1. Nama penguji ke ditapi Josep, lalu nama digaga iya?

 ANAK Jakop, Josep, napi siti penguji ti tusah. Siku indu mai iya tinduk. Indu nya bini tuan iya, Potipar. Josep enggai ngereja utai ti dipinta indu nya. Sekeda orang kemayaharitu engka berunding, ‘Nama kebuah Josep enggai ngereja nya?’ Potipar nadai ba rumah. Nambahka nya, Josep siku ulun ba rumah nya; indu tu ulih ngasuh pengidup iya tusah enti Josep enggai ngereja utai ti dipinta indu nya. Taja pia, Josep terus nulak peminta indu nya. Nama kebuah? Ku iya madahka: ‘Baka ni ku aku tau ngereja utai ti kamah tu, lalu bedosa ngelaban Petara?’—P-kal. 39:7-12.

2. Baka ni Josep nemu pengawa butang nya dosa ba Petara?

² Baka ni Josep nemu Petara ngumbai pengawa butang nya “utai ti kamah”? Adat Moses bisi nyebut “Anang butang.” Tang adat nya semina diberi ngagai orang Israel kira-kira dua ratus taun udah nya. (P-sut. 20:14) Taja pia, Josep nemu asai ati Jehovah pasal pengawa butang. Ambika chunto, Josep tentu nemu Jehovah ngepunka pengawa tikah entara siku lelaki enggau siku indu. Lalu iya tentu bisi ninga pasal chara Jehovah ngelindung ini ichit iya Sarah ngambika Sarah ulih mengkang tetap ati ngagai laki iya. Enggau chara ti sama,  Petara ngelindung bini Isak, Rebekah. (P-kal. 2:24; 12:14-20; 20:2-7; 26:6-11) Seraya Josep belematika utai nya, iya nemu nama utai ti betul sereta salah ba mata Petara. Ketegal Josep rinduka Jehovah, iya keran deka ngereja utai ti dikedekaka Jehovah kereja iya.

3. Nama deka dikerandauka kitai dalam artikel tu?

³ Kati nuan rinduka pengelurus? Nuan tentu rindu. Tang semua kitai enda sempurna, lalu enti kitai enda bejimat, runding dunya pasal pengelurus ulih ngachau kitai. (Isa. 5:20; Rom. 12:2) Nyadi, kitai deka bejuraika nama reti pengelurus sereta baka ni kitai tau bulih penguntung lebuh kitai ngereja utai ti lurus. Udah nya, kitai deka berandauka tiga chara kitai ulih ngemansangka pengerindu kitai ngagai standard Jehovah.

4. Nama runding ti salah ke dikembuan mayuh orang pasal pengelurus?

⁴ Lebuh orang berunding pasal siku orang ti lurus, sida ngumbai orang nya sumbung, rindu ngakim orang bukai, sereta ngumbai diri manah agi ari orang bukai. Tang Petara enda rinduka sifat nya. Lebuh Jesus ba dunya, iya ngutuk bala tuai pengarap laban sida netapka standard pengelurus kediri empu. (P-jar. 7:16; Luk. 16:15) Orang ke ngereja utai ti lurus ba mata Jehovah enda ngumbai diri manah agi ari orang bukai.

5. Nitihka Bup Kudus, nama reti pengelurus? Beri sekeda chunto.

⁵ Pengelurus nya sifat ti manah. Pandakka jaku, reti pengelurus nya ngereja utai ti betul ba mata Petara Jehovah. Dalam Bup Kudus, leka jaku pengelurus mai reti idup sejalai enggau standard ti pemadu tinggi, iya nya standard Jehovah. Ambika chunto, Jehovah meri pesan ngambika bala penyual ngena “timbang enggau penyukat ti betul.” (U-dat. 25:15) Nya alai, orang Kristian ti deka nyadi lurus ba mata Jehovah patut lurus ba semua pengawa dagang iya. Orang ti rinduka pengelurus mega enda rindu lebuh meda orang bukai diintu enggau chara ti enda lurus. Lalu, kena “ngelantangka ati [Jehovah] enggau pengabis iya,” orang ti lurus patut beratika runding Petara pasal pemutus ti digaga iya.—Kol. 1:10.

6. Nama kebuah kitai ulih andalka standard Jehovah bekaul enggau utai ti betul sereta salah? (Isaiah 55:8, 9)

⁶ Bup Kudus madahka Jehovah nya Pun pengelurus. Nya kebuah Iya dikumbai “endur alai pengelurus diau.” (Jer. 50:7, NWT) Ketegal Jehovah nempa semua utai, Iya siku aja ke bisi hak nentuka nama utai ti betul sereta salah. Ketegal kitai enda sempurna, kitai enda ulih nemu nama utai ti betul sereta salah. Tang ketegal Jehovah sempurna, Iya tentu nemu nama utai ti betul sereta salah. (J-lam. 14:12; bacha Isaiah 55:8, 9.) Taja pia, ketegal kitai ditempa neladan gamal Petara, kitai ulih idup nitihka standard pengelurus Iya. (P-kal. 1:27) Lalu kitai rindu ngereja nya. Pengerindu kitai ngagai Apai kitai meransang kitai bebendar neladan Iya.—Eps. 5:1.

