1. Nitihka 1 Tesalonika 5:11, nama patut digaga semua kitai?

 KATI raban gempuru nuan kala niri tauka ngaduka baru Palan Gempuru? Enti pia, nuan tentu agi ingat kali keterubah nuan begempuru ba endur ti baru nya. Nuan amat beterima kasih ngagai Jehovah. Kebendar iya, nuan engka kelalu gaga ati nyentukka nuan nyauka nyabak sereta enda ulih belaguka lagu pemuka. Tang kitai ulih mai mulia ti besai agi ngagai Jehovah enti kitai ngereja siti agi pengawa. Pengawa tu berega agi ari nirika bengunan. Pengawa nya bisi kaul enggau orang ke datai ngagai endur sembiang kitai. Rasul Paul ngena siti leka jaku ke mega ulih mai reti “nirika” kena madahka, kitai patut meransang pangan diri baka ke disebut ba ayat tema kitai, 1 Tesalonika 5:11.—Bacha.

2. Nama deka dikerandauka kitai dalam artikel tu?

² Rasul Paul nya teladan ti amat manah bekaul enggau meransang sereta negapka pengarap bala menyadi. Iya ngayanka pengibuh ngagai sida. Dalam artikel tu, kitai deka berandauka chara iya nulung bala menyadi Kristian (1) tan napi penusah, (2) bebaik enggau pangan diri, sereta (3) negapka pengarap sida ngagai Jehovah. Aram meh meda chara kitai ulih neladan iya lalu meransang bala menyadi kemayaharitu.—1 Kor. 11:1.

3. Nama runding ti seimbang ke dikembuan Paul?

³ Paul amat sayauka bala menyadi iya. Iya empu kala napi penusah. Nya alai, iya ulih ngayanka penyinu sereta pengibuh ngagai  bala menyadi bukai lebuh sida napi penusah. Bisi sekali, Paul nadai agi duit lalu patut ngiga kereja kena melanja diri empu sereta bala menyadi bukai. (SKR. 20:34) Iya gawa ngaga langkau kain. Lebuh iya datai ngagai Korint, terubah iya Paul gawa enggau Akuila seduai Prisila ke mega gawa ngaga langkau kain. Tang “ninting Hari Sabat,” iya nginjil ngagai orang Judah sereta orang Gerika. Udah nya, lebuh Silas enggau Timoti datai dia, “Paul ngena mayuh awak ngerembaika jaku Petara.” (SKR. 18:2-5) Paul enda kala enda ingat pasal tuju ti pemadu penting ba pengidup iya, iya nya nyembah Jehovah. Ketegal Paul netapka teladan ti manah bekaul enggau bebendar gawa ba pengawa nginjil sereta ngintu utai ti diguna diri empu, iya ulih meransang bala menyadi Kristian. Bala menyadi Kristian bisi napi mayuh penanggul ba pengidup sereta patut ngintu diri sebilik, tang Paul ngingatka sida ngambika enda nejuka utai tu ngasuh sida enda ingat pasal “utai ke beguna agi,” iya nya sembah ngagai Jehovah.—Plp. 1:10.

