1. Nama utai manah ke udah dikereja mayuh bala nembiak?

 NINTING taun, beribu iku nembiak Kristian dibaptisa. Kati nuan udah ngereja nya? Enti udah, bala menyadi Kristian nuan ba gempuru amat gaga ati ke nuan, lalu Jehovah mega gaga ati! (J-lam. 27:11) Perundingka semua utai ti manah ke udah dikereja nuan. Ambika chunto, nuan udah bebendar belajarka Bup Kudus, engka pengelama beberapa taun. Tu nulung nuan andal Bup Kudus nya endang Jaku Petara. Lalu keberat agi, nuan udah ngelala sereta rinduka Pengarang Bup Kudus nya. Pengerindu nuan ke Jehovah majak tegap nyentukka nuan ngaga pemutus deka nyembah Iya sereta dibaptisa. Nya pemutus ti amat manah!

2. Nama deka dikerandauka kitai ba artikel tu?

 ² Sebedau nuan dibaptisa, nuan tentu bisi napi sekeda penanggul ke ngasuh nuan tusah deka tetap ati ngagai Jehovah. Tang seraya nuan mansang besai, nuan deka napi penanggul ti baru. Sitan deka nguji ngasuh nuan badu agi rindu sereta nyembah Jehovah. (Eps. 4:14) Anang nejuka utai nya nyadi! Nama ulih nulung nuan mengkang taluk ngagai Jehovah sereta ngamatka semaya nuan ti deka nyembah Iya? Nuan mesti terus bebendar nyadi orang Kristian ti tegap agi ba pengarap. (Heb. 6:1) Tu meh utai ti deka dikerandauka kitai ba artikel tu.

3. Nama patut digaga semua orang Kristian pengudah dibaptisa?

³ Pengudah dibaptisa, semua kitai patut nitihka jaku ajar ke diberi rasul Paul ngagai orang Kristian ba Epesus. Iya meransang sida nyadi orang Kristian ti “besai tuai.” (Eps. 4:13) Reti iya sida patut ‘terus ngaga pemansang.’ Paul mandingka pemansang kitai ke nyadi orang Kristian nya baka chara nembiak ke mansang besai. Apai indai tentu gaga ati sereta temegah ke anak seduai iya ti agi mit. Tang anak nya enda ulih seruran baka anak mit. Lebuh iya udah mansang besai, iya enda tau nyadi “baka anak mit agi.” (1 Kor. 13:11) Sama mega enggau orang Kristian. Pengudah dibaptisa, kitai mesti terus ngaga pemansang. Aram beratika sekeda chara ke ulih nulung kitai ngereja nya.

4. Nama sifat ke ulih nulung nuan ngaga pemansang ba pengarap? Terangka. (Pilipi 1:9)

⁴ Dalamka agi pengerindu nuan ngagai Jehovah. Nuan udah rinduka Jehovah enggau dalam. Tang pengerindu nuan ke Iya ulih nyadi dalam agi. Baka ni? Rasul Paul madahka siti ari chara nya ba Pilipi 1:9. (Bacha.) Rasul Paul besampi ngambika pengerindu bala menyadi ba Pilipi “majak nambah.” Nyadi pengerindu kitai ke Jehovah mega ulih nyadi dalam agi. Baka ni kitai ulih ngereja nya? Kitai ulih ngereja nya enggau terus ngulihka “penemu ti ngena” sereta “meretika utai enggau dalam agi.” Seraya kitai majak agi ngelala Jehovah, kitai deka rindu agi ke Iya sereta beterima kasihka personaliti Iya enggau chara Iya ngereja siti-siti utai. Pengeran kitai ti deka ngelantangka ati Iya deka majak tegap, lalu kitai enggai ngereja utai ti ngasuh ati Iya asa. Kitai bebendar meretika utai ti dikedekaka Jehovah kereja kitai sereta chara kitai ulih ngereja nya.

5-6. Baka ni kitai ulih ngenalamka agi pengerindu kitai ke Jehovah? Terangka.

⁵ Jesus neladan personaliti Jehovah enggau sempurna. Nyadi, lebuh kitai majak agi ngelala Jesus, kitai deka rindu agi ke Jehovah. (Heb. 1:3) Chara ti pemadu manah kena ngelala Jesus nya nengah belajarka empat iti bup Injil. Enti nuan bedau berengkah macha Bup Kudus ninting hari, nuan ulih berengkah diatu enggau macha bup tu ke bisi cherita pengidup Jesus. Seraya nuan macha cherita pengidup Jesus, fokus meh ba sifat iya. Orang rindu begulai sereta bejaku enggau iya; iya merap bala anak mit ke datai ngagai iya. (Mrk. 10:13-16) Jesus bisi ati ti amat manah, lalu bala murid iya enda takut madahka asai ati diri ngagai iya. (Mat. 16:22) Tu meh chara Jesus neladan Apai iya ba serega. Kitai rindu deka nyemakka diri ngagai Jehovah. Kitai mega senang deka bejaku enggau Jehovah nengah sampi. Lebuh kitai besampi, kitai ulih madah ngagai Iya semua utai ti bisi dalam ati sereta runding kitai. Lalu kitai mega andal, Iya enda ngakim kitai. Jehovah rindu sereta ibuhka kitai.—1 Pet. 5:7.

