1. Nama kebuah Jehovah nempa utai idup?

KELIA menya, semina Jehovah idup kediri aja. Tang Iya enda tusah ati tauka berasai sunyi. Taja pia, Iya deka orang bukai ngasaika pengidup ti lantang. Ketegal pengerindu, Jehovah berengkah nempa utai.—Mas. 36:9; 1 Jhn. 4:19.

2. Baka ni asai ati Jesus sereta bala melikat lebuh meda Jehovah nempa utai?

² Terubah, Jehovah nempa Anak Iya, Jesus. Nengah Jesus, ‘semua utai . . . digaga,’ nyengkaum bala melikat. (Kol. 1:16) Jesus amat gaga ati sama gawa enggau Apai iya. (J-lam. 8:30) Lalu bala melikat mega bisi kebuah gaga ati. Sida meda Jehovah enggau Jesus, nempa serega sereta dunya. Baka ni asai ati bala melikat? Sida terus “manjung gaga ati” muji Jehovah lebuh meda dunya digaga, lalu terus muji Jehovah lebuh Iya ngaga utai bukai, kelebih agi lebuh mensia ditempa. (Jop 38:7; J-lam. 8:31) Nya alai, semua utai ke ditempa nya nunjukka pengerindu sereta penemu-dalam Jehovah.—Mas. 104:24; Rom. 1:20.

3. Nitihka 1 Korint 15:21, 22, nama penguntung ke diulih ari tebus Jesus?

³ Jehovah deka mensia idup belama iya ba dunya. Tang Adam seduai Awa angkat ngelaban Jehovah. Ketegal nya,  seduai iya enda ulih idup belama iya. Peturun seduai iya mega bedosa lalu mati. (Rom. 5:12) Nama digaga Jehovah? Tekala nya, Iya madahka chara Iya deka nyelamatka mensia. (P-kal. 3:15) Jehovah deka meri Anak Iya, Jesus, nyadika tebus ngambika peturun Adam seduai Awa dilepaska ari dosa enggau pemati. Udah nya, Iya deka meri pengidup ti meruan belama iya ngagai tiap iku orang ti milih deka nyembah Iya.—Jhn. 3:16; Rom. 6:23; bacha 1 Korint 15:21, 22.

4. Nama deka dipejuraika kitai ba artikel tu?

⁴ Kitai engka bisi mayuh tanya pasal pengangkat ari mati. Ambika chunto, baka ni nya deka nyadi? Lebuh orang ti dikesayauka kitai diangkatka idup baru, ulih kitai ngelala sida? Baka ni pengangkat ari mati nya ngasuh ati gaga? Lalu baka ni pengangkat ari mati ngajar kitai beterima kasih ke pengerindu, penemu-dalam, sereta pengeliat ati Jehovah? Aram kitai bejuraika semua tanya tu.

5. Nama kebuah kitai ulih madahka, ukai semua orang diangkatka idup baru ba maya ti sama?

⁵ Lebuh Jehovah ngena Jesus ngangkatka bejuta iku orang ari mati, ukai semua diangkatka idup baru ba maya ti sama. Nama kebuah kitai ngumbai baka nya? Kitai nemu Jehovah nya ukai Petara ti ngasuh charut. Enti semua orang mati diangkatka idup baru ba maya ti sama, penyampau mensia ti mayuh ba dunya deka ngasuh charut. Jehovah nemu pengawa tu patut diatur enggau manah ngambika orang bisi pemaik. (1 Kor. 14:33) Petara Jehovah ngayanka penemu-dalam sereta pengeliat ati lebuh Iya gawa enggau  Jesus. Seduai iya belubah-lubah nyediaka dunya alai mensia diau. Jesus mega deka ngayanka penemu-dalam sereta pengeliat ati maya Seribu Taun Kristus Merintah ila. Iya deka sama gawa enggau sida ke selamat ari Armagedon nyediaka utai ke diguna ngagai sida ke deka diangkatka idup baru.