4. Baka ni Paul enggau Timoti nulung bala menyadi tan natka perinsa?

⁴ Enda lama pengudah raban gempuru ba Tesalonika ditumbuhka, bala menyadi ti baru ba dia napi perinsa ti balat. Lebuh seraban orang ti jai enda tegigaka Paul seduai Silas, sida lalu ngirit “beberapa iku menyadi ngagai bala pemerintah nengeri nya.” Seraban orang ti jai nya manjung: “Semua sida tu ngelaban perintah raja Rome.” (SKR. 17:6, 7) Ulih nuan ngambarka asai ati bala menyadi Kristian ti baru nya lebuh sida nemu orang ba nengeri nya begedika sida? Sida tentu amat tekenyit sereta takut. Sida engka kurang agi ransing ba pengawa ke Jehovah. Tang Paul enggai utai tu nyadi. Taja pan iya enggau Silas patut ninggalka endur nya, seduai iya nentuka raban gempuru ti baru nya mengkang dijaga. Paul ngingatka bala menyadi ba Tesalonika: “[Kami] nganjung Timoti ngagai kita. Iya menyadi kitai . . . Kami nganjung iya ngambika iya negapka kita sereta ngelantangka ati kita, ngambika pengarap kita nyadi kering.” (1 Tes. 3:2, 3) Timoti engka udah kala napi perinsa ba menua iya empu, iya nya ba Listra. Iya udah meda chara Paul meransang bala menyadi dia. Ketegal iya udah meda sukung ke diberi Jehovah, Timoti ulih ngasuh bala menyadi Kristian ti baru nya andal semua utai ke ditapi sida deka berubah nyadi manah magang.—SKR. 14:8, 19-22; Heb. 12:2.

5. Baka ni siku menyadi lelaki ke benama Bryant bulih penguntung ari tulung ke diberi siku tuai gempuru?

⁵ Nama chara bukai ke dikena Paul negapka bala menyadi Kristian? Lebuh Paul enggau Barnabas pulai baru ngagai Listra, Ikonium, enggau Antiok, seduai iya “milih bala tuai gempuru ke tiap iti raban gempuru.” (SKR. 14:21-23) Bala tuai gempuru nya tentu ngelantangka ati bala menyadi Kristian ba raban gempuru, sama baka bala tuai gempuru kemayaharitu. Peratika utai ke dipadah siku menyadi lelaki ke benama Bryant: “Lebuh aku beumur 15 taun, apai aku ninggalka kami sebilik lalu indai aku dibuai ari gerempung. Aku berasai kediri sereta asa ati.” Nama nulung Bryant napi maya ti tusah nya? Ku iya: “Siku tuai gempuru ke benama Tony, berandau enggau aku ba gempuru sereta ba maya bukai. Iya madah ngagai aku pasal orang bukai ke napi penusah tang sida agi mengkang gaga ati. Iya bekunsi enggau aku ayat ba Masmur 27:10 sereta suah bejaku pasal Hesekiah ke mengkang tetap ati taja pan apai iya ukai chunto ti manah.” Baka ni sukung tu nulung Bryant? Ku Bryant agi: “Ketegal peransang ari Tony, aku nyau berengkah gawa penuh jam ke Jehovah.” Bala tuai gempuru, peratika meh sereta tulung bala menyadi ke begunaka sukung  baka Bryant. Sida engka begunaka “jaku ti siru” ke ulih meransang sida.—J-lam. 12:25.

6. Baka ni Paul ngena cherita pengidup orang bukai meransang bala menyadi Kristian?

⁶ Paul ngingatka bala menyadi Kristian pasal “mayuh amat saksi ke baka remang” ke udah mujur napi penusah laban Jehovah meri sida pengering. (Heb. 12:1) Paul nemu cherita pengidup orang kelia ke udah mujur napi semua macham penusah ulih nulung bala menyadi Kristian iya ngembuan pengarap sereta nulung sida terus fokus ba “nengeri Petara ti idup.” (Heb. 12:22) Sama mega kemayaharitu, semua kitai tentu udah ditegapka lebuh macha pasal chara Jehovah nulung Gideon, Barak, David, Samuel, enggau mayuh agi orang bukai. (Heb. 11:32-35) Pia mega enggau teladan ti manah kemayaharitu. Ba indu opis, kitai suah nerima surat ari bala menyadi Kristian ke udah ditegapka ba pengarap pengudah sida macha pasal cherita pengidup bala penyembah Jehovah kemayaharitu.