⁶ Jesus mega ngayanka pengasih ngagai orang. Rasul Matthew madahka: “Lebuh iya meda orang mayuh, iya kasihka sida laban sida baka bedus ti nadai orang ngibun. Sida ditekan sereta enda dikeibuhka orang.” (Mat. 9:36) Lalu nama asai ati Jehovah deh? Jesus madahka: “Apai aku ti ba serega enggai nejuka indah siku ari sida ke baka anak mit tu tesat.” (Mat. 18:14) Jaku nya ngelantangka ati kitai laban nya nunjukka Jehovah amat rinduka kitai! Seraya kitai ngelala Jesus enggau dalam agi, pengerindu kitai ke Jehovah mega deka majak dalam agi.

7. Baka ni nuan tau bulih penguntung lebuh begulai enggau bala menyadi Kristian bukai ke tegap ba pengarap?

 ⁷ Lebuh nuan begulai sereta ngelala bala menyadi bukai ti tegap ba pengarap, nuan deka nemu chara ngayanka pengerindu ti dalam agi sereta nyadi orang Kristian ti tegap ba pengarap. Peratika pengaga ati sida. Sida nadai kala ngesal ketegal udah nyembah Jehovah. Tanya meh pengalaman sida lebuh gawa ke Jehovah. Lebuh nuan bisi pemutus ti besai ke patut digaga, pinta meh jaku ajar ari sida. Kingatka meh, enti nuan bisi “mayuh penyanding penemu,” pengawa nuan deka mujur.—J-lam. 11:14.

8. Nama ulih digaga nuan enti nuan berasai kakang ati enggau utai ti dipadah Bup Kudus?

⁸ Putarka asai ati nuan ti kakang. Baka ke dipadah ba  genteran 2, Sitan deka nguji nagang nuan ari negapka pengarap sereta nyemakka diri ngagai Jehovah. Siti ari chara ke dikena Sitan, iya nya ngasuh nuan kakang ati sekalika ajar ari Bup Kudus nya amat tauka enda. Ambika chunto, sekeda orang engka nguji ngasuh nuan pechaya, ukai Petara ke nempa kitai tang semua kitai bisi ketegal evolusi. Lebuh nuan agi nembiak, nuan engka enda berunding mayuh pasal utai nya, tang diatu nuan engka diajar pasal teori evolusi ba sekula. Engka utai ti dipadah bala pengajar ba sekula baka ke betul ba nuan. Tang sida engka enda kala nguji ngiga penerang ke nunjukka Petara ti nempa semua utai nya endang bisi. Kingatka prinsip ke bisi ba Jaku Dalam 18:17: “Orang ke terubah mansutka jaku dalam kot endang munyi ti ngena belama, sebedau orang ke ngelaban iya belabuh nanya iya.” Ari ke terus pechayaka semua utai ti dipelajarka nuan ba sekula, nuan patut bebendar belajarka utai ti dipadah Bup Kudus. Gaga pansik nengah litaricha kitai. Berandau meh enggau bala menyadi Kristian kitai ke kala pechayaka teori evolusi. Tanya sida, ‘Nama kebuah sida ulih pechaya pasal Penempa ke rinduka kitai?’ Randau ke baka tu ulih nulung nuan ngiga bukti ke nunjukka Petara ti nempa semua utai nya endang bisi.

9. Nama ulih dipelajarka nuan ari pengalaman Melissa?

⁹ Siku menyadi Kristian indu ke benama Melissa belajarka topik pasal utai ti ditempa, lalu nya nulung iya mutarka asai ati ti kakang. b Ku iya madah: “Ba sekula, bala pengajar  ngajar pasal teori evolusi enggau chara ti ngasuh semua orang ngumbai utai nya amat. Terubah iya, aku enggai ngaga pansik laban aku takut enti utai ke ditemu aku nunjukka teori evolusi nya amat. Tang aku berunding, Jehovah dekaka kitai bisi bukti ke utai ti dipechaya kitai. Nyadi aku berengkah ngaga pansik. Aku macha bup Is There a Creator Who Cares About You? enggau brosur Was Life Created? enggau The Origin of Life—Five Questions Worth Asking. Nya meh utai ti diguna aku. Aku ngesal laban enda mansik utai nya tumu agi.”

