1. Nama kebuah Jesus minta Jehovah nyaga bala nembiak iya?

 BA MALAM sebedau Jesus mati, iya minta Jehovah nyaga bala nembiak iya. (Jhn. 17:15, 20) Endang amat, Jehovah seruran nyaga nembiak Iya. Tang Jesus nemu Sitan deka balat nyakal bala nembiak iya. Jesus mega nemu sida begunaka tulung ari Jehovah kena betan napi serang ari Sitan ti jai.

 2. Nitihka Masmur 33:18-20, nama kebuah kitai enda ibuh takut lebuh napi penusah?

² Dunya ti dipegai Sitan ngasuh orang Kristian ti bendar napi mayuh penusah. Kitai napi penusah ke ulih ngasuh kitai asa ati sereta nguji penaluk kitai ngagai Jehovah. Tang baka ke deka diperatika kitai ba artikel tu, kitai enda ibuh takut. Jehovah ngemataka kitai. Reti iya, Jehovah beratika penanggul kitai sereta deka nulung kitai. Aram beratika dua chunto ari Bup Kudus ke nunjukka chara Jehovah “ngemataka semua orang ke ngasika Iya.”—Bacha Masmur 33:18-20.

 3. Kemaya kitai engka berasai kediri?

³ Kekadang kitai engka berasai kediri taja pan bisi mayuh bala menyadi Kristian ba raban gempuru. Ambika chunto, sida ke biak engka berasai nadai orang ke deka nulung sida nemu chara nerangka utai ti dipechaya sida ngagai orang ke sama sekula. Tauka sida engka berasai kediri lebuh pindah ngagai raban gempuru ti baru. Sekeda ari kitai engka berasai balat tusah ati tauka napi kemurungan, lalu kitai engka ngumbai diri patut napi asai  ati nya kediri. Kitai engka kakang ati deka bejaku enggau orang bukai pasal asai ati diri laban kitai nangika sida enda meretika asai ati kitai. Lalu bisi maya iya, kitai engka berunding sekalika bisi orang amat ibuhka kitai tauka enda. Enda ngira nama utai ke ngasuh kitai berasai kediri, bisi maya iya, kitai mega berasai nadai daya sereta balat irau. Jehovah enggai kitai berasai baka nya. Nama kebuah kitai ulih bejaku munyi nya?

 4. Nama kebuah nabi Elijah madah: “Semina aku aja ti agi idup”?

⁴ Perundingka teladan Elijah ti tetap ati. Jesebel madahka diri deka munuh iya. Nya alai, nabi Elijah rari pengelama lebih ari 40 hari. (1 Raj. 19:1-9) Lalu pengujung iya, dalam siti gua, iya madah ngagai Jehovah: “Semina aku aja [nabi] ti agi idup.” (1 Raj. 19:10) Bisi nabi bukai ba menua nya. Ambika chunto, Obadiah udah nyelamatka 100 iku nabi ari dibunuh Jesebel. (1 Raj. 18:7, 13) Enti pia, nama kebuah Elijah berasai kediri? Kati iya ngumbai semua nabi ke diselamatka Obadiah nya udah mati magang? Kati iya berasai kediri laban nadai orang berengkah enggau iya nyembah Jehovah taja pan Jehovah udah nunjukka Diri Petara ti bendar ba Gunung Karmel? Tauka Elijah engka ngasaika nadai orang nemu pasal bala munsuh iya deka munuh iya tauka Elijah engka berunding nadai orang ibuhka iya. Ayat Bup Kudus nya nadai nerangka asai ati Elijah enggau nyemetak. Tang kitai nemu Jehovah meretika kebuah Elijah berasai kediri lalu Iya nemu chara nulung Elijah.

 5. Baka ni Jehovah ngasuh Elijah andal pasal iya ke enda kediri?

⁵ Jehovah ngereja beberapa iti utai kena nulung Elijah. Iya meransang Elijah bejaku. Dua kali Iya nanya Elijah: “Nama pengawa nuan ditu?” (1 Raj. 19:9, 13) Lalu tiap kali lebuh Jehovah nanya, Iya ninga lebuh Elijah madahka asai ati diri. Jehovah nyaut Elijah enggau nunjukka kuasa Iya ti besai sereta Iya bisi dia enggau Elijah. Jehovah mega ngasuh Elijah yakin pasal mayuh orang Israel ke agi nyembah Iya. (1 Raj. 19:11, 12, 18) Elijah tentu berasai lantang pengudah madahka asai  ati diri ngagai Jehovah sereta ningaka saut ari Iya. Jehovah lalu meri Elijah beberapa iti pengawa ti penting. Iya ngasuh Elijah nata Hasael nyadi raja menua Siria, Jehu nyadi raja menua Israel, sereta Elisa nyadi nabi. (1 Raj. 19:15, 16) Jehovah nulung Elijah fokus ba utai ti positif lebuh Iya meri Elijah pengawa tu. Jehovah mega meri iya pangan ti rapat, iya nya Elisa. Baka ni nuan tau bulih tulung ari Jehovah lebuh nuan berasai kediri?

