1. Nama udah dipelajarka nuan pasal Penempa kitai?

ENTI nuan dibesaika dalam ruang bilik Saksi-Saksi Jehovah, nuan engka udah belajar pasal Jehovah ari nuan agi mit. Nuan diajar Jehovah nya Penempa semua utai, Iya ngembuan mayuh kualiti ti manah sereta bisi tuju deka ngaga dunya tu nyadi Paradais.—P-kal. 1:1; SKR. 17:24-27.

2. Nama runding sekeda orang ngagai sida ke pechayaka Petara?

² Mayuh orang enda pechaya bisi Petara lalu Iya ke nempa semua utai. Tang sida pechaya pengidup nyadi kediri lalu belubah-lubah berubah nyadi utai idup ke berubah gamal. Sekeda ari sida ke madahka utai tu orang ke amat bepelajar. Sida madah sains udah mujur nunjukka Bup Kudus nya salah, sereta orang ke pechayaka Penempa nya enda bepelajar, enda pintar, tauka senang ditipu.

3. Nama kebuah kitai patut terus negapka pengarap diri?

³ Kati penemu ke datai ari sida ke bepelajar tu ulih ngasuh kitai kakang ati Jehovah nya Penempa semua utai? Tu bepanggai enggau kebuah kitai pechayaka Jehovah nya Penempa. Kati kitai pechaya ketegal kitai diasuh pechaya tauka kitai udah ngena awak kena ngiga bukti sereta belajar kediri empu? (1 Kor. 3:12-15) Enda ngira berapa lama nuan udah nyadi Saksi-Saksi Jehovah, semua kitai patut terus negapka pengarap kitai. Enti kitai ngereja nya, kitai enda ulih ditipu enti orang madah Bup Kudus nya salah. (Kol. 2:8; Heb. 11:6) Kena nulung kitai, artikel tu deka bejuraika  (1) kebuah orang enda pechayaka Penempa, (2) baka ni nuan ulih negapka pengarap nuan ngagai Jehovah, Penempa nuan, lalu (3) baka ni nuan ulih terus negapka pengarap nuan.

4. Nitihka Hebrew 11:1, nama reti pengarap ti bendar?

⁴ Sekeda orang ngumbai ngembuan pengarap mai reti pechayaka utai, tang nadai enggau bukti. Tang nitihka Bup Kudus, nya ukai pengarap ti bendar. (Bacha Hebrew 11:1.) Nya alai, taja pan kitai enda ulih meda Jehovah, Jesus, sereta Perintah Petara, kitai bisi bukti semua nya endang bisi. (Heb. 11:3) Seiku saintis ke nyadi Saksi-Saksi Jehovah madahka: “Kami arapka utai bepelasarka bukti. Kami mega enda ngelengkaka fakta sains.”

5. Nama kebuah mayuh orang pechaya nadai Penempa?

⁵ Kitai engka nanya, ‘Enti bisi bukti Penempa nya endang bisi, nama kebuah mayuh orang enda pechayaka Petara nempa semua utai?’ Tu ketegal sekeda sida enda mansik bukti kediri empu. Robert, ke diatu nyadi seiku ari Saksi-Saksi Jehovah madahka: “Ketegal ba sekula kami enda belajarka pasal utai ti ditempa, aku ngumbai nadai Penempa. Tang maya aku beumur 22 taun, aku betemu enggau Saksi-Saksi Jehovah lalu sedar Bup Kudus meri kitai mayuh kebuah pechaya Petara nempa semua utai.” *—Peda kutak “ Pesan ngagai Apai Indai.”

6. Nama kebuah sekeda orang enggai pechayaka Penempa?

⁶ Sekeda orang enda pechayaka Penempa  laban sida madah sida semina pechayaka utai ti ulih dipeda sida. Tang sida kebendar iya pechaya utai ti enda ulih dipeda baka angin. Pengarap ke disebut dalam Bup Kudus nya mega bepelasarka bukti “utai ti enda dipeda.” (Heb. 11:1) Tu begunaka awak sereta mayuh pengawa kena belajar lalu ngiga bukti kediri empu. Lalu mayuh orang enggai ngereja nya. Nya alai, sida ke enda belajar kediri empu sereta ngiga bukti engka ngumbai nadai Petara.

