1. Nama deka digaga bala menyadi ngambika ulih gawa mayuh agi ke Jehovah?

 PENGUJUNG dunya nyau majak semak. Nya alai, kitai bisi mayuh pengawa deka dikereja. (Mat. 24:14; Luk. 10:2; 1 Pet. 5:2) Semua kitai enggau naka ulih deka gawa ke Jehovah. Mayuh menyadi Kristian kitai deka ngereja mayuh agi ba pengawa nginjil. Sekeda deka nyadi pengerintis. Sida ke bukai deka gawa ba Betel tauka nirika bengunan teokratik. Lalu mayuh menyadi Kristian lelaki deka nyadi penulung gempuru tauka tuai gempuru. (1 Tim. 3:1, 8) Jehovah tentu gaga ati lebuh Iya meda nembiak Iya ransing deka gawa ke Iya!—Mas. 110:3; Isa. 6:8.

2. Nama asai ati kitai enti kitai enda ulih nyapai juluk ati gawa ke Jehovah?

² Kitai engka berasai asa ati enti kitai bedau ulih nyapai juluk ati, kelebih agi enti kitai udah lama nganti. Tauka kitai engka berasai asa ati enti kitai enda ulih ngereja sekeda pengawa ba gerempung Jehovah ketegal kitai kelalu tuai tauka ketegal kebuah ke bukai. (J-lam. 13:12) Nya meh utai ke nyadi ba Melissa. * Iya bisi juluk ati deka gawa ba Betel tauka ngagai Sekula Penginjil Perintah Petara. Tang ku iya: “Umur aku udah ngelebus tatak umur ke udah ditetapka kena nerima pengawa tu. Kekadang, aku berasai asa ati.”

3. Nama patut digaga sekeda orang ngambika layak nerima tanggung pengawa?

³ Sekeda menyadi ke biak sereta bepengerai engka patut ngemansangka sekeda kualiti sebedau sida layak nerima tanggung pengawa ke bukai. Ambika chunto, sekeda engka pintar,  jampat ngaga pemutus sereta sanggup ngereja nama-nama pengawa. Tang sida engka patut belajar besabar, ngereja pengawa sida enggau manah agi sereta bebasaka orang bukai. Enti nuan bebendar ngemansangka kualiti ke diguna nuan, bala menyadi lelaki engka deka meri tanggung pengawa ba maya ti enda disadang nuan. Peratika utai ke nyadi ba Nick. Lebuh iya beumur 20 taun, iya berasai asa ati ketegal iya enda dipilih nyadi penulung gempuru. Ku iya, “Aku ngasaika diri bisi pengurang.” Tang Nick enda ngetu ngemansangka kualiti ke patut dikembuan iya. Iya ngereja utai ke ulih ba eklisia lalu ngereja pengawa nginjil. Kemayaharitu, iya gawa nyadi seiku ari Komiti Pampang Opis.

4. Nama deka dipejuraika kitai ba artikel tu?

⁴ Kati nuan berasai asa ati ketegal nuan enda ulih nyapai sekeda juluk ati ba pengawa ke Jehovah? Enti pia, besampi meh ngagai Jehovah pasal nya lalu padahka asai ati nuan ngagai Iya. (Mas. 37:5-7) Pia mega, nuan ulih nanya penemu bala menyadi lelaki ti bepeneleba chara nuan ulih ngaga pemansang. Udah nya, enggau naka ulih meh nitihka jaku lalau sida. Enti nuan ngereja nya, nuan engka deka nerima tanggung pengawa tauka ulih nyapai juluk ati nuan. Tang baka Melissa, nuan engka enda ulih nyapai juluk ati ke diatu. Taja pia, baka ni nuan ulih terus gaga ati? Kena nyaut tanya tu, artikel tu deka bejuraika (1) nama ulih ngasuh nuan gaga ati, (2) baka ni ulih nambahka agi pengaga ati, lalu (3) nama juluk ati ke ulih ditetapka nuan ngambika mengkang gaga ati.