7. Nama kebuah kitai begunaka standard ti ulih dikearapka? Padahka siti sempama.

⁷ Kitai tau bulih penguntung lebuh nitihka standard Jehovah bekaul enggau utai ti betul sereta salah. Kati nuan nemu nama kebuah iya? Gambarka enti tiap iti bank bisi standard sida empu pasal chara nentuka rega duit. Tu tentu ngasuh penyarut nyadi. Lalu gambarka enti lutur tauka indu misi enda nitihka iring ti nyemetak pasal chara ngintu pesakit. Sekeda pesakit tentu mati. Endang amat, standard ti ulih dikearapka deka nyaga  kitai. Baka nya mega, standard Jehovah bekaul enggau utai ti betul sereta salah deka nyaga kitai.

8. Nama berekat ti deka diterima sida ti rindu ngereja utai ti betul?

⁸ Jehovah merekatka orang ti nguji idup nitihka standard Iya. Iya besemaya: “Orang ke lurus deka bempu menua tu lalu diau ditu belama iya.” (Mas. 37:29) Ulih nuan ngambarka penyerakup, pemaik, sereta pengaga ati ke deka diasaika lebuh semua orang nitihka standard Jehovah? Jehovah dekaka nuan bisi pengidup ti baka nya. Tentu amat, semua kitai bisi kebuah rinduka pengelurus! Baka ni kitai ulih ngemansangka agi pengerindu kitai ngagai sifat tu? Aram beratika tiga chara kitai ulih ngereja nya.

9. Nama deka nulung kitai rinduka pengelurus?

⁹ Chara 1: Rinduka Jehovah ke netapka standard nya. Kena rinduka pengelurus, kitai patut rindu agi ke Jehovah ti netapka standard bekaul enggau utai ti betul sereta salah. Dalam agi pengerindu kitai ngagai Jehovah, kitai deka keran agi idup nitihka standard pengelurus Iya. Kena ngambarka tu: Enti Adam seduai Awa rinduka Jehovah, seduai iya tentu ngasika Jehovah.—P-kal. 3:1-6, 16-19.

10. Nama digaga Abraham ngambika ulih meretika agi runding Jehovah?

¹⁰ Kitai tentu enggai ngereja penyalah ti sama baka Adam seduai Awa. Kitai ulih nyeliahka nya enti kitai terus belajar pasal Jehovah, rinduka sifat Iya, sereta nguji meretika chara Jehovah berunding. Enti kitai ngereja nya, kitai deka rindu agi ngagai Jehovah. Perundingka chunto Abraham. Iya amat rinduka Jehovah. Taja pan bisi maya iya Abraham tusah meretika pemutus Jehovah, tang iya enda ngelaban. Iya nguji meretika Jehovah enggau dalam agi. Ambika chunto, lebuh iya nemu pasal pemutus Jehovah ke deka ngerusak Sodom enggau Gomorah, Abraham terubah iya takut enggaika “Hakim ke ngakim semua dunya” ngerusak orang ti manah lebuh iya ngerusak orang ti jai. Ba Abraham, utai nya enda masuk akal. Nyadi iya enggau baruh ati nanya Jehovah beberapa iti tanya. Jehovah enggau sabar nyaut iya. Pengujung iya, Abraham nyau sedar Jehovah beratika ati tiap iku orang lalu Iya enda ngukum orang ti manah lebuh Iya ngerusak orang ti jai.—P-kal. 18:20-32.

11. Baka ni Abraham ngayanka diri rindu sereta arapka Jehovah?

¹¹ Ati Abraham balat ditegu pengudah berandau enggau Jehovah pasal Sodom enggau Gomorah. Iya tentu rindu sereta bebasaka Apai iya lebih agi ari suba. Tang betaun udah nya, Abraham napi siti situasi ke ngasuh iya tusah deka pechayaka Jehovah. Jehovah ngasuh Abraham munuh anak ti dikesayauka iya, Isak. Tang diatu, Abraham ngelala agi Petara. Nya alai, iya nadai mayuh tanya. Abraham terus nyediaka perengka kena ngereja utai ti diasuh Jehovah. Taja pia, gambarka penusah ba ati Abraham lebuh iya benung besedia! Abraham tentu berunding enggau dalam pasal utai ti udah dipelajarka iya pasal Jehovah. Iya nemu Jehovah enda ngereja utai ti enda lurus tauka enda bepengerindu. Nitihka rasul Paul, Abraham berunding, Jehovah tentu ulih ngangkatka idup baru anak ti dikesayauka iya Isak. (Heb. 11:17-19) Nambahka nya, Jehovah udah besemaya Isak deka bisi mayuh peturun. Tang maya nya, Isak bedau bisi anak. Abraham rinduka Jehovah, nyadi iya arapka Apai iya deka seruran ngereja utai ti betul. Taja pan  nya tusah, pengarap Abraham meransang iya ngasi.—P-kal. 22:1-12.

