1. Nama basa ke dikembuan kitai?

ENDANG basa ti besai ulih nyadi sebagi ari gerempung Jehovah! Kitai ngasaika pemaik sereta pengelantang ulih begulai enggau bala menyadi Kristian nyembah Jehovah. Nama ungkup pengawa nuan ba eklisia?

2. Nama sempama ke dikena Paul dalam beberapa iti surat iya?

² Kitai ulih nemu mayuh utai pasal ungkup kitai ba eklisia ari sempama ke dikena rasul Paul dalam beberapa iti surat iya. Ba tiap iti surat iya, Paul mandingka eklisia baka tubuh mensia, lalu tiap iku orang ba eklisia baka perengka tubuh.—Rom. 12:4-8; 1 Kor. 12:12-27; Eps. 4:16.

3. Nama tiga iti pekara ke deka dipejuraika kitai?

³ Ba artikel tu, kitai deka bejuraika tiga iti pekara ke ulih dipelajar ari sempama Paul. Kesatu, tiap iku kitai bisi ungkup * ba gerempung Jehovah. Kedua, utai ke ulih digaga enti kitai tusah meretika nama ungkup kitai ba eklisia. Lalu ketiga, kebuah kitai patut ngereja mayuh pengawa ba gerempung Petara.

4. Nama dipelajarka kitai ari Rome 12:4, 5?

⁴ Utai keterubah ke ulih dipelajarka kitai ari sempama Paul iya nya, tiap iku kitai bisi ungkup ba gerempung  Jehovah. Paul ngepunka sempama iya: “Laban baka tubuh kitai ti mayuh perengka, lalu pengawa ti dikereja sida siti-siti endang enda sebaka, baka nya mega kitai; taja pen kitai tu mayuh, tang kitai tu nyadi siti tubuh dalam Kristus, seraban enggau pangan diri.” (Rom. 12:4, 5) Nama reti ku Paul? Tiap iku kitai bisi ungkup ti enda sebaka dalam gerempung Jehovah, lalu amat berega ba Iya.

5. Nama “pemeri” ke udah diberi Jehovah ngagai eklisia?

⁵ Lebuh nuan berundingka orang ke bisi pengawa ba eklisia, nuan tentu berundingka menyadi Kristian lelaki ke ngiring kitai. (1 Tes. 5:12; Heb. 13:17) Amat, nengah Kristus, Jehovah udah meri “pemeri mensia” dalam gerempung Iya. (Eps. 4:8) “Pemeri mensia” tu nyengkaum Raban ti Ngiring, penulung Raban ti Ngiring, raban Komiti Pampang Opis, tuai ti ngabas, bala pengajar ba Sekula Bup Kudus, tuai gempuru, sereta penulung gempuru. Semua menyadi lelaki tu dipilih nengah roh kudus ngambika ulih nyaga bedus Jehovah sereta ngeringka bala menyadi Kristian.—1 Pet. 5:2, 3.

6. Nitihka 1 Tesalonika 2:6-8, nama keran digaga menyadi lelaki ke dipilih nengah roh kudus?

⁶ Menyadi lelaki dipilih nengah roh kudus kena bejalaika bemacham tanggung pengawa. Baka jari enggau kaki ti bekereja ke tubuh, menyadi lelaki ke dipilih roh kudus bebendar gawa ke penguntung eklisia. Sida enda minta dipuji, tang keran deka meransang sereta ngeringka bala menyadi Kristian. (Bacha 1 Tesalonika 2:6-8.) Kitai amat beterima kasih ngagai Jehovah laban udah milih bala menyadi lelaki ke layak sereta enda berundingka diri empu!

7. Nama berekat ke ngasuh sida ti gawa penuh jam gaga ati?

⁷ Sekeda bala menyadi dipilih nyadi pengerintis seberai tasik, pengerintis spesial, tauka pengerintis biasa. Mayuh bala menyadi Kristian di serata dunya milih ngereja pengawa nginjil sereta ngaga orang nyadi murid nya pengawa penuh jam sida. Asil iya, sida udah nulung mayuh orang nyadi murid Jesus Kristus. Taja pan sida ke gawa penuh jam nya nadai mayuh duit tauka reta, Jehovah udah meri mayuh berekat ke sida. (Mrk. 10:29, 30) Kitai sayauka bala menyadi Kristian tu, lalu kitai beterima kasih ketegal sida sebagi ari gerempung Jehovah!