 6. Nama ulih disampika nuan lebuh nuan berasai kediri? (Masmur 62:8)

⁶ Jehovah mai nuan besampi ngagai Iya. Iya nemu penanggul ke ditapi nuan, lalu Iya madahka Diri deka ningaka sampi nuan ba barang maya. (1 Tes. 5:17) Iya amat gaga ati ningaka bala penyembah Iya. (J-lam. 15:8) Nama ulih disampika nuan lebuh nuan berasai kediri? Baka Elijah, padah ngagai Jehovah pasal asai ati nuan. (Bacha Masmur 62:8.) Padah ngagai Jehovah pasal utai ti ngasuh nuan irau sereta asai ati nuan senentang nya. Pinta Jehovah nulung nuan nemu utai ti ulih digaga nuan lebuh nuan berasai kediri tauka tusah ati. Ambika chunto, enti nuan berasai kediri sereta takut lebuh orang ke sama kelas nanya pasal utai ti dipechaya nuan, pinta meh ngagai Jehovah kena meri nuan pemerani nerangka utai nya. Nuan mega ulih minta penemu-dalam kena nerangka utai ti dipechaya nuan enggau manah. (Luk. 21:14, 15) Enti nuan berasai balat tusah ati tauka napi kemurungan, minta Jehovah nulung nuan bejaku enggau siku menyadi Kristian ti bepeneleba. Nuan ulih minta Jehovah nulung menyadi Kristian nya meretika asai ati nuan. Padahka asai ati nuan ngagai Jehovah, peda chara Iya nyaut sampi nuan, sereta terima meh bantu ari orang bukai. Enti nuan ngereja nya, nuan deka kurang agi berasai kediri.

 7. Nama dipelajarka nuan ari chunto Mauricio?

⁷ Jehovah udah meri semua kitai pengawa ti penting. Lalu, nuan ulih andal Iya meda sereta beterima kasihka semua utai ti digaga nuan ba raban gempuru sereta ba pengawa nginjil. (Mas. 110:3) Baka ni mengkang sibuk ba pengawa tu ulih nulung nuan lebuh nuan berasai kediri? Peratika chunto siku menyadi Kristian lelaki ti biak ke benama Mauricio. b Enda lama pengudah Mauricio dibaptisa, siku ari bala bakih iya ti rapat berengkah ninggalka pemendar. Ku Mauricio: “Lebuh aku meda iya ninggalka Jehovah, aku enda berasai yakin enggau diri empu. Aku berunding sekalika aku ulih ngamatka semaya aku kena nyembah Jehovah sereta mengkang dalam ruang bilik Jehovah. Aku berasai kediri lalu ngumbai nadai orang ulih meretika asai ati aku.” Nama udah nulung Mauricio? Ku iya agi: “Aku mayuh agi nginjil. Nya nulung aku badu berunding  pasal diri empu sereta asai ati diri. Aku berasai gaga ati sereta kurang agi berasai kediri lebuh aku gawa begulai enggau orang bukai ba pengawa nginjil.” Amat, taja pan kitai enda ulih betunga mua nginjil enggau bala menyadi kitai, tang kitai agi diperansang lebuh begulai nginjil enggau sida nengah telefon tauka betulis surat. Nama utai bukai ke nulung Mauricio? Ku iya nampung agi: “Aku mega ngereja mayuh agi ba raban gempuru. Aku bebendar nyedia sereta ngenataika begian pemelajar ba gempuru. Pengawa tu ngasuh aku berasai dikeibuh sereta dikerinduka Jehovah enggau orang bukai.”

 8. Nama asai ati kitai lebuh napi sekeda penguji ti besai?

⁸ Kitai nemu, kitai deka napi mayuh penguji ba hari ti penudi. (2 Tim. 3:1) Tang kitai engka enda nyangka siti-siti penguji deka nyadi ba kitai tauka kitai engka tekenyit lebuh utai nya nyadi. Kitai engka enda nyangka diri deka napi penanggul ba duit, lutur engka madahka kitai bisi penyakit ti raya, tauka engka orang ke dikesayauka kitai mati. Maya nya, kitai engka berasai balat tusah ati sereta stres, kelebih agi lebuh kitai enda badu-badu napi penguji tauka lebuh napi mayuh penanggul ba maya ti sama. Kingatka meh, Jehovah nemu situasi kitai, lalu enggau tulung Iya, kitai ulih napi sebarang penguji enggau yakin.