6. Nitihka Kereja Rasul 24:15, sapa orang ke deka diangkatka Jehovah idup baru?

⁶ Ke beguna agi, sida ke selamat ari Armagedon patut ngajar sida ke diangkat idup baru pasal Perintah Petara sereta peneka Jehovah. Nama kebuah? Laban mayuh ari sida ke diangkat nya “enda lurus.” (Bacha Kereja Rasul 24:15.) Sida patut ngaga ubah ngambika tau bulih penguntung ari tebus Jesus lalu idup belama iya. Pikirka pemayuh pengawa ke deka digaga kena ngajar pemendar pasal Petara ngagai bejuta iku orang ke enda nemu pasal Jehovah. Kati tiap iku orang bisi pengajar diri empu, baka pengawa ngajar Bup Kudus kemayaharitu? Kati sida deka diatur enggau siti-siti eklisia sereta dilatih ngambika ulih ngajar orang bukai ke deka diangkatka idup baru? Kitai patut nganti kena nemu saut nya. Taja pia kitai nemu, ba ujung Seribu Taun Kristus Merintah, ‘dunya deka penuh laban penemu Jehovah.’ (Isa. 11:9) Kitai tentu deka gaga ati enggau pengawa kitai maya seribu taun nya!

7. Nama kebuah nembiak Petara bisi penyiru lebuh ngajar orang ke diangkatka idup baru?

⁷ Maya Seribu Taun Kristus Merintah, semua nembiak Jehovah agi terus ngaga ubah ngambika ulih ngelantangka ati Iya. Semua sida bisi penyiru lebuh nulung orang ke diangkatka idup baru ngelaban runding sereta pengingin ti salah lalu idup nitihka standard Jehovah. (1 Pet. 3:8) Ketegal nya, sida ke diangkat idup baru deka semak enggau nembiak Jehovah ti baruh ati, ke enda ngetu ngaga ubah ngambika bulih “pengelepas.” (Plp. 2:12) Asil iya, sida mega deka sama enggau nembiak Petara nyembah Jehovah.

8. Nama kebuah kitai ngumbai ulih ngelala orang ti dikesayauka kitai ti diangkatka idup baru?

⁸ Bisi sekeda bukti kitai ulih ngelala orang ti dikesayauka kitai ti diangkatka idup baru. Perundingka tu. Pengangkat ari mati kala nyadi kelia menya. Lebuh Jehovah ngidupka orang ti udah mati, mua sida, chara bejaku, sereta runding agi baka selama sebedau sida mati. Jesus mega kala madahka, pemati nya baka tinduk, lalu pengangkat ari mati nya baka ngerak orang dani ari tinduk. (Mat. 9:18, 24; Jhn. 11:11-13) Lebuh orang dani ari tinduk, mua, chara bejaku, sereta runding sama baka sebedau sida tinduk. Peratika chunto Lasarus. Iya udah mati empat hari. Nya alai, bangkai iya tentu nyau bau but. Tang lebuh Jesus ngangkatka iya idup baru, menyadi indu Lasarus agi ngelala iya, lalu Lasarus pan agi ingatka sida.—Jhn. 11:38-44; 12:1, 2.

9. Nama kebuah orang ke diangkatka idup baru enda terus nyadi sempurna ba runding sereta tubuh?

⁹ Jehovah besemaya, ‘nadai orang deka madahka diri sakit’ lebuh dibaruh perintah Kristus. (Isa. 33:24; Rom. 6:7) Orang ke diangkatka idup baru deka ngembuan tubuh ti gerai. Taja pia, sida enda terus nyadi sempurna. Enti sida terus nyadi sempurna maya nya, engka diri sebilik sereta bala pangan enda ulih ngelala sida. Nya alai, semua mensia belubah-lubah nyadi sempurna maya Seribu Taun Kristus Merintah. Ba pengujung  seribu taun, Perintah nya deka ngereja semua peneka Jehovah, nyengkaum nulung mensia nyadi sempurna. Udah nya, Jesus deka meri baru Perintah nya ngagai Apai iya.—1 Kor. 15:24-28; Pem. 20:1-3.

10. Nama asai ati kitai lebuh betemu baru enggau orang ti dikesayau ke diangkatka idup baru?

¹⁰ Gambarka asai ati nuan lebuh betemu baru enggau orang ti dikesayauka nuan. Nuan engka kelalu gaga ati nyentukka nuan nyabak tauka ketawa. Engka pengaga ati nuan meransang nuan belagu muji Jehovah. Ke pemadu beguna nya, pengerindu nuan ke Jehovah sereta Anak Iya deka majak nambah ketegal seduai iya udah meri kitai pengadang angkat idup baru.

