) Tu nyadi ngagai bala menyadi Kristian ba urung taun 1914. Maya nya,  mayuh ari sida ke dipilih niki ke serega ngarapka diri deka kin ba taun 1914. Baka ni sida mutarka asai ati ti asa lebuh utai ke disadang sida enda nyadi?

10. Baka ni sepasang laki bini mutarka asai ati ti asa ketegal utai ke disadang enda nyadi?

¹⁰ Peratika chunto dua iku menyadi Kristian ti taluk ke mutarka asai ati ti asa. Menyadi Royal Spatz dibaptisa ba taun 1908 maya iya beumur 20 taun. Iya amat andalka diri deka nerima berekat niki ke serega ba taun 1914. Nya alai ba taun 1911, iya madah ngagai seiku menyadi Kristian indu ke benama Pearl, ke deka enggau iya jadi: “Nuan nemu utai ke deka nyadi ba taun 1914. Enti tua deka jadi, diatu meh maya ti ngena.” Tang berekat ke disadang seduai iya enda nyadi. Kati seduai enggai agi nyembah Jehovah ketegal nya? Enda, laban seduai betatika pengawa ngereja peneka Jehovah enggau tetap ati, ukai berekat nya. Seduai bebendar deka ba lumba ke nuju ngagai pengidup enggau ati ti liat. Royal enggau Pearl mengkang kisuk sereta tetap ati nyentuk ngagai seduai iya nembuka pengawa ba dunya tu bepuluh taun udah nya, sebedau niki ke serega. Nuan tentu deka nganti maya lebuh Jehovah deka muai sebarang utai ke ngachau nama Iya, nunjukka chara Iya merintah nya betul, sereta ngamatka semua semaya Iya. Tu deka nyadi ba maya ti udah ditetapka Jehovah. Seraya nganti, aram meh kitai terus kisuk nyembah Jehovah. Anang ngelakka diri berasai asa sereta lemi semengat ketegal utai ke disadang enda nyadi.

11-12. Nama kebuah kitai ulih terus gawa ke Jehovah enggau tetap ati taja pan kitai enda kering agi baka suba? Beri siti chunto.

¹¹ Nyau enda kering agi ketegal majak tuai. Orang ke enggau lumba begunaka tubuh ti kering. Tang nuan enda ibuh begunaka tubuh ti kering enti deka terus mansang ba pengarap. Kebendar iya, mayuh ari sida ke enda tentu kering ba tubuh agi ngereja pengawa ke Jehovah enggau naka ulih. (2 Kor. 4:16) Ambika chunto, Menyadi Arthur Secord * beumur 88 taun, lalu iya udah gawa ba Betel pengelama 55 taun. Diatu iya lemi sereta enda bepengerai. Bisi sekali, seiku indu misi datai ngintu iya. Indu misi nya malik ngagai iya lalu madahka: “Menyadi Secord, nuan udah mayuh ngereja utai ke Jehovah.” Taja pia, Arthur enda betatika utai ti udah dijapai iya suba. Iya malik lalu tuchum ngagai indu misi nya. Ku iya: “Au, amat nya. Tang keberat agi kitai patut mengkang tetap ati ari diatu, ukai beberatka utai ti udah digaga kitai suba.”

¹² Nuan engka udah betaun-taun gawa ke Jehovah. Lalu diatu nuan engka ngasaika diri enda ulih ngereja mayuh agi baka ke udah  ketegal enda bepengerai. Enti pia, anang lemi semengat. Nuan ulih andalka Jehovah deka ingat sereta beterima kasih ke utai ti kala dikereja nuan suba. (Heb. 6:10) Lalu kingatka meh, pengerindu kitai ke Jehovah ukai bepanggai ba pemayuh utai ti dikereja ke Iya. Tang nya bepanggai ba runding kitai ti positif sereta ngereja utai ke Jehovah enggau naka ulih. (Kol. 3:23) Jehovah nemu pengurang kitai sereta enda ngarapka lebih ari kitai.—Mrk. 12:43, 44.

13. Baka ni utai ke ditapi Anatoly enggau Lidiya meransang kitai nyembah Jehovah enggau tetap ati taja pan engka udah lama napi penanggul?

