1. Nama tanya engka diperundingka kitai lebuh belematika pasal utai ke digaga Jehovah?

LEBUH kitai berundingka pemesai dunya raya ke ditempa Jehovah, kitai engka ngembuan asai ati baka David, ke besampi ngagai Jehovah lalu madah: “Lebuh aku engkadah ke langit ti udah digaga Nuan, engkadah ngagai bulan enggau bintang ti udah di atur Nuan, aku lalu nanya: ‘Sapa mensia, alai Nuan deka bedulika sida? Sapa anak mensia, alai Nuan deka ibuhka sida?’” (Mas. 8:3, 4) Baka David, kitai engka ngasaika diri mit enti dibanding enggau bintang ke digaga Jehovah lalu enda nyangka Iya ibuhka kitai. Tang kitai deka meda, Jehovah ukai semina ibuhka mensia ti keterubah, iya nya Adam seduai Awa, tang mega ngaga seduai iya sebagi ari ruang bilik Iya.

2. Jehovah deka Adam seduai Awa ngereja nama?

² Adam seduai Awa nya anak Jehovah ti terubah ba dunya, lalu Jehovah nya Apai sida ti bepengerindu. Iya deka seduai iya ngembuan ruang bilik. Nya alai, Iya madahka seduai iya: “Beranak betelesak lalu ngemenuhka dunya meh kita sereta bekuasa atas iya.” (P-kal. 1:28) Jehovah ngasuh seduai iya ngembuan anak lalu nyaga dunya tu. Enti seduai iya ngereja utai ke diasuh Jehovah, Adam sereta Awa enggau bala peturun sida deka terus nyadi ruang bilik Jehovah belama iya.

3. Nama kebuah kitai ngumbai Adam seduai Awa bisi ungkup ti berega ba ruang bilik Jehovah?

³ Adam seduai Awa ngembuan ungkup ti berega ba ruang bilik Jehovah. Baka ke dipadah ba Masmur 8:5 enggau nota kaki, David madahka tu pasal mensia ke ditempa Jehovah:  “Nuan udah ngaga iya semina baruh mimit ari melikat, lalu Nuan udah meri iya mulia enggau basa nyadika makota iya.” Endang amat, Jehovah enda meri mensia kuasa, pemintar, enggau penau ti sebaka enggau bala melikat. (Mas. 103:20) Tang, mensia semina “baruh mimit” ari bala melikat. Perundingka nya! Lebuh Jehovah ngaga Adam seduai Awa, Iya meri sida pengidup ti pemadu manah!

4. Nama nyadi ngagai Adam seduai Awa ketegal enda ngasika Jehovah, lalu nama deka dikerandauka kitai ba artikel tu?

 ⁴ Sayau amat, ketegal Adam enggau Awa enda ngasika Jehovah, seduai iya lenyau ungkup ba ruang bilik Jehovah. Baka ke deka dikerandauka kitai ba artikel tu, ulah seduai iya udah mai empas ngagai bala peturun sida. Taja pia, tuju Jehovah ke mensia enda berubah. Iya deka mensia ke ngasi nyadi anak Iya belama iya. Dalam artikel tu, kitai deka berandauka (1) baka ni Jehovah udah nunjukka kitai tu berega ba Iya, (2) nama ulih digaga kitai diatu kena nunjukka diri deka nyadi sebagi ari ruang bilik Petara lalu (3) nama berekat ke deka diterima anak Jehovah ba dunya.

5. Baka ni kitai nunjukka diri bebasaka Petara, ke ngaga kitai ulih nunda kualiti Iya?

⁵ Jehovah ngaga kitai ngambika ulih nunda kualiti Iya. (P-kal. 1:26, 27) Ketegal nya, kitai ulih ngemansangka sereta mandangka kualiti Jehovah baka pengerindu, penyiru, tetap ati, sereta pengelurus. (Mas. 86:15; 145:17) Lebuh kitai ngembuan kualiti ke baka tu, kitai nunjukka diri bebasaka Jehovah lalu nunjukka kitai beterima kasih ngagai Iya. (1 Pet. 1:14-16) Lebuh kitai ngembuan ulah ke ngasuh Jehovah lantang ati, kitai mega ulih berasai gaga. Lalu ketegal kitai bisi kualiti baka Jehovah, kitai tau nyadi sebagi ari ruang bilik Iya.