8. Nama kebuah penginjil berita manah berega ba Jehovah?

⁸ Kati semina menyadi lelaki ke ngiring enggau sida ke gawa penuh jam aja berega ba Jehovah? Enda. Semua penginjil berita manah berega ba Jehovah sereta eklisia. (Rom. 10:15; 1 Kor. 3:6-9) Tu ketegal semua bala menyadi Kristian bisi juluk ati ti sama iya nya, ngaga orang nyadi murid Jesus Kristus, Tuan kitai. (Mat. 28:19, 20; 1 Tim. 2:4) Semua penginjil, enda ngira ke udah dibaptisa tauka bedau dibaptisa, bebendar ngenuluka pengawa ngaga orang nyadi murid.—Mat. 24:14.

9. Nama kebuah kitai ngumbai bala menyadi Kristian indu nya berega?

⁹ Jehovah ngayanka basa ngagai menyadi Kristian indu enggau meri sida pengawa ti beguna. Ba Jehovah, menyadi indu ke nyadi bini, indai, balu, sereta ke agi dara berega ba Iya laban sida tetap ati nyembah Iya. Bup Kudus seruran nyebut pasal bala indu kelia menya ti ngelantangka ati Petara. Sida dipuji ketegal ngayanka teladan manah sida ba penemu-dalam, pengarap, pengeransing,  pemerani, pengerah jari, sereta bebendar gawa. (Luk. 8:2, 3; SKR. 16:14, 15; Rom. 16:3, 6; Plp. 4:3; Heb. 11:11, 31, 35) Kitai amat beterima kasih ngagai Jehovah laban bisi menyadi Kristian indu ke ngembuan kualiti ti manah ba eklisia kemayaharitu!

10. Nama kebuah menyadi ke tuai berega ba kitai?

¹⁰ Kitai mega gaga ati laban bisi mayuh menyadi Kristian ke udah tuai dalam eklisia. Sekeda eklisia bisi menyadi Kristian ke tuai ti tetap ati nyembah Jehovah ari sida agi biak. Sekeda da agi, engka baru belajarka pemendar. Enda ngira sapa sida, mayuh menyadi ke tuai napi penanggul ba pengerai ketegal majak tuai. Ketegal nya, sida tusah deka ngereja pengawa ba eklisia sereta ba pengawa nginjil. Taja pia, sida ngereja utai ke ulih ba pengawa nginjil, lalu enggau naka ulih meransang sereta ngelatih menyadi Kristian ke bukai! Kitai tentu bulih penguntung ari peneleba sida. Sida amat berega ba Jehovah sereta ba kitai.—J-lam. 16:31.

11-12. Baka ni sida ke biak udah meransang nuan?

¹¹ Pikirka mega orang ke biak. Sida napi mayuh penguji ketegal diau ba dunya ke dibaruh kuasa Antu Sitan sereta runding iya ti jai. (1 Jhn. 5:19) Tang, kitai berasai diperansang lebuh sida ke biak meri saut ba gempuru, enggau ba pengawa nginjil, sereta berani ngetanka pengarap sida. Endang amat, kita ke biak bisi ungkup ti beguna ba gerempung Jehovah!—Mas. 8:2.

¹² Taja pia, sekeda bala menyadi Kristian kitai tusah deka pechaya diri berega ba gerempung Jehovah. Nama ulih nulung tiap iku kitai ngasaika diri bisi ungkup ba gerempung Iya? Aram kitai berandauka nya.

13-14. Nama kebuah sekeda baka menyadi ngasaika diri enda berega ba eklisia?

