1. Nama udah diberi Jehovah ngagai tiap iku nembiak Iya ke tetap ati?

JEHOVAH udah meri genap iku nembiak Iya ke tetap ati ungkup pengawa ba gerempung Iya. Taja pan pengawa kitai enda sama, tang semua kitai berega lalu begunaka pangan diri. Rasul Paul nulung kitai meretika pasal utai tu. Baka ni?

2. Nitihka Epesus 4:16, nama kebuah patut nyukung pangan diri sereta besaup ngereja pengawa?

² Ba ayat tema ke dikena ba pun artikel tu, Paul enggau terang madahka nadai seiku ari kitai tau nyebut ngagai menyadi bukai, “Aku enda begunaka nuan!” (1 Kor. 12:21) Enti kitai deka eklisia bisi pemaik, kitai enda tau enda ngumbai pangan diri berega sereta besaup ngereja pengawa. (Bacha Epesus 4:16.) Lebuh kitai beserakup, semua menyadi deka ngasaika pengerindu lalu tu nulung eklisia mengkang tegap.

3. Nama deka dipejuraika ba artikel tu?

³ Nama sekeda chara kitai ulih ngayanka basa ngagai bala menyadi ba eklisia? Ba artikel tu, kitai deka bejuraika tiga iti chara, iya nya (1) chara bala tuai gempuru ngayanka basa ngagai pangan diri, (2) chara kitai ngayanka basa ngagai bala menyadi ke bedau kawin, lalu (3) chara kitai ngayanka pengerindu ngagai sida ke enda entu nemu bansa jaku kitai.

4. Nama jaku lalau Paul ba Rome 12:10 ke patut dititihka bala tuai gempuru?

⁴ Jehovah udah milih semua tuai gempuru ba eklisia  ngena roh kudus, lalu tiap iku sida ngembuan pemeri enggau penau ti enda sebaka. (1 Kor. 12:17, 18) Sekeda engka baru dipilih nyadi tuai gempuru. Nya alai, sida enda mayuh peneleba enti dibanding enggau tuai gempuru ke bukai. Sekeda engka tusah ngereja mayuh pengawa ketegal umur sereta pengerai sida. Taja pia, nadai seiku pan ari sida tau madah ngagai tuai gempuru ke bukai, “Aku enda begunaka nuan!” Tang tiap iku tuai gempuru patut nitihka jaku lalau Paul ba Rome 12:10.—Bacha.

5. Baka ni bala tuai gempuru ngayanka basa ngagai pangan diri, lalu nama kebuah sida patut ngereja nya?

⁵ Siti chara bala tuai gempuru ngayanka basa iya nya, mendingka pangan diri enggau manah. Tu amat beguna lebuh sida bisi aum pasal pekara ti berat. Nama kebuah? Peratika utai ke dipadah ba Menara Pengawal kena 1 Oktober 1988, dalam jaku Indonesia: “Bala tuai gempuru nemu, nengah roh kudus, Jesus ulih ngena sebarang tuai gempuru madahka prinsip Bup Kudus ke ulih nulung sida mutarka penanggul tauka ngaga pemutus ti berat. (SKR. 15:6-15) Roh kudus ukai semina nulung seiku tuai gempuru aja, tang semua sida.”

6. Baka ni bala tuai gempuru ulih beserakup, lalu nama penguntung ngagai eklisia?

⁶ Tuai gempuru ti bebasaka tuai gempuru bukai enda seruran nguji deka bejaku dulu lebuh ba aum sida. Iya enda seruran bejaku, lalu enda ngumbai penemu iya selalu betul. Iya madahka runding iya enggau baruh ati, lalu ningaka penemu orang bukai enggau manah. Kelebih agi, iya keran deka bekunsika prinsip ari Bup Kudus sereta nitihka iring ari “ulun ke tetap ati sereta bepenemu-dalam.” (Mat. 24:45-47) Lebuh bala tuai gempuru berandauka utai enggau bepengerindu sereta basa, roh kudus deka enggau sida lalu ngiring sida ngaga pemutus ti ulih negapka eklisia.—Jas. 3:17, 18.