¹³ Napi penanggul ke enda ulih diseliah tauka diputarka. Sekeda nembiak Jehovah udah betaun-taun natka penanggul sereta pemerinsa. Ambika chunto, Anatoly Melnik * semina beumur 12 taun lebuh apai iya ditangkap, dijil, sereta dibuai ngagai Siberia, ke penyauh lebih ari 7,000 km (4,000 batu) ari sida sebilik ba Moldova. Setaun udah nya, Anatoly, indai iya, enggau aki ini iya mega dibuai ngagai Siberia. Nyau kelama, sida ulih datai ke gempuru ba genturung pendiau ke bukai. Tang, sida patut bejalai 30 km (20 batu) maya musin seleju, natka gaya hari ti balat chelap maya nya. Udah nya, Menyadi Melnik dijil tiga taun, jauh ari bini iya, Lidiya, sereta anak indu seduai iya ke beumur setaun. Taja pan Anatoly enggau sida sebilik betaun-taun napi pemerinsa, sida mengkang nyembah Jehovah enggau tetap ati. Diatu, Anatoly beumur 82 taun. Iya gawa ba Komiti Pampang Opis di Asia Tengah. Baka Anatoly enggau Lidiya, aram meh kitai bebendar gawa ke Jehovah sereta terus betan baka ke udah.—Gal. 6:9.

14. Nama patut digaga Paul enti iya deka ngulihka juluk ati iya?

¹⁴ Paul andalka diri ulih nembuka lumba nya lalu ngulihka juluk ati iya. Ketegal iya orang ti dipilih niki ke serega, iya ngadang diri deka bulih ‘prais, iya nya kangau Petara.’ Taja pia, kena ngulihka juluk ati nya, iya sedar iya patut “majak belanda.” (Plp. 3:14) Paul ngena sempama ti ngerinduka ati tu nulung bala menyadi ba Pilipi terus betatika juluk ati sida.

15. Baka ni Paul ngena chunto bekaul enggau peranak kena meransang orang Kristian ba Pilipi ngambika sida “majak belanda”?

¹⁵ Paul ngingatka bala menyadi Kristian ba Pilipi pasal sida ke bisi pengadang niki ke serega, lalu nyadi peranak serega. (Plp. 3:20) Nama kebuah sida patut ingatka tu? Maya nya  suba, orang keran deka nyadi peranak Rome ketegal perintah Rome meri mayuh penguntung ngagai rayat iya. * Tang, menyadi Kristian ti dipilih ke serega deka nyadi peranak ke siti perintah ti chukup badas. Perintah tu deka meri sida mayuh agi penguntung enti dibandingka enggau perintah Rome. Nya kebuah Paul meransang sida terus idup nyadi peranak ti nitihka ajar ti dibai Berita Manah Kristus. (Plp. 1:27) Kemayaharitu, bala menyadi kitai ti dipilih ke serega netapka teladan ti manah seraya sida majak belanda ngulihka juluk ati sida, iya nya idup belama iya ba serega.

16. Nitihka Pilipi 4:6, 7, nama patut dikereja kitai enda ngira pengadang kitai nya ba serega tauka ba dunya paradais?

¹⁶ Enda ngira pengadang kitai nya ba serega tauka ba dunya paradais, kitai patut majak belanda ngambika tau bulih berekat nya. Enda ngira nama pemujur ke udah dijapai tauka penyalah ke kala digaga kitai, kitai enggai ngelakka nya nagang kitai ngaga pemansang ba pengarap. Lalu kitai enggai ngelakka nama-nama utai ngasuh kitai ngetu nyembah Jehovah. (Plp. 3:16) Kitai engka udah lama deka meda semaya Jehovah dikeamatka. Kitai engka nyau tuai lalu enda kering agi. Tauka kitai nyau betaun-taun napi penanggul sereta pemerinsa. Enda ngira nama nyadi “anang irauka utai.” Tang awakka sampi peminta nuan didinga Jehovah, lalu Iya deka meri nuan pemaik ke enda disadang nuan.—Bacha Pilipi 4:6, 7.

17. Nama deka dikerandauka kitai ba artikel pengudah tu?

¹⁷ Baka orang ke belanda ti bebendar deka nembuka lumba nyentuk ngagai adan, aram meh kitai terus betatika juluk ati ti deka nembuka lumba ke nuju ngagai pengidup. Kitai mega deka betatika pengadang ke deka diulih kitai jemah ila seraya kitai majak semak deka datai ba adan. Kitai deka terus ngereja nya ari diatu enggau naka ulih. Nama patut digaga kitai ngambika ulih terus betan, majak belanda ba jalai ti betul lalu nitihka pengelaju diri? Artikel ke nangkanka tu deka nulung kitai netapka utai ti patut dikenuluka ba pengidup sereta baka ni kitai ulih “milih utai ti pemadu badas.”—Plp. 1:9, 10.