7. Kati semua orang ke bepelajar enda setuju Petara ke nempa dunya raya? Terangka.

⁷ Pengudah belajar sereta ngiga bukti, sekeda saintis udah pechaya Petara nya ke nempa dunya raya. * Baka Robert, ke disebut sebedau tu tadi, sekeda orang enda pechaya bisi Penempa laban pekara nya enda diajar  ba universiti. Taja pia, mayuh saintis udah ngelala sereta rinduka Jehovah. Baka sekeda saintis tu, semua kitai patut ngeringka pengarap ngagai Petara enda ngira sekalika kitai orang ke bepelajar tauka enda. Nadai orang bukai ulih ngereja nya ke kitai.

8-9. (a) Nama tanya deka dikerandauka kitai? (b) Nama penguntung enti nuan belajar pasal utai ti ditempa?

⁸ Baka ni nuan ulih ngeringka pengarap nuan ngagai Penempa? Aram kitai meda empat iti chara kitai ulih ngereja tu.

⁹ Belajar pasal utai ke ditempa. Nuan ulih ngeringka pengarap nuan ngagai Penempa enti nuan belajar pasal jelu, utai tumbuh, enggau bintang. (Mas. 19:1; Isa. 40:26) Mayuh agi nuan belajar pasal semua utai ti ditempa tu, majak agi nuan deka pechaya Jehovah nya Penempa. Litaricha kitai bisi mayuh artikel ti nerangka pasal utai ti ditempa. Enggau naka ulih meh belajarka artikel nya taja pan tusah dimereti. Belajar utai ke ulih nuan, lalu anang enda ingat meda baru video pasal utai ti ditempa ba laman web jw.org. Video nya udah dipandangka maya konvensyen pelilih menua kitai ba taun ti udah.

10. Beri siti chunto ke nunjukka bisi Penempa. (Rome 1:20)

¹⁰ Lebuh belajar pasal utai ti ditempa, peratika utai ke ulih dipelajar nuan ari Penempa kitai. (Bacha Rome 1:20.) Ambika chunto, mata panas. Kelimpah ari meri pengangat ngagai semua utai idup, mata panas mega bisi panchar ultraungu ke ulih nganu. Kitai mensia patut dilindung ari panchar tu. Baka ni? Kebendar iya, kitai semua dilindung laban dunya kitai bisi pelindung kediri empu, iya nya lapis ozon. Lapis ozon tu enda ngemendarka panchar ultraungu tama ngagai dunya. Lebuh mata panas majak mancharka ultraungu, penyampau ozon ba dunya mega majak betambah. Endaka tu nunjukka, bisi Penempa ti bepengerindu sereta bepenemu-dalam ke nempa semua utai tu?

11. Dini nuan ulih tetemuka fakta pasal utai ti ditempa? (Peda kutak “ Penerang ke Ulih Negapka Pengarap Nuan ngagai Penempa.”)

¹¹ Nuan ulih tetemuka mayuh fakta pasal utai ti ditempa ba Bup Dikena Saksi-Saksi Jehovah Ngiga Pansik sereta enggau ngiga pansik di jw.org. Nuan engka ulih berengkah ari artikel sereta video ba siri “Kati Tu Ditempa?” Video tu pandak sereta nunjukka fakta ti ngagitka ati pasal jelu sereta utai ti ditempa ke bukai. Video tu mega nunjukka baka ni saintis nguji nitihka utai ti ditempa.