11. Nitihka jaku Jesus ba John 5:28, 29, nama berekat ngagai sida ke deka diasaika sida ti ngasika Petara?

¹¹ Gambarka asai ati orang ke diangkatka idup baru lebuh sida ngelengkaka pengidup ti lama lalu idup nitihka standard Petara. Sida ke ngaga ubah deka bulih pengidup ti meruan belama iya. Tang sida ke angkat ngelaban Jehovah deka dibuai laban Petara enggai nejuka sida ngachau pemaik ba Paradais.—Isa. 65:20; bacha John 5:28, 29.

12. Baka ni orang ba dunya deka diberekatka Jehovah?

¹² Ba baruh Perintah Petara, semua nembiak Petara deka meda ayat ba Jaku Dalam 10:22 dikeamatka: ‘Berekat ti diberi Jehovah, ngasuh kaya, lalu Jehovah nadai nambahka ati ti tusah enggau pengaya nya.’ Enggau saup ari roh kudus Jehovah, nembiak Iya deka mandangka ulah sereta runding Kristus enggau manah agi, lalu belubah-lubah nyadi sempurna. (Jhn. 13:15-17; Eps. 4:23, 24) Pia mega, ninting hari tubuh sida nyadi majak kering lalu sida deka nyadi orang ke majak manah. Pengidup maya nya endang ngagaka ati! (Jop 33:25) Taja pia, baka ni belemati pasal pengangkat ari mati ulih nulung nuan diatu?

13. Nitihka Masmur 139:1-4, baka ni pengangkat ari mati nunjukka Jehovah amat ngelala kitai?

¹³ Baka ke udah dikerandauka kitai tadi, lebuh Jehovah ngangkatka orang idup baru, sida agi orang ti sama. Nama reti nya? Tu nunjukka Jehovah amat sayauka nuan nyentukka Iya ingat semua utai pasal nuan. Semaka jaku, enti Iya ngangkatka nuan idup baru, Iya ulih mulaika semua pengingat nuan sereta ulah nuan baka selama. Raja David nemu, Jehovah ngelala tiap iku kitai enggau silik. (Bacha Masmur 139:1-4.) Baka ni asai ati kitai pengudah nemu tu?

14. Nama asai ati kitai lebuh nemu Jehovah amat ngelala tiap iku nembiak Iya?

¹⁴ Nama kebuah kitai enda ibuh irau enti Jehovah nemu semua utai pasal kitai? Kingatka, Jehovah amat ibuhka kitai. Iya ngumbai tiap iku kitai berega ba Iya. Iya ingat semua utai pasal kitai, nyengkaum utai ke nyadi ba pengidup kitai. Endaka tu ngasuh kitai berasai lantang lebuh belematika pengibuh Jehovah? Anang meh sekali-kali ngasaika diri enda dikeibuhka. Jehovah seruran enggau kitai lalu ngiga peluang kena nulung kitai.—2 Ban. 16:9.

15. Baka ni pengadang angkat idup baru nunjukka Jehovah bisi penemu-dalam?

¹⁵ Sitan ulih ngena asai takutka pemati ngasuh orang bejai enggau bala pangan sereta ngereja utai ti salah. Taja pia, ketegal bisi pengadang angkat idup baru, kitai enda berasai  takut. Kitai nemu, enti munsuh munuh kitai, Jehovah ulih ngangkatka kitai idup baru. (Pem. 2:10) Kitai mega pechaya, sida enda ulih ngerusakka kaul kitai enggau Jehovah. (Rom. 8:35-39) Pengadang angkat idup baru meri kitai pemerani ngambika taluk ngagai Jehovah, lalu enda takut lebuh penyukung Sitan ngemba deka munuh kitai. Endang terang, pengadang angkat idup baru nya nunjukka Jehovah bisi penemu-dalam.