 9. Padahka sekeda penguji ke ditapi Jop.

⁹ Peratika baka ni Jehovah nulung Jop, lelaki ke tetap ati. Iya napi sekeda penguji ti balat ngenusahka ati dalam timpuh ti pandak. Jop nerima berita ti enda manah sereta ngenusahka ati iya. Dalam timpuh sehari, semua jelu tupi iya udah dichuri tauka dibunuh, lalu bala orang gaji enggau bala anak iya udah dibunuh. (Jop 1:13-19) Enda lama pengudah nya, lebuh iya agi balat tusah ati, Jop ditinggang penyakit ti balat ngemediska iya. (Jop 2:7) Utai ke nyadi nya amat merinsaka Jop nyentukka iya madah: “Aku enggai agi idup. Aku nyau lelak idup.”—Jop 7:16.

10. Baka ni Jehovah nyediaka utai ti diguna Jop ngambika iya ulih betan napi penguji? (Peda gambar ba mua majalah.)

¹⁰ Jehovah nyaga Jop, laban Iya rinduka Jop. Jehovah meri iya utai ti diguna iya kena betan napi penguji sereta mengkang tetap ati. Jehovah bejaku enggau Jop, ngingatka Jop pasal penemu-dalam Iya ti nadai tatak sereta pengerindu Iya ke utai ti ditempa Iya. Jehovah mega bisi nyebut pasal mayuh jelu ti ngalitka ati. (Jop 38:1, 2; 39:9, 13, 19, 27; 40:15; 41:1, 2) Jehovah mega ngena siku lelaki biak ti tetap ati ke benama Elihu kena ngering sereta ngelantangka ati Jop. Elihu ngasuh Jop yakin, Jehovah seruran merekatka penyembah Iya ke betan napi penguji. Tang Jehovah mega ngasuh Elihu meri Jop sekeda jaku lalau ti bepengerindu. Elihu nulung Jop badu agi kelalu berunding pasal diri empu enggau ngingatka Jop pasal kitai ke kelalu mit enti dibandingka enggau Jehovah, Penempa dunya raya. (Jop 37:14) Jehovah mega meri Jop siti pengawa. Iya ngasuh Jop besampika tiga iku kaban iya ti udah bedosa. (Jop 42:8-10) Baka ni Jehovah nyukung kitai kemayaharitu lebuh kitai napi sekeda penguji ti besai?

11. Baka ni Bup Kudus nulung kitai lebuh napi penguji?

¹¹ Jehovah enda bejaku terus enggau kitai baka ke digaga Iya ngagai Jop. Tang Iya bejaku ngagai kitai ngena Bup Kudus. (Rom. 15:4) Iya ngelantangka ati kitai lebuh Iya meri kitai harapan ke jemah ila. Perundingka sekeda utai ari Bup Kudus ke ulih ngelantangka ati kitai lebuh kitai napi sekeda penguji. Dalam Bup Kudus, Jehovah ngasuh kitai pechaya, nadai utai indah sekeda penguji ti besai “ulih nyeraraka  kitai ari pengerindu Petara.” (Rom. 8:38, 39) Iya mega ngasuh kitai yakin, Iya “diau semak sida ke ngangauka Iya” nengah sampi. (Mas. 145:18) Jehovah madahka, enti kitai bepanggai ba Iya kitai ulih mujur betan napi sebarang penguji sereta ulih gaga ati taja pan kitai merinsa. (1 Kor. 10:13; Jas. 1:2, 12) Jaku Petara ngingatka kitai, penguji ke ditapi kitai nya sementara aja, enti dibandingka enggau berekat ti meruan belama iya ke deka diterima kitai. (2 Kor. 4:16-18) Jehovah meri kitai harapan pasal Iya ke deka ngerusakka Sitan ti pun semua penanggul sereta orang ke jai baka Sitan. (Mas. 37:10) Kati nuan bisi ngingatka sekeda ayat Bup Kudus ti ngelantangka ati ke ulih nulung nuan betan napi penguji ba jemah ila?

12. Nama dikedekaka Jehovah kereja kitai enti kitai deka bulih penguntung ari Jaku Iya?

¹² Jehovah dekaka kitai magi awak kena belajarka Bup Kudus enggau tetap sereta belematika utai ti dibacha kitai. Lebuh kitai ngena utai ti udah dipelajar, pengarap kitai majak tegap lalu kitai majak semak ngagai Apai kitai ti di serega. Asil iya, kitai dikeringka kena betan napi penguji. Jehovah mega meri kuasa kudus ngagai sida ke bepanggai ba Jaku Iya. Lalu kuasa kudus nya ulih meri kitai “kuasa ke ngelui ari pengering mensia” kena betan napi sebarang penguji.—2 Kor. 4:7-10.