10-11. Nama ulih nulung nuan mengkang beresi ba moral? (1 Tesalonika 4:3, 4)

¹⁰ Nulak ulah ti salah. Lebuh nuan agi nembiak, pengingin deka besetubuh engka amat besai, lalu kekadang orang bukai deka ngumbuk nuan ngereja ulah seks ti kamah. Sitan deka nuan ngereja nya. Nama ulih nulung nuan mengkang beresi ba moral? (Bacha 1 Tesalonika 4:3, 4.) Lebuh nuan besampi ngagai Jehovah, padah ngagai Iya asai ati nuan, lalu pinta meh Jehovah ngeringka nuan. (Mat. 6:13) Kingatka, Jehovah deka nulung nuan ukai ngukum nuan. (Mas. 103:13, 14) Bup Kudus mega ulih nulung nuan. Melissa ke dipadah tadi, bebendar nguji nulak runding ti kamah. Ku iya: “Macha Bup Kudus ninting hari udah nulung aku terus ngelaban pengingin ti salah tu. Nya ngingatka aku, pengidup aku enggi Jehovah lalu aku deka nyembah Iya.”—Mas. 119:9.

¹¹ Anang mutarka penanggul nuan kediri. Bejaku meh enggau apai indai nuan pasal penanggul nuan. Amat, enda senang bejaku pasal pekara peribadi enggau apai indai, tang amat penting enti nuan ngereja nya. Melissa madah baru: “Aku besampi minta pemerani, lalu udah nya bejaku enggau apai pasal penanggul aku. Pengudah nya aku berasai lantang agi. Aku nemu Jehovah tentu temegahka aku.”

12. Baka ni nuan ulih ngaga pemutus ti manah?

¹² Awakka prinsip Bup Kudus ngiring nuan. Seraya nuan mansang besai, apai indai deka nejuka nuan ngaga pemutus kediri empu. Tang agi bisi mayuh utai ke enda ditemu nuan. Baka ni nuan ulih nyeliahka diri ari ngaga pemutus ti ulih ngerusakka kaul nuan enggau Jehovah? (J-lam. 22:3) Siku menyadi Kristian indu ke benama Kari nerangka utai ti nulung iya ngaga pemutus ti manah agi. Iya nemu orang Kristian ti tegap ba pengarap enda begunaka pesan ke tiap iti pekara ba pengidup. Ku iya: “Aku patut faham pasal chara Jehovah berunding lalu ukai semina nitihka pesan aja.” Lebuh macha Bup Kudus, tanya diri empu: ‘Nama ulih ditemu aku pasal runding Jehovah ari ayat tu? Kati bisi prinsip ke ulih nulung aku ngereja utai ti betul? Enti bisi, baka ni aku deka bulih penguntung lebuh aku ngereja utai ti diajar Bup Kudus?’ (Mas. 19:7; Isa. 48:17, 18) Lebuh nuan macha sereta berunding enggau dalam pasal utai ti dibacha nuan ari Bup Kudus, nuan deka berasai senang agi ngaga pemutus ti ngelantangka ati Jehovah. Seraya nuan terus ngaga pemansang, nuan deka sedar nuan enda begunaka pesan ngagai tiap iti pekara ba pengidup laban nuan udah meretika runding Jehovah ba pekara nya.

13. Baka ni bala bakih ti manah ulih nulung nuan? (Jaku Dalam 13:20)

¹³ Pilih bala bakih ke rinduka Jehovah. Bala bakih ke dipilih nuan ulih nulung nuan nyadi orang Kristian ti tegap ba pengarap. (Bacha Jaku Dalam 13:20.) Siku menyadi Kristian indu ke benama Sara nyauka lenyau pengaga ba ati. Tang bisi utai nyadi ke nulung iya  gaga ati baru. Sara madahka: “Aku tetemuka bala bakih ti manah ba maya ti ngena. Siku menyadi Kristian indu ti biak enggau aku begulai belajarka artikel Menara Jaga ninting minggu. Siku agi bakih aku nulung aku berengkah meri komen ba gempuru. Ketegal bantu ari bala bakih aku, aku berengkah bebendar agi belajarka Bup Kudus kediri empu sereta besampi. Kaul aku enggau Jehovah pan majak tegap agi, lalu aku berasai gaga ati baru.”

14. Baka ni Julien ngiga bala bakih ti manah?

¹⁴ Baka ni nuan ulih ngiga bala bakih ti deka meransang nuan ngereja utai ti manah? Siku tuai gempuru ke benama Julien madahka: “Lebuh aku agi nembiak, aku ngiga bala bakih ti manah lebuh aku begulai nginjil enggau sida. Bala bakih tu amat ransing sereta nulung aku meda pengaga ati ke tau diulih ari pengawa nginjil. Ketegal nya, aku netapka juluk ati deka gawa nyadi pengerintis. Aku mega sedar, aku nadai mayuh bakih laban aku semina ngiga bala bakih ke serambau enggau aku aja. Udah nya, aku mega tetemuka bala bakih ti manah lebuh aku gawa ba Betel. Teladan sida nulung aku milih pemerindang ti manah, lalu nya ngasuh aku semak agi enggau Jehovah.”