5. Nama patut diperundingka kitai ngambika kitai ulih gaga ati? (Pengajar 6:9)

⁵ Pengajar 6:9 bisi nerangka baka ni kitai ulih ngembuan pengaga ati. (Bacha.) Ngambika ulih gaga ati, kitai patut netapka juluk ati ke ulih dijapai kitai sereta puas ati enggau utai ti dikemisi diri. Tang, orang ke seruran inginka utai bukai enda ulih puas ati.

6. Nama sempama ke deka diperatika kitai, lalu nama ulih dipelajarka kitai ari nya?

⁶ Kati kitai ulih puas ati enggau utai ke dikembuan kitai? Mayuh orang ngumbai enda ulih laban kitai rindu belajar utai ti baru. Tang kebendar iya kitai ulih puas ati. Kitai ulih gaga ati enggau utai ti dikembuan kitai diatu. Baka ni? Kitai deka beratika sempama Jesus pasal duit emas, ke bisi dipadah ba Matthew 25:14-30. Kitai deka belajar baka ni ngembuan pengaga ati sereta chara kitai ulih majak agi gaga ati, enda ngira nama pengawa ke digaga kitai diatu.

7. Padahka sempama Jesus pasal duit emas.

⁷ Dalam sempama nya, seiku lelaki deka bejalai ngagai menua bukai. Sebedau iya mupuk, iya ngangauka orang gaji iya lalu meri tiap iku sida duit emas ngambika sida ulih bedagang. Lelaki nya nemu pengelandik tiap iku orang gaji iya enda sebaka. Nya alai, iya meri lima ribu singkap duit emas ngagai orang gaji keterubah. Lalu orang gaji kedua diberi iya dua ribu singkap sereta orang gaji ketiga diberi iya seribu singkap. Orang gaji keterubah enggau kedua bebendar gawa ngulihka mayuh agi duit ke tuan sida. Taja pia, orang gaji ketiga nya enda ngereja nama-nama utai ngena duit ke udah diberi ngagai iya. Nya alai, iya dibuai tuan iya ari pengawa iya.

8. Nama kebuah orang gaji ti keterubah ulih berasai gaga ati?

⁸ Orang gaji keterubah nya tentu berasai  gaga ati laban tuan iya meri lima ribu singkap duit emas ngagai iya. Nya penyampau duit ti amat mayuh! Lalu, nya mega nunjukka tuan iya amat arapka iya. Tang baka ni enggau orang gaji ti kedua? Iya engka ulih berasai asa ati ketegal enda nerima penyampau duit ti sama baka orang gaji ti keterubah nya. Tang nama digaga orang gaji ti kedua nya?

9. Nama utai ke enda disebut Jesus pasal orang gaji ti kedua nya? (Matthew 25:22, 23)

⁹ Bacha Matthew 25:22, 23. Jesus nadai nyebut orang gaji ti kedua nya ringat ketegal iya semina bulih dua ribu singkap duit emas. Lalu Jesus mega enda madahka orang gaji nya mutap lalu madahka: ‘Nama kebuah tuan meri aku kurang amai? Aku pan bebendar gawa baka orang gaji ti keterubah nya! Enti tuan ngumbai aku ukai pekereja ti manah, engka aku patut ngelalaika duit iya lalu gawa ke diri empu, ukai gawa ke iya.’

10. Nama digaga orang gaji ti kedua enggau duit ke diberi tuan iya?

¹⁰ Baka orang gaji ti keterubah, orang gaji ti kedua mega ngemeratka pengawa ke diberi tuan iya lalu bebendar gawa ke tuan iya. Asil iya, iya nambahka duit ke diberi tuan iya nyadi dua kali lipat. Ketegal orang gaji kedua nya bebendar gawa, tuan iya meri upah ngagai iya. Tuan iya ukai semina muji iya tang mega meri iya mayuh agi tanggung pengawa!