13. Baka ni penerang ti bepelasarka Bup Kudus ti disediaka “ulun ke tetap ati sereta bepenemu-dalam” nulung kitai betan napi penguji?

¹³ Enggau tulung ari Jehovah, “ulun ke tetap ati sereta bepenemu-dalam” nyediaka mayuh artikel, video sereta musik ke ulih nulung kitai tegap ba pengarap sereta mengkang semak ngagai Jehovah. (Mat. 24:45) Kitai patut ngena semua utai ti disediaka Jehovah ngagai kitai. Baru-baru tu, siku menyadi indu ari Amerika Serikat madahka iya amat beterima kasihka semua penerang ti bepelasarka Bup Kudus. Ku iya: “Sepemanjai 40 taun nyembah Jehovah, pengarap aku udah mayuh kali diuji.” Iya napi mayuh penguji ti besai. Aki iya mati ketegal dilantak kerita ke dibai orang mabuk. Apai indai iya balat sakit lalu mati, lalu iya empu dua kali kena kanser. Nama nulung iya betan? Ku iya nerangka: “Jehovah seruran nyaga aku. Penerang ti bepelasarka Bup Kudus ti disediaka Jehovah nengah ulun ke tetap ati sereta bepenemu-dalam udah nulung aku betan. Ketegal nya aku ulih berasai baka Jop ke madahka: ‘Aku deka majak ngumbai diri nadai penyalah nyentuk ngagai maya aku mati.’”—Jop 27:5.

14. Baka ni Jehovah ngena bala menyadi Kristian nyukung kitai lebuh napi penguji? (1 Tesalonika 4:9)

 ¹⁴ Jehovah udah ngelatih nembiak Iya ngayanka pengerindu sereta ngelantangka ati pangan diri lebuh napi penguji ti ngenusahka ati. (2 Kor. 1:3, 4; bacha 1 Tesalonika 4:9.) Enggau neladan Elihu, bala menyadi Kristian kitai keran deka nulung kitai mengkang tetap ati lebuh napi penusah. (SKR. 14:22) Ambika chunto, peratika baka ni raban gempuru Diane meransang sereta nulung iya mengkang semak ngagai Jehovah pengudah laki iya merinsa ketegal penyakit raya. Ku iya: “Tu amat tusah. Tang dalam timpuh beberapa bulan nya, kami udah ngasaika tulung ari Jehovah ti bepengerindu. Raban gempuru ngereja mayuh utai kena nyukung kami. Bala menyadi ngelawa kami, nelefon kami, sereta merap kami ngambika kami terus betan. Ketegal aku enda nemu deriba, bala menyadi nentuka aku ulih datai begempuru sereta pansut nginjil lebuh aku ulih.” Kitai berasai amat gaga ati laban kitai bisi bala menyadi ti bepengerindu ba raban gempuru!

15. Nama kebuah kitai ulih pechaya kitai ulih betan napi penguji?

¹⁵ Semua kitai deka napi bemacham penguji. Tang baka ke udah dipelajarka kitai, kitai enda napi penguji nya kediri. Baka siku apai ti bepengerindu, Jehovah seruran nyaga sereta ngelindung kitai. Iya semak enggau kitai, sedia ningaka serebana kitai sereta keran deka nyukung kitai. (Isa. 43:2) Kitai yakin, kitai ulih betan napi penguji laban Jehovah udah enggau gerah jari nyediaka semua utai ti diguna kitai kena betan. Iya udah meri kitai peluang ulih besampi, Bup Kudus, mayuh penerang ti bepelasarka Bup Kudus, sereta bala menyadi ti bepengerindu kena nulung kitai ba maya ti tusah.

16. Baka ni kitai ulih mengkang ba baruh jaga sereta lindung Jehovah?

¹⁶ Kitai amat beterima kasih laban kitai bisi Apai ti di serega ke nyaga sereta ngelindung kitai. “Kitai gaga ati ketegal Iya.” (Mas. 33:21) Kitai ulih nunjuk ngagai Jehovah pasal kitai ke beterima kasihka jaga sereta lindung ari Iya enggau ngena semua utai ke udah disediaka Iya kena nulung kitai. Kitai mega patut ngereja begian kitai ngambika ulih mengkang ba baruh jaga Petara. Reti iya, enti kitai enggau naka ulih ngasika Jehovah sereta ngereja utai ti betul ba mata Iya, Jehovah deka nyaga sereta ngelindung kitai belama iya!—1 Pet. 3:12.