12. Lebuh belajarka Bup Kudus, nama utai bukai ke patut diperundingka kitai?

¹² Belajarka Bup Kudus. Seiku saintis ke dipadah ba pun tadi, terubah iya enda pechayaka Penempa. Tang nyau kelama, iya berengkah pechaya. Ku iya madah: “Pengarap aku ukai semina bepelasarka utai ke dipelajarka aku ari sains, tang mega bepelasarka utai ke dipelajarka aku ari Bup Kudus.” Engka nuan udah bisi mayuh penemu pasal Bup Kudus. Tang kena ngemansangka pengarap nuan ngagai Penempa, nuan patut terus belajarka Bup Kudus. (Jos. 1:8; Mas. 119:97) Ambika chunto, perundingka baka ni Bup Kudus enggau silik nerangka pasal utai ke kala nyadi suba. Pia mega, baka ni utai ke ditulis bala nabi dikeamatka, sereta baka ni utai ti ditulis penulis Bup Kudus sejalai enggau pangan diri. Enti nuan ngereja nya, pengarap nuan ngagai Penempa kitai ti bepengerindu sereta bepenemu-dalam deka nyadi kering agi lalu nuan deka pechaya Iya  meh Pengarang Bup Kudus. *—2 Tim. 3:14; 2 Pet. 1:21.

13. Padahka siti chunto jaku lalau ti manah ari Bup Kudus.

¹³ Lebuh belajarka Bup Kudus, peratika baka ni jaku lalau iya beguna ba pengidup. Ambika chunto, Bup Kudus udah lama nangkan pengangkun ke duit nya ulih mai penusah sereta “mayuh macham pemedis.” (1 Tim. 6:9, 10; J-lam. 28:20; Mat. 6:24) Kati jaku lalau nya agi beguna kemayaharitu? Siti bup ke nulis pasal ulah mensia kemayaharitu madahka: “Kesuah agi, orang ke pechaya duit nya utai ti pemadu beguna ba pengidup, enda gaga ati sereta balat tusah ati. Indah orang ke semina bisi pengingin deka mayuh agi duit mega enda gaga ati sereta bisi mayuh penanggul ba pengerai.” Nya alai, jaku lalau Bup Kudus endang beguna. Ulih nuan ngingatka baru sekeda prinsip Bup Kudus ti udah nulung nuan? Lebuh kitai berundingka semua jaku lalau ti manah ari Bup Kudus, kitai ulih meda Penempa kitai nemu utai ti pemadu manah ke kitai. Tu meransang kitai seruran bepanggai ba Iya. (Jas. 1:5) Asil iya, pengidup kitai nyadi gaga agi.—Isa. 48:17, 18.

14. Baka ni belajarka Bup Kudus ulih ngajar nuan pasal Jehovah?

¹⁴ Lebuh nuan belajarka Bup Kudus, kembuan meh juluk ati ti deka ngelala Jehovah. (Jhn. 17:3) Maya nuan belajar, nuan deka nemu pemanah Jehovah ke ulih dipeda nuan, mega ba utai ti digaga Iya. Pemanah Jehovah tu nunjukka Jehovah endang bisi. (P-sut. 34:6, 7; Mas. 145:8, 9) Lebuh nuan ngelala Jehovah enggau manah agi, pengarap enggau pengerindu nuan ke Iya deka majak nambah, lalu kaul nuan enggau Iya deka nyadi tegap.

15. Baka ni bejaku pasal Petara ngagai orang bukai ulih nulung nuan?

¹⁵ Bekunsi meh utai ke dipelajar nuan pasal Petara ngagai orang bukai. Lebuh nuan ngereja nya, pengarap nuan empu deka ditegapka. Tang baka ni enti lebuh nuan nginjil, nuan betemu enggau orang ke nanya sekalika bisi Petara tauka enda, lalu nuan enda nemu baka ni deka nyaut iya? Nuan ulih ngiga penerang Bup Kudus ari litaricha kitai, lalu bekunsika utai ti ditemu nuan enggau orang nya. (1 Pet. 3:15) Nuan mega ulih minta tulung ari menyadi Kristian ti bepeneleba. Enda ngira enti orang ke nanya tanya nya nerima saut ari Bup Kudus tauka enda, nuan bisi bulih penguntung ketegal udah ngaga pansik. Pengarap nuan deka nyadi tegap agi. Asil iya, nuan enda jampat pechaya enggau orang ke bepenemu-dalam ke ngumbai nadai Petara.