6. Baka ni Jehovah nunjukka mensia berega ba Iya lebuh Iya ngaga dunya tu?

⁶ Jehovah nyediaka endur alai kitai diau. Sebedau Jehovah ngaga mensia ti terubah, Iya nyediaka dunya ke mensia. (Jop 38:4-6; Jer. 10:12) Ketegal pemanah ati sereta pengerah jari Iya, Jehovah ngaga mayuh utai ti manah ngambika kitai ulih idup enggau lantang. (Mas. 104:14, 15, 24) Lalu kekadang, lebuh Iya belematika utai ke ditempa Iya, Jehovah “meda utai nya manah.” (P-kal. 1:10, 12, 31) Baka ni Jehovah nunjukka mensia berega ba Iya? Iya meri sida kuasa “merintah” atas semua utai ke ditempa Iya ba dunya. (Mas. 8:6) Petara deka semua mensia ti sempurna gaga ati lebuh nyaga utai ke ditempa Iya. Kati nuan seruran beterima kasih ngagai Jehovah ke peluang tu?

7. Baka ni Josua 24:15 nunjukka mensia bisi peluang bibas milih?

⁷ Jehovah udah meri kitai peluang bibas milih. Kitai ulih milih nama deka digaga kitai ba pengidup. (Bacha Josua 24:15.) Petara kitai ti bepengerindu gaga ati enti kitai milih deka betuaika Iya. (Mas. 84:11; J-lam. 27:11) Kitai mega ulih ngena peluang bibas milih ngaga pemutus ti manah ba pekara bukai. Peratika teladan ke ditetapka Jesus.

8. Padahka siti chunto baka ni Jesus ngena peluang bibas milih iya.

⁸ Baka Jesus, kitai mega ulih milih ngenuluka utai ke diguna orang ari pengingin diri empu. Bisi sekali, lebuh Jesus enggau bala rasul iya berasai lelak, sida ngiga endur ti sunyi ngambika ulih belelak. Taja pia, sida enda ulih ngereja nya. Orang mayuh tetemuka sida, lalu keran deka diajar Jesus. Kati Jesus  berasai ringat? Enda. Tang iya berasai sinu ati ke sida. Nama digaga Jesus? “Iya lalu belabuh ngajar sida mayuh macham utai.” (Mrk. 6:30-34) Lebuh kitai nunda Jesus ngena awak sereta pengering kitai nulung orang, kitai mai mulia ngagai Apai kitai ti di serega. (Mat. 5:14-16) Kitai mega nunjuk ngagai Jehovah kitai deka nyadi sebagi ari ruang bilik Iya.

9. Nama pemeri ti udah diberi Jehovah ngagai mensia?

⁹ Jehovah udah meri mensia penau ulih beranak, sereta tanggung pengawa ngajar anak sida rindu sereta betuaika Jehovah. Enti nuan apai indai, kati nuan beterima kasih ke pemeri tu? Taja pan bala melikat diberi ungkup pengawa ke besai, tang Jehovah enda meri sida pemeri tu. Nya alai, enti nuan apai indai, beterima kasih meh enggau peluang ulih ngemesaika anak nuan. Jehovah udah meri apai indai tanggung pengawa ngemesaika anak sida ‘dalam disiplin enggau ajar Jehovah.’ (Eps. 6:4; U-dat. 6:5-7; Mas. 127:3) Kena nulung apai indai, gerempung Petara udah nyediaka mayuh perengka bepelasarka Bup Kudus, baka litaricha, video, musik, enggau artikel dalam laman web. Tu enggau terang nunjukka, Jehovah enggau Jesus rinduka bala nembiak kitai. (Luk. 18:15-17) Lebuh apai indai bepanggai ba Jehovah lalu enggau naka ulih nyaga anak sida, Jehovah berasai gaga ati. Lalu sida mega meri peluang ngagai anak sida nyadi sebagi ari ruang bilik Jehovah!

10-11. Nengah tebus, nama peluang ke udah diberi Jehovah ngagai kitai?