11. Baka ni kitai ulih nambahka pengaga ati kitai?

¹¹ Pia mega, kitai ulih gaga agi ati lebuh kitai bebendar ngereja pengawa ke diberi ngagai kitai dalam gerempung Jehovah. Mengkang kisuk meh ba pengawa nginjil, lalu bebendar gawa ba eklisia. (SKR. 18:5;  Heb. 10:24, 25) Besedia enggau manah sebedau begempuru ngambika ulih meri saut ti meransang. Lebuh nuan diberi begian ba gempuru tengan minggu, kereja meh nya enggau manah. Enti nuan dipinta nulung ngereja pengawa ba eklisia, tembuka pengawa nya ba maya ti ditetapka lalu nunjukka diri ulih dikearapka. Anang ngumbai pengawa ke diberi ngagai nuan nya nadai reti sereta tau dikereja pia-pia aja. Uji enggau naka ulih ngemansangka pengelandik nuan. (J-lam. 22:29) Majak nuan bebendar gawa ke Jehovah, rapat agi kaul nuan enggau Iya sereta gaga agi ati nuan. (Gal. 6:4) Enggau nya, nuan senang agi gaga ati lebuh orang bukai nerima pengawa ke dikinginka nuan.—Rom. 12:15; Gal. 5:26.

12. Nama digaga Melissa enggau Nick ngambika gaga agi ati?

¹² Agi nuan ingatka Melissa, ke disebut ba genteran 2? Iya keran deka gawa ba Betel tauka enggau Sekula Penginjil Perintah Petara. Taja pan iya enda ulih nyapai juluk ati nya, ku iya madah: “Aku ngereja utai ke ulih aku ba pengawa ngerintis lalu nguji mayuh macham chara lebuh nginjil. Tu mai pengaga ati ti besai ba aku.” Lalu nama digaga Nick kena mutarka asai asa ati lebuh enda dipilih nyadi penulung gempuru? Ku iya: “Aku betatika utai ke ulih digaga aku, baka nginjil sereta meri saut ti meransang lebuh begempuru. Aku mega ngisi pom ngambika ulih gawa ba Betel, lalu aku dikangau setaun pengudah nya.”

13. Nama asil iya enti nuan bebendar ngereja pengawa ke udah diberi ngagai nuan diatu? (Pengajar 2:24)

¹³ Enti nuan diatu bebendar ngereja pengawa ke udah diberi ngagai nuan, kati tu reti iya nuan deka nerima mayuh agi pengawa dudi hari? Tu ulih nyadi, baka Nick. Tang enti enda ulih, baka Melissa, nuan agi ulih gaga ati sereta puas ati enggau utai ke ulih digaga nuan ke Jehovah. (Bacha Pengajar 2:24.) Kelimpah ari nya, nuan mega ulih gaga ati laban nemu diri udah ngelantangka ati Tuan kitai, iya nya Jesus Kristus.

14. Nama patut dikingatka kitai lebuh berundingka juluk ati gawa ke Jehovah?

¹⁴ Enti kitai ngereja utai ti pemadu manah ke Jehovah diatu, kati reti nya kitai enda ibuh bebendar deka ngereja mayuh agi ke Iya? Enda! Kitai patut netapka juluk ati ke ulih nulung kitai nyadi penginjil sereta pengajar ti landik agi, lalu nulung bala menyadi Kristian. Kitai ulih nyapai juluk ati tu enti kitai ngenuluka orang bukai, ukai berundingka diri empu.—J-lam. 11:2; SKR. 20:35.

15. Nama juluk ati ke ulih nulung nuan gaga agi ati?

¹⁵ Nama juluk ati ke ulih ditetapka nuan? Pinta meh Jehovah nulung nuan nemu juluk ati ke ulih dijapai nuan. (J-lam. 16:3; Jas. 1:5) Kati nuan ulih netapka juluk ati ke bisi dipadah ba  genteran 1 artikel tu, baka nyadi pengerintis sukung tauka pengerintis biasa, gawa ba Betel tauka enggau ba pengawa nirika bengunan teokratik? Tauka nuan engka ulih belajarka bansa jaku ti baru tauka nginjil ngagai endur bukai. Nuan ulih nemu mayuh agi pasal juluk ati nya enggau macha pelajar 10 ba bup Diorganisasikan untuk Melakukan Kehendak Yehuwa sereta berandau enggau bala tuai gempuru ba eklisia nuan. * Lebuh nuan enggau naka ulih deka nyapai  juluk ati nya, orang bukai ulih meda pemansang nuan sereta pengaga ati nuan deka nambah.