7. Nama ulih dipelajarka nuan ari jaku lalau Paul ke ditulis ba Rome 14:19-21?

⁷ Kitai meransang bala menyadi Kristian lebuh kitai bejaku sereta ngereja utai ti ngemansangka pemaik dalam raban gempuru. Kitai enda ngelakka runding ti enda sama nyeraraka kitai. Kitai enda bekeras enggau penemu sereta runding diri empu enti utai nya enda ngelanggar prinsip Bup Kudus. Peratika siti chunto. Raban gempuru ba Rome bisi orang Kristian bansa Judah enggau bansa bukai. Lebuh Adat Moses enda agi dikena, bala penyembah Jehovah enda ibuh agi ngasika adat pasal sekeda pemakai ke enda ulih diempa. (Mrk. 7:19) Berengkah ari maya nya, sekeda orang Kristian bansa Judah bibas makai semua macham pemakai. Tang bisi mega orang Kristian bansa Judah kebukai ke ngasaika nya salah enti makai pemakai ke baka nya. Raban gempuru bepechah-belah ketegal isu nya. Paul madahka, pemaik patut ditanka lalu iya madah: “Manah agi enda makai dagin tauka ngirup wain tauka ngereja nama-nama utai ke ngasuh pengarap menyadi kita lemi.” (Bacha Rome 14:19-21.) Paul nulung bala menyadi iya meda penusah ke ulih nyadi ngagai bala menyadi Kristian sereta semua raban gempuru enti bisi laya ke baka nya nyadi. Iya mega sanggup ngubah ulah diri ngambika enda ngasuh pengarap orang bukai nyadi lemi. (1 Kor. 9:19-22) Kitai mega ulih negapka orang bukai sereta ngetanka pemaik enti kitai enda bekelikuh enggau pangan diri pasal utai ke bekaul enggau pemutus diri empu.

8. Nama digaga Paul lebuh bisi isu ti besai ke ngachau pemaik ba raban gempuru?

⁸ Paul netapka teladan ti manah bekaul enggau ngetanka pemaik lebuh orang enda sepenemu enggau pekara ti penting. Ambika chunto, sekeda bala menyadi dalam raban gempuru abad keterubah bekeras madahka, orang ukai bansa Judah ke nyadi orang Kristian patut disunat ngambika orang Judah enda ngutuk sida. (Gal. 6:12) Paul enda setuju enggau runding nya. Tang ari ke bekeras enggau runding iya empu, Paul enggau baruh ati minta jaku lalau ari bala rasul sereta tuai gempuru ba Jerusalem. (SKR. 15:1, 2) Ketegal chara Paul mutarka penanggul nya, iya nulung bala menyadi Kristian terus ngetanka pengaga sereta pemaik ba raban gempuru.—SKR. 15:30, 31.

9. Baka ni kitai ulih neladan Paul?

⁹ Enti bisi pekara ti serius ke patut diputarka, kitai ngemansangka pemaik lebuh ngiga  iring ari orang ke dipilih Jehovah kena nyaga raban gempuru. Kesuah iya, iring ti bepelasarka Bup Kudus ulih ditemu ba litaricha kitai tauka utai bukai ke disediaka gerempung Jehovah. Enti kitai bebendar nitihka iring tu ari ke ngemansangka penemu diri empu, kitai deka ngemansangka pemaik ba raban gempuru.

10. Nama agi digaga Paul kena ngemansangka pemaik ba raban gempuru?

¹⁰ Paul ngemansangka pemaik lebuh iya madahka sifat ti positif pasal bala menyadi Kristian, ukai utai ti negatif pasal sida. Ambika chunto, ba ujung surat iya ke nuju ngagai bala menyadi ba Rome, Paul bisi nyebut nama mayuh orang. Lalu, kesuah iya Paul mega madah utai ti positif tauka utai ti bekaul enggau orang nya empu. Kitai ulih neladan Paul enggau nyebut pasal sifat manah bala menyadi Kristian kitai. Enggau nya, kitai deka ngerapatka agi kaul sereta ngenalamka agi pengerindu entara bala menyadi ba raban gempuru.

