1. Nama dipadah David pasal pemaruh ati Jehovah?

ULIH kitai ngumbai Jehovah baruh ati? Ulih. David kala nulis: ‘Nuan udah meri aku pengelepas nyadika terabai aku, lalu [“pemaruh ati,” NWT] Nuan ba aku udah ngasuh aku kering.’ (2 Sam. 22:36; Mas. 18:35) Lebuh nulis ayat nya, David engka ngenang baru pasal nabi Samuel ke datai ngagai rumah apai iya ke deka milih raja Israel ti baru. David nya anak ke pemadu biak ari lapan iku menyadi lelaki. Tang David dipilih Jehovah nyadi raja nganti Raja Saul.—1 Sam. 16:1, 10-13.

2. Nama deka dikerandauka kitai ba artikel tu?

² David tentu setuju enggau utai ti dipadah pemasmur pasal Jehovah: “Iya nilik ke baruh deka meda langit enggau dunya. Iya ngasuh orang ke seranta diau lantang . . . duduk begulai enggau bala raja.” (Mas. 113:6-8) Ba artikel tu, kitai deka belajarka utai ti beguna pasal pemaruh ati ke diayanka Jehovah. Udah nya kitai mega deka berandauka utai ke ulih dipelajar ari Raja Saul, nabi Daniel, sereta Jesus pasal pemaruh ati.

3. Baka ni Jehovah nunjukka Diri baruh ati?

³ Kitai ulih meda pemaruh ati Jehovah ari utai ke digaga  Iya. Taja pan kitai enda sempurna, Jehovah nerima sembah kitai. Iya indah ngumbai kitai pangan Iya. (Mas. 25:14) Ngambika ulih nyadi pangan Iya, Jehovah meri Anak Iya nyadika tebus kena muai dosa kitai. Endaka tu nunjukka Jehovah amat kasih sereta siru ke kitai?

4. Nama udah diberi Jehovah ngagai kitai, lalu nama kebuah?

⁴ Perundingka siti agi chara Jehovah nunjukka Diri baruh ati. Ketegal Jehovah nempa kitai, Iya ulih nentuka pengidup kitai. Tang Iya enda ngereja nya. Iya meri kitai peluang milih. Iya deka kitai nyembah Iya ketegal kitai rinduka Iya sereta nemu penguntung ke diulih ketegal ngasika Iya. (U-dat. 10:12; Isa. 48:17, 18) Kitai amat gaga ati laban Jehovah baruh ati!

5. Baka ni Jehovah ngajar kitai baruh ati? (Peda gambar ba kulit majalah.)

⁵ Baka ni Jehovah ngajar kitai baruh ati? Jehovah nya Petara ti bepenemu-dalam di dunya raya. Tang Iya sanggup nerima penemu orang bukai. Ambika chunto, Jehovah nejuka Anak Iya nulung Iya nempa semua utai. (J-lam. 8:27-30; Kol. 1:15, 16) Taja pan Jehovah nya pemadu bekuasa, Iya meri sekeda pengawa ngagai orang bukai. Ambika chunto, Iya milih Jesus nyadi Raja Perintah Petara, lalu mega meri sekeda tanggung pengawa ngagai 144,000 iku orang ke sama merintah enggau Jesus. (Luk. 12:32) Endang amat, Jehovah bisi ngelatih Jesus nyadi Raja sereta Imam Besai. (Heb. 5:8, 9) Iya mega ngelatih sida ke sama merintah enggau Jesus. Lebuh Jehovah meri sida  tanggung pengawa, Iya enda ngansak sida nitihka penemu Iya. Tang, Iya pechayaka sida deka ngereja peneka Iya.—Pem. 5:10.

6-7. Nama ulih dipelajarka kitai ari Jehovah pasal meri tanggung pengawa ngagai orang bukai?

⁶ Perundingka tu: enti Jehovah enda begunaka tulung ari sapa-sapa sanggup meri tanggung pengawa ngagai orang bukai, endaka kitai diperansang deka nunda Iya? Pikirka chunto tu, kati nuan nya tuai bilik tauka tuai gempuru ba eklisia? Enti pia, teladan meh Jehovah enggau meri tanggung pengawa ngagai orang bukai, lalu anang ngansak sida nitihka chara nuan. Enti nuan neladan Jehovah, nuan ukai semina ulih nembuka pengawa aja, tang mega ulih ngelatih orang bukai sereta nulung sida andal agi ngagai diri empu. (Isa. 41:10) Nama utai bukai ke ulih dipelajar sida ke bisi tanggung pengawa ari Jehovah?