15. Nama jaku tangkan ke diberi rasul Paul ngagai Timoti pasal ngiga bakih? (2 Timoti 2:20-22)

¹⁵ Nama patut digaga nuan lebuh nuan nemu begulai enggau siku-siku orang ba gempuru ulih ngerusakka kaul nuan enggau Jehovah? Paul nemu sekeda orang ba raban gempuru enda berunding tauka ngembuan ulah baka orang Kristian. Nya alai, iya ngasuh Timoti nyeliahka diri ari sida. (Bacha 2 Timoti 2:20-22.) Kaul kitai enggau Jehovah amat berega. Kitai udah bebendar nyemakka diri ngagai Jehovah, nyadi kitai enda patut bebakih enggau sapa-sapa ke ulih ngerusakka kaul nya.—Mas. 26:4.

16. Nama bansa juluk ati ba pengarap ti patut dipilih nuan?

¹⁶ Tetapka juluk ati ti manah. Pilih juluk ati ke ulih negapka pengarap nuan sereta nulung nuan nyadi orang Kristian ti tegap ba pengarap. (Eps. 3:16) Ambika chunto, nuan engka ngaga pemutus deka suah agi macha sereta belajarka Bup Kudus kediri empu. (Mas. 1: 2, 3) Tauka nuan ulih nguji suah agi besampi ari ati. Nuan engka patut bejimat agi lebuh milih pemerindang tauka chara nuan ngena awak. (Eps. 5:15, 16) Jehovah deka gaga ati lebuh Iya meda nuan bebendar deka ngaga pemansang.

17. Baka ni nuan bulih penguntung lebuh nulung orang bukai?

¹⁷ Nuan deka nyadi orang Kristian ti manah agi lebuh nuan nulung orang bukai. Jesus madahka: “Orang ke meri deka gaga agi ati ari orang ke nerima.” (SKR. 20:35) Nuan deka berasai amat gaga ati enti nuan ngena sekeda ari awak sereta pengering nuan lebuh agi biak kena nulung orang bukai. Ambika chunto, nuan ulih netapka juluk ati nulung sida ke udah tuai sereta enda bepengerai ba raban gempuru nuan. Engka nuan ulih nulung sida meli utai ti diguna tauka ngajar sida chara ngena perengka elektronik. Enti nuan siku menyadi lelaki, tetapka juluk ati deka nyadi penulung gempuru ngambika nuan ulih nulung bala menyadi Kristian enggau mayuh agi. (Plp. 2:4) Nuan mega ngayanka pengerindu ngagai sida ke ukai Saksi lebuh nuan bekunsika Berita Manah pasal Perintah Petara enggau sida. (Mat. 9:36, 37) Enti ulih, gaga meh juluk ati nyadi pengerintis biasa, gawa ba Betel tauka ba pengawa nirika bengunan teokratik.

18. Baka ni ngereja mayuh agi ke Jehovah ulih nulung nuan ngaga pemansang?

¹⁸ Ngereja mayuh agi ke Jehovah deka meri nuan mayuh peluang kena ngaga pemansang ba pengarap. Enti nuan siku pengerintis, nuan engka ulih enggau Sekula Penginjil Perintah Petara, gawa ba Betel tauka enggau pengawa nirika bengunan teokratik. Siku pengerintis indu ti biak ke benama Kaitlyn madahka: “Begulai ba pengawa nginjil enggau bala menyadi Kristian ti tegap ba pengarap nulung aku semak agi ngagai Jehovah pengudah dibaptisa. Teladan sida meransang aku belajarka Bup Kudus enggau mayuh agi sereta ngemansangka pengelandik aku kena ngajar.”

19. Seraya nuan terus ngaga pemansang ba pengarap, nama berekat ti deka diasaika nuan?

¹⁹ Jehovah deka meri nuan mayuh berekat seraya nuan terus ngaga pemansang ba pengarap. Nuan enda ngena pengering nuan ngereja utai ti nadai guna. (1 Jhn. 2:17) Nuan enda berasai tusah ati ketegal ngaga pemutus ti salah. Tang nuan deka tetemuka pemujur sereta pengelantang ti bendar. (J-lam. 16:3) Teladan nuan ti manah deka meransang semua bala menyadi Kristian. (1 Tim. 4:12) Lalu ke beguna agi, nuan deka bulih pengelantang sereta pengaga ati ke datai lebuh nuan ngagaka ati Jehovah sereta ngembuan kaul ti rapat enggau Iya.—J-lam. 23:15, 16.