12. Baka ni kitai ulih neladan Abraham? (Masmur 73:28)

¹² Baka ni kitai ulih neladan Abraham? Baka Abraham, kitai patut terus belajar pasal Jehovah. Seraya kitai ngereja nya, kitai deka majak semak sereta rindu agi ke Iya. (Bacha Masmur 73:28.) Penemu ati kitai deka dilatih kena ngayanka runding Petara. (Heb. 5:14) Asil iya, lebuh orang nguji mai kitai ngereja utai ti salah, kitai deka nulak. Kitai enggai ngereja sebarang utai ti deka ngemediska ati Apai kitai lalu ngerusakka kaul kitai enggau Iya. Nama chara bukai kitai ulih ngayanka diri rinduka pengelurus?

13. Baka ni kitai ulih ngemansangka pengelurus? (Jaku Dalam 15:9)

¹³ Chara 2: Ninting hari, uji ngemansangka pengerindu ngagai pengelurus. Enti kitai deka bisi tubuh ti gerai sereta kering, kitai patut bebendar sesais ninting hari. Pia mega, kitai begunaka usaha ti besai kena ngemansangka pengerindu kitai ngagai standard Jehovah. Tu ulih dikereja nuan ninting hari. Jehovah nya munasabah, lalu Iya enda minta kitai ngereja utai ti lebih ari ke ulih dikereja kitai. (Mas. 103:14) Jehovah madahka Diri “rinduka orang ke ngereja utai ti ngena.” (Bacha Jaku Dalam 15:9.) Enti kitai benung nguji nyapai siti juluk ati ba pengawa ke Jehovah, kitai deka ngereja mayuh pengawa kena nyapai iya. Baka nya mega enggau ngereja pengelurus. Lalu Jehovah deka enggau sabar nulung kitai belubah-lubah mansang.—Mas. 84:5, 7.

14. Nama nya “terabai dada pengelurus,” lalu nama kebuah kitai begunaka nya?

¹⁴ Jehovah enggau bepengerindu ngingatka kitai, ngereja utai ti betul ba mata Iya nya enda tusah. (1 Jhn. 5:3) Lalu nya deka nyaga kitai. Kitai begunaka standard Jehovah kena nyaga kitai ninting hari. Kingatka pasal kereban perang ti dipadah rasul Paul. (Eps. 6:14-18) Ni bagi kereban perang ke ngelindung ati siku soldadu? “Terabai dada pengelurus” ke ngambarka standard pengelurus  Jehovah. Terabai dada ti amat ulih nyaga ati kitai. Baka nya mega, standard pengelurus Jehovah ulih nyaga pengingin, emosi, enggau runding kitai. Nya kebuah amat penting kitai nentuka kereban perang kitai bisi terabai dada pengelurus!—J-lam. 4:23.

15. Baka ni nuan ulih ngena terabai dada pengelurus?

¹⁵ Baka ni nuan ulih ngena terabai dada pengelurus? Nuan ulih ngereja nya enggau berunding pasal utai ti dikedekaka Petara kereja nuan ba tiap pemutus ke digaga nuan ninting hari. Lebuh berunding pasal utai ti dikerandau, musik ke didinga, utai ti dipeda, tauka bup ke dibacha, tanya diri empu: ‘Nama utai ke deka tama ngagai ati aku? Kati utai tu dikerinduka Jehovah? Tauka kati utai tu ngemansangka utai ti dikumbai Jehovah enda lurus baka ulah ti kamah, mangah, amu, sereta berundingka diri empu?’ (Plp. 4:8) Enti pemutus ke digaga nuan sejalai enggau peneka Jehovah, nuan deka nejuka standard pengelurus Iya nyaga ati nuan.

16-17. Baka ni Isaiah 48:18 ngasuh kitai andal kitai ulih idup nitihka standard Jehovah belama iya?

¹⁶ Kati nuan kala irau sekalika nuan ulih terus idup nitihka standard Jehovah nyentukka belama iya? Perundingka sempama ti dikena Jehovah ke ditulis ba Isaiah 48:18. (Bacha.) Jehovah besemaya pengelurus kitai ulih nyadi “baka gelumbang ti ngalun ngagai tebing.” Gambarka nuan benung bediri ba tebing tasik lalu meda gelumbang ti benung ngalun ngagai tebing. Nuan berasai lantang maya nya. Tang, kati nuan kala irau sekalika gelumbang nya deka ngetu ngalun ngagai tebing? Enda! Nuan nemu gelumbang nya udah ngalun ngagai tebing pengelama beribu taun, lalu iya deka terus ngalun ngagai tebing.