7. Nama runding Jesus pasal sida ke bedau kawin?

⁷ Kemayaharitu, eklisia kitai nyengkaum sida ke melaki-bini, diri sebilik, sereta bala menyadi ke agi bujang dara. Baka ni runding kitai ngagai sida ke bedau kawin? Peratika nama runding Jesus bekaul enggau sida ke bedau kawin. Lebuh Jesus ngereja pengawa nginjil ba dunya, iya enda kawin. Iya mengkang bujang lalu ngena awak ngereja pengawa iya. Jesus nadai kala ngajar sekalika orang Kristian patut kawin tauka enda. Taja pia Jesus bisi madahka, sekeda orang Kristian deka milih enda kawin. (Mat. 19:11, 12) Jesus bebasaka sida ke enda kawin. Iya enda ngumbai sida ke milih deka mengkang bujang dara manah agi ari ke udah kawin tauka nadai penguntung ketegal enda kawin.

8. Nitihka 1 Kor. 7:7-9, nama diasuh Paul diperundingka orang Kristian?

⁸ Baka Jesus, rasul Paul mengkang bujang lebuh bejalaika pengawa nginjil. Paul nadai kala ngajar orang Kristian enda ulih kawin. Iya nemu nya pemutus seiku-seiku orang. Taja pia, iya bisi meransang bala menyadi berundingka enti sida ulih mengkang bujang kena gawa ke Jehovah. (Bacha 1 Korint 7:7-9.) Paul tentu enda ngemaruhka orang Kristian ke agi bujang. Kebendar iya, iya milih Timoti ke agi bujang ngereja pengawa ti beguna. * (Plp. 2:19-22) Nya alai, endang salah enti kitai ngumbai seseiku menyadi lelaki nya layak agi megai tanggung pengawa ketegal iya udah kawin tauka bedau kawin.—1 Kor. 7:32-35, 38.

9. Nama runding ke patut dikembuan kitai pasal kawin sereta pengidup bujang dara?

⁹ Jesus tauka Paul nadai kala ngajar orang Kristian patut kawin tauka mengkang bujang dara. Nyadi, nama runding ke patut dikembuan kitai pasal pekara nya? Menara Jaga kena 1 Oktober 2012, nerangka: “Amat, dua pekara tu [kawin sereta pengidup bujang dara] ulih dikumbai pemeri ari Petara. . . . Jehovah enda ngumbai [pengidup bujang dara] pekara ti ngemaluka tauka ngasuh tusah ati.” Nya alai, kitai patut bebasaka bala menyadi Kristian ke agi bujang dara dalam eklisia.

10. Baka ni kitai ngayanka basa ngagai menyadi Kristian ke bujang dara ti tetap ati?

 ¹⁰ Baka ni kitai ulih bebasaka asai ati bala menyadi ke bedau kawin? Kingatka, sekeda menyadi Kristian udah ngaga pemutus enda kawin. Sekeda menyadi deka kawin, tang bedau tetemuka orang ke ulih nyadika kaling pengidup. Sekeda agi engka udah lenyau kaling pengidup ba pemati. Enda ngira kebuah iya, kati tu reti iya menyadi Kristian ke bukai ulih nanya menyadi ke bujang dara kebuah sida bedau kawin, tauka nulung sida begigaka kaling pengidup? Endang amat, sekeda menyadi Kristian ke bujang dara engka bisi minta ngigaka kaling. Tang enti sida enda minta, baka ni asai ati sida lebuh menyadi bukai madahka deka nulung sida ngiga kaling? (1 Tes. 4:11; 1 Tim. 5:13) Aram kitai beratika sekeda utai ke dipadah menyadi Kristian ke bujang dara ti tetap ati.

11-12. Baka ni kitai ulih ngenusahka ati menyadi Kristian ke agi bujang dara?

¹¹ Seiku tuai ti ngabas ke ngereja pengawa iya enggau manah ngasaika pengidup bujang bisi mayuh penguntung. Tang ku iya, lebuh menyadi Kristian nanya, “Nama kebuah nuan bedau kawin?”, tu ngenusahka ati iya. Seiku menyadi lelaki ke bujang ke gawa ba pampang opis madahka: “Kekadang sekeda menyadi kasih ke menyadi ke bedau kawin. Tu ulih ngasuh orang berunding, pengidup bujang nya ngenusahka, ukai siti pemeri.”