¹³ Peratika utai kedua ti ulih dipelajarka kitai ari sempama Paul, iya nya mayuh menyadi Kristian ngumbai diri enda agi berega ba  eklisia. Tu ngasuh mayuh menyadi Kristian enda pechayaka diri agi berega ba eklisia. Paul nulis: “Enti kaki nyebut, ‘Laban aku ukai jari, nya alai aku ukai raban tubuh nya,’ jaku nya enda ulih ngasuh kaki nya badu agi nyadi perengka tubuh nya. Lalu enti pending nyebut, ‘Laban aku ukai mata, nya alai aku ukai raban tubuh,’ jaku nya enda ulih ngasuh pending nya badu agi nyadi perengka tubuh nya.” (1 Kor. 12:15, 16) Nama reti jaku Paul?

¹⁴ Enti nuan mandingka diri enggau menyadi Kristian bukai, nuan engka berengkah ngumbai diri enda beguna ba eklisia. Sekeda menyadi ba eklisia engka landik ngajar, nemu ngatur pengawa, tauka tuai gempuru ke nemu ngelantang sereta meransang bala menyadi. Ketegal nya, nuan engka ngasaika diri enda semanah sida. Taja pia, nya nunjukka nuan baruh ati sereta nemu tatak diri. (Plp. 2:3) Tang anang enda bejimat. Enti nuan seruran mandingka diri enggau sida tu, nuan deka asa ati. Baka ke dipadah Paul, nuan deka ngasaika diri nadai berega ba eklisia. Nama ulih nulung nuan mutarka asai ati ke baka nya?

15. Nitihka 1 Korint 12:4-11, nama patut ditemu kitai pasal penau ke dikembuan kitai?

¹⁵ Peratika fakta tu. Jehovah meri sekeda orang Kristian ba kurun keterubah roh kudus kena ngereja pengawa ajih, tang ukai semua orang Kristian nerima pemeri ti sama. (Bacha 1 Korint 12:4-11.) Jehovah meri sida pemeri sereta penau ti enda sebaka. Tang semua sida nya berega ba Jehovah. Kemayaharitu, Jehovah nadai meri kitai roh kudus kena ngereja pengawa ajih. Tang prinsip iya agi sama. Semua kitai berega ba Jehovah taja pan utai ke ulih dikereja kitai enda sama.

16. Nama jaku lalau Paul ke patut dititihka kitai?

¹⁶ Ari ke mandingka diri enggau menyadi Kristian ke bukai, kitai patut nitihka jaku lalau rasul Paul: “Genap iku kita patut meresa  pengawa diri. Nya baru iya tau temegahka diri empu, ukai temegahka orang bukai.”—Gal. 6:4.

17. Nama penguntung ke diulih kitai enti nitihka jaku lalau Paul?

¹⁷ Enti kitai nitihka jaku lalau Paul lalu meresa diri empu, kitai engka nemu diri bisi pemeri sereta penau ti nadai ba orang bukai. Ambika chunto, seiku tuai gempuru engka enda landik ngajar ba panggau, tang iya engka landik ba pengawa ngaga orang nyadi murid. Tauka iya engka enda tentu nemu ngatur pengawa baka tuai gempuru ke bukai, tang bala menyadi berasai nyamai minta jaku ajar Bup Kudus ari iya. Tauka iya engka tuai gempuru ke rindu ngelaluka temuai. (Heb. 13:2, 16) Enti kitai nemu pengering diri, kitai berasai gaga enggau utai ke ulih digaga kitai ke bala menyadi. Lalu tu nulung kitai enda chemburu enggau menyadi bukai ti bisi pemeri ke enda sebaka enggau kitai.

18. Baka ni kitai ulih nyadi pengajar ke manah agi?

¹⁸ Enda ngira nama ungkup kitai ba eklisia, tiap iku kitai patut ngemansangka pengawa sereta penau kitai. Kena ngereja tu, Jehovah ngena gerempung Iya ngelatih kitai. Ambika chunto, ba gempuru tengan minggu, kitai nerima iring pasal chara ngemanahka agi pengawa nginjil kitai. Kati nuan bisi nitihka utai ke dipelajar nuan ari gempuru nya?