⁷ Bup Kudus madah, Jehovah rindu ningaka penemu bala melikat. (1 Raj. 22:19-22) Apai indai, baka ni kita ulih neladan Jehovah? Ba maya ti ngena, tanya meh runding bala anak kita pasal chara sekeda pengawa ulih digaga. Lalu enti nya engkeman, titihka penemu sida.

8. Baka ni Jehovah nunjukka Diri liat ati lebuh nulung Abraham enggau Sarah?

⁸ Siti agi chara Jehovah nunjukka Diri baruh ati nya, lebuh Iya liat ati. Ambika chunto, Jehovah liat ati enggau bala nembiak Iya ti betanyaka pemutus Iya enggau chara ti bebasa. Lebuh Abraham madahka diri enda setuju enggau pemutus Jehovah ti deka ngerusakka Sodom enggau Gomora, Jehovah mendingka iya. (P-kal. 18:22-33) Lalu kingatka lebuh bini Abraham, Sarah ketawaka semaya Jehovah ti deka ngasuh iya beranak ba umur ti udah tuai. Jehovah enda pedis ati tauka ringat ngagai iya. (P-kal. 18:10-14) Tang, Iya ngayanka basa ngagai Sarah.

9. Nama ulih dipelajarka apai indai sereta tuai gempuru ari teladan Jehovah?

⁹ Nama ulih dipelajarka apai indai sereta tuai gempuru ari teladan Jehovah? Pikirka tu. Nama deka digaga kita enti anak tauka sekeda menyadi Kristian enda setuju enggau pemutus kita? Kati kita tekala nya ngemetulka sida? Tauka kita nguji meretika runding sida? Enti kita neladan Jehovah, diri sebilik sereta bala menyadi Kristian tentu bulih penguntung. Nyentukka diatu, kitai udah berandau utai ke ulih dipelajar ari pemaruh ati Jehovah. Diatu kitai deka belajar ari chunto bukai dalam Bup Kudus pasal chara ngayanka pemaruh ati tauka kualiti nemu tatak diri.

10. Baka ni Jehovah ngena chunto ari Bup Kudus ngajar kitai?

¹⁰ Jehovah ngena chunto ari Bup Kudus ngajar kitai. (Isa. 30:20, 21) Kitai ulih belajar mayuh lebuh kitai belematika utai ku Bup Kudus pasal orang ke ngembuan kualiti ti ngelantangka ati Petara sereta orang ke enda ngayanka kualiti nya.—Mas. 37:37; 1 Kor. 10:11.

11. Nama ulih dipelajar kitai ari chunto Raja Saul ti enda manah nya?

¹¹ Peratika utai ke nyadi ba Raja Saul. Iya baruh ati lebuh agi biak. Iya nemu tatak diri sereta bisi kakang ati deka nerima mayuh tanggung pengawa. (1 Sam. 9:21; 10:20-22) Tang pengudah nyadi raja, iya nyadi sumbung lalu ngereja utai ke ukai pengawa iya. Bisi sekali, iya enda sabar nganti nabi Samuel. Ari ke baruh ati lalu arapka Jehovah deka nyelamatka nembiak Iya, Saul ngenjuk pemeri tunu taja pan nya ukai pengawa iya.  Ketegal nya, Jehovah nulak Saul nyadi raja. (1 Sam. 13:8-14) Kitai bulih penemu-dalam enti belajar ari chunto Saul ti enda manah sereta enda ngereja utai ke ukai pengawa kitai.

12. Baka ni Daniel ngayanka diri baruh ati?

¹² Enda baka Saul, Nabi Daniel nunjukka pemaruh ati. Ba pengidup Daniel, iya seruran baruh ati sereta ngiga iring ari Jehovah. Peratika tu. Lebuh Jehovah ngena Daniel madahka reti mimpi ngagai Nebukadnesar, Daniel enda madahka nya datai ari penemu diri empu. Tang iya enggau baruh ati meri mulia ngagai Jehovah. (Dan. 2:26-28) Nama ulih dipelajarka kitai? Enti bala menyadi rindu ninga cheramah kitai tauka bisi peneleba ti manah ba pengawa nginjil, kitai deka meri semua mulia ngagai Jehovah. Kitai nemu, kitai semina ulih mujur ngereja semua pengawa tu ketegal saup ari Jehovah. (Plp. 4:13) Enti kitai baruh ati, kitai mega neladan chunto manah Jesus. Baka ni?

13. Nama dipelajarka kitai ari Jesus ti baruh ati ba John 5:19, 30?

¹³ Taja pan iya Anak Petara ti sempurna, Jesus bepanggai ba Jehovah. (Bacha John 5:19, 30.) Jesus enda kala nguji ngerampas kuasa ari Apai iya. Pilipi 2:6 madah, Jesus ‘enda ngumbai diri sebaka enggau Petara.’ Jesus nemu tatak diri sereta bebasaka kuasa Apai iya.