16. Nama ulih digaga nuan enti nuan enda ulih nyapai sekeda juluk ati diatu?

¹⁶ Tang, kati enti nuan enda ulih nyapai sekeda juluk ati baka ke udah dikerandau ba artikel tu? Uji meh netapka juluk ati ke ulih dijapai nuan. Peratika sekeda juluk ati ke bukai.

17. Nitihka 1 Timoti 4:13, 15, nama ulih nulung menyadi lelaki nyadi pengajar ti manah agi?

¹⁷ Bacha 1 Timoti 4:13, 15. Enti nuan seiku menyadi lelaki ke udah dibaptisa, nuan engka ulih ngemansangka chara bejaku sereta ngajar. Nama kebuah? Laban enti nuan bebendar nyadi pemacha, pencheramah sereta pengajar ti manah, orang ke ningaka nuan deka bulih penguntung. Uji netapka juluk ati belajar sereta ngena tiap iti kualiti ke dikerandauka ba brosur Ngemanahka Agi Chara Macha enggau Ngajar. Belajar siti-siti kualiti, seruran belatih ba rumah, sereta ngena utai ke udah dipelajar nuan lebuh meri begian nuan. Pinta tulung ari penyaup meri jaku lalau tauka bala tuai gempuru ke bukai ke “bebendar nusui Berita Manah enggau ngajar.” * (1 Tim. 5:17) Juluk ati nuan nya ukai semina ngena utai ke dipelajar nuan ari brosur nya, tang keberat agi nulung bala peninga ngeringka pengarap tauka meransang sida ngena utai ke udah dipelajar sida ba pengidup. Enggau ngereja nya, semua deka bulih pengaga ati.

18. Nama ulih nulung kitai nyapai juluk ati ba pengawa nginjil?

¹⁸ Semua kitai bisi tanggung pengawa nginjil sereta ngaga orang nyadi murid. (Mat. 28: 19, 20; Rom. 10:14) Kati nuan deka ngemansangka agi pengelandik ba pengawa ti beguna tu? Nuan ulih netapka juluk ati ngemansangka sekeda pengelandik ti beguna lebuh belajar sereta ngena utai ke udah dipelajar nuan ari brosur Ngajar. Nuan mega ulih belajar ari Pengidup enggau Pengawa Kristian Kitai—Bup Kereja Kena Gempuru sereta video chara ke ulih dikena berandau ba gempuru tengan minggu. Uji meh ngena mayuh macham chara ngambika ulih tetemuka chara ti pemadu manah. Lebuh nuan nitihka chara tu, nuan deka gaga agi ati laban udah ngemansangka pengelandik ba pengawa nginjil.—2 Tim. 4:5.

19. Baka ni nuan ulih ngemansangka kualiti Kristian?

¹⁹ Anang enda ingat, juluk ati ti pemadu beguna ke ulih ditetapka nuan iya nya, ngemansang kualiti Kristian ti ngelantangka ati Petara. (Gal. 5:22, 23; Kol. 3:12; 2 Pet. 1:5-8) Baka ni nuan ulih ngereja nya? Semaka jaku, nuan deka negapka pengarap nuan. Nuan ulih macha artikel ba litaricha kitai ke bisi madahka sekeda chara kena negapka pengarap nuan. Nuan mega tau bulih penguntung ari meda sekeda video ba Berita JW ke nunjukka baka ni bala menyadi Kristian ngayanka pengarap sida lebuh napi penanggul. Udah nya, peratika chara nuan ulih neladan pengarap sida ba pengidup nuan.

20. Baka ni kitai ulih gaga agi ati sereta nyeliahka ari berasai asa ati?

²⁰ Endang amat, semua kitai ngarapka diri ulih ngereja mayuh agi ke Jehovah. Ba dunya baru ila, nadai utai ulih ngachau kitai gawa ke Iya. Tang ke diatu, enti kitai enggau naka ulih ngereja sebarang pengawa ke ulih digaga kitai, kitai deka gaga agi ati, lalu enda entu berasai asa ati. Ke beguna agi, kitai deka meri mulia sereta puji ngagai Jehovah, “Petara ti gaga ati.” (1 Tim. 1:11, NWT) Nya alai, aram meh kitai gaga ati enggau pengawa ti dikembuan kitai diatu!