¹⁰ Jehovah meri Anak Iya ti pemadu dikesayau ngambika kitai ulih nyadi sebagi ari ruang bilik Iya baru. Baka ke udah disebut ba  genteran 4, ketegal Adam seduai Awa udah bedosa, sida ukai agi sebagi ari ruang bilik Jehovah. Tu mega mai empas ngagai bala peturun sida. (Rom. 5:12) Adam seduai Awa endang patut dibuai ari ruang bilik Jehovah. Tang baka ni enggau bala peturun sida? Nengah genselan tebus Anak Iya, Jesus Kristus, Jehovah udah muka jalai ngambika bala peturun Adam ke tetap ati ulih nyadi sebagi ari ruang bilik Iya. (Jhn. 3:16; Rom. 5:19) Ketegal nya, 144,000 iku mensia ke tetap ati ulih diambu Jehovah nyadika anak Iya.—Rom. 8:15-17; Pem. 14:1.

¹¹ Nambahka nya, bejuta iku mensia ke tetap ati benung ngereja peneka Petara. Sida bisi peluang nyadi sebagi ari ruang bilik Jehovah pengudah penguji ti penudi ba ujung Seribu Taun Jesus Merintah. (Mas. 25:14; Rom. 8:20, 21) Ketegal sida bisi pengadang nya, indah diatu sida udah berengkah ngangau Jehovah, Penempa sida, “Apai.” (Mat. 6:9) Pia mega, mensia ke diangkatka idup baru bisi peluang belajar pasal peneka Jehovah. Sida ke milih deka ngasika Jehovah mega ulih nyadi sebagi ari ruang bilik Iya.

12. Nama tanya ke deka disaut kitai diatu?

¹² Baka ke udah dikerandauka, Jehovah udah ngereja mayuh utai kena nunjukka mensia berega ba Iya. Iya udah ngambu 144,000 iku orang nyadika anak Iya ba serega lalu Iya mega deka meri raban orang mayuh peluang nyadi anak Iya ba dunya baru. (Pem. 7:9) Nama ulih digaga kitai diatu kena nunjukka ngagai Jehovah kitai deka nyadi sebagi ari ruang bilik Iya?

13. Nama ulih digaga kitai ngambika ulih nyadi sebagi ari ruang bilik Petara? (Mark 12:30)

¹³ Ayanka pengerindu ngagai Jehovah ari sembah nuan ti pengabis ati. (Bacha Mark 12:30.) Jehovah udah meri kitai mayuh  pemeri, tang engka siti pemeri ti pemadu berega, iya nya kitai ulih nyembah Iya. Kitai nunjukka ngagai Jehovah, kitai rinduka Iya enggau “ngasika pesan Iya.” (1 Jhn. 5:3) Jesus, ti ngarika Apai iya, ngasuh kitai ngaga murid lalu maptisa sida. (Mat. 28:19) Iya mega ngasuh kitai rinduka pangan diri. (Jhn. 13:35) Jehovah ngelaluka sida ti ngasika pesan Iya nyadi sebagi ari ruang bilik Iya.—Mas. 15:1, 2.

14. Baka ni kitai ulih ngayanka pengerindu ngagai orang bukai? (Matthew 9:36-38; Rome 12:10)

¹⁴ Ayanka pengerindu ngagai orang bukai. Kualiti Jehovah ti nyulut tauka pemadu tampak nya pengerindu. (1 Jhn. 4:8) Jehovah mandangka pengerindu sebedau kitai ngelala Iya. (1 Jhn. 4:9, 10) Lebuh kitai ngayanka pengerindu ngagai orang bukai, kitai neladan Jehovah. (Eps. 5:1) Siti chara kitai ulih ngayanka pengerindu ngagai orang, iya nya nulung sida belajar pasal Jehovah seagi-agi bisi awak. (Bacha Matthew 9:36-38.) Enggau ngereja nya, kitai meri sida peluang ulih nyadi sebagi ari ruang bilik Petara. Pengudah seseiku orang dibaptisa, kitai deka terus ngayanka pengerindu enggau basa ngagai iya. (1 Jhn. 4:20, 21) Baka ni kitai ulih ngereja nya? Ambika chunto, kitai pechayaka menyadi kitai. Kitai enda ngumbai iya bisi tuju ati ti jai lebuh iya ngereja sesiti utai ke enda dimeretika kitai. Tang, kitai deka ngayanka basa ngagai iya lalu ngumbai iya pama agi ari kitai.—Bacha Rome 12:10; Plp. 2:3.