16. Nama tanya ke ulih ditanya kitai, lalu nama kebuah?

¹⁶ Enti munsuh Jehovah deka munuh nuan, kati nuan arapka Jehovah deka ngangkatka nuan idup baru? Baka ni nuan ulih nemu sekalika nuan amat arapka Jehovah? Tanya meh diri empu, ‘Kati pemutus ke digaga aku ninting hari nunjukka aku arapka Jehovah?’ (Luk. 16:10) ‘Kati gaya pengidup aku nunjukka aku andal Jehovah deka nyediaka utai ke diguna aku enti ngenuluka peneka Iya?’ (Mat. 6:31-33) Enti nuan nyaut “au,” tu nunjukka nuan arapka Jehovah sereta besedia napi penguji ti deka datai.—J-lam. 3:5, 6.

17. (a) Baka ni pengangkat ari mati nunjukka pengeliat ati Jehovah? (b) Baka ni kitai ulih ngayanka diri beterima kasih ke pengeliat ati Iya?

¹⁷ Jehovah udah nentuka maya deka ngerusakka dunya ti jai tu. (Mat. 24:36) Sebedau hari nya datai, Jehovah deka terus ngayanka pengeliat ati. Iya keran deka ngangkatka orang idup baru, tang Iya liat ati. (Jop 14:14, 15) Iya nganti alai maya ti ngena ulih ngereja nya. (Jhn. 5:28) Nama kebuah kitai beterima kasih ke pengeliat ati Jehovah? Pikirka tu, ketegal pengeliat ati Jehovah, mayuh orang, nyengkaum kitai, bisi peluang “nesal ati.” (2 Pet. 3:9) Jehovah deka semua orang bisi peluang idup belama iya. Tang baka ni kitai ngayanka diri beterima kasih? Kitai enggau bebendar ngiga orang ke deka “nerima pengidup ti meruan belama iya.” (SKR. 13:48) Baka kitai, sida mega deka bulih penguntung ari pengeliat ati Jehovah.

18. Nama kebuah kitai patut liat ati enggau orang bukai?

¹⁸ Jehovah nemu kitai semina nyadi  sempurna ba pengujung seribu taun. Sebedau maya nya datai, Iya liat ati sereta sanggup ngampun penyalah kitai. Nya alai, kitai patut neladan Iya lalu betatika pemanah orang bukai sereta liat ati enggau sida. Pikirka chunto seiku menyadi Kristian indu. Laki iya napi pengirau ti balat lalu ngetu datai begempuru. Ku menyadi indu nya madah: “Maya nya amat ngasuh aku tusah ati. Pengidup kami duai berubah enggau ngenyit, lalu kami enda ulih ngereja semua utai nitihka peneka kami.” Taja pia, menyadi indu nya liat ati enggau laki iya. Iya bepanggai ba Jehovah lalu terus betan. Baka Jehovah, iya enda betatika penanggul nya tang meda pemanah ke bisi ba laki iya. Ku iya agi: “Laki aku bisi kualiti ti manah, lalu iya belubah-belubah mutarka pengirau iya.” Endang amat, kitai patut liat ati enggau diri sebilik tauka bala menyadi Kristian ke nguji mutarka penanggul ti ditapi sida.

19. Nama juluk ati kitai?

¹⁹ Jesus enggau bala melikat gaga ati lebuh dunya ditempa. Uji gambarka pengaga ati sida lebuh meda dunya penuh enggau mensia ti sempurna, ti rindu sereta nyembah Jehovah. Gambarka pengaga ati sida ke merintah enggau Jesus lebuh nulung mensia belubah-lubah nyadi sempurna. (Pem. 4:4, 9-11; 5:9, 10) Gambarka mega pengaga ati kitai lebuh penyakit, penusah ati, sereta pemati nadai agi. (Pem. 21:4) Seraya nganti maya nya datai, aram meh kitai bebendar neladan pengerindu, penemu-dalam, sereta pengeliat ati Jehovah. Enti ngereja nya, nuan ulih ngetanka pengaga ati enda ngira nama penanggul ke ditapi nuan. (Jas. 1:2-4) Kitai beterima kasih ke semaya Jehovah ke madahka “semua orang ke lurus enggau ke enda lurus deka diangkatka ari mati”!—SKR. 24:15.