19. Baka ni nuan ulih nyapai juluk ati ke deka enggau Sekula Penginjil Perintah Petara?

¹⁹ Siti agi sekula ke ngelatih nya, ulih enggau Sekula Penginjil Perintah Petara. Sekula tu dibuka ngagai menyadi Kristian ke lelaki enggau ke indu ti gawa penuh jam ba pengawa nginjil sereta beumur entara 23 ngagai 65 taun. Nuan engka ngumbai enda ulih nyapai juluk ati tu. Tang ari ke berunding baka nya, manah agi berundingka kebuah nuan deka enggau sekula nya. Udah nya, gaga meh ubah ngambika nuan ulih enggau sekula nya. Enti nuan bebendar ngereja nya, sereta enggau saup ari Jehovah, nuan tentu ulih nyapai juluk ati nya.

20. Nama ulih dipelajarka kitai ari Rome 12:6-8?

²⁰ Pekara ketiga ti ulih dipelajarka kitai ari sempama Paul bisi dipadah ba Rome 12:6-8. (Bacha.) Ba ayat nya, Paul sekali agi madahka bala menyadi bisi pemeri ti enda sebaka. Tang diatu Paul nekanka, kitai patut ngena sebarang pemeri ke bisi ba kitai kena meransang sereta ngeringka bala menyadi Kristian.

21-22. Nama ulih dipelajarka kitai ari Menyadi Robert enggau Menyadi Felice?

²¹ Pikirka utai ke nyadi ba Menyadi Robert. Pengudah gawa ke Jehovah ba menua bukai, iya diasuh gawa ba Betel di menua iya empu. Taja pan menyadi lelaki ke bukai udah nerangka ubah ke nyadi ukai ketegal iya bisi ngereja penyalah, tang iya madahka: “Aku ngasaika diri nadai guna laban ngumbai diri enda mujur ba pengawa ke diberi. Asai ati nya ngachau aku beberapa bulan. Lalu kekadang aku berunding deka badu gawa ba Betel.” Baka ni iya ulih mutarka asai ati nya lalu nyadi gaga baru? Seiku tuai gempuru ngingatka iya, Jehovah ngelatih tiap iku kitai nengah pengawa kitai ke suba ngambika kitai beguna agi ba pengawa ke diatu. Menyadi Robert nemu, iya patut badu ngenang utai ke udah lama, lalu berengkah betatika utai ke ulih digaga iya ari diatu.

²² Menyadi Felice Episcopo mega napi penanggul ti sama. Ba taun 1956, iya enggau  bini iya tembu sekula Gilead, lalu gawa nyadi tuai ti ngabas ba Bolivia. Ba taun 1964, seduai iya bisi anak. Ku Felice madah: “Kami duai ngasaika diri tusah ngelengkaka pengawa ti dikerinduka kami. Nyau setaun, aku berasai asa ati. Tang ari tulung Jehovah, aku ngubah runding lalu bejalaika pengawa baru, iya nya nyadi apai.” Kala nuan ngasaika utai ti sama baka Menyadi Robert tauka Menyadi Felice? Kati nuan berasai asa ati ketegal enda ulih ngereja pengawa baka suba? Enti nuan ka berasai lantang ati baru, gaga meh ubah ba runding, lalu betatika utai ke ulih digaga nuan ke Jehovah sereta ke bala menyadi ari diatu. Pia mega, mengkang kisuk lalu kena meh pemeri sereta penau nuan nulung orang bukai. Seraya nuan meransang bala menyadi Kristian, nuan deka gaga ati.

23. Nama patut dibelematika kitai, lalu nama deka dipejuraika kitai ba artikel pengudah tu?

²³ Tiap iku kitai berega ba Jehovah. Iya deka kitai nyadi sebagi ari ruang bilik Iya. Enti kitai belematika utai ke ulih digaga kitai kena meransang bala menyadi Kristian lalu enggau naka ulih ngereja nya, kitai ulih ngasaika diri berega ba gerempung Jehovah. Tang baka ni runding kitai pasal bala menyadi Kristian? Baka ni kitai ulih ngayanka diri sayauka sereta bebasaka sida? Artikel pengudah tu deka bejuraika tanya nya.