15. Kitai deka ngayanka pengasih enggau pemanah ngagai sapa?

¹⁵ Ayanka pengasih enggau pemanah ngagai semua orang. Enti kitai deka nyadi sebagi ari ruang bilik Jehovah, kitai enda tau enda nitihka jaku lalau Petara ba pengidup kitai. Ambika chunto, Jesus ngasuh kitai ngayanka pengasih enggau pemanah ngagai semua orang, nyengkaum munsuh kitai. (Luk. 6:32-36) Kekadang kitai engka ngasaika tu tusah dikereja. Taja pia, kitai patut belajar berunding sereta ngembuan ulah baka Jesus. Lebuh kitai enggau naka ulih ngasika Jehovah lalu neladan Jesus, tu nunjukka kitai deka nyadi sebagi ari ruang bilik Jehovah belama iya.

16. Baka ni kitai ulih nyaga nama manah ruang bilik Jehovah?

¹⁶ Nyaga nama manah ruang bilik Jehovah. Ba diri sebilik, menyadi ke biak seruran nunda ulah menyadi ke tuai. Enti menyadi ke tuai nitihka jaku lalau Bup Kudus ba pengidup iya, menyadi ke biak mega deka nunda iya. Tang enti menyadi ke tuai ngereja utai ti salah, menyadi ke biak engka nitih teladan ti enda manah nya. Utai tu mega ulih nyadi ba ruang bilik Jehovah. Enti orang Kristian ke tetap ati berengkah ngembuan runding orang Kristian ke limpang ari pengarap, tauka ngembuan chara pengidup ti enda menyana, orang bukai ba eklisia mega engka nunda teladan iya ti enda manah. Tu tau ngenyaika nama ruang bilik Jehovah. (1 Tes. 4:3-8) Kitai patut nyeliahka diri ari neladan ulah ti enda manah lalu enda ngasuh nama-nama utai ngerusak kaul kitai enggau Apai kitai ti di serega.

17. Nama runding ke patut ditulak kitai, lalu nama kebuah?

¹⁷ Arapka Jehovah, ukai reta tengkira. Jehovah besemaya deka nyediaka utai ke diguna kitai baka pemakai, gari sereta alai endur diau. Tang, kitai enda tau enda ngenuluka Perintah Iya lalu idup sejalai enggau standard Iya ti lurus. (Mas. 55:22; Mat. 6:33) Nya alai, kitai enggai ngumbai reta tengkira ba dunya tu ulih meri kitai pengelikun sereta pengaga  ati. Kingatka, kitai semina tau bulih pemaik ba runding enti kitai ngereja peneka Jehovah. (Plp. 4:6, 7) Taja pan kitai ulih meli mayuh utai, tang perundingka tu, kati kitai bisi awak tauka pengering ngena sereta nyaga utai nya? Kati kitai nyau sayauka reta kitai lebih ari utai bukai? Jehovah udah meri kitai pengawa. Nya alai, kitai enggai dilimpangka enggau reta tengkira. Kitai enggai baka seiku lelaki ke nulak peluang nyembah Jehovah lalu lenyau peluang nyadi anak Jehovah ba serega, ketegal iya enda ulih ngelengkaka reta tengkira iya!—Mrk. 10:17-22.

18. Nama basa ti besai sereta berekat ke deka diasaika mensia ti tetap ati belama iya?

¹⁸ Mensia ke tetap ati deka nerima berekat ti pemadu besai, iya nya peluang nyembah sereta rinduka Jehovah belama iya! Sida ke bisi pengadang idup ba dunya deka ngasaika pengaga ati lebuh sida nyaga dunya tu. Enda lama agi, Perintah Petara deka ngaga semua utai nyadi manah baru. Lalu Jesus deka mutarka semua penanggul ke nyadi ketegal pemutus ke digaga Adam seduai Awa. Jehovah deka ngangkatka bejuta iku orang idup baru lalu meri sida peluang idup belama iya ba dunya Paradais enggau pengerai ti sempurna. (Luk. 23:42, 43, nota kaki) Lebuh mensia ke nyembah Jehovah nyadi sempurna, sida ulih mandangka “mulia enggau basa” ke dipadah David.—Mas. 8:5.

19. Nama patut dikingatka kitai?

¹⁹ Enti nuan seiku ari raban orang mayuh, nuan bisi pengadang ti ngagitka ati. Petara rinduka nuan lalu Iya deka nuan nyadi sebagi ari ruang bilik Iya. Nya alai, enggau naka ulih meh ngelantangka ati Iya. Kingatka semaya Iya ba ati enggau runding nuan ninting hari. Beterima kasih meh enggau peluang nuan ulih nyembah Apai kitai ti di serega lalu jaga meh peluang ulih muji Iya belama iya!