14. Lebuh Jesus dipinta ngereja pengawa ke ukai diasuh Jehovah, nama digaga Jesus?

¹⁴ Perundingka utai ke digaga Jesus lebuh James enggau John sereta indai seduai iya minta Jesus ngereja siti utai ke ukai pengawa iya. Nama digaga Jesus? Tekala nya Jesus madahka, semina Apai iya ti di serega bisi hak mutuska sapa duduk muak ari kanan enggau ari kiba Jesus ba Perintah iya. (Mat. 20:20-23) Tu nunjukka, Jesus nemu tatak diri sereta baruh ati. Iya semina ngereja pengawa ke diasuh Jehovah. (Jhn. 12:49) Baka ni kitai ulih neladan chunto manah Jesus?

15-16. Baka ni kitai ulih nitihka jaku lalau ba 1 Korint 4:6?

¹⁵ Kitai ulih neladan pemaruh ati Jesus lebuh nitihka jaku lalau ba 1 Korint 4:6. Ayat nya madahka: “Anang ngelui utai ti udah ditulis.” Nya alai, lebuh orang minta jaku lalau ari kitai, perundingka ayat Bup Kudus  sereta litaricha ari gerempung kitai. Kitai enggai ngansak orang nitihka penemu kitai tauka bejaku enggau enda berunding. Enggau nya, kitai nunjukka diri nemu tatak diri. Enggau baruh ati kitai nemu, jaku lalau ari Jehovah nya seruran manah agi ari penemu diri empu.—Pem. 15:3, 4.

¹⁶ Kelimpah ari bebasaka Jehovah, kitai bisi kebuah manah ke bukai kena ngayanka pemaruh ati. Diatu kitai deka berandauka, baka ni pemaruh ati mai pengaga ati sereta nulung kitai begulai manah enggau orang bukai.

17. Nama kebuah orang ke baruh ati ulih gaga ati?

¹⁷ Enti kitai baruh ati, kitai tentu deka gaga ati. Nama kebuah? Lebuh kitai nemu tatak diri, kitai deka beterima kasih sereta gaga ati nerima tulung ari orang bukai. Pikirka chunto Jesus ti ngeraika sepuluh iku orang ke sakit lan. Semina seiku aja ke beterima kasih ngagai Jesus pengudah digeraika. Orang nya nemu, iya enda ulih digeraika enti nadai tulung ari Jesus. Ketegal nya, lelaki ti baruh ati nya beterima kasih ke tulung ti udah diterima lalu muji Petara.—Luk. 17:11-19.

18. Baka ni baruh ati nulung kitai begulai manah enggau orang bukai? (Rome 12:10)

¹⁸ Orang ke baruh ati senang begulai enggau orang bukai lalu bulih mayuh pangan. Nama kebuah? Sida gaga ati ngumbai orang bukai bisi kualiti ti manah sereta ngayanka diri andalka sida. Orang ke baruh ati mega gaga ati lebuh orang bukai mujur ngereja pengawa sereta jampat muji sida.—Bacha Rome 12:10.

19. Nama kebuah kitai nyeliah ari sumbung?

 ¹⁹ Orang ke sumbung tusah deka muji orang bukai, tang sida rindu dipuji. Sida rindu mandingka diri enggau orang bukai sereta ngumbai diri manah agi. Ari ke ngelatih orang bukai lalu meri sida pengawa, orang ke sumbung suah ngereja pengawa kediri laban iya ngumbai orang bukai enda ulih ngereja pengawa nya enggau manah. Pia mega, sida ngumbai diri landik agi sereta berasai chemburu lebuh orang bukai ngereja utai ti manah agi ari iya empu. (Gal. 5:26) Orang ke baka tu tusah bulih pangan. Enti kitai nemu diri sumbung, bebendar meh besampi minta Jehovah ‘ngubah chara kitai berunding’ ngambika kitai enda ngembuan ulah nya.—Rom. 12:2.

20. Nama kebuah kitai patut baruh ati?

²⁰ Kitai amat beterima kasihka teladan Jehovah! Kitai nemu Iya baruh ati ari utai ke digaga Iya ke nembiak Iya, lalu kitai deka neladan Iya. Kitai mega deka neladan nembiak Jehovah ba Bup Kudus ke baruh ati. Aram meh kitai seruran meri basa sereta puji ngagai Jehovah! (Pem. 4:11) Enti kitai ngereja nya, kitai ulih bejalai sejalai enggau Jehovah, ke rindu orang ti baruh ati.