¹⁷ Pengelurus nuan mega ulih nyadi baka gelumbang ba tasik! Baka ni? Lebuh nuan patut ngaga pemutus, perundingka dulu nama utai ti dikedekaka Jehovah kereja nuan. Udah nya, kereja meh iya. Enda ngira sekalika pemutus nya tusah tauka enda, Apai nuan ti bepengerindu seruran deka meri nuan pengering sereta nulung nuan terus ngereja utai ti betul tiap hari.—Isa. 40:29-31.

18. Nama kebuah kitai patut badu agi ngakim orang nitihka standard kitai empu?

¹⁸ Chara 3: Awakka Jehovah ngakim. Kitai bebendar nguji ngereja utai ti dikedekaka Jehovah kereja kitai. Tang, kitai enda patut mandingka utai ti dikereja kitai enggau orang bukai lalu ngumbai diri manah agi ari orang bukai. Kitai nadai hak nentuka sekalika orang bukai benung ngereja utai ti dikedekaka Jehovah kereja sida. Kitai patut ingat, Jehovah meh “Hakim ke ngakim semua dunya.” (P-kal. 18:25) Jehovah enda ngasuh kitai ngakim orang bukai. Kebendar iya, Jesus meri pesan tu: “Badu agi ngakim ngambika kita enda diakim.”—Mat. 7:1. b

19. Baka ni Josep ngayanka diri arapka pengawa ngakim ari Jehovah?

¹⁹ Perundingka baru pasal teladan Josep ti tetap ati. Iya nyeliahka diri ari ngakim orang bukai, indah sida ke jai ulah enggau iya. Bala menyadi Josep ngemediska iya, nyual iya nyadi ulun, sereta ngasuh apai sida pechaya Josep udah mati. Betaun udah nya, Josep betemu baru enggau diri sebilik iya. Diatu Josep siku pemerintah ti bekuasa. Iya ulih ngakim bala menyadi iya sereta malas  dendam. Taja pan bala menyadi Josep amat udah nesal ati, tang sida agi takut enggaika Josep ngereja utai nya. Tang, Josep madah ngagai sida: ‘Anang takut. Aku enda nemu ngaga diri nyadi Petara.’ (P-kal. 37:18-20, 27, 28, 31-35; 50:15-21) Josep enggau baruh ati ngawakka Jehovah ngakim.

20-21. Baka ni kitai ulih nyeliah ari ngumbai diri manah agi ari orang bukai?

²⁰ Baka Josep, kitai ngawakka Jehovah ngakim. Ambika chunto, kitai enda ngumbai diri nemu utai ke ngasuh bala menyadi kitai ngereja sesiti utai. Kitai enda ulih macha ati orang; semina ‘Jehovah Empu ke meresa juluk ati.’ (J-lam. 16:2) Iya rinduka semua macham orang, enda ngira nama bansa tauka adat sida. Lalu Jehovah meransang kitai: “Tukangka meh ati [kitai] enggau besai.” (2 Kor. 6:13) Kitai bebendar nguji rinduka semua bala menyadi kitai, ukai ngakim sida.

²¹ Tu mega reti iya kitai enda ngakim sida ke ukai Saksi. (1 Tim. 2:3, 4) Kati nuan deka ngakim siku kaban belayan ke ukai Saksi, lalu madah, “Nadai jaku iya nya deka tama pemendar”? Tentu enda. Nya nunjukka nuan ngenemuka diri sereta ngumbai diri manah agi ari orang bukai. Jehovah agi benung meri “semua orang ba serata endur” peluang nesal ati. (SKR. 17:30) Kingatka meh, ba Jehovah, orang ke enda lurus nya orang ke ngumbai diri manah agi ari orang bukai.

22. Nama kebuah nuan deka terus rinduka pengelurus?

²² Pengerindu kitai ngagai standard pengelurus Jehovah deka ngasuh kitai gaga ati lalu nulung kitai nyadi teladan ti manah ngagai orang bukai ngambika sida ulih rindu agi ke kitai sereta Petara Jehovah. Awakka semua kitai enda ngetu “keranka pengelurus.” (Mat. 5:6) Andal meh, Jehovah beratika usaha nuan sereta gaga ati seraya nuan nguji bebendar ngereja utai ti betul. Orang ba dunya tu majak enda lurus. Tang andal sereta ingat meh, Jehovah “rinduka bala nembiak Iya ke lurus.”—Mas. 146:8.