¹² Seiku menyadi indu ke gawa ba Betel madahka: “Sekeda menyadi Kristian ngumbai semua menyadi ke agi bujang dara benung ngiga kaling, tauka ngumbai semua menyadi ke agi bujang dara ngiga kaling ninting kali bisi peluang begelumu. Bisi sekali, aku bisi pengawa Betel ba endur bukai. Aku datai ba hari eklisia endur nya bisi gempuru. Menyadi indu ke alai aku bemalam madah, bisi dua iku menyadi lelaki ke serambau enggau aku ba eklisia nya. Iya ngasuh aku anang irau, laban iya ukai ka ngiga kaling ke aku. Tang lebuh kami tama ngagai Palan Gempuru, iya enggau lengkas mai aku bekelala enggau dua iku menyadi lelaki nya. Maya nya, kami betiga berasai amat malu.”

13. Nama chunto ti meransang ati seiku menyadi indu ke agi dara?

¹³ Seiku agi menyadi indu ke gawa ba Betel madahka: “Aku ngelala bala pengerintis ke tuai ti bedau kawin. Sida nemu berunding, bisi juluk ati, sanggup nulung orang bukai, sereta gaga ati. Sida amat berega ba eklisia. Sida bisi ulah ti manah taja pan enda kawin. Sida enda ngumbai diri manah agi ari orang bukai ketegal bedau kawin. Tauka ngumbai diri enda ulih gaga ati ketegal nadai kaling pengidup sereta anak.” Endang ngelantangka ati lebuh kitai dipebasa sereta dikumbai berega ba mata bala menyadi. Tiap iku kitai nemu diri dikerinduka laban bala menyadi ibuhka kitai, sida enda kepapas tauka ngumbai diri manah agi ari kitai, lalu sida enda kelalu kasih ke kitai.

14. Baka ni kitai ngayanka basa ngagai menyadi Kristian ke bujang dara?

¹⁴ Bala menyadi Kristian ke bujang dara tentu berasai dikerindu enti kitai ngemeratka kualiti manah sida. Ari ke berasai kasih laban sida bedau kawin, kitai patut meda penetap ati sida. Asil iya, menyadi ke bujang dara enda ngumbai kitai nyebut ngagai sida: “Aku enda begunaka nuan!” (1 Kor. 12:21) Tang, sida deka nemu kitai bebasaka sida sereta gaga ati ke ungkup sida ba eklisia.

15. Nama ubah ke digaga sekeda menyadi ngambika ulih ngereja mayuh agi ba pengawa nginjil?

¹⁵ Beberapa taun ti udah, mayuh penginjil netapka juluk ati belajarka bansa jaku bukai kena ngereja mayuh agi ba pengawa nginjil. Ngambika ulih ngereja nya, sida patut ngaga ubah ba pengidup. Sida ninggalka eklisia ke ngena bansa jaku diri empu, lalu pindah ngagai eklisia ke ngena bansa jaku bukai ti begunaka mayuh agi penginjil. (SKR. 16:9) Sida ngaga pemutus tu laban deka gawa mayuh agi ke Jehovah. Taja pan sida engka begunaka mayuh taun ngambika landik ba bansa jaku baru, sida ulih nulung eklisia dalam mayuh chara. Kualiti manah sereta peneleba ti dikembuan sida ngeringka bala menyadi Kristian ba eklisia. Kitai amat rinduka semua menyadi tu!

16. Baka ni raban tuai gempuru nentuka menyadi lelaki layak nyadi tuai gempuru tauka penulung gempuru?

¹⁶ Taja pan seiku menyadi lelaki bedau tentu landik ba bansa jaku baru, tu ukai reti iya raban tuai gempuru enda ulih milih iya nyadi tuai gempuru tauka penulung gempuru. Bala tuai gempuru deka nentuka iya layak tauka enda, bepelasarka iring ari Bup Kudus pasal pendiau tuai gempuru sereta penulung gempuru, ukai bepanggai ba pemandai iya bejaku bansa jaku ke dikena eklisia nya.—1 Tim. 3:1-10, 12, 13; Tit. 1:5-9.