16. Nama ulih nyadi enti kitai enda terus negapka pengarap kitai?

¹⁶ Enda ngira berapa lama kitai udah nyembah Jehovah, semua kitai patut terus negapka pengarap kitai ngagai Iya. Nama kebuah? Laban enti kitai enda bejimat, pengarap kitai ulih nyadi lemi. Baka ke udah dikerandauka kitai, pengarap nya mega nyengkaum bukti ngagai utai ti enda ulih dipeda. Kitai senang enda ingat utai ke enda ulih dipeda kitai. Paul madah, pengarap ti lemi nya “dosa ti ulih manjuk kitai enggau mudah.” (Heb. 12:1, NWT) Nya alai, baka ni kitai ulih nentuka pengarap kitai mengkang tegap?—2 Tes. 1:3.

17. Nama ulih nulung pengarap kitai mengkang tegap?

 ¹⁷ Kesatu, suah minta roh kudus ari Jehovah. Nama kebuah? Laban pengarap nya sebagi ari buah roh kudus. (Gal. 5:22, 23) Kitai enda ulih negapka sereta ngemansangka pengarap kitai ngagai Jehovah enti nadai roh kudus. Enti kitai terus minta Jehovah meri kitai roh kudus, Iya deka meri kitai nya. (Luk. 11:13) Kelebih agi, kitai ulih besampi: “Tambahka pengarap kami.”—Luk. 17:5.

18. Nitihka Masmur 1:2, 3, nama pemeri ti berega ke dikembuan kitai diatu?

¹⁸ Kedua, terus belajarka Bup Kudus. (Bacha Masmur 1:2, 3.) Lebuh masmur nya ditulis, semina mimit aja orang Israel bisi salin Adat Petara. Taja pia, raja enggau imam bisi salin Adat nya. Lalu ninting tujuh taun, atur digaga ngambika “semua lelaki, indu, nembiak” enggau orang kampar ke diau di Israel begempuru ngambika ulih ninga Adat nya dibacha. (U-dat. 31:10-12) Maya jeman Jesus, semina mimit aja orang bisi salin gulung surat Jaku Petara. Mayuh gulung surat nya disimpan ba balai gempuru. Kemayaharitu, mayuh orang bisi sebagi tauka semua Bup Kudus. Nya siti pemeri ti berega. Baka ni kitai ulih ngayanka diri beterima kasihka pemeri tu?

19. Nama patut digaga kitai ngambika pengarap kitai terus ditegapka?

¹⁹ Kitai ulih nunjukka diri beterima kasih ke pemeri tu enggau macha Bup Kudus enggau tetap. Kitai ulih ngaga jadual kena macha sereta belajarka Bup Kudus, ukai semina macha lebuh kitai bisi awak. Enti kitai terus nitihka jadual nya, kitai ulih terus negapka pengarap kitai.

20. Nama juluk ati kitai?

²⁰ Enda baka “orang ke bepenemu-dalam sereta pandai” ba dunya tu, pengarap kitai bepelasarka bukti ari Bup Kudus. (Mat. 11:25, 26) Lebuh kitai belajarka Bup Kudus, kitai nemu kebuah gaya dunya tu majak jai, lalu nama deka digaga Jehovah kena mutarka nya. Nya alai, terus meh negapka pengarap kitai lalu nulung mayuh agi orang arapka Penempa kitai. (1 Tim. 2:3, 4) Aram meh kitai terus nganti maya semua orang ba dunya tu deka muji Jehovah lalu madahka jaku ari Pemandang 4:11: ‘O Jehovah Petara kami, Nuan endang patut nerima mulia, . . . laban Nuan udah ngaga semua utai.’