11. Baka ni kitai ulih ngemansangka pemaik lebuh bisi penanggul nyadi?

¹¹ Bisi maya iya, orang Kristian ti tegap ba pengarap mega engka enda sepenemu tauka belaya enggau pangan diri. Nya meh utai ti nyadi ngagai Paul enggau bakih iya Barnabas. Seduai iya enda sepenemu sekalika patut mai Mark ba pejalai seduai iya ti deka datai. Seduai iya “balat belaya” lalu beserara ari pangan diri. (SKR. 15:37-39) Tang Paul, Barnabas, enggau Mark mutarka penanggul nya lalu bebaik enggau pangan diri. Tu nunjukka sida beberatka agi pemaik sereta penyerakup ba raban gempuru. Udah nya, Paul bisi nyebut utai ti manah pasal Barnabas enggau Mark. (1 Kor. 9:6; Kol. 4:10) Kitai mega patut mutarka sebarang laya ke engka dikembuan kitai enggau bala menyadi ba raban gempuru lalu terus befokus ba sifat manah sida. Enggau nya, kitai deka ngemansangka pemaik sereta penyerakup.—Eps. 4:3.

12. Nama sekeda penanggul ke ditapi bala menyadi Kristian kitai?

¹² Kitai meransang bala menyadi Kristian kitai lebuh kitai negapka pengarap sida ngagai Jehovah. Sekeda ari sida dikelese diri sebilik ke enda sama pengarap tauka orang ke sama gawa, tauka orang ke sama sekula enggau sida. Kebukai benung napi penanggul ba pengerai tauka belaban enggau asai ati ti negatif. Bisi mega bala menyadi Kristian ke udah betaun-taun dibaptisa lalu udah nganti lama ngambika sistem dunya tu dirusakka. Situasi ke baka tu ulih nguji pengarap bala menyadi Kristian kemayaharitu. Bala menyadi ba raban gempuru abad keterubah mega napi penanggul ti sama. Nama digaga Paul kena negapka pengarap bala menyadi Kristian iya?

13. Baka ni Paul nulung sida ke dikelese ketegal pengarap sida?

¹³ Paul ngena ayat Bup Kudus negapka pengarap bala menyadi Kristian. Ambika chunto, orang Kristian bansa Judah engka berasai tusah deka nyaut kelese ari diri sebilik ke enda arap ti madahka, pengarap orang Judah manah agi ari pengarap orang Kristian. Surat Paul ti nuju ngagai orang Hebrew tentu udah negapka sida. (Heb. 1:5, 6; 2:2, 3; 9:24, 25) Chara Paul nerangka utai ulih nulung sida nemu chara nyaut jaku kelese ari diri sebilik ke enda arap. Kemayaharitu, kitai ulih nulung bala menyadi Kristian kitai ke napi kelese ngambika ngena litaricha ti bepelasarka Bup Kudus kena nerangka kebuah sida arap. Lalu enti bala nembiak dikelese ketegal pechayaka semua utai idup ditempa magang, kitai ulih nulung sida ngiga penerang  ba laman web jw.org. ba baruh topik Kati Tu Ditempa? enggau Evolusi tauka Utai ti Ditempa kena nunjukka kebuah sida pechaya semua utai idup ditempa magang.