17. Nama pemutus ke patut digaga apai indai lebuh pindah ngagai menua bukai?

¹⁷ Sekeda menyadi Kristian mai diri sebilik pindah ngagai menua bukai ketegal deka ngulihka pengelikun tauka deka ngiga kereja. Nya alai, anak sida engka ngagai sekula ke ngena bansa jaku menua nya. Apai indai engka mega patut belajar bansa jaku ba menua nya ngambika ulih ngiga kereja. Baka ni enti ba endur nya bisi eklisia tauka raban ti ngena jaku asal sida empu? Kati sida patut enggau eklisia ke ngena bansa jaku menua nya, tauka enggau eklisia ti ngena bansa jaku asal sida empu?

18. Sejalai enggau Galatia 6:5, baka ni kitai ngayanka basa ke pemutus ti digaga tuai bilik?

¹⁸ Tuai bilik bisi tanggung pengawa milih eklisia ke diri sebilik. Iya patut ngaga pemutus nitihka utai ke diguna diri sebilik iya. (Bacha Galatia 6:5.) Ketegal tu pemutus seiku-seiku tuai bilik, kitai patut bebasaka pemutus ke digaga iya. Enda ngira nama pemutus iya, kitai deka ngelaluka sereta ngayanka pengerindu ngagai sida sebilik.—Rom. 15:7.

19. Nama patut diperatika tuai bilik?

¹⁹ Bisi mega ruang bilik milih enggau eklisia ke ngena bansa jaku asal apai indai, tang bala anak enda entu nemu jaku asal nya.  Enti endur eklisia nya dikelingi orang ke ngena bansa jaku menua nya, bala anak tusah deka mereti utai ke dikerandau ba gempuru sereta sida tusah deka ngaga pemansang ba pengarap. Nama kebuah? Laban ba sekula, anak engka ngena bansa jaku menua baru, ukai jaku asal ke dikena apai indai sida. Lebuh utai tu nyadi, tuai bilik patut berunding enggau dalam sereta besampi minta penemu-dalam ngambika ulih ngaga pemutus ti nulung anak sida semak enggau Jehovah sereta nembiak Iya. Apai indai ulih milih sekalika ngajar anak jaku asal sida, tauka pindah ngagai eklisia ke ngena bansa jaku ti ulih dimeretika anak sida. Enda ngira nama pemutus ke digaga tuai bilik, eklisia ke dipilih iya patut ngayanka basa sereta pengerindu ngagai sida sebilik.

20. Baka ni kitai ulih ngayanka basa ngagai bala menyadi kitai ke belajar bansa jaku ti baru?

²⁰ Enda ngira nama kebuah, seruran deka bisi bala menyadi ke enggau naka ulih belajar bansa jaku ti baru. Sida engka tusah madahka runding diri. Tang, enti kitai enda semina beratika chara sida bejaku, kitai ulih meda pengerindu enggau pengeran sida gawa ke Jehovah. Enti kitai beratika kualiti manah sida, kitai deka rindu agi sereta bebasaka sida. Lalu kitai enda nyebut “aku enda begunaka nuan” ketegal sida enda entu nemu bansa jaku ke dikena kitai.

21-22. Nama ulih digaga tiap iku kitai?

²¹ Kitai amat beterima kasih ngagai Jehovah laban udah meri tiap iku kitai pengawa dalam gerempung Iya. Enda ngira lelaki tauka indu, bujang dara tauka udah kawin, tuai tauka biak, landik ba bansa jaku bukai tauka nemu mimit aja, semua kitai berega ba Jehovah sereta enggau pangan diri.—Rom. 12:4, 5; Kol. 3:10, 11.

²² Aram meh kitai bebendar ngena utai ke dipelajar ari sempama Paul pasal tubuh mensia. Enggau nya, kitai deka terus ngiga chara meransang bala menyadi Kristian. Pia mega, kitai deka seruran ngayanka pengerindu sereta basa ngagai sida.