14. Taja pan Paul sibuk nginjil sereta ngajar, tang nama utai ti dikereja iya?

¹⁴ Paul meransang bala menyadi Kristian ngayanka pengerindu sereta “ngereja utai ti manah.” (Heb. 10:24) Iya ukai semina nulung bala menyadi Kristian nengah utai ti dipadah iya, tang mega nengah utai ti dikereja iya. Ambika chunto, lebuh bala menyadi ba Judea napi lapar pungkang, Paul mai sekeda utai ti diguna sida. (SKR. 11:27-30) Pia mega, taja pan Paul sibuk nginjil sereta ngajar, tang iya seruran ngiga chara kena nulung bala menyadi ke seranta. (Gal. 2:10) Enggau ngereja nya, Paul negapka pengandal bala menyadi iya ngagai Jehovah ke deka ngintu sida. Kemayaharitu, lebuh kitai meri awak, pengering, sereta pengelandik nulung maya bencana alam nyadi, kitai mega negapka pengarap bala menyadi Kristian. Kitai mega ulih ngereja tu lebuh kitai enggau tetap meri duit pemeri ngagai pengawa sedunya. Nengah chara tu sereta chara bukai, kitai ulih nulung bala menyadi Kristian andal, Jehovah enda kala deka ninggalka sida.

15-16. Nama patut digaga kitai ngagai sida ke lemi ba pengarap?

¹⁵ Paul terus meransang sida ke lemi ba pengarap. Iya ngayanka penyinu ngagai sida sereta bejaku enggau chara ti nelap sereta positif. (Heb. 6:9; 10:39) Ambika chunto, dalam surat iya ti nuju ngagai bala menyadi Hebrew, iya suah ngena leka jaku “kitai.” Tu nunjukka Paul nemu, iya empu patut nitihka jaku lalau ke diberi iya. (Heb. 2:1, 3) Baka Paul, kitai terus meransang sida ke lemi ba pengarap. Kitai negapka sida enggau ngayanka pengibuh ngagai sida. Nengah chara tu, kitai nunjukka diri amat rinduka  sida. Chara kitai bejaku ulih ngasuh utai ti disebut kitai nya manah agi didinga sereta ulih meransang bala peninga kitai.

¹⁶ Paul ngasuh bala menyadi Kristian andal pasal Jehovah ke nemu semua pengawa ti manah ke udah dikereja sida. (Heb. 10:32-34) Kitai ulih ngereja utai ti sama lebuh nulung bala menyadi Kristian ke lemi ba pengarap. Kitai ulih nanya iya pasal chara iya tetemuka pemendar, tauka meransang iya ngenang baru maya iya nerima sukung ari Jehovah. Kitai ulih ngena peluang nya ngasuh menyadi nya andal pasal Jehovah ke seruran ingatka chara menyadi nya ngayanka pengerindu ngagai Jehovah suba, lalu andal Jehovah enda kala ninggalka iya ba jemah ila. (Heb. 6:10; 13:5, 6) Randau ke baka tu engka meransang menyadi Kristian tu ngambika terus gawa ke Jehovah.

17. Nama pengelandik ke patut terus dikemansangka kitai?

¹⁷ Siku pekereja ke nirika bengunan patut terus ngemanahka agi pengelandik iya. Baka nya mega, kitai ulih ngemanahka agi pengelandik kitai kena negapka bala menyadi. Kitai ulih nulung orang bukai bulih pengering kena tan napi penusah lebuh kitai bekunsi enggau sida pasal teladan orang ke udah tan suba. Kitai ulih ngemansangka pemaik enggau nyebut pasal utai ti manah ke bisi ba orang bukai, ngetanka pemaik lebuh bisi utai nyadi ke ulih ngachau penyerakup, sereta bebaik enggau pangan diri lebuh bisi laya. Lalu, kitai ulih terus negapka pengarap bala menyadi kitai enggau bekunsika pemendar Bup Kudus ti penting, meri tulung ti praktikal, sereta nyukung sida ke lemi ba pengarap.

18. Nama utai ti keran deka digaga nuan?

¹⁸ Sida ke gawa ba projek teokratik berasai gaga sereta puas ati. Kitai ulih ngasaika pemuas sereta pengaga ba ati lebuh kitai nulung negapka pengarap bala menyadi Kristian kitai. Enda baka bengunan biasa ke nyau kelama nyadi jai, asil ari pengawa kitai deka tan belama iya! Awakka semua kitai bisi pengeran ke deka meransang sereta “negapka pangan diri.”—1 Tes. 5:11.